Keluaran Uram 23

Ninyi bobde taleraming dinyi ati, “Ukubkwandarur,” ebmou deyok

23:1-13

1Er Iya Erebdobnyi biryi Musa bisi ato ebdeibmou, “Sunci yuk ninyi deyok ati tola uram borkiringna mem. Ani, sunci tolanyi biryi tola ati, ‘Ukubmar,’ ebmaci dinyi asi boboka yuk nang keken ai lak ena mem. 2Sunci ninyi yu ilinto kunmangnyi ninyi asi milina mem. Ani, yuk deyok nirya mem en dinyi kum kununmangnyi ura, tola ati, ‘Ato kubmang,’ eboka yuk ninyi keken ai ebde yibana mem. Eda, dib dinyi akwe yuk ninyi keken dam ebkwandarur! 3Sunci bona kumnyi biryi malyi dinyi kunubmaci ati, deyok lilina dam aryi lilinmangnya dam ara, ‘Bona kumnyi bica er tam kibkun,’ tenena mem.

4Sun mar ordananyi bisam lembu kum, keledai kum asi wanikmaca asing eibmunyi ura, doboka er bisam damnyi dam ola bobinkwandarur. 5Sun mar ordananyi bisam keledai ikina bobmaci aryi dalukoka sakci ura, ‘Ni lemdeirina kum kubkun,’ tenena mem. Eda, a bisam keledai bobmaci keica nirya asi dobkaboka bukeibkwandarur.

6Sun kankan dam aryi bona bon kum nang deyok kubmaci ati deyok lilin ai dam boyanmangnyi ura, er mundu lobdobto akwe lilibdeibkwandarur. Er kanyi malyi kubmanto kuboka uram sengkwetena mem. 7Tola ati, ‘Anyi biryi ukubmar,’ eboka deyok lilin ai boyangana mem. Sangkuna anyi biryi er ton ukuna kum kubmaci bok, tola ati ebmamunyi ba, anyi obingnyi ura, tola ebmarinyi bira er malyi kun dinyi kilina kum kubkwan. 8Duknuboka bula doraming uang kum, yuk bona kum ara sun dorona mem. Ato kuboka bula doraming dinyi ara ninyi teleb ab, asing erekanci nang ab asi asing kurminingdaming. 9Yuk atei nang sun mutuk yandoka kuramingnyi nang asi dubto uram karena mem. Ara, sunbabyi Mesir mutuk bindoka kurandauci borandau kanya akwe sunbabyi ato kanya bonung ati ebman.

10Kwalina nabaryi ara sun mutuk wa iboka kibde bulurorandarur. 11Ani, kwalina tabaryi dinyi ara a wa iamunya nirya ukuboka a taklobokamunyi ba, sun kankan dam aryi yina kum nang kunung ninyi yibdobkwanung. Sun yiroramingnyi ani, a taklobingnyi dinyi ara bai bisam yibdobkwandur. Ara, sun wa anggur wa babyi, sun wa zaitun wa babyi ati ebman. 12Uki nabaryi ara sun wa ur ironkwamandarur. Uki ta tum berekci ura, lobdeibkwandarur. Ara, sun bisam lembu babyi, sun bisam keledai babyi, sun wa dimnamunyi ba, mambul weik wa iransingnyi ner sal babyi, ninyi atei nang sun atei bukmangnyi ninyi nirya ababyi a tum ara lobdeibkwanung.

13A ebdeibmasin uram nirya ara diboka-diboka kalikwandarur. Yuk kwemdeina si semeboka sun si bambul aryi kwemdeina si namna mem,” ebmou.

Imtamnyi molon tum ab, yuk weik uki tum ab ati, “Ukubkwandarur,” ebmou deyok.

23:14-19

14“Kwalina tentok ara liki winiryi sun nirya aryi li doboka Ni si weik enkwandarur. 15Kwalina si Bungbung Ena Dongona Kum Roti yin tum ara diboka kalingkwandarur. Uki tabaryi ara Niryi sunsi ebdeibmasin to kuboka, wala si Abib wala dobci ura, bungbung ena dongona kum roti yinkwandarur. Ara, a wala aryi Mesir mutuk dam aryi anaboka yandau ati ebman. Bok, sunci Ni dam yankwamamunya ara taruk baning yangana mem. Eda, ukutotoa ton bobnumuncok yankwandarur. 16Ani, tonda sun wa dam gandum wa iboka kouandau ani, sirya du moubmou ura, yuma kibkalibmandau tum ababyi teneiboka li donkwandarur. Tonda, sun wa iboka co anggur toto yuk co toto wa iandau ani, yuma du dakmandau tum ab ara tuba li donkwandarur. Ani, tonda a kwalina sirya talak ara li doboka sun wa iamunya asi kiboka bulubkwandarur. 17Kwalina tentok ara liki winiryi sun atei nang sal kuramingnyi tok nirya Ni sun Nai Iya Erebdobnyi dam asi yankwanung.

18Sunci bisam ngang sekoka ining Niti kareboka molonkwanurum ara roti bungbung erande keica ab tabtabingdongona mem. Ani, tonda Ni uki tum aryi a oboka molobmamunyi bisam kob ara a deiblobmamunyi ba, lukunda maberengna ara mem. Eda, a tum aryok uki dabsekwandarur. 19Tonda, sunci kourandum ba, aboka mourande dinyi asi iya teleb dinyi wiboka Ni sun Nai Iya Erebdobnyi dam boyankwandarur. Sunci kambing mi oboka yubkwamamunyi ura, a kambing er kwin moum yung urubmamunya ab tabtabukoka yuna ara mem. Eda, kambing mi akwe yubkwandarur,” ebmou.

Er Imtamnyi biryi erekdobmouci, “Ato kubkwansin,” ebmou deyok

23:20-33

20“Iya dib uram aryi ebkun ara Niryi Ni uram eryuryangananyi malaikat tentok sunsi bokdonoknyi ba, kalikmasiriryi, bisik menekoka Niryi kiknibdeibsise mutuk dam bobinkwansir. 21Er urasin dam ara diboka kalikdanmamuncok, er uram kekenkwamandarur. Sunci ersi malyito ton kibdongona mem. Malyi kibmamunyi ura, sun malyi kubmamunyi dinyi kum libdobsicei. Ni si ara er dam kurur ati ebman. 22Uca, sunci Ni a ebman uram nirya diboka kekeboka kunubmunyi ura, sun mar ordan nang asi Niryi mar ordana nang kibokabniryi mar bobkwan. 23Ara, Ni uram eryuryangananyi biryi sun dam bomenekoka, Amori yala nang dam ab, Het yala nang dam ab, Feris yala nang dam ab, Kanaan mutuk nang dam ab, Hewi yala nang dam ab, Yebus yala nang dam ab asi bobdobkwande. Ura, Niryi a yala nang nirya asi oboka kum dandeibkwan.

24Ati, sunci a mutuk nang molonung kwemdeina moloboka si weik ena mem. Ani, sunci, sun kwemdeina moloramingiryi, kuramingnyi to kuboka milina mem. Eda, sunci sun kiknibdeiboka moloramingnyi dinyi ninyi atoa kikniboka moloramingnyi dinyi ab, abyokomna ikoka moloramingnya ab asi, dakaboka kum dandeibkwandarur. 25Ukubmunyi ura, sunda Ni sun Nai Er Iya Erebdobnyi bisi si weik eboka molobkwanindarur. Ba, Niryi sun yina roti kwaning ab, sun yin me ab karebkwansunun. Ani, sun u yin dinyi ababyi sun kankan dam aryi kum dandeibkwansunun. 26Sun kunkwandum mutuk dam aryi mi you ner ab, mi yongna ner ab ara ton kum kubkwande ati ebman. Ani, sun kam kuna ababyi cang kibdeibkwansin.

27Sun a mutuk dam kum binmamunyi bok asi, a mutuk ninyi asi mambul kun dinyi minob karebkwaman. Ba, sunsi iyanganmasingnyi ninyi asi daldalubkabkwaman. Ani, sun mar ordan nang asi cukoka sun dongtam kibdeibkwaman. 28Ani, mong amnya minob takdongobkwaman. Ba, a keica aryi Hewi nang ab, Kanaan nang ab, Het nang ab asi yakdonoknyi ba, cukoka binsekwaming. 29A ninyi asi kwalina tentok aryi minob kum danardeina kum kubkwaman, eda ukublobkwan. Ato kubnyi asi a mutuk lo kubci ba, bai kam yala yuk-yuk wengyandoka sunsi mitik kibdeibsingnyei ati ato ukublobkwan. 30Niryi a mutuk yala ninyi asi mitik-mitik kum dandeibnin baranyi asi, sun mi ababyi kikliboka deibmunci, a mutuk nirya sun mutuk kibdobkwandum. 31Niryi mutuk wiliba sekeibkwansin ara me Teberau kwan dam aryi kuboka Filistin dam ab, yini mutuk dam aryi kuboka me Efrat kin kunung ninyi nirya ara sunti karebkwansin. Ba, a ninyi asi kum dandeibkwandum. 32Sunci a mutuk ninyi ab, sun moloramingnyi kwemdeina ab asi, ‘Ukubkwamab,’ eboka uram sisingna ara mem. 33Sun a mutuk ninyi kobdoba ara sun mutuk dam iya kum kunung ati, sunci a ninyi kwemdeina molonmamunci, Nisi malyi kibsinibnumunyei. Ato kubmunyi ura, sun mining dam nang eboka youbdankwandum ati ebman,” ebmou.

Currently Selected:

Keluaran Uram 23: MTG

Highlight

Copy

Compare