Keluaran Uram 12
12
Kwalina si Paskah kwalibmai deyok
12:1-28
1Er Iya Erebdobnyi biryi Musa ab, Harun ab asi Mesir mutuk dam aryi ato ebmou.#Im. 23:5; Bil. 9:1-5; 28:16; Ul. 16:1-2 2“A wala aryi sun wala nungna yuma nukalibkwandum. Ba, kwalina o kwali-o kwali bankwanduma nirya ara a wala asi yuma wala kibkwandum. 3Sun Israel nang a nirya asi ato ebmar ebdurum, ‘A wala tanggal 10 ara sun yala kundarur to ai tentok ara bisam domba mi tentok dobkwandarur. 4Ba, sun ai ninyi mitikanun kuramingnyi aryi bisam domba dobman kum kubci ura, sun ai dam kuramingnyi ninyi ab antanibdobkwanung. Bisam domba mi deyok ara sun yuk-yuk aryi kubmaci to kuboka dobkwamandarur. 5Sun bisam domba dobkwamamunya ara bisam domba kum kambing kum, yim asi u yala nirya ton yirdena kum kuanci domba nun kwalina tentok kwalibmangnya bisam akwe dobkwamandarur. 6A bisam domba ara yuk wibdeiboka wininmamunyi ani, a wala tanggal empat belas kubci ura, sun Israel nang nirya bulubmunyi ura, sintam ara obkwandarur. 7Obmunyi ura, a domba yibmamunyi ai asi, ining mitikanun doboka bublan dina-dina abyokomna ab, bublan eitam mardeirin co ab asi lubkwandarur. 8Ba, a domba tub ara a tum lukunda aryok yibkwamanung. Ba, uk dabmangnyi tub ara roti bungbung en keica dongona kum roti kwaning ab, sik buna ab yibkwanung. 9Eda, a bisam tub yik yina ab, me umbura yuboka yina ab ara mem. Ani, kisok ab, yan ab, deisu ab ababyi ukubmaning uk daboka yibkwandarur. 10Ani, a domba tub kwel deibmamunyi ba, maberengna ara mem. A kwel deibmamunyi ba, maberekmaci dinyi ara uk dabkwandarur. 11Paskah kwalinina yibkwamamunyi to ara ato kuboka yibkwandarur. Sun der arikna arikdobmunyi ura, yan karuk ongobdobkwandarur. Ura, kama doubdobmunyi ura, birib-birib eboka yibkwandarur. A yina ara Er Iya Erebdobnyi biti kwalina si Paskah ara ato kuboka yibkwandarur.
12Arub lukunda ara Ni Iya Erebdobnyi biryi Mesir mutuk dam yibinkirikoka, ninyi mabwe yuma mi babyi, bisam yala nirya mi babyi nirya obkiribkwaman. Ani, Mesir mutuk kwemdeina nirya mambul weik dinyi kareboka wenebkwaman. Nira sun Nai Iya Erebdobnyi kunun ati ebman. 13Sun bukmamunyi ai ara ining lubmamunyi aryi sisa ato kubkwandum. Ba, a ining lubmamunya asing eibnyi ura, sun atei ara bisibokwamasin. Mesir mutuk weneboka mambul dinyi karenmanyi ura, sunda ton kum obminikwansin. 14Arub ara aminda teneibdenin binkwandum uki tum berekmar. Sun mabwe odei-odei binkwanduma nirya Ni sun Nai Iya Erebdobnyi biti kwalibde binkwanurum. Sunci aminda ukuboka kwalinkwandum ati iya dinyi kibdeibdarur.#Kel. 23:15; 34:18; Im. 23:6-8; Bil. 28:17-25; Ul. 16:3-8 15Uki tabaryi ara roti bungbung ena dinyi dongona kum roti kwaning asi yibkwandarur. Yuma tum ababyi roti bungbung en dinyi sun ai deiamunya nirya bai donokwandarur. Unanyi biryi roti bungbung erande dinyi asi yuma tum aryi kuboka uki ta tum ton da yibmaci ura, anyi bira Israel nang kankan aryi kum dandeibkwanung.
16Sun buluboka wengna tum, Er Imtamnyi biti teneina yuk tum, yuma tum ton, uki ta tum ton bulunkwandarur. A tum ara sunci wa ina mem! Eda, ninyi yina dinyi akikwe kiknibdeibdobkwandarur. 17A deyok aryi roti kwaning bungbung en keica dongona kum kwalina iya ukunkwandarur. Ara, arub tum kobdob akiryok, Niryi sun Israel yala olong yuk-yuk Mesir dam aryi anaboka bobinkwansin tum sirya kikdeibman. Ati, aminda sun mabwe odei-odei nirya teneibde binkwandum uki tum kibdeibman. 18Yuma wala, a wala tanggal 14 berekci tum sintam ara roti bungbung ena dongona kum roti yibkalibkwandarur. Yibde baramunyi ani, a wala akiryok tanggal 21 berekmaci tum sintam sirya yibkwandarur. 19Uki tabaryi nirya ara sun ai umbura roti bungbung erande keica ara deirina mem. Tingyangan nang babyi, Israel nang yoka nirya babyi, roti bungbung erande keica ab yibmaci ura, sun Israel nang kankan aryi obkabkwanung. 20Utotoa nirya roti bungbung erande keica ab dongobde yina mem. Sun kuramunyi ai nirya roti bungbung ena keica dongona kumkum dinyi akwe yinkwandarur,’ sun Israel nang asi ebkwandarur,” ebmou.
21Ura, Musa biryi Israel weik nang nirya nabmou ura, ato ebmou, “Sun yala yuk-yuk ara Paskah ati bisam domba oboka kwalibkwayeb ati, bisam kambing ab, domba ab borbindarur! 22Ani, co si hisop bisila kouboka domba ining kwerdongon meyok umbura toubdongoboka bisik bublan eitam mardeiraming co ab, abyokomna dina-dina ab lubkwandarur. Lubmunyi ura, sunda ai dam ninyi mitik tentok ababyi sangkwetena mem. Ai akwe bukmamunyi tok asi berekwandur. 23Ba, Er Iya Erebdobnyi biryi Mesir mutuk nirya ninyi weneboka obukde yibinkwamar. Er Iya Erebdobnyi biryi dinmaci uca, ining bublan eitam mardeirin co ab, bublan dinatam-dinatam ining eibci ura, bisibokwamar. Ura, a ninyi obde yibananyi bisi, ‘Ur akai wengbindoka obdarur,’ kum ebkwamar.#Ibr. 11:28
24A dinyi ara iya kubkwande dinyi ati, sunbabyi, sun mabwe babyi iya talebnuruamunyi asi iya kubkwande. 25Ani, sun Nai Iya Erebdobnyi biryi karebkwansir mutuk dam minob ebdeibsou to Kanaan dam sirya wengbimunyi ura, a tum ara Iya Erebdobnyi bisi moloboka bisik bublan dam ining lubkwandarur tum kibkwandarur. 26Sun mabwe aryi, ‘Ato kundarur ara unato ati kundarur do?’ eboka asibsingnyi ura, 27ato ebkwandarur, ‘Er Iya Erebdobnyi biryi Mesir mutuk nang obukde yibanmou uca, nun atei nang Israel nang ai ara bisibokmou. A deyok aryi Imtamnyi biti teneirden kwalina li donub,’ ebkwandarur,” ebmou. Ura, sun Israel nang luknubdongoboka Er Imtamnyi bisi molobmai. 28Ukuboka Er Iya Erebdobnyi biryi Musa ab, Harun ab asi ebdeibmou to kuboka sun Israel nang aryi kunubmai.
Weik wenena takubaryi dinyi yuma mabwe obde yibinmou ba, sun Israel nang Mesir dam aryi anaboka binmai deyok
12:29-42
29Ura, a lukunda ara Er Iya Erebdobnyi biryi Mesir mutuk yuma yandua mabwe obde yibinmou. Yuma ara sienyi Firaun mi erebdob sokon bukwandanyi aryi obkalibmou akiryi kuboka, obde binmou ani, iya luknubdob ninyi yu nang asi tabwe deboka malyi kun nang wenen ai dongoramnyi nang sun mabwe sirya orbinmou. Ani, bisam yabwe ababyi yuma mi ara nirya obkiribmou.#Kel. 4:22-23 30Ura, Firaun ab, er wa in nang nirya ab, yuk Mesir nang nirya ab a lukunda bukokmai ura, kekenmai uca, Mesir mutuk nirya engena lu enmou. Ara, ai tentok ababyi mi dina kum ai mitik ton kum kubmou.
31Ura, a lukunda aryi Musa ab, Harun ab asi Firaun biryi nabmou ura, ato ebmou, “Ni mutuk dam aryi anaboka ukuca bindobdarur. Sun bitinyi babyi, sun Israel nang babyi nirya ukuca ur da bandarur. Sunci, nisi ‘Lobdeibsurum,’ erurum to kuboka, sun Nai Iya Erebdobnyi bisi ur molorbindarur. 32Sun bisam yabwe kambing babyi, domba babyi, lembu babyi, sapi babyi nirya ur bobde bindarur. Ukuca bindarur! Ani, nibabyi kisal dangna dinyi sasibdeibnumuncok bindarur,” ebmou. 33Ani, Mesir mutuk nang ababyi nirya titik-titik eboka, “Nun nirya dibkiribibyei ati, sun Israel nang a mutuk kuna nun li, da banung,” ebmai.
34Ura, sun roti bungbung ena dongona kum roti kiknibkwamangiryi dongoraming dinyi asi aminda inibkwamai to kuboka kaluna aryi akuboka takubdobmai. 35Ura, sun Israel nang Musa ebmou to kunuboka, Mesir nang asi dengna weik keil emas ab, perak ab, kaluna ab molobdobmai.#Kel. 3:21-22 36Ara, Er Iya Erebdobnyi biryi Mesir ninyi kanya ara yongon kanya karebmou ba, sun molobmai to kunuboka karebmai.
Ukuboka Mesir ninyi bona daluboka bobdobmai. 37Ukuboka sun Israel nang Raamses aryi kuboka Sukot dam binmai. Ninyi yoka yubwa 600.000 baryi dikum binmai. Ba, nerabwe ab mabwe ab ara nukiribmang kumto kuboka, tukwe bisik binmai. 38Ani, yuk mutuk ninyi-yuk mutuk ninyi ababyi sun Israel nang asi milibmai ba, tonkwa binmai. Ani, sun bisam yabwe kambing ab, domba ab, lembu ab, sapi ab yubwa ilinto ababyi sun bobde binmai.
39Mesir dam aryi roti iniboka bobdamnya ara bukam kum eda ilil roti kiknibmai ura, bungbung erande keica dongona kum roti kiknibmai. Ara, roti bungbung ebde welerande keica dongona kum kubmai ara Mesir dam aryi, “Uki kuna li,” tenen yakdonokmai ba, bisik kona kirona kum kuamnyi deyok aryi ato kubmai.
40Sun Israel nang Mesir mutuk kuramnyi talak ara kwalina yubwa 430 baryi kwaliamnyi.#Kej. 15:13; Gal. 3:17
41Sirya kwalina yubwa 430 baryi kwalibmai ura, a tum kobdob berekmou tum aryok Er Iya Erebdobnyi mabwe Israel ninyi Mesir dam aryi anabmai. 42A lukunda ara Er Iya Erebdobnyi biryi sun Israel nang asi iya kalikokmouci, bobinmou. Ani, a lukunda ara Israel nang sun mabwe odei-odei binkwamnyi nang aryi Er Iya Erebdobnyi bisi teneiboka, Er si weik ebde binkwamnyi ati, kalikoka dibde bun tum berekmou.
Kwalina si Paskah li aminda kwalibde binkwamnyi to asi iya kibdeibmou deyok
12:43-51
43Er Iya Erebdobnyi biryi Musa ab, Harun ab asi ato ebmou, “Ara, Paskah kwalina li ara ato kubkwandarur. Sun yuk atei nang Israel yala kum nang ara a kwalina li ninyi tentok ababyi a yina ara yina mem. 44Eda yuk atei nang asi dekamingiryi, sun wa in nang kiboka den bam sekamingnyi nang asi ur yibkwanung. 45Tingyangan nang ab, sun wa iransing nang ab ara yina mem. 46A Paskah kwalina yina yinmamunya ara tentok ai umbura akwe yibkwandarur. A bisam tub yinmamunya ara mitik tentok ababyi ai dam bosangkwetena mem. Ani, yok ababyi bulangna mem.#Bil. 9:12; Yoh. 19:36 47Sun Israel nang Imtamnyi bisi dib tenen nang nirya a Paskah kwalina li iya ukunkwandarur. 48Tingyangan nang sun kankan dam iya yandoka kurandinyi bira Er Iya Erebdobnyi biti Paskah tonkwa kwalibkwamangnyi ura, den bam sekingnyi bok asi paskah kwalin dam binkwandur. Ba, a mutuk nang kobdoba kibkwandur. Ba, ninyi tentok ababyi den bam kum sekaminginyi bira a yina kum kubkwandur. 49A kwalina deyok ati, ‘Ato kubkwandarur,’ ena ara a mutuk nang yoka babyi, sun kankan dam tingyangan nang babyi tentok dinyi akwe kunubde binkwandum,” ebmou.
50Ura, sun Israel nang nirya Er Iya Erebdobnyi biryi eamwe to akwe kunuramnyi. Ara, Musa ab, Harun ab asi ebdeiamwe to ababyi kunuramnyi. 51Ani, a tum kobdob akiryok Iya Erebdobnyi biryi sun Israel nang Mesir mutuk dam aryi Israel yala olong yuk-yuk wibmou ura, boboka anabmou.
Currently Selected:
Keluaran Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
