Keluaran Uram 25

Er Imtamnyi ai, keis ol ai si Kemah Suci dobkwamnyi ati, “Ukuboka dobkwandarur,” ebmou deyok

25:1-9

1Er Iya Erebdobnyi biryi Musa bisi ato ebmou, 2“Sun Israel ninyi asi ebminyi ba, Niti dama yuk wiboka deibmangnyi ani, boyankwanung. Sun kanyatam aryi, ‘Er Iya Erebdobnyi biti dama bulubkwan,’ teneboka wibdeibmangnyi dinyi asi kanci Niti dama boyankwanurum. 3Ba, kanci sunsi moloboka bulubde yibinkwaminyi keica si ara dengna weik keil si emas ab, perak ab, tembaga ab, 4kuruta bol wis bol ab, kaluna kuruta bol ab, unduk bol ab, kaluna si kirmizi ab, kait aling ab, ilab teleb aling ab, bisam kambing bol aling ab asi bulubde yibinkwandum. 5Ani, bisam domba yim kala asi bi bol luamingnya ab, me kwan umbura kurande kam si lumba-lumba kala ab, co si penaga ab bulubde yibinkwandum. 6Tonda, uk ubna ati me dingna me ab, Imtamnyi ai wa in nang asi kisok deici dingna me ab, uk dabingnyi ba, siltong teleb ena ab 7ani, dengna weik keil si krisopras ab, dengna weik keil aryi imam sien nang ongon aling taramtam kuboka limdongon keica si efod kiknin dinyi ab asi bulubde yibinkwandum.

8Nira ai dobmaniminyi ai dam kunkwanun ati, Ni ai beterdongona mem ai dobkwanurum. 9Ni ebman dinyi utotoa nirya kunubkwandum. Ara, ‘Ni ai beterdongona mem ai ato kuboka dobdum,’ ebman dinyi ab, ai don keica si sibman dinyi nirya ab ara kunuboka dobkwandum,” ebmou.

Er Iya Erebdobnyi biryi, “Ukubdarur-ukuna mem,” en uram deirin co sangkol deyok

25:10-22

10“ ‘Ukubdarur-ukuna mem,’ en uram deirin co sangkol kiklina kiknibkwaminyi ara co si penaga aryi kiknibkwandum. Barwetam ara kiklina 110 sentimeter baryi kuboka kiklibkwandum. Ani, co las ila ab, cang tingdeirina ababyi 66 sentimeter baryi uboka mitikanun libdongobkwandum. 11Ukuboka kiknibminyi ura, dengna weik keil si emas tabtabingna kum emas aryi aitam babyi, baitam babyi uk daboka lilibkwandum. Ani, a co sangkol kubkub dina-dina asi emas aryi lilibkwandum. 12Ani, emas aryi toubna dama um atoa dumbaryi kikniboka, a co sangkol er yan tam kuboka urub tam bitinyi, deyok tam kubkub bitinyi kuboka kiknibdeibkwandum. 13Ura, co si penaga aryi maloua kiboka talebobana kiknibminyi ura, emas aryi denebkwandum. 14Ura, sunci a emas toubna kubkub dina-dina kiknibdeibmaminyi bisik asi dongob-dongobkwandum. Ba, aminda a dakdongoaminyi aryi co dongobdongoboka bobinkwanung. 15A talebdongoboka boban co ara ubkaboka yuk dikum deirina mem. Eda, emas toubna umbura iya a dongoblobkwandum.

16Ba, a co sangkol umbura ara Niryi keil kerek sekeibsise uram deibkwandum. 17Ani, a co sangkol alib lilibdongoboka, singibdongobkwaminyi ara keil emas tabtabingna kum emas aryi lilibkwandum. Ara, barwe dina-dina kiklina 110 sentimeter baryi singibdongobkwandum. Ba, dumdam tam ababyi neiktoto kiklina 66 sentimeter baryi akwe singibdongobkwandum. 18-19Ani, kat weik emas aryi keil teikoka malaikat atoa si kerub bitinyi kikniboka a co sangkol bublan ab neika deneboka eitam ton outam ton tikeibkwandum. 20A malaikat atoa kerub bitinyi ara ol tengebdeiboka eitam dinyi outam dinyi urasin a co sangkol bublan noutumang asi wanwanubdeibkwandum.

21A co sangkol umbura ara Niryi, ‘Ukubdarur-ukuna mem,’ eboka keil kerek sekeibsise dinyi bitinyi a umbura deibminyi ura, bublan tirikdongobkwandum. 22Ba, akai umbura aryi kan ab Ni ab erdankwanim. Ba, a co sangkol deici malaikat atoa kerub bitinyi ol dina-dina lakanca noutam aryi Niryi kansi uram enkwankin. Ba, kanci kuboka sun Israel nang asi erkarenkwandim,” ebmou.

Er Imtamnyi biti yina roti kwaning deirin co lamna deyok

25:23-30

23“Ani, ton ebkun ara co lamna kiknibkwaminyi ara co si penaga aryi kiknibkwandum. A kiknibkwaminyi kiklina ara barwe dinatam-dinatam nirya 88 sentimeter baryi kikliboka sekwandum. Ba, dumdam eitam-outam kiklina ara 44 sentimeter baryi kikliboka sekwandum. Ba, tiknirwelen tam ara kiklina ara 66 sentimeter baryi kikliboka sekwandum. 24Ani, emas kobdob tabtabingna kum emas aryi a co lamna kubkub sengdona dina-dina ababyi nirya libkwandum. 25Ani, a co las kubkub dina-dina biriman ara bukamto kuboka sibarya erebdeibkwandum. A sibarya dangdang kiklina ara 7,5 sentimeter baryi kikliboka sekwandum. Ura, emas aryi liliboka denebkwandum. 26Ba, a co lamna kiknibmaminya asi emas toubna dama atoa aryi kubkub dina-dina yan dumbaryi nirya kikniboka kalikeibkwandum. 27Ara, a co lamna kubkub dina-dina asi toubna dama atoa kikniboka kalikeibokaminyi aryi a co lamna bobankungnyi ura, co dongobdongoboka bobinkwanung. 28A co lamna taleboka boban co kiknibkwaminyi ara co si penaga aryi kiknibminyi ura, emas aryi lilibkwandum. Ba, ato kuaminyi aryi aminda taleboka bobinkwanunga. 29Ba, kiknibminikwandim dinyi ara roti kwaning yangardeirin suwa ab, me yin meyok ab, anggur me kwerdeirin meyok ab, yan kurande meyok ab nirya emas kobdob tabtabingna kum emas aryi kiknibkwandum. 30Ukubminyi ura, Niti dama deiboka yin roti ara a co lamna deici asi deiboka, Ni yuma ai dam, Ni ai kobdob co sangkol urasin dam deiriryangankwandum!” ebmou.

Uk ubna yabla deyok

25:31-40

31“Sunci uk ubna yabla kiknibkwamunyi ura, emas kobdob tabtabingna kum emas aryi kiknibkwandarur. Ara, emas kobdob aryi keil teikoka uk ubna kiknibkwandum. Ara, uk ubna yan sasa babyi, toukwe nong babyi, taruk yabla babyi, du kobdob babyi, uk arande dikum babyi nirya ato kuboka uk ubna kiknibkwandarur. 32Noutumang yok tentok tikanci uca, ton tam winiryi-ton tam winiryi te kwalekibkwandum. Ba, ton noutumang dinyi ababyi tikwandur. 33Taruk kwalengna tentok ara co keta oandiryi keta larande to kuboka, yok tam kungkaba winiryi kubdeibkwandum. Ani, ton amubaryi dinyi ababyi a kubmaminyi to akwe ukubkwandum. 34A uk ubna yabla deici nirya ara mungkaba bukeiboka co keta orande to kuboka keta labdeibkwandum. 35Ani, yuma taruk babyi, bitinyi dinyi taruk babyi, winiryi dinyi taruk babyi, tonda dinatam taruk winiryi babyi, a taruk nirya ara uk du yuk-yuk kiknibkwandum. 36Taruk ab, du ab ara a uk ubna yabla kikniaminya nong dub aryi dukdongobkwandum. A kiknibkwaminya nirya ara yuk dinyi tabtabingna kum emas keil aryi nunuboka kiknibkwandum. 37Ba, ukubminyi ura, a uk ubna taruk tabaryi lekeiaminya urub yuk-yuk ara uk ubna urub dam bukeiboka uk abdeibnin yibinkwandum. Ba, a umna aryi akai dumdam tam ababyi berekwandur. 38Ba, uk ubna sirya yibmariryi, kwamingca marbana ababyi emas kobdob aryi kiknibkwandum. 39Ani, 35 baryi kilogram tabtabingna kum emas aryi uk ubna yabla anda ukurdana kiknibkwandum. 40Ani, tonda a mutuk kon dam aryi eterenmakinci, ‘Uk ubna yabla ara ato kiknibkwandum,’ ebmase to kiknibkwandum,” ebmou.

Currently Selected:

Keluaran Uram 25: MTG

Highlight

Copy

Compare