Keluaran Uram 22

Bona karerdana ati, “Ato kuboka karebdankwandarur,” ebmou deyok

22:1-17

1Ura, Er Iya Erebdobnyi biryi Musa bisi ato ebmou, “Unanyi biryi bisam sapi ukula dobdobmariryi, oboka yibmaci kum, ukula doboka dekdobmaci kum ara sapi akwe amubaryi unubkwandur. Ba, bisam domba ukula doboka dekdobmaci ura, domba akwe dumbaryi unubkwandur.

2Ukula donanyi biryi ukula dobkwamariryi, lukunda yandoka ai lika angmaci asi eiboka kunuk kankan aryi kulaboka obingnyi ba, dibmaci ura, obmarinyi bira ikin karena kum kubkwandur. 3Bok, kiting sirya tingyanmaci bok, ukula donananyi asing eiboka obmaci ura, ukula donanyi bisi obmarinyi bira anyi er ikin takubdeibkwandarur.

Bok, a ukula donanyi bira kikiman dekwandur. A ukula donanyi er bona ton kum ura, er mining damnyi bisi yuk nang asi, ‘Ni deknindarur,’ eboka karebdankwandur. Ba, erti a dekmangnyi uang aryi er ukula dobmaci bona unubkwandur. 4Ba, a ukula dobmaci keica bisam sapi kum, bisam keledai kum, bisam domba kum, obde yina kum kubmariryi, kam tuba deibmaci ura, liki bitinyi dekwandur.

5Unanyi biryi er bisam wa dam bobde kunmariryi kum, anggur wa ina dam kunmariryi kum, mol kwabmaci ba, sun wa ibdamingnya nirya yibmaci ura, er wa ibdanca telebto wa nun asi unubkwandur. Tonda, er mutuk wa dam anggur du biti tiliboka mouanci du kum, yuk dinyi weik erebdoba kibmaci dinyi kum asi unubkwandur.

6Ani, malyi keica uk irdongonmaci asi gandum bulubdeiamingnya kum, gandum kum kibmangnya kum asi uk yaliboka yibci kum, sun wa a nirya uk yibmaca kum ara weikto luluboka unubkwandur.

7Unanyi biryi uang kum, yuk bona kum asi er kwit biti, ‘Ni dinyi a deirbinurum!’ eboka kareanci ba, deirbinandur. Deirbinmaci dinyi asi ukula dobdobmangnyi ura, a dobmarinyi sirya bikingnyi ura, a ukula dobmarinyi biryi liki bitinyi dekwandur. 8Ba, a ukula dobmarinyi kum bikingnyi ura, akainyi bira Er Imtamnyi dam bindoka dib en uram aryi, ‘Ni kwit dinyi ni taruk aryi ukula doboka ni ai aminda iya kum deiryangankwan,’ ebkwandur. 9Ba, tonda bona deyok ati ordanmangnya ab, bisam keledai deyok ati ordanmangnya ab, bisam domba deyok ati ordanmangnya ab, ongon aling deyok ab ati ordanmangnya ab ani, yuk bona wanikmangnya ab ati, ‘Ni dinyi-kan dinyi,’ eboka tatardanmaringnyi ura, boboka Imtamnyi ai dam, Er Imtamnyi urasin dam bobinkwanung. Ba, unanyi bisi Imtamnyi biryi ukula dobmarinyi lak kibdeibci ura, er kwit bisi dengna liki bitinyi dekwandur.

10-11Unanyi biryi bisam keledai kum, bisam lembu kum, bisam domba kum, yuk bisam kum asi er kwit ai tiya deianci ba, winirandur. Uca, dibmaca kum, yan bulakmaca kum, ninyi kum dinmangnyi ba, yakdonokmangnya kum ati, a bitinyi nang aryi Er Iya Erebdobnyi biti dib en uram aryi, ‘Ni taruk lakoka ni kwit bisam doboka ni ai kum deibkwan,’ eboka, ‘Kom,’ ebkwandur. Ebci ura, er bona damnyi bira kanya teleb asa kuboka, ‘Teleb,’ ebkwandur. Ba, a bona ai deiandinyi biryi ununa kum kubkwandur. 12Bok, a bisam asi iya dib ukula dobmangnya bikmaci ura, akai damnyi biryi a bisam damnyi bisi bisam unubkwandur. 13Ba, a bisam asi bai kam aryi oboka yibmaci ura, yina kobola boboka amubkwandur. A bisam ara ununa kum kubkwandur.

14Unanyi biryi er kwit bisam tiya bonmaci asi yan bulakmaci kum, dibmaci kum, er bisam damnyi a kum kunmaci bok, ara weikanun luluboka karebkwandur. 15Uca, er bisam damnyi dam a kunmaci ba, yan bulakmaci ura, a bisam ununa kum kubkwandur. Bok, a bisam tiya bonmaci asi, yan bulakmaci ura, tiya doboka wa inmaci dinyi ati dekwamaci dinyi ab tabakdongoboka dekwandur.

16Unanyi biryi ner kabir ninyi ena kum kuamingnyi ner asi neneboka er ab tonkwa mabmaringnyi ura, a ner asi dekokabdiryi, dobdobkwandur. 17Ba, a kabir ner er nai biryi, ‘Ni nebnyi anyi bisi kum kabdeibkwan,’ tenebmaci bok, anyi biryok tataboka er nebnyi dobkwandur. Ato kubmaci ura, er nebnyi te murumna dengna weikanun luluboka dengna weik keil ilinto dekwandur,” ebmou.

“Iya malyito kun dinyi ati ukubkwandarur,” ebmou uram.

22:18-20

18Ninyi dibdob nang kanya miliboka yuk-yuk dinyi lak kimnanci ner ara kam kuna mem, eda obkabokwandarur.

19Unanyi biryi bisam kum, kam kum, yuk kamyoa asi yobmaci ura, anyi bira obkabokwandarur.

20Unanyi biryi Iya Erebdobnyi bisi molona kum uca, yuk kwemdeina ati, dama karerbindoka molonmaci ura, anyi bira obkabkwandarur.

“Mikib doboka ukubokman kum nang ati ato kubkwandarur,” ebmou deyok

22:21-27

21Minob dara sunbabyi Mesir mutuk dam tingbinandau to akwe yuk mutuk nang sun mutuk dam yandoka kunkwanung. Ati, sunci yuk mutuk nang sun mutuk dam yandoka kuramingnyi ura, sunsi malyi kiboka uram daraboka wenena mem.

22Sulyi ner ab wanglon mabwe nermabwe ab asi durukoka wenena mem.

23Sunci a ninyi asi durungnamunyi ura, Niryi sun boukwe eibde bunmangiryi uram donmaningnya kekebkwan. 24Ba, Ni yu weknici ura, ninyi on ya aryi obkwansin. Ba, sun doamunyi nerabwe ara sulyi nerabwe kibsekwaming. Ani, sun mabwe ara wanglon mabwe kibsekwaming.

25Sunci Ni uram keken nang sun kankan dam kunungci, co bok ton talena kum kunung nang aryi, “Kan bona tiya ton karebmanurum, Nibabyi aminda unubkwankin,” eboka molobingnyi ba, karebkwandarur. Ba, ukuboka karebmunyi ura, “Ola unubnurum,” eboka titik-titik ena mem. Ani, weikto tabakdongoboka molona mem.

26Sunci, sun kwit yabwe alib ongon aling asi dobdobmamunci, “Co bok aminda tamubkarebkwankin,” eraming dinyi ara kiting kum wengbinabci bok asi tamubkarebkwandarur. 27Ara, er nong lilirona ab er bol akurona a kunum. Erda unatoa aryi kaluboka mabkwamarur do? Erci nisi u eboka molonici ura, ni kekenkwamanun. Nira ninyi boukwe kimnanyi kunun ati ebman.

Yuk-yuk deyok nirya ati, “Ukubkwandarur-ukubkwandarur,” ebmou deyok

22:28-31

28“Ni Iya Erebdobnyi bisi si malyi kimnina mem. Ani, sun kuramunyi mutuk sienyi kiboka taleansirinyi bisi yu uram ena mem.

29Sunci gandum du dakmamunya ab, anggur du dakmamunya ab, asi Ni Imtamnyi biti karenina luba kibnumunyei. Ani, sun mi du mi deibmunya ara Niti, karebkwanindarur. Ba, Ni wa ibde bankwandur. 30Ani, sun bisam lembu ab, sapi ab, kambing ab, domba ab ababyi neiktoto nisi karebkwanindarur. Uki tabaryi ara a bisam er kwin ab kunmaringnyi ani, uki inbaryi tum ara Nisi karebkwanindarur.

31Sunda Ni mabwe malyi dinyi beterdongona kum nang kibkwandum. Bisam yala kamyoa nirya asi bai kam aryi bai oblobmaci dinyi ara yina mem. Eda, kam ati karebkwandarur.”

Currently Selected:

Keluaran Uram 22: MTG

Highlight

Copy

Compare