Ester Uram 9

Sun Yahudi nang aryi sun mar iramnyi nang asi obmai uram deyok

9:1-19

1A kwalina wala amolbaryi wala si ara Adar aryi tanggal 13 ara weik sienyi biryi uram eboka arukdeiamwe dinyi kunubkwamai talak dam kubmou. A uki tum ara sun Yahudi nang sun mar iramnyi nang ara, “A uki tum ola kurbici ba, Yahudi nang asi muna obdongobkwayeb,” tenen dibde buramnyi. Asi sun teneramnyi to kum kubmou. Eda, danguboka Yahudi nang aryi sunsi muna obdongobmai. 2Ba, Yahudi nang aryi, “Sunsi mar iramnyi nang nirya wiboka obkwayeb,” tenen weik sienyi Ahasyweros taleamwe mutuk sun kuramnyi atei dam nirya bulubmai. Ba, Yahudi nang aryi a mutuk nang nirya asi obkiribmanto kubmai ba, sun ilil aryi ninyi tentok aryi tamuboka sun Yahudi nang asi obman kum kubmou. 3Ba, a mutuk si erebdob nang ab, weik nang ab, sien nang ab weik sienyi kuramwe atei dam wa iramnyi nang ab aryi, “Mordekhai biryi nun nirya obkiribkwamasir,” tenen aryi sun ilil kubmou deyok aryi sun Yahudi nang tam makeibdobmai. 4Ara, Mordekhai bira weik sienyi kuramwe atei dam ara erebdob wa dobdobmou uca, er mikib ara tabakdongobde baramwe. A deyok aryi ninyi aryi erti, “Weik sienyi biryi Yahudinyi Mordekhai bisi erebdeiboka mikib ilinto karebmar,” eboka dantam-dantam nirya ebdanin yibinmai ba, kekebmai ura, ninyi ilinto aryi sun Yahudi nang asi milibdobmai. 5Ba, sun Yahudi nang aryi sun mar iramnyi nang asi muna obdongobmai. Sunci ninyi on ya tuna aryi oboka kum daneibmaici, muna obdongobmai. Ura, sunci, “Obkwayeb,” tenebmai nang mar iramnyi nang asi obmai ba, “Takdongobkwayeb,” tenebmai nang ara takdongobmai ba, kam kubdobmai. 6A onmai tum ara Yahudi nang aryi weik sienyi kuramwe atei dam Susan atei dam ara ninyi 500 baryi ton obmai. 7Ura, tonda Haman mabwe takubaryi nang ababyi obmai. A obmai nang sun si ara Parsandata ab, Dalfon ab, Aspata ab, 8Porata ab, Adalya ab, Aridata ab, 9Parmasta ab, Arisai ab, Aridai ab, Waizata ab asi obmai 10A nang ara sun mar iramunyi Hamedata mi si Haman mabwe takubaryi obmai bok, sun bona talena ara taruk ton lakoka talerdena kum kubmai. 11Ura, ninyi aryi Susan atei dam obmai ninyi ara weik sienyi bisi, “Ninyi ukubaryi obmang,” ena ara sirya ebmai. 12Ba, weik sienyi biryi er ner Ester weik sien ner asi ato eboka arukdeibmou, “Ura, ni kunun atei dam Susan atei dam akibabyi Yahudi nang aryi ninyi 500 baryi ab, Haman deiamwe mabwe takubaryi ab obmang. Yuk atei dam ara wanok obde banmang kum, nun kum bikmanim. Ati ura, unatoa molobdobkwindim do? A molobdobminyi dinyi ababyi karebkwamakin. Tonda kanda unatoa asi teleb tenebmarim do? Kan teleb tenebmaminyi dinyi ara kunubdeibkwamakin,” ebmou. 13Ura, Ester biryi ato ebmou, “Nai, kanci teleb tenebminyi ura, ‘Ur,’ eboka Yahudi nang ati mundu lobdeibminyi ba, Susan atei a kunung aryi arub kubmang to ambutum ababyi ukubnung. Ani, Haman mabwe takubaryi sirya obmanga sun nong tukwi ara cang co dub biriblobnung,” eboka molobmou. 14Ba, weik sienyi biryi a ebmou to kuboka mundu lobdeibmou. Ba, weik sienyi biryi arungna uram Susan atei aryi kerek sekoka dobkwetebmai ura, Haman mabwe takubaryi nang dibmaia sun tukwi ara cang co ikamnya dub biriblobmai. 15Wala si Adar wala asi tanggal empat belas ara sun Yahudi nang Susan atei kuramnyi nang bulubdobmaici, akatei dam kuramnyi nang asi ninyi tubto 300 baryi obmai bok, sun bona talena ara taruk ton lakoka talerdena kum kubmai. 16Ba, sun Yahudi nang yuk atei yuk atei kuramnyi nang ababyi sun kuramnyi atei dam tentok ai buluboka wekdobmaici, sun kam kun dinyi kalikdandoka, “Nun mar ordana nang aryi oryasingnyei,” tenen sun damnyi kalikdandobmai. Sun Yahudi nang aryi sunsi mar iramnyi nang asi obmai nang nirya ara 75.000 baryi nang obmai. Bok, a obmai nang sun bona talena ara taruk ton lakoka talerdena kum kubmai. 17A ukubmai tum ara wala si Adar wala asi tanggal 13 aryi ukubmai. Ba, tanggal 14 ara sunsi mar iramnyi nang asi ona takmai. Ba, a bitinyi uki tum ara sun Yahudi nang weik uki tum kibdeibmaici, sun kanya kilkil aryi kwalina kwaliboka yibkalibmai.

18Sun yuk atei yuk atei kuramnyi Yahudi nang ara ato kubmai. Bok, sun Susan atei kuramnyi Yahudi nang ara tanggal 13 yuma tum babyi, tanggal 14 bitinyi tum babyi ara Susan atei keta buluboka wekmaici, sunsi mar iramnyi nang asi obmai. Ba, tanggal 15 winiryi tum ara takmaici, a uki tum ara sun weik uki tum kibdeiboka sun kanya kilkil aryi kwalina kwaliboka yibkalibmai. 19A deyok aryi sun Yahudi nang weik atei kuramnyi nang ara wala Adar wala tanggal 15 asi weik uki tum kibdeibmai bok, sun mitik-mitik atei kuramnyi Yahudi nang ara tanggal 14 ara sun weik uki tum kibdeibmai. Ura, sun kanya kilkil aryi kwalina kwaliboka yiramnyi. Ba, a uki tum ara kanya karyi asa aryi yina bongkiringdan tum kibdeibmaici, iya ukuramnyi.

Sun Yahudi nang aryi, “Weik kwalina tum si Purim ara iya kwalibde bankwayeb,” eboka uram dobdeibmai uram deyok

9:20-32

20Ura, Mordekhai biryi sun mar iramnyi nang asi obmai deyok ara kerek sengna umbura sekdongobmou ura, a kerek sengna ara sun Yahudi nang weik sienyi si Ahasyweros taleamwe mutuk kuramnyi dam atei kuramnyi nang babyi era atei kuramnyi nang babyi ati deibmou. 21A kerek sekeibmou ara ato ati sekeibmou, “Sun kunkwamnyi talak nirya wala si Adar uki bitinyi tanggal 14 ab, tanggal 15 ab ara kanya teneiboka kwalingkwanung,” tenen sekdeibmou. 22Ara, “A uki tum aryi sun Yahudi nang asi mar iramnyi nang nirya obkaboka kalikdandobmai ani, tonda a wala aryi mambul kanya boramnyi dinyi danguboka kilkil kanya bobmai. Tonda, a tum aryi engen kanya boramnyi danguboka lengleng kanya bobmai. Ba, a uki tum berekci ura, sunci kanya kilkil asa aryi kwalina kwaliboka, yina yuboka bokirikdandoka utotoa kum nang ati ukutoto kareboka kimkwamnyi deyok aryi a uki tum yuk wibdeibkwayeb,” eboka kerek sekoka deibmou. 23Ba, sun Yahudi nang sun kanya yuk aryi, “Nun mar ordana nang asi muna kibdongobmab uki tum ara iya kanya teneinkwayeb,” tenen a uki tum sirya kunubkalibmai. Asi, Mordekhai biryi sunsi, “A uki tum ara iya weik uki tum kibdeibkwayeb,” eboka arukmouci, tabakdongoboka kerek sekeibmou ba, sunci kanya teleb kuboka er uram dobdobmai. 24A weik kwalina si ara Purim eboka si dobmai. A uki tum kunubmou dinyi nirya kununa kabul talak ara Agag yalanyi Hamedata mi si Haman bira Yahudi nang asi yu boramuryi, “Yahudi nang nirya ara obkaboktinyi,” teneramwe. Ara, “Una uki tum aryi obtinyi asi kikiman do?” tenen, “Sekni yamin deirin dinyi si purim aryi lak kibci uki tum bikoka sun Yahudi nang asi oboka kum daneibkwayeb,” tenen sekni yamin deirin dinyi si Purim yamin deibdeiamwe. 25Bok, a teneramwe dinyi asi Ester biryi kekebmouci, weik sienyi dam ebkarebmou. Ba, weik sienyi biryi kerek sengna biriman aryi, “Haman er mar moun yirur dinyi bisik sekoka ersi obdarur,” eboka arukmou. Arukmou ba, Haman er wisinyi nong ara cang co dub biribkweteblobmai ba, dibmou. Ba, er mabwe takubaryi nang nirya ara obmai ba, dibmaia sun tukwi ara co cang dub biriblobmai. Ato kuboka Yahudi nang mar moun yiramunyi Haman erdamnyi obdanmou. 26Haman biryi yin yamin deiriramnyi dinyi si purim deiamwe deyok aryi sun Yahudi nang aryi, a uki tum si ara, “Purim,” eboka si dobmai. Ara, Mordekhai biryi sun Yahudi nang asi kerek sengna deib aryi arukmou to, 27Tonda, sunci ukuramnyi dinyi asing eiriramnyi deyok aryi sun Yahudi nang aryi a uki tum ara wiboka iya kanya teneibde bankwamnyi uki kibdeibmai. A dinyi ara sun kubde bankwamnyi ab, sun mabwe nermabwe odei-odei kibde bankwamnyi ab, yuk atei nang asi sun Yahudi nang tam kibdobmai nang ab aryi ebdeibdanin bankwamnyi dinyi kibdeibmai. Ura, sun Yahudi nang aryi, “A uki tum ab a talak ab ati kerek sekdeiamibyi dinyi ara kwalina o kwali-o kwali bankwayeba nirya ara kum bisibkwande,” eboka uram sekwetebmai. 28Ura, tonda, “Nun Yahudi nang kubde bankwayeba ninyi dika nirya babyi, ninyi Yahudi nang kubde bankwayeba nirya babyi, Yahudi nang kunkwayeb atei nirya babyi, Yahudi nang kunkwayeb mutuk nirya babyi ara a uki tum ati kanya teneiboka nun kunkwayeba nirya luba kimna kum kunkwayeb. Tonda, nun mabwe yaldakoka odei-odei bankwayeba nirya ara a uki tum asi kum danarsinina kum kubkwayeb, eda iya kanya teneiboka kwalina kwalibde bankwayeb,” eboka uram doboka deibmaci sekwetebmai.

29Ura, ninyi si Abihail nebnyi si Ester weik sien ner ab, Yahudinyi si Mordekhai ab sun tonkwa aryi kerek sengna liki bitinyi dinyi ton kerek sekoka kwalina si Purim deyok ati sekeibmarei. Ara, “A uki tum asi bita-bita ebkataboka katabum ebdeibkwanim,” tenen sekeibmarei. 30Sirya sekmarei ura, sun Yahudi nang ninyi si Ahasyweros weik sienyi taleamwe sien mutuk dam 127 baryi atei asi kuramnyi nang ati deibmarei. A kerek sengna umbura asi sunci, “Teleb aryi mangkau asa kuronkwandarur,” eboka sekdongobmarei ura, deibmarei. 31Ara, “Kwalina si Purim ara sunci uki sirya wiboka dobdeiamingnyi aryi sun ninyi wise kuramingnyi talak kwalina babyi, sun mabwe nermabwe kubkwamingnyi talak kwalina babyi nirya kanya teneiboka kunubde binkwanung,” tenen kerek sekdeibmarei. “A uki tum ara kwaning si teamiryi, engeboka moloamnyi dinyi asi kanya teneibkwanung,” tenen Yahudinyi si Mordekhai ab, weik sien ner Ester ab aryi kerek sekeibmarei. 32Ato kuboka Ester biryi arukmou ba, weik kwalina uki tum si Purim ati, “Sun Yahudi nang uki tum,” eboka wibdeibmai ura, kerek sengna umbura sekdongobmai.

Currently Selected:

Ester Uram 9: MTG

Highlight

Copy

Compare