Keluaran Uram 26

Er Iya Erebdobnyi bisi dama deiboka molon keis ol ai si Kemah Suci deyok

26:1-37

1“Keis ol ai dobkwandim ara aruma yala takubaryi aryi dobkwandum. Ara, namin kaluna lenan tabwe aryi kuruta aling wis bol ab, unduk bol ab, kaluna si kirmizi ab deici asi, aling win nang aryi Malaikat ol atoa kiknibdandoka wibkwandum. Ukuboka wibingnyi ura, a kaluna aryi Keis ol ai dobkwandum. 2Ai don aruma kaluna a nirya kiklina ara barwetam ara 12 meter baryi kikliboka sekwandum. Ba, dumdam tam ara bitinyi meter sekwandum. A ai don kaluna nirya ara kiklina neikto akwe kiklibde sekwandum. 3Aruma amubaryi labaruboka tentok kibkwandum. Ani, ton yuk dinyi ababyi amubaryi laboka tentok akwe kibkwandum. 4Yuma waluboka koubmamunyi dinyi ara tabwe kuruta bol kaluna isibdoba aryi aruma kubkub bitinyi dinyi ab laboka denebkwandum. 5Botobkwamunyi ara yubwa 50 baryi botobkwamandum ati, yuma dinyi botobmaminyi aryok bitinyi dinyi ababyi labaruboka botobkwandum. Ba, botona ara neik dikum wanwanubdeibkwandum. 6Ani, ai aruma yubwa 50 baryi ai aruma asi ton aruma aryi ton aruma dungdongon dikum ara emas aryi dukdongobdankwandum. Ba, ton aruma aryi ton aruma denebci ba, aruma tentok ato kubkwandum.

7Tonda, bisam kambing bol aryi kaluna koklombaryi kiknibminyi ura, Ni ai beterdongona kum ai alib asi kalubdongobkwande. 8A aruma nirya cangtam kiklina ara 13 meter baryi kubci ba, sekwandum. Ba, dumdam tam ara bitinyi meter kubci ura, sekwandum. Aruma koklombaryi ara kiklina neiktoto akwe kubkwandur. 9Aruma amubaryi ara yuk wiboka denebkwandum. Ba, aruma nabaryi ababyi yuk wiboka deibkwandum. Ba, nabaryi dinyi ara wibminci, bitinyi likasuboka dumdam tam asi dobkwandum. 10Yuma aruma koubne asi yubwa 50 baryi botobkwandum. Ba, ton aruma koubne ababyi yubwa 50 baryi botobkwandum. 11Ani, dungdongona yubwa 50 baryi keil tembaga aryi nunubokabmunci, dukoka aruma denebkwandum. Ura, a denebmaminyi dinyi aryi boton bisik asi dukdongobnin yibiminyi ura, tentok kibdobkwandum. 12Ba, sekdoba kablobminyi aruma ara kubkub dolona dongtam kuboka Ni ai keis ol ai asi libkwandum. 13Ani, aruma cang dolobmaci dikum ara kubkub sengdona otam kiklina 50 sentimeter baryi, atam kiklina 50 sentimeter baryi kiboka otam babyi, atam babyi nirya dolobkwetebkwandum. 14Ani, tonda ai aruma ara yim bisam domba kala asi bi bol lubdongoboka alib kalubdongobkwandum. Ani, namin kaluna aryi alib kalubdongobkwandum.

15Ba, tonda Ni ai beterdongona mem ai dobkwaminyi co ara co si penaga loanci co aryi touboka dobkwandum. 16Co las tentok asi kiklina cang ara 4 meter kikliboka yekwandum. Ba, abilinga a nirya ilatam ara kiklina 66 sentimeter baryi kiklibde sekwandum. 17Abilinga tentok ara bing bitinyi labaruboka dakdongobnin binkwandum. 18Ni ai beterdongona mem ai dobkwandim ara me youkwetam kuboka asi abilinga langlang 20 baryi ibkwandum. 19Ura, abilinga 40 baryi ibmaminyi amwetam ara keil perak aryi yangabkwandum. Ani, abilinga tentok amwetam yangabmaminci, bing bitinyi-bitinyi dakdongobmaminyi dikum asi abilinga bitinyi libdongobnin yibinkwandum. 20Ani, Ni ai eitam lumun bitinyi ababyi abilinga 20 baryi yangabkwandum. 21Ara, keil si perak aryi yangabkwandim ara abilinga yangamna tentok ara er yan bitinyi urub tam ton, deyok tam ton kuboka kiknibde binkwandum. Ukubde binaminyi asi abilinga 40 baryi kiknibkwandum. 22Ba, ai dongtam kitingbantam lumun ara abilinga nabaryi ibkwandum. 23Ani, dongtam lumun dikum ara abilinga bitinyi siriktam lumun ton, kwanimtam lumun ton kiknibkwandum. 24A abilinga ibkwamaminyi ara outam bing bitinyi leleboka dakwandum. Ani, eitam ababyi bing bitinyi leleboka dakwandum. Ara, emas toubna dakdongoaminyi dikum asi dakwandum. Ba, a bitinyi abilinga ara ai kubkub sengdona tukwetam aryi kuboka im dub iknin binkwandum. 25Ba, a nirya ara abilinga inbaryi yangabminyi ura, abilinga yan ara perak aryi yan dina-dina dibnin yibinkwandum. A abilinga nirya ara 16 baryi ibkwandum.

26Ani, tonda co si penaga aryi mabdeibnin yibinkwandum. Ton amubaryi ara akai kubkub lumun abilinga dikum asi mabdeibnin yibinkwandum. Ton amubaryi co ara kwanimtam kuboka abilinga dam asi mabdeibnin yibinkwandum. Ton amubaryi co ara siriktam abilinga dam asi mabdeibnin yibinkwandum. 27Ba, mardeiboka kolongna co ara ton amubaryi ara yuk ai deibmunyi ura, ton amubaryi ara Imtamnyi ai kitingbantam kuboka asi kolokwandarur. 28Ura, abilinga kankan noutam kolokmaminyi co ara kwaikwa barimna tikeibde binmaminyi asi sirya bindoka tikeibkwandum. 29Anda abilinga nirya ara emas aryi uk nunuboka denebkwandum. Ani, co kolongna bisik ara toubna kuna emas aryi kiknibminyi ura, kolongna co asi emas aryi deneboka co kolokdeibkwandum. 30Ura, Ni ai beterdongona kum ai si Kemah Suci dobkwaminyi ara mutuk kon dam aryi kansi, ‘Ukubkwandum-ukubkwandum,’ ebdeibse to kunuboka dobkwandum.

31Noutam wilimna dolorkweten aling ara aling win nang aryi tabwe kuruta bol ab, wis bol ab, unduk bol ab, namin kaluna si lenan ab aryi turukdandoka wiboka malaikat atoanun kiknibkwandum. 32Ura, co si penaga abyokomna dumbaryi dub asi diribkwetebkwandum. A abyokomna ara emas aryi deneaminci, emas dibdongoaminyi dikum ara perak yangaboka deneaminya deici asi wilimna kaluna diribkwetebkwandum. 33Akai noutumang wilimna aling kaluna kiknibkwamaminyi ara ai aruma ab deneboka dukdongobnin yibinamingnyi dikum asi biriboka dolobkwetebkwandum. Ura, a kaluna ara, ‘Ukubdarur-ukuna mem,’ en uram deirin co sangkol deiamingnyi ai kan, weik ai kan noutumang bublan dam asi diriboka dolobkwetebkwandum. 34Ura, ‘Ukubdarur-ukuna mem,’ en uram deirin co sangkol ara malyi dinyi beterdongona iya mem ai asi deiboka bublan tirikdongobkwandum. 35Ba, co lamna ara bublan dam ai asi eitam kuboka deibkwandum. Ba, uk ubna yabla ara a co lamna ab ara outam kuboka asi wanwanubdeibkwandum.

36Ani, tonda akai bisik bublan kiknibkwaminyi aling ara tabwe yala bol wis bol ab, kuruta bol ab, unduk bol ab, namin aling lenan ab aryi aling kolo si kermizi kaluna asi tabwe yala turukoka-turukoka wiamingnyi kaluna aryi kiknibkwandum. 37Ani, abyokomna amubaryi co si penaga aryi kiknibminyi ura, kaluna diribdongobkwandum. Ba, a kaluna diribdongobnin yibinkwaminyi co ara emas aryi luboka tikeibnin yibinkwandum. Ura, emas aryi a co denebdongobnin yibinkwandum. Ura, anda abyokomna amubaryi yangamna ara keil si tembaga aryi yangabkwandum.

Currently Selected:

Keluaran Uram 26: MTG

Highlight

Copy

Compare