Keluaran Uram 10

Liki inbaryi dinyi ara weik wenena kwising karebmou deyok

10:1-20

1Er Iya Erebdobnyi biryi Musa bisi ato ebmou, “Niryi Mesir sienyi ab, er wa in nang ab sun kanya kat kibdeibkwaman ati, Mesir sienyi dam birum. Ba, a weik wenena sun urasin dam karebkwan. 2Ba, aminda sunci kan yaldakde binkwandim mabwe asi ato eboka nukarebkwandim. Ara, Niryi Mesir ninyi dam asi, ilil tenen dinyi kikniboka, weik wenena weneranse, dinyi nukarebkwandim. Ukuboka nukarebminyi ba, sunci Nisi, ‘Erda Iya Erebdobnyi dib kurur,’ tenebkwaning,” ebmou.

3Ba, Musa ab, Harun ab Mesir sienyi dam binmarei ura, ato kuboka asibmarei. “Ibrani nang molonubnyi Iya Erebdobnyi biryi ato ebmar. Kanda una talak aryi, ‘Ni malyito kunun,’ eboka ni urasin dam aryi luknubdankwandim. Ani, Ni wibdeibse nang asi, ‘Ur bindarur,’ eboka mundu lobmimba, Niti dama deiboka molorbinkwaning do? 4Kanci Ni wibdeibse nang asi, ‘Ur bindarur,’ kum ebminyi ura, ambutum ara niryi kan mutuk asi kwising karebkwamakin ati ebman. 5Kwising aryi mutuk nirya amubingnyi ba, tukwe kib ara ninyi aryi asing eibman kum kubkwamar. Ba, a kwising ara lumtaia mo aryi oramwe ani, sun wa dam sunti kabdeibsou co nirya yibkiribokwaming. 6A kwising aryi kan ai ab, kan wa in nang ab, Mesir mutuk nang sun ai nirya dukubkwamar. Sun nai yabwe ai ab, sun abwe yabwe ai ab minob yuma a mutuk dam deibmai talak aryi kuboka, arub ababyi ton kum asing eiramnyi to dinyi kubkwaman,” ebmou. Ura, Musa tamuboka Mesir sienyi takloboka bindobmou.

7Sirya ato kubmou ura, Mesir sienyi er wa in nang aryi ersi ato ebmai, “Anyi bira uki unabaryi nunsi ebde younkwansir do? Israel nang asi, ‘Ur bindarur,’ ebdum. Ba, sun Nai Iya Erebdobnyi bisi molorbinkwaming. Mesir mutuk ninyi nirya obkiriboka kum dandeibkwansir ara bingdum do?” ebmai. 8Ura, Musa ab, Harun ab asi tubto tamuboka boyanmai ura, Mesir sienyi biryi sun si ato ebmou, “Sun Nai Iya Erebdobnyi bisi ur molorbindarur. Unanyi-unanyi Iya Erebdobnyi bisi molorbinkwaming do?” ebmou. 9Uca, Musa biryi ato ebmou, “Nun nirya kabir nang babyi, wis nang babyi, nun mabwe sal babyi, nun nermabwe babyi, nun bisam kambing babyi, nun bisam domba babyi, nun bisam lembu babyi, sapi babyi nirya binkwamab. Ara, nun Nai Iya Erebdobnyi biti weik kwalina kwalibkwamab ati lobdeibsurum,” ebmou. 10Uca, Mesir sienyi biryi sunsi ato ebmou, “Niryi ur bindarur eboka mundu lobsinyi ba, sun mabwe ab baromunyi ura, Iya Erebdobnyi biryi sun si milibkwamasir! Ura, kan tenebmarim to ara, ‘Iya bobde binkwan,’ tenen enmarim ara ni bikmakin. Ato kubkwamarim ara, ‘Ni li,’ tenebman. Ati, kan tenen dinyi kunubcei. 11Ato kuma, eda ur bindobdarur! Binkwamarum bok, nerabwe ara a kunmangnyi ba, sal akwe sun Nai Iya Erebdobnyi bisi li doboka molorbinkwandarur. Sunci, ‘Ukubkwayeb,’ ebmarum to,” ebmou. Ura, Musa ab, Harun ab asi Mesir sienyi urasin dam aryi yakdonokmou.

12Iya Erebdobnyi biryi Musa bisi ato ebmou, “Kama taruk dobtaleboka Mesir mutuk tukwe deici tam takdongobdum! Ba, kwising anabokabdiryi Mesir mutuk nirya oblibkwande. Kwising anabci ura, tukwetam kurur co nirya lumtaia mo aryi obkiribmouci, takdongobmou co nirya yibkiribkwande,” ebmou. 13Ura, Musa biryi kama aryi Mesir mutuk deici tam ukdongobmou. Ba, Iya Erebdobnyi biryi yeinya karebmou ba, yaletam kuboka aryi a mutuk dam diniryanmou. Ura, a tum yeinya dorlonmou tok asi inibmou. Ani, lukunda ababyi yeinya dorlonmou tok asi berekmou akiryi yaletam yeinya aryi kwising boyanmou. 14Kwising yanmai ura, Mesir mutuk nirya amubmai ara ilinto. Minob talak ara a kwising yubwa ara ato ton kum kuramwe. Ani, aminda ababyi a kwising yubwa ato ton kum kubkwande to asi ilinto kubmou.

15A kwising yubwa aryi tukwe asok nirya sinibmou. Ba, Mesir mutuk nirya kwising yubwa aryi kunuk dakmou. Ura, kwising aryi tukwetam betengnamwe dinyi nirya ab, lumtaia mo aryi obkiriamuryi, takloamwe co du nirya ab yibkiribmai. Ato kubmou ba, Mesir mutuk nirya yikmakla bol ton mitik ton tangdongona kum kubmou.

16Ura, Mesir sienyi biryi Musa ab, Harun ab asi ola nabmou ura, ato ebmou, “Niryi sun Nai Iya Erebdobnyi ab, sun ab uram dangbisisunun ara malyi dinyi kununun. 17Ni malyito kununun dinyi asi a talak akiryok libdobnururumci, sun Nai Iya Erebdobnyi bisi molobdurum. Ba, talya aryi dibdeibmaninto dinyi ara kum kubkwanir ati,” ebmou. 18Ba, Musa bira Mesir sienyi takloboka Iya Erebdobnyi bisi molorbinmou. 19Ura, Er Iya Erebdobnyi biryi yeinya tamubdeibmou. Ara, kitingbantam yeinya mikib ilinto doboka a kwising yubwa nirya boboka me Teberau kwan dongobmou. Kwising mitik tentok ababyi ton Mesir mutuk dam tangdongona kum kubmou. 20Uca, Iya Erebdobnyi biryi Mesir sienyi kanya kat biribdeibokmou ba, Israel nang asi, “Ur bindarur,” eboka mundu kum lobmou.

Liki toubnibaryi dinyi ara weik wenena kunuk dakmurubmou deyok

10:21-29

21Iya Erebdobnyi biryi Musa bisi ato ebmou, “Kan taruk aryi imtam asi ukderum. Ba, Mesir mutuk nirya kunuk dakwande. Ba, ninyi ara a kunuk asi talebisibdankwaming,” ebmou. 22Ura, Musa biryi imtam asi taruk ukdongobmou ba, kunuk Mesir mutuk uki winiryi ibmurubmou. 23Ba, ninyi tentok ababyi sun kwit yabwe asing eirirdana kum kubmai. Ani, lukunda winiryi ara mabloamnyi tok burongna kum kubmai. Uca, sun Israel nang nirya kuramnyi mutuk dam ara berengdamwe.

24Ura, Mesir sienyi biryi Musa bisi nabmou ura, ato ebmou, “Ur anaboka sun Nai Iya Erebdobnyi bisi molorbindarur. Eda, sun bisam kambing ab, domba ab, lembu ab, sapi ab ara ur takloboka bindarur. Ani, sun mabwe ara ur sun ab tonkwa bindarur,” ebmou. 25Uca, Musa biryi ato ebmou, “Iya Erebdobnyi biti dama deiboka uk daboka molobkwabmab dinyi ara kanci ton, ‘Ur bobindarur ebsiminyi ba,’ nun Nai Iya Erebdobnyi biti kiknibdeibkwayeb. 26Ati, nun bisam yabwe yuk-yuk ababyi bobinkwanub. Bisam kamyoa tentok ababyi ton kum taklobinkwamab. Ara, nun Nai Iya Erebdobnyi biti nun dama deiboka molobkwamab dinyi ara unatoa aryi molobkwamab do? Nun kum bikmab,” ebmou. 27Uca, Iya Erebdobnyi biryi Mesir sienyi kanya kat biribdeibokmou ba, Israel nang asi “Ur bindobdarur,” eboka mundu kum lobmou ba, anaboka kum binmai. 28Ura, Mesir sienyi biryi ersi ato ebmou, “Obkinyob ati bindobdum! Kan ni urasin tubto kum eibkwanirim. Ni urasin eiriniminyi tum ara dibkwandim,” ebmou. 29Ba, Musa biryi ato ebmou, “Kanci a ebmarim to ara diba! Niryi kan urasin ton kum eirinkwankin!” ebmou.

Currently Selected:

Keluaran Uram 10: MTG

Highlight

Copy

Compare