Keluaran Uram 13

Er Iya Erebdobnyi biryi, “Yuma mabwe ara Niti karebkwanindarur,” eboka iya kibdeibmou deyok ab, roti bungbung erande keica dongona kum kwalina li ab deyok

13:1-10

1Er Iya Erebdobnyi biryi Musa bisi ato ebmou, 2“Sun Israel nang yuma mundu boboka yuma mabwe deibkwandum ara wiboka Niti karebkwanindarur. Ara, ninyi mabwe yuma mabwe babyi, sun winin dinyi yuma mi deibkwanduma babyi ara Niti karebkwanurum,” ebmou.#Bil. 3:13; Luk. 2:23

3Ba, Musa biryi sun Israel nang asi ato ebmou, “Arub tum aryi Mesir mutuk dam il dimnansungwe mutuk dam aryi anaboka yanmab ati, teneirden dinyi ara iya li kibdarur. Ara, o mutuk aryi anaboka yanmab ara Er Iya Erebdobnyi taruk mikib aryi iniboka boyanmasir ati, utotoa nirya bungbung erande keica ab dongobde yina mem. 4Arub anaboka yanmarum wala ara yuma wala si Abib wala aryi yanmarum. 5Er Iya Erebdobnyi biryi Israel nang asi Kanaan nang mutuk ab, Het nang mutuk ab, Amori nang mutuk ab, Hewi nang mutuk ab, Yebus nang mutuk ab ebdeiansou. Erci minob talak aryi sun abwe yabwe asi iya dib en uram eboka kunubdeiamwe. Akiryi sunti karebkwansou ati, ‘Karebkwansin,’ eamwe mutuk bobinkwansir. A mutuk ara moum yung me ab, kwiryi me ab ilinto lubanbanabde yibarur mutuk nun asi bimunyi ura, a berekmar wala berekmaci tum ara a dinyi teneirden li doboka Imtamnyi si weik ebkwandarur! 6Roti bungbung erande keica dongona kum roti ara uki tabaryi yibkwandarur. Yiramunyi ani, uki tabaryi tum kibmaci ura, Er Iya Erebdobnyi uki tum kibdeibkwandarur. 7Roti bungbung erande keica dongona kum roti ara a tabaryi uki nirya yinkwandarur. Roti bungbung erande keica ara sun dam ton a kuna mem. Ani, sun mutuk dam nirya ababyi a bungbung erande keica deiamunyi asi biksicei.

8A tum ara sun mabwe asi ato ebkwandarur, ‘A Paskah kwalina dinyi ara Iya Erebdobnyi biryi Mesir mutuk dam aryi boyananou ati, teneirden dinyi ati, Er si weik eboka molonkwaman,’ ebkwandarur. 9A kwalina ara sun teneirden dinyi sun taruk dam kubkwande. Ani, sun asok deici deiamunci, a dinyi teneirdenkwandum. Ba, Iya Erebdobnyi biryi, ‘Ato kubkwandarur,’ en dinyi sun si bambul dam kubkwande. Ara, Imtamnyi taruk mikib aryi Mesir mutuk dam aryi boboka yasou dinyi teneirdena ati ebman. 10A iya kibdeibman dinyi ara kwalina o kwali-o kwali bankwanduma nirya talebnurubkwandarur,” ebmou.

“Yuma mabwe ara Er Iya Erebdobnyi bisi karebdarur,” ebmou deyok

13:11-16

11Musa biryi Israel nang asi ton ato ebmou, “Er Iya Erebdobnyi biryi minob iya dib en uram aryi sun ab, sun abwe yabwe ab asi, ‘Ukubkwansin,’ ebdeiansou to kuboka, Kanaan nang mutuk boyasouci, sun mutuk kibdeibsou. 12Ati, sun nirya ninyi babyi, bisam winiramunyi bisam babyi, yuma mundu boboka deibmounyi mabwe ara sun dama Er Iya Erebdobnyi biti deiboka karebkwandarur. Ara, sun winiramunyi bisam yabwe aryi yuma mi yim deibci dinyi ara Iya Erebdobnyi biti dama oboka karebkwandarur.#Luk. 2:23 13Ba, ninyi mabwe yuma deibmunyi mi ababyi Er Imtamnyi biti dama deibkwandarur. Uca, a yuma mi oboka dama kum deibkwamamunyi deyok aryi a yuma mi olong ara unuboka bisam domba asi oboka dama deibkwandarur. Ba, tonda bisam keledai aryi yuma deibci mi ara Er Imtamnyi biti oboka dama deirina kum bisam deyok aryi a bisam obmanto olong ara #13:13 Keledai ara Imtamnyi dama deibmanto kum deyok ati, domba mi asi unubkwandarur.bisam domba mi asi unuboka dama deibkwandarur. Ba, kum unubmunyi ura, a bisam keledai mi asi ngang kotoklobokwandarur. 14Ani, aminda sun mabwe aryi ato eboka asibkwansing, ‘Unati ato kundarur do?’ eboka asibsingnyi ura, ato ebkwandarur. ‘Er Iya Erebdobnyi taruk mikib aryi nunsi, Mesir mutuk dam il dimnansei ai umbura aryi boboka yasou ati, ato kunub,’ ebkwandarur. 15‘Ani, Firaun kanya katabokamuryi, nunsi, “Ur bindobdarur,” eboka mundu kum loansou. Ba, Er Iya Erebdobnyi biryi Mesir mutuk nang mabwe yuma mabwe nirya ninyi mi babyi, bisam mi babyi nirya obkiriamwe. A deyok aryi ni bisam yabwe nirya mundu boboka yim yuma deibci mi ara Imtamnyi biti oboka dama deirinun. Ba, ni mabwe yuma mi ababyi Imtamnyi biti deiboka karenun. Bok, ninyi mabwe yuma mi oboka dama deibmanto olong ara bisam domba asi unuboka dama deirinun. 16Yuma mabwe dama deirina ab, bisam mi yuma mi dama deirina ab ara asing dina sun taruk dam kubkwande. Ani, teneirdena sun asok dam deibkwandarur. Ara, Er Iya Erebdobnyi taruk mikib aryi Mesir mutuk dam aryi boyasou ukunun,’ ebkwandarur,” ebmou.

Er Imtamnyi biryi Er uram keken nang iniboka bobinmou deyok

13:17-22

17Mesir weik sienyi Firaun biryi sun Israel nang asi sirya, “Ur bindarur!” eboka mundu lobmou. Ura, sun Israel nang asi Er Imtamnyi bira Filistin nang mutuk bisik ara iya dam bok, a bisik ara kum bobinmou. Ara, Imtamnyi biryi ato tenebmou, “A bisik bobaranyi asi sunci daluboka ongnyi ba, sun kanya sulbalyi asa aryi Mesir mutuk neik bisik tamuboka bingnyei,” tenen yuk bisik bobinmou. 18Ura, Er Imtamnyi biryi sun Israel nang asi yinimwe bisik Teberau kwan dam bisik kebdeiboka bobinmou. Ura, sun Israel nang aryi, ninyi ordana yin kiknibdobmai cok asi Mesir aryi anaboka binmai.

19Ura, Yusuf biryi Israel mabwe asi iya dib en uram ebdarur eboka arukmouci, minob ato eamwe. “Er Iya Erebdobnyi biryi telebto kubdeibsici ura, ni yok ababyi bobinkwanindarur,” eamwe. A deyok aryi, Musa bira Yusuf yok boboka binmou. 20Ura, sun Israel nang Sukot aryi anaboka banmai ani, Etam dam yini mutuk wiliba bindoka keis ol ai doboka mabmai. 21Kitingtam ara Er Iya Erebdobnyi duwa bum aryi sun bankwamangnyi to bomenengnamwe. Ba, lukunda ara uk buk aryi sun bankwamangnyi to berekmaci ba, baramnyi. Ukuramwe akiryi kitingtam lukunda barmururamnyi. 22Ara, ton tum kum dandobman ani, ton tum ara lak kimna kum kuramwe. Eda, duwa bum ara iya kitingtam boboka menengdamwe. Ba, lukunda ara iya uk buk aryi boboka menengdamwe ba, sun Israel nang barmururamnyi.

Currently Selected:

Keluaran Uram 13: MTG

Highlight

Copy

Compare