Keluaran Uram 24

Er Iya Erebdobnyi biryi Israel nang asi, “Niryi sunsi lebdeibsiniryi talebkwansin,” ebmou deyok ati li dona deyok

24:1-11

1Er Iya Erebdobnyi biryi Musa bisi ato ebmou, “Kan ab, Harun ab Ni dam weleyarurum. Ba, Nadab ab, Abihu ab Israel nang weik nang 70 baryi nang ab ara eratoto tikoka Nisi kisok luknubdongoboka molobkwanunung. 2Eda, Musa kan tentok asi Ni Iya Erebdobnyi dam yankwandum. Yuk nang ara Ni dam talyi yangana mem. Ani, Israel nang yuk nang ababyi Musa ab tonkwa weleyangana mem,” ebmou.

3Ura, Musa biryi Israel nang asi Imtamnyi biryi, “Yuk-yuk deyok nirya asi ato-ato kubde bankwandarur,” ebdeibmou uram ton. “Ukubdarur-ukuna mem,” ebmou uram ton ab asi, sunsi yandoka eterebmou. Eterebmou ba, sun Israel nang nirya aryi uram diririb eboka ato ebmai, “Er Iya Erebdobnyi biryi ebdeibmasir uram nirya kununkwayeb,” ebmai. 4Ura, Musa biryi Er Iya Erebdobnyi biryi a ebmou to nirya kerek sekmou. Ani, ambutum berekmou ura, belekuna kobdob bukoka Imtamnyi biti dama deirin keil dungna a mutuk deyok dam keil laboka kiknibmai. Ani, sun aminda teneirdenkwamnyi ati Israel nang yala kuramnyi to amolbaryi keil irim dikoka kiknibmai. 5Ura, sun Israel nang kabir nang asi wibmou. Ba, bisam domba oboka sun lemna ati, dama deiboka bisam nong nirya uk danmai. Tonda, bisam si sapi yim akwe obokabiryi sun lemna dinyi ati Er Iya Erebdobnyi biti dama deiboka uk danmai. 6Ura, Musa biryi a bisam sapi ining ton doboka suwa baskom sangkol umbura dikdongobmou. Ani, neik ining akwe ton bokoka keil dungna deici dikeibmou. 7Ura, Er Iya Erebdobnyi biryi, “Ukubkwandarur-ukuna mem,” eamwe uram kerek sengna doboka a uram nukmou ba, sun Israel nang kekebmai. Ura, sunci ato ebmai, “Er Iya Erebdobnyi biryi a ebdeibsou uram nirya kekeboka kunubkwayeb,” ebmai. 8Ura, Musa biryi a ining baskom umbura dikdongobmou dinyi dobtaleboka sun Israel nang asi dikoka aktelebmouci, ato ebmou. “A ining ara Er Iya Erebdobnyi biryi, ‘Ato-ato kubdarur,’ ebmasir uram nirya ab, sunci, ‘Er uram kununkwayeb,’ ebmarum uram ab ati, sirya sasiboka katabum ebdeibmasir,” ebmou.

9Ura, Musa ab, Harun ab, Nadab ab, Abihu ab, sun Israel nang wis yoka nang ab, yubwa 70 baryi nang ab tonkwa mutuk kon dam welebmai. 10Sirya a mutuk kon dam binmai ura, sun Israel nang aryi Er Imtamnyi Israel nang sun Nai asing eibmai. Er yan ara keil si nilam aryi yangaraming keil kait atoanun asi eibmai. Ba, Er yanibmou dikum ababyi milil aryi bereklobmou asi asing eibmai. 11Uca, sun Israel nang sien nang asi Er Iya Erebdobnyi Er taruk lakoka ona kum kubmou.#24:11 Er Iya Erebdobnyi biryi Israel nang asi ona kum kubmou. Ara, minob ato eramnyi, “Unanyi biryi Imtamnyi asing eibmaci ura, anyi bisi Imtamnyi biryi obkwandur,” eramnyi. A deyok aryi Imtamnyi sirya asing eibmai bok, Imtamnyi biryi sunsi ona kum kubmou. Eda, mangkau asa aryi yina yibmai. Eda, Imtamnyi bisi asing dinmai cok asi yina ab, me ab yibmai.

Musa mutuk Sinai kon dam kunmou deyok

24:12-18

12Er Iya Erebdobnyi biryi Musa bisi ato ebmou, “Nisi mutuk kon dam weleyarum. Ba, Niryi kansi Israel nang asi ‘Ukubdarur-ukuna mem,’ en uram keil kerek sekoka karebkinyi ba, bindoka eterebkwandim,” ebmou. 13Ura, Er mabwe kanyi deiriramwe nang Musa ab, Yosua ab anaboka Er Imtamnyi mutuk kon dam welebinmarei. 14Ba, Musa biryi sun Israel nang wis yoka nang ati ato ebmou, “A dibde kuransumunyi ba, aminda sun dam yankwanimca. Sunda Harun ab, Hur ab taleboka tonkwa kurandarur. Tonkwa kuramunyi talak aryi unanyi biryi deyok ton kubmaci ura, sun a bitinyi nang dam boyankwandarur. Ba, sunci a deyok lilibdeibkwansururung,” eboka dukeibmarei. 15Ura, Musa a mutuk kon welebinmou ura, Musa bisi duwa aryi libdongobokmou. 16Ba, Er Iya Erebdobnyi milil aryi Sinai kon asi mita sinamnya kanim-kanim eboka uk angninto kuramwe. Ukuramwe talak ara uki nabaryi a mutuk kon asi duwa iamwe. Ani, uki tabaryi tum berekmou ura, Er Iya Erebdobnyi biryi duwa umbura aryi Musa bisi nabmou. 17Ura, Israel nang aryi dinmai uca, Sinai kon tam asi Er Iya Erebdobnyi milil aryi uk angninto kunmou.

18Bok, Musa bira a mutuk kon dub kobdob weleboka duwa umbura wengbinmou. Ura, Musa bira Sinai kon dub kuramwe uki ara kitingtam lukunda 40 baryi kuramwe.

Currently Selected:

Keluaran Uram 24: MTG

Highlight

Copy

Compare