Keluaran Uram 18

Yitro biryi Musa bisi binmou deyok

18:1-12

1Midian mutuk dam Er Iya Erebdobnyi biti ninyi dama deirinanyi imam si Yitro bira Musa er yamal kuramwe. Er Iya Erebdobnyi biryi Musa ab Er Imtamnyi wibmou nang Israel nang ab asi ilil tenen dinyi nirya sun dam kareramwe. Ara, Mesir dam aryi Er Iya Erebdobnyi biryi iniboboka binamwe. 2A talak aryi Musa er yamal Yitro ab, er ner Zipora ab ababyi tonkwa binamnyi. Musa er ner Sipora bira minob, “Bindobdum!” eamwe ba, minob bindoamwe.#Kel. 2:21-22 3Ani, Sipora er mabwe bitinyi#Kis. 7:29 ab minob bindamnyi. Ton mi si ara Gersom. Ara, er nai Musa biryi, “Nira ninyi atei tingyasiryi kunun ati, ni mi si Tingyanganyi,” ena ati sun uram aryi Gersom eboka si doamwe. 4Ba, ton mi si ara Eliezer eboka si doamwe. A mi si dobmou ara ato eboka dobmou, “Firaun biryi ninyi on ya aryi nisi obmanin bok, ni Nai Imtamnyi biryi miliboka lemdonururnyi kurur,” eboka er uram aryi Eliezer eboka si doamwe.

5Ura, Musa er ner ab, er mabwe ab, er yamal Yitro ab, Musa minob yini mutuk bindoka kuramwe mutuk dam binmai. A mutuk ara Iya Erebdobnyi mutuk kon dam asi ai bindoka keis ol ai doboka kuramwe dam asi binmai. 6Binmai ura, Yitro biryi yuk nang asi ato ebdeibmou, “Ni kan yamal Yitro ab, kan ner ab er mabwe bitinyi ab yanganmab,” ebmou.

7Ba, Musa a uram kekebmou ura, Musa sakweteboka sun dam binmouci, er yamal Yitro bisi u kunkunuboka kibdobmou. Ura, sun yuk-yuk asi, “Sun teleb akwe kundarur do?” eboka asibdanmai ura, ai tonkwa wengdorbinmai.

8Sirya ai wengbinmai ura, Musa biryi er yamal biti Imtamnyi biryi Firaun ab, Mesir nang ab asi wenen dinyi kareramwe dinyi nukmou. Ani, sun Israel nang bisik dam yangaramnyi ba, ilil tenen dinyi nirya kunuramwa ab, Er Iya Erebdobnyi biryi Israel nang asi leamwe to nirya liliboka nukmou.

9Ba, Er Iya Erebdobnyi biryi sun Israel nang ati, telebto akwe ukubdeiamwe dinyi nirya ati, Yitro er kanya kilkil mitik kum kubmou. Ara, Mesir nang taruk dam kuramnyi to kumci sirya lebmou deyok aryi Yitro kanya teleb kubmou. 10Ura, Yitro biryi Imtamnyi si weik eboka ato ebmou, “Nun Nai, Er Iya Erebdobnyi, nun kanya teleb kubmasir. Mesir nang ab, Firaun ab taruk dam kuramoubwe asi sirya lebdeibsirarya a! 11Ukura sirya bikne, Nun Nai Imtamnyi bira Iya Erebdobnyi dib kurur. Ati, yuk kwemdeina ara malyi dinyi kurur. Ara, Mesir nang aryi Israel nang asi taleboka arungnamnyi asi lebdeibmar ati ebman. Ani, Mesir nang iya taba deiamunguryi, Israel nang asi tatarongnamungwe asi lebmar ati ebman,” ebmou.

12Ura, Musa er yamal biryi Er Iya Erebdobnyi biti bisam oboka uk dabmouci, er dama yala amuma deibmou. Ba, Harun ab, sun Israel nang weik nang wis yoka nang ab, Musa er yamal ab buluboka Iya Erebdobnyi urasin dam tonkwa yibmai.

Malyi dinyi kunubman ba, lilirdeirin nang tikeibmai deyok

18:13-27

13Mabmai ani, berekmou ura, Musa bukoka Israel nang asi sun malyi kuramnyi dinyi lilibmou. Ba, Israel nang belekuna aryi Musa urasin dam a tikmai tok asi sintam kibmou. 14Ba, Musa er yamal Yitro dinmou uca, ato kubmou nirya asing eibmou. Ura, ato ebmou, “Iya ato akwe ukunkwandim do? Kan tentok bukmarim uca, Israel nang nirya ara kan urasin dam tuba a tikmang tok asi sintam kibmar ara unato ati do?” ebmou.

15Uca, Musa biryi er yamal Yitro bisi ato ebmou, “Sun a yanmang ara Er Iya Erebdobyi biryi, ‘Ato-ato kuboka kunubde binkwandarur,’ ena ati asiryanmang deyok aryi ato kubman. 16Sangkuna sun kankan dam aryi obdanin yibangnyi ura, ni dam boyankwaming ba, niryi a ordanmaringnyi bitinyi nang asi tonyi deyok lilirdeirin, tonyi deyok lilirdeirin kibkwan. Ani, niryi sunsi Imtamnyi biryi iya kununkwaming tenen, ‘Ato-ato kubkwandarur,’ ebdeibwe to sunsi eterebkwan,” ebmou.

17Uca, Musa er yamal biryi ato ebmou, “Ato kunmarim dinyi ara malyito kunmarim. 18Kan ab, kan ab tonkwa a kunmarum atei nang ab boubkwamasir to kunmarim. Ato wa ara ninyi tentok ibman kum wa asi kan tentok inmarim ati ebman. 19Ati, ukura niryi kansi, ‘Ukubdum!’ ebkwinkin asi kekerum. Ura, Iya Erebdobnyi milibkwamakir. Kanci sun akatei nang aryi ukunung deyok nirya Er Iya Erebdobnyi dam karerbana ara kan deici deibingnyi ba, bobirum. 20Ani, kanci, ‘Ato-ato kubdarur,’ en dinyi nirya sunsi eterebdum. Tonda iya kunubde binkwaming uram ababyi eterebdum. Ani, tonda sun kunubde bankwamingnyi bisik asi ato bisik binkwandarur eboka eterebdum. Ani, tonda sun inkwamingnyi wa asi a wa ibkwandum eboka eterebdum. 21Ani, a wa nirya ibde baramingiryok Er Imtamnyi bisi ilil kuboka Imtamnyi uram kunuramingnyi nang asi wibkwandum. Tonda diboka kalikoka lilirdeirina bikdob nang asi akatei nang kankan aryi ingkirikoka wibkwandum. Ara, etekdob nang ab, Imtamnyi bisi ilil kuramingnyi nang ab akwe ingkirikoka wibminyi ura, tikeibkwandum. Ani, duknuboka, bula dordana ara, ‘Nun li,’ teneramingnyi nang akwe ingkirikoka tikeibkwandum. Ara, sun Israel nang kankan dam aryi yubwa 1.000 baryi nang asi kalingkwandinyi kibdeibkwandum. Tonda yubwa 100 baryi nang asi kalingkwamingnyi nang kibdeibkwandum. Tonda yubwa 50 baryi nang kalingkwamingnyi nang kibdeibkwandum. Ani, tonda takubaryi nang kalingkwamingnyi nang kibdeibkwandum. 22Ba, sun yuk-yuk deyok lilin tum berekci ura, sun Israel nang kankan dam aryi deyok ton kubci ura, lilinkwanung. Uca, weik deyok kubci ura, kan dam boyangankwanung. Ba, mitik deyok kubci ura, a nang sun yuk lilinkwanung. Ato kuboka kan wa caknam kibdeibkwankunung. Ukuboka sun wa tonkwa ibde binkwandarur. 23Ato kubminyi ura, Imtamnyi biryi kansi, ‘Ato kubdum,’ ebkici ba, a wa asi sasiboka ibkwandim. Ani, sun Israel nang mundu lobdobci ba, karyi asa aryi sun atei yuk-yuk binkwaming,” ebmou.

24Ba, Musa bira er yamal ebmou uram kekebmou ura, er ebmou tok nirya kunubmou. 25Ura, sun Israel nang nirya dam aryi Musa biryi malyi dinyi kunubmangnyi ninyi asi telebto akwe kuboka lilirdeirinkwamnyi nang akwe wibmouci, tikeibmou. Ara, ninyi yubwa 1.000 baryi nang kalingkwamnyi nang tikeibmou. Tonda ninyi yubwa 100 baryi nang kalingkwamnyi nang tikeibmou. Ton 50 baryi nang kalingkwamnyi nang tikeibmou. Ani, tonda takubaryi nang kalingkwamnyi nang tikeibmou. 26A nang ara sun Israel nang asi deyok kubci talak aryi liliramnyi. Uca, ikin weikto deyok kubci ura, Musa dam boyangaramnyi. Ba, mitik deyok caknamto kubci ura, sun biyuk liliramnyi.

27Ani, Musa er yamal Yitro bisi, “Ur, da birum,” ebmou ba, er mutuk dam bindobmou.

Currently Selected:

Keluaran Uram 18: MTG

Highlight

Copy

Compare