Keluaran Uram 21

Sun Ibrani nang asi il dimnamnyi deyok

21:1-11

1Er Imtamnyi biryi Musa bisi ato ebmou, “Kanci, ‘Ato kubkwandarur,’ en dinyi sun kankan dam bobinkwindim dinyi ara ato.

2Sun Ibrani nang il dimnamingnyi nang asi dekdobminyi ura, kan wa kwalina nabaryi ibkwankurur. Ani, kwalina tabaryi dinyi ara il doranci dinyi lobdeibminyi ba, dengna kumkum ur bindobkwandur. 3Ani, sal tentok ner kum doandinyi bisi, kan wa yandoka irankici ura, er yuk bindobkwandur. Uca, ner doandinyi biryi yandoka wa irankici ura, er ner ab lobdeibminyi ba, bindobkwandurung. 4Ani, sangkuna er taleboka er nai kibde kurandinyi biryi anyi bisi ner kabdeianci ba, mi deiandur. Ara, sal deiandur kum, ner deiandur kum ara er taleboka er nai kibde kurandinyi dinyi kibkwandur. Ba, a il dimnamingnyi ba, il dobde kurandinyi er kikwe anaboka ur nang kankan bindobkwandur. 5Uca, anyi biryi, ‘Ni talebnounyi ab, ni ner ab, ni mabwe nermabwe ab asi iya kanyi deibse ati, ni akatei aryi anaboka kum binkwan,’ ebci ura, 6anyi er nai kiandinyi biryi boboka Imtamnyi ai dam bobinkwandarur. Ura, anyi bisik bublan dam kum, bublan abyokomna dam kum bobindokabdiryi, anyi bisi er amol yumci aryi otokdongobkwandarur. Ba, a il dorandinyi bira er nai kiandinyi wa akwe iya ibde kuranci tok asi dibkwandur.

7Ani, ninyi tentok aryi er nebnyi asi il dimkwamingnyi ati bona dekanci ner ara a ner il dimnamingnyi ani, kwalina tabaryi bisianci ababyi, sal aryi lordeiriraming to kum kubkwanung. 8Ani, a ner asi er doandinyi biryi kanya kum deianci ura, a ner er nai biryi yuk nang asi karebci ba, dekmangnyi uang ara minob dekoka doandinyi bisi unubkwanung. Anyi biryi yuk mutuk ninyi asi kamdeirina ara a ner dam asi, ‘Ukubkwankin,’ eanci deyok aryi ato kubkwandur. 9Ba, a ner asi, ‘Il dimna ner kibdobkwan,’ tenen dekdobingnyi ura, er mi ati kabdeibkwandur. Ba, er mi kabdeibci ura, a ner ara er nebnyi kobdoba ato kibdobkwandur. 10Ba, a ner doandinyi tubto yuk nerabwe dobdobci ababyi, aminda ner asi yina mitikanun kareboka, ongon aling mitikanun dekeiboka kimna mem. Eda, utotoa nirya bourdeirinkwandur. 11Uca, a ner asi dengna bourdeirina kum kuranci ba, a ner anaboka bindobkwamaci ati, sirya dengna ara dengna kum kubkwandur,” ebmou.

Ninyi kisok bona dengna karerdana ati, “Ato kubkwandarur,” ebmou deyok

21:12-36

12Er Imtamnyi biryi ton ato ebmou, “Unanyi biryi ninyi obci ba, dibci ura, erbabyi obmunyi ba, talebdanin binkwandurung. 13Uca, teneboka kuma talyi donongdongci uca, Imtamnyi biryi tenebmaci to aryi dibmaci ura, anyi cuki binkwamaci mutuk eterebkwansin. 14Ani, ninyi tentok aryi, yu kuboka er kwit bisi obmariryi, Ni Imtamnyi biti dama deirin keil lamna dam duknurororbinmaci ababyi, anyi bisi taleboka ur obkwanung.

15Unanyi biryi er nai kum, er kwin kum asi kulaboka obdinyi bira ersi obmunyi ba, dibkwandur.

16Ani, unanyi biryi ninyi ukula doboka, yuk ninyi asi dekdobmaca kum, er dam tuba a kunmaca kum ababyi, ukubmarinyi bisi obkwanung.

17Tonda, unanyi biryi er nai kum, er kwin kum submaci ura, anyi bisi obmunyi ba, dibkwandur.

18-19Ninyi bitinyi ordanmaringiryi, keil aryi kum, taruk inin aryi kum kulabmaci ba, dina kum kubmariryi, tuba nakinmaci ura, anyi bira ikin karena kum kubkwandarur. Ba, anyi bukokabdiryi kama dumuboka atei dam yibanmaci ura, obmaci atikwe ur dekwandur. Ara, ninyi kweten keica dekeianci ba, yiranci ani, nakibdobkwandur.

20Ani, unanyi biryi er wa dimnanci ba, il dorandinyi kum, er wa il doranci ner kum aryi manmalibmaci ba, kama aryi kulanmaci ba, dibci ura, anyi bisi erbabyi kisok dakwanung. 21Uca, er il dimnanci ba, il dorandinyi bisi kulabmaci ba, tuba uki tentok kum, bitinyi kum kam tuba bukmaci ura, anyi bisi ikin karena mem. Anyi bira er sirya dekanci deyok aryi er dinyi kurandur ati ebman.

22Ani, sangkuna ninyi obdanin yibangiryi, ton tam nang aryi mi mundu boanci ner asi mundu obdongobmangnyi ba, mi yokwandur. Ukuboka mi yokmariryi, dina kum kubmaci ura, malyi kun dinyi liliraming nang ebmangnyi to kuboka er akenyi biryi dengna molobci ura, a obmarinyi biryi dekwandur. 23Uca, a obdongobmangnyi ner asi dibci ura, er obmarinyi bibabyi obingnyi ba, talebdanin binkwandurung. 24#Im. 24:19-20; Ul. 19:21; Mat. 5:38Ani, asing kwebmangnyi ura, erbabyi asing kwebkwanung. Si kurukabmangnyi ura, erbabyi si kurukwanung. Taruk bulakmangnyi ura, erbabyi taruk bulakwanung. Yan bulakmangnyi ura, erbabyi yan bulakwanung. 25Ani, uk dabmangnyi ba, bol boubmasici ura, erbabyi uk dabingnyi ba, er bol boubkwandur. Dilaka sakmasici ura, erbabyi dilaka sakwandur. Nebmasici ura, erbabyi nebkwandur.

26Unanyi biryi er wa dimnanci ba, er wa iranci sal kum, ner kum asi asing tulukdongobmaci ura, er wa iranca takloboka ur kuronanyi kibdobkwandur. Ara, er asing tulukdongobmaca dengna ato ara il doranca kum uca, ur kubdobkwandur. 27Ani, unanyi biryi er il wa dimnanci ba, il doranci sal kum ner kum onmaci ba, si kururukwande. Ukubmaci ura, er si kurukabmaca dengna ara il dona kum uca, ur kuronkwandur.

28Bisam sapi kisok yang taci aryi sal kum, ner kum obmasici ura, a bisam damnyi bisi ikin karena mem. Eda, a bisam asi keil aryi molokoka obmunyi ura, tub ara yina mem. 29Uca, a bisam sapi aryi sal kum ner kum asi tuba ninyi obde baransici ati, a bisam sapi wininanyi bisi, ‘Diboka kalikdum!’ ebkwandarur. Ato eramunyi bok, er bisam diboka kum kalingnanci aryi sal kum ner kum obmaci ura, a bisam sapi ara keil aryi kulaboka obkwandarur. Ani, er bisam damnyi bibabyi obmunyi ba, dibkwandur. 30Ani, tonda ‘Antanibkwanim ati, uang deknurum,’ eboka, ikin eboka ikin kareanci ura, er moloanci to kuboka dekwandur. Ara, er kam kuna ati limdaroninto dinyi libdandobkwandur. 31Bisam kisok yang taci aryi mi kum, nebnyi kum asi obmaci ura, er bisam damnyi bisi dengna molobingnyi ba, dekwandur. 32Uca, a bisam sapi kisok yang taci aryi wa diamingnyi ba, il dorandinyi kum, ner kum asi obmaci ura, er bisam damnyi biryi dengna weik keil si perak kitina 30 baryi a il dorandinyi taleboka er nai kiandinyi bisi dekwanung.#21:32 Dengna weik keil si perak kitina 30 baryi ara il dorandinyi kum, il dorande ner kum, “Anyi kum, a ner kum lebdeibkwande,” tenen dengna a kunum kurur. Ba, a bisam sapi ara keil aryi kulaboka obkwanung.

33-34Tonda, unanyi biryi me kwena ukoka kikniamingnya asi bublan kuklobmaci ba, bisam sapi kum, keledai kum a umbura wekwande. Ukuboka, me kwena um kabul ungmariryi, ukublobmaci ba, bisam sapi kum, keledai kum a umbura wekwande. Ato kuboka wekmaci ura, a me yina lokmarinyi biryi erbabyi dekanci to uang dekoka unubkwandur. Uca, a bisam ara erdamnyi kibdobkwandur. 35Ani, tonyi bisam sapi aryi tonyi bisam sapi obci ba, dibci ura, a obmaci bisam sapi kam dinyi ara uang dekwanung. Ura, a uang a bokdobingnyi ura, a dibmaci bisam ababyi bokdobkwanung. 36Uca, a bisam sapi ara iya ato akwe yuk bisam oranci bok, er bisam damnyi diboka kum kalingnanci ura, a obmaci ba, dibmaci bisam ato akwe unubkwandur. Bisam sapi obmaci ura, sapi akikwe unubkwanung. Ba, a obmaci ba, dibmaci bisam ara er bisam damnyi dinyi kibdobkwandur,” ebmou.

Currently Selected:

Keluaran Uram 21: MTG

Highlight

Copy

Compare