Ester Uram 8

Weik sienyi Ahasyweros uram arungna aryi sun Yahudi nang asi lebdeibmou uram deyok

8:1-17

1Haman dibmou tum aryok weik sienyi Ahasyweros biryi Yahudi nang asi yu boramunyi si Haman biryi taleramwe bona talena nirya ara weik sien ner Ester biti dobkarebmou. Ura, Ester biryi weik sienyi bisi, “Mordekhai bira ni du, nun nai yabwe ara nira weitnyi nebnyi ba, erda dunyi mi asi kununum,” ebmou. Ato eboka lak kibmou deyok aryi weik sienyi biryi Mordekhai bisi nabmou ba, er ab ebdanmarei. 2Ura, weik sienyi biryi er taruk du dongona Haman taruk dam kareamwe dinyi doboka Mordekhai bisi karebmou. Ura, Ester biryi Haman taleramwe bona talena nirya ara Mordekhai biti karebmouci, “A dinyi nirya ara kan dinyi kibmakir ati, kalingdonkwandum,” ebmou. 3Ura, Ester biryi weik sienyi urasin dam ton ato molobmou. Ara, “Haman er tam nang aryi nunsi tubto mar moun yiboka obsingnyei,” tenebmouci, erci, “Weik sienyi biryi lebdeibkwansurura,” tenen molobmou. Binmou ura, erci er kutam ikdongoboka engenmou ai aryok, weik sienyi bisi, “Nai, nun boukwe kibdobsurum,” eboka molobmou. Ura, tonda “Yu biribdobnyi Agag yalanyi Haman biryi, ‘Yahudi nang nirya obkwayeb,’ eboka mar moun yiamwe uram asi, kanci a uram ara kununa mem ebdum,” eboka engenmouci, molobmou. 4Ba, weik sienyi biryi er taruk dam douramwe keil emas aryi kikniboka kama aryi Ester bisi ukdongobmou ba, Ester bukalaboka weik sienyi urasin dam tikokmou. 5Ura, weik sienyi bisi kibmouci, kutam ikdongoboka erebdeibmou ura, ato eboka molobmou, “Nai, kanci teleb tenebminyi ab, kanci nisi boukwe kibkwaniminyi ura, a yanman tum ara diba tenebniminci, ni molobdobkun dinyi kunubdeibnurum. Ara, kan kanya teleb kubkici ura, kanci minob Agag yalanyi Hamedata mi Haman biryi teneiamuryi, sekdeiamwe kerek sengna ara, ‘Kununa mem,’ eboka kerek sekoka deibdum. Ba, ‘Yahudi nang ati obkaboka kum daneibdarur,’ eboka sekamwe kerek sengna kan talebumwe mutuk atei dam deibnin yibiu kerek sengna ara taklobkwaming ati kanci kerek sekdeibdum. 6Ara, ato ati molobman. Ni kan wa irmilikin ner aryi dinmatinyi bok asi, ni atei nang ab, ni du weit yabwe ab, ni mi mam yabwe ab asi ninyi aryi ikin dinyi takubdeiboka orminingmating dinyi dirdena ara ni ikin mitik kum kubnute. A deyok aryi ‘Kanci nunsi lebdeibsurum,’ tenen kansi luknubdongoboka molobmakin,” eboka molobmou. 7Ura, weik sienyi Ahasyweros biryi er ner weik sien ner Ester ab, Yahudinyi si Mordekhai ab asi ato ebmou, “Haman biryi, ‘Yahudi nang obkwan,’ tenebmou deyok aryi Haman bira sirya cang co deici biribkweteboka obokabsiryi, er taleramwe bona talena ara niryi Ester kanti karebkise. 8Ati, weik sien nang si deici ab, weik sien nang taruk du dongona aryi tubdeiboka deibmangnyi kerek sengna ara taklobman kum kurur. Taklobman kum kurur bok, deyok ton tabangdongon kerek sengna ara ur tabakdongobkwayeb. A deyok aryi sun nang mal aryi sun Yahudi nang ati teleb tenebdurumnyi to kuboka kerek sekeibdurum. A kerek sengna ara ni weik sienyi si deici aryi ola kerek sekeiboka ni weik sienyi taruk du dongona aryi lubdeibdumunyi ura, ninyi asi arukwandurum,” sienyi biryi ebmou. 9Ato ebmou ura, a tum akiryok weik sienyi er kerek sengna nang nabmai ura, Mordekhai biryi arukmou to kuboka Yahudi nang ab, Yahudi kum nang ab ati kerek sekoka deibmai. Ara, weik sienyi amwetam bun nang ab, tonda weik atei sien nang ab, tonda weik atei si erebdob nang ab ati kerek sekoka deibmai. Ba, a kerek sekmai ara India mutuk aryi kuboka Etiopia mutuk atei ara 127 baryi sien atei nirya asi sekoka deibmai. A kerek sengna ara sun atei uram yuk-yuk eramnyi to ab, sun huruf kerek sengna yukto-yukto kerek sengnamnyi to kuboka sun Yahudi nang babyi, sun Yahudi nang kuma babyi sekoka deibmai. A kerek sekoka deibmai talak ara wala winiryi wala si Siwan asi tanggal 23 aryi a kerek sekoka deibmai. 10Ura, a kerek sengna ara weik sienyi si Ahasyweros si deici aryi sekdongoboka a kerek sengna deici asi weik sienyi taruk du dongona aryi lubdeibmai ura, bokirikwamai nang asi arukmai. Ba, bongkiringna nang ara weik sienyi bisam kuda bon nang aryi a kerek sengna ola bokirikmai. A bukoka bongkiringmai bisam kuda ara dukduk mikib bisam weik sienyi biti yuk wiboka yal dordeiriramnyi bisam aryi boboka bongkiringmai. 11A kerek sengna si konga ara ato eboka sekmai, “Weik sienyi biryi ato eboka arukmar: Sun Yahudi nang kuramingnya nirya ara ur buluboka neika kubdobingiryi, kalikdandoka sunsi, ‘Obkaboka sun bona arabdobkwayeb,’ tenenung atei nang asi tamuboka ur obkiribnung. 12A kunubkwaming uki tum ara yuk tum mem. Eda, neik uki tum aryi ni weik sienyi Ahasyweros talebse mutuk atei dam nirya kunubkwanung. Ara, amolbaryi wala si Adar tanggal 13 uki tum berekci ura, sun Yahudi nang aryi sun damnyi kalingdaronmangiryi, sunsi mar iramingnyi nang asi tamuboka ur obnung. 13A kerek sengna ara ninyi nirya urasintam nukoka ebkarebdanin yibingnyi ura, ‘Sun Yahudi nang aryi tamuboka sunsi mar iramingnyi nang obkwaming uki tum ati kalikoka dibde kuna teleb,’” eboka sekeibmai. 14Ura, weik sienyi bisam kuda dukduk mikib bisam deici bukoka bon nang aryi birib-birib eboka anabmaici, a kerek sengna bokde yibinmai. Ba, a kerek sengna asi weik sienyi kuramwe mikib weik atei Susan kuramnyi nang urasintam ababyi nukarebmang. 15Ba, Mordekhai bira weik sienyi ai aryi anaboka baitam sakweteboka yibinmou ura, er ongon aling ara weik sien nang dam kuramiryi ongoramnyi aling asi ongoboka sakwetebmou. Ara, kisok kaluna ara emas aryi kikniamnyi iya teleb dinyi kalubmou. Ba, nunukoka ongobmou aling si ara lenan kait aling bol asi kuruta bol aryi lubdongoamnyi aling asi ongobmou. Ba, alib ongon aling ababyi lenan kait aling bol asi kuruta bol aryi lubdongoamnyi aling asi ongobmou. Ato kuboka Mordekhai biryi weik sien nang ongoramnyi aling ongoboka sakwetebmou. Ba, Susan atei dam kuramnyi ninyi nirya sun kanya kilkil aryi luna mumubmai. 16Bok, sun Yahudi nang asi ara bukdob kanya lengleng ebmouci, sun kanya karyi aryi sun kanya dub erebmou. 17Ato kuboka yuk atei ab yuk mutuk ab kuramnyi Yahudi nang ab weik sienyi arungdeirin uram bokde yibinamnyi atei nirya ababyi sun Yahudi nang kanya karyi kubmou. Ba, a tum aryi sun kanya kilkil asa aryi kwalina kwalibmai. Ba, sun akatei nang Yahudi nang kuma ara Yahudi nang kuna sun ilil deyok aryi Yahudi nang tam kibdobmai.

Currently Selected:

Ester Uram 8: MTG

Highlight

Copy

Compare