Keluaran Uram 20

“Ukubdarur-ukuna mem,” ebmou uram deyok

20:1-17

1Er Imtamnyi biryi a uram nirya ato ebmou. 2“Nira Iya Erebdobnyi sun Molonindarurnyi kunun. Sunda mutuk Mesir aryi kuboka arungna deyok aryi mambul weik kurandau bok, Niryi sun taruk taleboka boyasisinyi bikwe molobkwanindarur.

3Sunda Ni urasintam kurandum nang aryi kwemdeina molona mem. Nira Imtamnyi bikwe ilil kuboka weik kibnindarur.

4Sunci kwemdeina kikniboka molona mem. Ara, imtam dinyi kikliboka, ‘Molobkwayeb,’ tenen kiknina mem. Tonda, tukwetam dinyi ton mekintam dinyi asi neiktoto kikniboka molona mem. 5Nira Iya Erebdobnyi bira sun Ni dam kundarur nang ati boukwe weik kuboka, ‘Ni kikwe molobniting,’ tenesununyi kunun ati, sunci sun kutam ikdongoboka yuk molon dinyi bisi si weik ebmunyei. Yuk kwemdeina si weik eboka milibmunyi ura, Nira Iya Erebdobnyi biryi yu weik kuboka wenebkwansin. Sunci Nisi, ‘Nun li,’ tenebkwaningnyi nang ab sun mabwe odei-odei winiryi dumbaryi asi Niryi wenebkwansin. 6Ura, sun Nisi boukwe weik kun nang ara Ni en uram diboka kekebnumunyi nang asi yubwa-yubwa 1.000 baryi Ni bico tenesunun.

7Ni sun Nai Iya Erebdobnyi si talyi enina mem. Talyi ebnumunyi ura, Niryi wenebkwansin.

8Uki si Sabat tum ara, ‘Er Iya Erebdobnyi bisi si weik eboka milibkwayeb,’ tenebdarur. A uki tum ara Er Imtamnyi weik uki tum kurur deyok aryi, sunci a uki tum asi wa ina mem. 9Uki nabaryi ara sun wa irandum wa nirya ur ibdarur. 10Sirya ibmunyi ura, uki si Sabat tum berekci ura, taruk loubdarur. A uki tum ara Ni Iya Erebdobnyi uki tum ati, sunci wa ina mem. Ara, sun ton, sun mabwe nermabwe ton, sun wa irmilisin nang ton, sun wa irmilisin nerabwe ton, sun wa in bisam sapi ton, sun wa in bisam keledai ton, wa ina mem. Tonda, ninyi atei nang ara sun atei bukmangnyi nang ababyi a uki tum asi wa ina mem. 11Ni sun Nai Iya Erebdobnyi biryi minob ura imtam tukwetam mekintam kiknibmasiryi, imtam tukwetam mekintam kurande dinyi nirya ababyi kiknibmasiryok, uki nabaryi wa inmase. A nirya kikninmase ani, uki tabaryi tum berekmou ura, Ni sun Nai Iya Erebdobnyi biryi loubmase. A deyok aryi Ni sun Nai Iya Erebdobnyi biryi a uki tum si Sabat tum ati, ‘Teleb uki tum,’ kibdeibmase. Ati, sunci, ‘Er Iya Erebdobnyi bisi si weik eboka molobkwayeb,’ tenebmunyi ura, weik uki tum kibdeibmase.

12Sun nai sun kwin ati, ‘Nun nai, nun kwin,’ tenen teleb akwe kubdarur. Sun ato kubmunyi ura, Er Iya Erebdobnyi biryi yik dinyi karebsici ba, sunda Er Iya Erebdobnyi biryi karebkwansir mutuk asi wengbindoka ani, wau loboka dibkwandarur.

13Ninyi ona mem.

14Sal babyi ner babyi ukula yordana mem.

15Yuk nang dinyi asi ukula dona mem.

16Sun tola ati yuk nang asi tatab-tatab ena mem.

17Yuk nang dinyi asi, ‘Dobdobtinyi,’ tenena mem. Yuk nang ai ton, yuk nang ner ton, yuk nang wa irmilinanyi ton, yuk nang wa irmilin ner ton ati, ‘Ni dinyi,’ tenena mem. Yuk nang wa in bisam sapi ton, wa in bisam keledai ton ababyi, ‘Dobdobtinyi,’ tenena mem.” Ato eboka Er Imtamnyi biryi wenebsou.

Sun Israel nang aryi Iya Erebdobnyi mikib lak kibmou dinyi asi sun ilil kubmou deyok

20:18-21

18Sun Israel nang nirya liman demou ab, bebe lingmou ab, buu ena lilim enmou ab, mutuk kon tulum angmou ab asi asing eibmai. Ura, sun Israel nang ilil aryi sirim talebmou ba, sun yuk dikum era tikdobmai.#Ibr. 12:18-19 19Ura, sunci Musa bisi ato ebmai, “Musa, kanci nunsi uram enkwansurum. Er Imtamnyi biryi nunsi uram esina ara nun dibibyei,” ebmai. 20Uca, Musa biryi sun Israel nang asi ato ebmou, “Sun ilil kusina mem. Er Imtamnyi yankwamar ara, ‘Nisi ilil tenebkwanunung,’ tenen ukurderyankwamasir. Ba, Ersi ilil kanya bobingiryi, ‘Malyi dinyi kununa kum kubkwanunga,’ tenen ukubkwamar,” ebmou.

21Sun Israel nang ara era tikdobmai ba, Musa bira duwa aryi kunuk dakmiting ebmoua dam asi wengbinmou.

Er Imtamnyi uram kekena ati, “Ukubkwandarur,” ebmou deyok

20:22-26

22Ura, Er Iya Erebdobnyi biryi Musa bisi ato ebmou, “Israel ninyi asi ato ebdum: Ni nong kobdoba aryi imtam aryi sunsi uram enmasin ara sirya eibmarum. 23Ati, Ni sun Nai a kuranyi bok, sunci kwemdeina perak aryi kum, emas aryi kum kiknina mem.

24Eda, sunci, Niti dama deirin keil dungna tukwe aryi kiknibkwandum. Kikniboka kan lemna dinyi ab, obde uk dan dinyi ab ati, kan domba ab, kambing ab, sapi ab oboka a keil labmaminyi keil deici asi dama deiboka yalibkwandum. Niryi a dikum asi kiknibdarur ebmanyi dikum ara Ni si asi teneirdenkwanindarur. Ba, Nira sunsi kisal dangyankwansin. 25Sunci Nisi molon keil dungna kiknibkwamamunyi ura, minob teleamingnyi keil aryi kiknina mem. Ara, sangkuna keil ya ati, teleamingnya keil aryi a keil labmamunyi ura, betebdongobmamunci. 26Ani, sun den lak kum kibkwansici to ati sunci Niti molon keil dungna dub welen kweitata tingdeirina mem,” ebmou.

Currently Selected:

Keluaran Uram 20: MTG

Highlight

Copy

Compare