Keluaran Uram 11
11
Liki takubaryi dinyi ara weik wenena yuma mabwe obmou deyok
11:1-10
1Iya Erebdobnyi biryi Musa bisi ato ebmou, “Niryi weik wenena tubto ton Mesir sienyi dam ab, Mesir mutuk dam ab karebkwaman. Ukuboka karebnyi ura, a mutuk dam aryi sunsi, ‘Ur bindobdarur,’ eboka yakdonokwamasir. 2Sun sal aryi dengna weik keil si emas ab, keil si perak ab Mesir ninyi sun ai dam kuramnyi ninyi asi molobdobkwaming. Ba, nerabwe ababyi sun ka yabwe asi molobdobkwaming ati, sun a mutuk nang asi ur ebdum,” ebmou. 3Ura, Iya Erebdobnyi biryi Mesir ninyi kanya asi yongon kanya karebmou ba, bongna kanya kubmou. Ura, Israel nang ati bona karebmai. Ani, Musa bibabyi Mesir sienyi wa in nang ab, Mesir ninyi nirya si bikdobnyi kuramwe. A deyok aryi sun Israel nang asi bona karebmai.
4Ura, Musa biryi, “Iya Erebdobnyi biryi ato ebmar,” ebmou, “Lukunda dukduk en ara Mesir mutuk nirya yibinkwaman. 5Ba, Mesir mutuk nirya yuma mi deiamingnya ara nirya dibkwamang. Yuma ara Mesir sienyi erebdob sokon dam yuma mi aryi dibkalibkwamar ani, sirya ara Mesir nerabwe asi luknubdob nerabwe ninyi atei me ilingna nerabwe sun mabwe yuma mi sirya dirbinkwaming. Ani, bisam yabwe yuma mi ababyi dibkwaming. 6Ba, Mesir mutuk nirya ngolokoka weik engena engebkwamang ara duti-duti eboka engebkwamang. Ara, minob ton ato kuna kum kurur to kubkwamar. Ani, aminda ababyi ton ato kum kubkwande to nun asi kunubkwande. 7Ani, kam aryi Israel nang asi ngaruru ebman to kum kubkwamar. Ara, ninyi ati kum, bisam yala ati, kum ababyi uram kaibman kumto dinyi kubkwamar. Akiryi Israel nang ara yukto teleb kibdeibnyi ura, Mesir nang asi obkiribkwaman. Ba, sunci Nisi, ‘Iya Erebdobnyi dib kurur,’ tenebkwaning,” ebmou. 8Ani, Musa biryi ton ato ebmou, “Mesir sienyi kan wa in nang aryi, ni dam luknubdongoboka nisi ato eboka molobkwamaning, ‘Musa kan ab, kan atei nang wa irmilikunung nang nirya ab asi, “Ukuca, anaboka bindobdarur,” ’ebsingnyi ura, anaboka bindobkwamab,” ebmou. Ura, Musa er yu weik wekmou ba, Mesir sienyi takloboka bindobmou.
9Ura, Iya Erebdobnyi biryi Musa bisi ato ebmou, “Mesir sienyi biryi kan uram kum kekekurur ara weik wenena er urasintam asi Mesir mutuk ilinto kunubdeibkwan ati, kunun,” ebmou. 10Musa ab, Harun ab aryi Mesir sienyi urasin dam weik wenena ilinto kiknirandei. Bok, Iya Erebdobnyi biryi Mesir sienyi kanya kat kibdeibokamwe ba, Israel nang asi er mutuk dam aryi, “Ur bindarur,” kum eamwe.
Currently Selected:
Keluaran Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
