Keluaran Uram 19

Er Iya Erebdobnyi biryi Mutuk Sinai kon dam aryi lak kibdanmou deyok

19:1-25

1Sun Israel nang Mesir dam aryi sirya anaboka yanmai talak wala winiryi mabmai ura, a tum aryok Sinai mutuk kon dam yanmai. 2Sun mutuk Rafidim aryi kuboka yini mutuk Sinai kon dam yanmai ura, ai dobmai. Sun Israel nang ara a mutuk kon dam bindoka keis ol ai dobmai.

3Ura, Musa a mutuk kon Er Imtamnyi dam binmou ba, a mutuk kon dam aryi Er Iya Erebdobnyi biryi Musa bisi ato eboka uram dobmou, “Kanci Yakub deibdoba nang asi Israel nang enung nang asi ato bindoka ebkwandum. 4‘Sun nong kobdob aryi Mesir nang asi ilil dinyi kareboka oramwe dinyi sun asing eiandau. Ani, sunsi maka bib aryi er mi amakoka bobde yangarande to kuboka, sunsi amakoka bobde yandobsise. 5Ati, ukura Ni uram iya kekeramunci, Ni ebdeibsise to asi talebnuruamunyi ura, sunda yuk mutuk-yuk mutuk nang kankan dam aryi sunda Ni noutama kobdob nang kibsiniryi boukwe kibkwansin. Ara, im dangna tukwe dangna kunung ninyi nirya ara Ni dinyi akwe kunung bok, sun Israel nang asi ara ni kanyi deibsise. 6Sunda Niti dama deirin nang imam atoa nang kiboka ni mabwe kobdoba kibkwandum.’#19:6 Sun Israel nang ara yuk kwemdeina kikniboka molon nang kankan dam aryi wiboka Er Imtamnyi mabwe kibdobmou nang kuramnyi. A ebman uram nirya Israel nang asi bindoka ebkwandum,” ebmou.

7Ura, Musa yuryandoka Israel nang sien nang asi nabmou ura, Er Iya Erebdobnyi biryi ersi ebmou to nirya sunsi eterebmou. 8Ura, Sun Israel nang nirya aryi ato eboka uram walulum eboka, “Iya Erebdobnyi biryi a ebmar uram nirya kununkwayeb!” ebmai. Ba, Musa biryi sun ebmai to Iya Erebdobnyi bisi ebmou. 9Ba, Er Iya Erebdobnyi biryi Musa bisi ato ebmou, “Iya dib sirik aryi ebkun, duwa tilib kankan deici kansi yankwaman. Duwa umbura aryi kan ab uram sisingnimnyi ba, sunbabyi kekebingiryi, kansi iya dib tenebkwanking,” ebmou.

10Sirya ato ebmou ura, Er Iya Erebdobnyi biryi Musa bisi ato ebmou, “Sun Israel nang dam asi ato eboka arukdum. ‘Arub ab, ambutum ab ara sun nong nirya me ilikoka kwit kimdanmanung. Ani, sun ongon aling ababyi me ilikoka, Ni Imtamnyi ab ebdankwamabyi ati, kiknibkwanung. 11Uki winiryi kiknirminingdonkwamanung. Ani, uki winiryi sirya berekci ura, sun Israel nang urasin dam aryi mutuk kon Sinai kon dam yuryankwan.’ 12A deyok aryi sun Israel nang asi lika doboka boongobminyi ura, ato ebkwandum. ‘Diboka kalikdarur, Sinai kon welena ab, a mutuk kon deyok dam yanirbana ab ara mem! Unanyi biryi a mutuk asi bolibmaci ura, anyi bira dibkwamaci atikwe bolibkwande.#Ibr. 12:18-20 13Ani, unanyi biryi taruk aryi a mutuk asi talena mem. A mutuk talebmarinyi bira keil yongoboka obkwamang kum, mar aryi yariboka obkwamang kum. Ara, ninyi babyi, ur kamyoa babyi nirya kam kuna kum kubkwamarur. Eda, buu ena weikanun engnyi ura, ur a mutuk kon welebkwanung,’ ebkwandum,” ebmou.

14Ura, Musa bira mutuk Sinai kon aryi yuryandoka, Israel nang dam yanmou. Ura, “Sun nong kiknibdeiboka kwit kibdamunci, sun ongon aling me ilikdarur,” eboka arukmou. 15Ura, Musa biryi sun Israel nang asi ato ebmou, “Uki winiryi tum berekwamar ati, kiknibdeiboka kwit kibdandoka kunkwamandarur. Ani, sun ner ababyi yona ara mem,” ebmou.

16Uki winiryi tum sirya berekmou ura, kiting tingyangau talak ara Sinai kon tam aryi liman deboka, bebe ling eboka, duwa kinikoka ibtambum ebmou. Ura, buu ena lilim ilinto enmou ba, sun Israel nang keis ol ai umbura bukmai ninyi nirya sirim talebmou.#Why. 4:5

17Ura, Musa biryi sun Israel nang asi Imtamnyi ab ebdankwamai ati, iniboka Sinai kon deyok dam bobinmou ura, a bindoka tikmai. 18Ura, Sinai mutuk kon a nirya tulum aryi libdobmou. Ara, Er Iya Erebdobnyi uk deici yuryankou ati ato kubmou. Ba, tulum ara ai uk sekmangnyi ba, tulum silim-silim erande to kuboka a mutuk kon nirya sirim talebmou. 19Ura, buu ena ebnin banmou ani, weikanun ebmou. Asi Musa biryi Imtamnyi bisi uram ebmou ba, Imtamnyi bira liman umbura aryi uram ebmou. 20Ba, Er Iya Erebdobnyi Sinai mutuk kon dam yuryanmou. Ura, Musa bisi, “A mutuk kon dam yarum,” eboka nabmou ba, Musa a mutuk kon dub welebinmou.

21Ura, Er Iya Erebdobnyi biryi Musa bisi ato ebmou, “Kan yurbindokabminci, sun Israel nang asi erbirum. Sunci dirkiringmang ati, lika botobkaboka ni asing eibningnyei. Ba, sun ilinto nirya dibsekingnyei,” ebmou. 22Er Iya Erebdobnyi biti ninyi dama deirin nang imam nang ababyi sun nong kwit kibdangiryok asi Er Iya Erebdobnyi dam yankwanung. Ba, Er Iya Erebdobnyi biryi sun si ona kum kubkwandur. 23Ba, Musa biryi Er Iya Erebdobnyi bisi ato ebmou, “Sun Israel nang a mutuk Sinai kon kum weleyankwamang. Ara, Kanci nunsi, ‘A mutuk dam asi a mutuk dam yaniryangnyei tenen sisa ikoka boongobdarur,’ eboka aruksoumwe ba, a mutuk sirya sisa ikoka aknabdongoboubwe dikum ara malyi dinyi kunuboka beterdongona mem dikum kibdeibumwe,” ebmou.

24Ura, Er Iya Erebdobnyi biryi Musa bisi ato ebmou, “Yurbinabminyi ani, tubto Harun ab weleyarurum. Bok, imam nang ab, ur Israel nang ab ara a mutuk kon weleyandoka Er Iya Erebdobnyi ab ebdabyi asi sun dibingnyei,” ebmou.

25Ura, Musa yurbindoka Israel nang dam binmou ura, a deyok Israel nang keken ai lak bindoka ebmou.

Currently Selected:

Keluaran Uram 19: MTG

Highlight

Copy

Compare