Keluaran Uram 17

Masa mutuk ab Meriba mutuk ab deyok

17:1-7

1Ani, sun Israel nang nirya Er Iya Erebdobnyi biryi ebdeiamwe to kuboka, yini mutuk si Sin dam aryi anaboka tiya bindoka kunkwamai mutuk dam bindoka kunmai. Ani, tubto anaboka tiya bindoka kunkwamangnyi ati ton mutuk dam bindoka kunmangnyi ani, tubto anaboka yuk mutuk baramnyi, ato akwe kubde baramnyi. Uki tentok tum ara Rafidim dam tiya bindoka atei dobmai. Uca, a mutuk ara sun Israel nang me kum aryi me ton kum yiramnyi. 2Me ton kum yiramnyi deyok aryi Musa bisi kerebmai. Ura, ato ebmai, “Kanci me ton karebsurum ba, nun me ton yinkwayeb,” ebmai. Uca, Musa biryi sunsi ato ebmou, “Sunda unato ati nisi kerenmanurum do? Sun unato ati, Er Iya Erebdobnyi bisi Er kubkwande to nun tenen ukurdenmarum do?” ebmou. 3Sun Israel nang a mutuk dam aryi me utaramwe ba, Musa bisi uram taleramiryi ato eramnyi, “Kan una deyok ati Mesir dam aryi nun ab, nun nermabwe ab, nun bisam yabwe ab me utankwansou ati, iniboka orminingyasoumwe do?” ebmai.

4Ura, Musa biryi Er Iya Erebdobnyi bisi ato eboka uram dobmou, “Niryi sun Israel nang asi una kubdeibkwan do? Do talak ara keil aryi yongoboka obkwamaning ati ebman,” ebmou.

5Ba, Er Iya Erebdobnyi biryi Musa bisi ato ebmou, “Sun Israel nang kan miliranking nang ab, Israel sien nang ab asi bomenekwandum. Ani, kan kama Nil kulabmomwe kama ab douboka birum. 6Ba, Nira mutuk kon Horeb keil kon asi kan urasin deiboka banmaminyi dikum tikwamanun. Ba, a mutuk keil kon asi kulabminyi ba, keil umbura aryi me anabkwamar. Ba, sun Israel nang a me asi yibdobkwaming,” ebmou. Ura, Musa biryi Er Iya Erebdobnyi ebmou to kunuboka Israel nang weik nang urasin dam asi ukubmou.

7Ura, a mutuk si ara Masa#17:7 Mutuk si Masa ara Ibrani uram deib aryi “Ukubdenmai dikum” eramnyi. ab, Meriba#17:7 Mutuk si Meriba ara Ibrani uram deib aryi “Kerebmai dikum” eramnyi. ab eboka si dobmai. Ara, Israel nang aryi Musa bisi kerebmai dinyi ab Iya Erebdobnyi bisi ukubdenmaici ato ebmai, “Nun kankan dam ara Iya Erebdobnyi ton a kurur do? Ton kum kurur do?” ebmai deyok aryi ukuboka si dobmai.

Sun Israel nang aryi Amalek nang asi obkabmai deyok

17:8-16

8Ura, Amalek nang aryi Israel nang asi Rafidim dam iyanmai. 9Ba, Musa biryi Yosua bisi ato ebmou, “Amalek nang mar ibinkwamab ati, ninyi wimasurum. Ba, ambutum ara Imtamnyi kama erebtalebmanyi tok a mutuk kon kobdob tikwaman ati,” ebmou.

10Ura, Yosua bira Musa ebmou to kuboka ninyi wibmou. Ura, anaboka Amalek nang asi mar ibinmai. Ba, Musa ab, Harun ab, Hur ab ara mutuk kon welebmai. 11Ura, Musa taruk ererongni talak ara Israel nang asi mikib dongonmou. Ba, Musa taruk luknurongni talak ara Amalek nang mikib dongonmou. 12Ato kunmou deyok aryi Musa taruk dikdik kunmou ura, keil doboka er amwetam yangabdeibmarei ba, Musa bukmou. Ura, Musa taruk asi Harun dinatam baribtalebmou ura, Hur bira dinatam baribtalebmou. Ba, taruk lulungna kum kunmou, eda iya taruk ereblobmou tok asi kiting wekmou. 13Ukuboka Yosua biryi Amalek sienyi ab, er atei nang nirya ab asi ninyi on ya aryi oboka erebdobdobmou.

14Ura, Er Iya Erebdobnyi biryi Musa bisi ato ebmou, “Aminda iya, ‘Amalek atei nang asi oboka erebdamoubwe,’ eboka teneirdenkwandarur ati, keil deici kerek sekeibdum.” Ani, Yosua amol umbura asi ato ebdum, “Amalek ninyi ara aminda teneirdena kum kubkwaming. Eda, nirya iya kum dandeibkwan,” eboka a uram minob ebmou.#Ul. 25:17-19; 1Sam. 15:2-9

15Ura, Musa biryi Imtamnyi biti dama deirin keil dungna kiknibmouci, si dobmou. “Er Iya Erebdobnyi bira nun mar bomenengbasururnyi kurur,” eboka si dobmou. 16Ani, ton ato ebmou, “Er Iya Erebdobnyi biryi nun mikib dongordeirisurur ba, mar ibanub. Ati, Er Iya Erebdobnyi biryi Amalek nang asi odei-odei iya mar bobmurubkwande ati, Imtamnyi bira mikibnyi kurur en dinyi erebtalebkwayeb,” ebmou.

Currently Selected:

Keluaran Uram 17: MTG

Highlight

Copy

Compare