Ester Uram 7

Haman bisi weneboka obmai ba, dibmou uram

7:1-10

1Weik sienyi Ahasyweros ab, Haman ab ara weik sien ner Ester biryi sunsi du dongobkwamou ati er atei yanmarei. 2Liki bitinyi dinyi a yanmareici, co anggur du yung me yirabdei talak aryi weik sienyi biryi Ester bisi ato eboka asibdenmou, “Se weik sien ner Ester, kanda unatoa asi molobdobkwamarim do? Kanci molobminyi dinyi ara karebkwamakin. Tonda unatoa tenebdobmarim do? Ni talebse mutuk, ‘Wiliboka dinatam karebnurum,’ ebminyi ababyi kunubdeibkwankununa!” eboka asibmou. 3Uca, weik sien ner Ester biryi ato ebmou, “Nai weik sienyi, ni kan wa irmilikin ner asi boukwe kubkici ab, kanci teleb tenebniminyi ab ura, kanci ni molona kekebnurum. Ara, Kanci ni ab ni yala nang ab asi, ‘Obtibyi,’ tenen nang asi bisik seksinibokabminci, lebdeibsurum. Kam kurona dinyi karebsurum. 4Ara, ato deyok ati molobman. Ni kan wa irmilikin ner ab, ni yala nang Yahudi nang ab asi ninyi aryi, ‘Obkiriboka kum daneibtibyi,’ tenen sirya deksei deyok aryi, niryi kansi, ‘Lebdeibsurum,’ eboka molobman. Ninyi aryi nunsi, ‘Yuk nang wa irmilin nerabwe sal kunkwaming,’ tenen dekansiting ura, niryi kan urasin dam uram kum ebtinyi. Bok, niryi kansi uram ebman ara ninyi aryi nun kan wa irmilikin nang ati, ‘Obkiriboka kum daneibtibyi,’ tenen ukusunung ati, niryi kansi lak ebman. Ara, ninyi aryi nun kan wa irmilikin nang asi obsingnyi ara nun kikwe mambul kum dobtibyi. Eda, weik sienyi kanbabyi, ‘Kobe se, ni wa irmilinin nang asi obmanga,’ tenen mambul bobkwanduma. A mambul ara yuk mambul dinyi borandim to kuma. Eda, ‘Iya mambul dinyi bobminyei,’ tenen ati molobmakin,” ebmou. 5Ato ebmou ba, weik sienyi Ahasyweros biryi weik sien ner Ester bisi asibdenmou, “A ebmarimnyi bira unanyi do? Ba, yu kanya boboka, ‘Ato kubkwan,’ tenerurunyi bira dantam kurur do?” eboka asibdenmou. 6Uca, Ester biryi ato ebmou, “Ninyi yu bonanyi, ninyi onanyi er si ara Haman, yu biribdobnyi a bukmar atiba,” ebmou. Ba, Haman bibabyi weik sienyi urasin ab, weik sien ner urasin ab dirdena ara er ilil weik aryi er yok kum dandobmou ba, buklobmou. 7Ba, weik sienyi er yu aryi me yibde bukmarei ai akiryi tikoka baitam sien atei dam keta bindobmou. Bok, Haman bira er sirya bikdanmou, “Weik sienyi biryi, ‘Obdarur,’ ebkwamanir,” tenebmou deyok aryi, “Er ner weik sien ner Ester bisi molobdobnyi ba, kum obkwanununga,” tenen aitam tuba bukmou.

8Ura, weik sienyi baitam sakweteboka bindobmou ani, tubto me yinmai ai wengyangaramwe ba, Haman biryi, “Weik sienyi biryi nisi boukwe kibkwanurura,” tenebmou ura, Ester bukmanaryok maramwe sokon deici asi kutam ikdongoboka molobmou. Asi, weik sienyi biryi eibmou ura ato ebmou, “Anyi bira a tuba bukmarci, ni mining ai yandoka ni ner asi yonkwamara de?” ebmou. Ura, weik sienyi biryi ato enmou akiryok, yuk wa in nang dam tikmai aryi Haman bisi talebdongoboka er urasin aling kolo siklibdeibmai. 9Ura, a wekmai nang kankan aryi ninyi tentok weik sienyi dam kobdob wa iramunyi si Harbona biryi ato ebmou, “Nai, anyi Haman bira Mordekhai bisi, ‘Obkwan,’ tenerur. Ara, kan wa irmilin nang kankan aryi ninyi bitinyi aryi kansi, ‘Obkwankinim,’ tenen kunmakirei asi Mordekhai biryi bikdongoboka lebdeiankounyi bok, Haman biryi ersi, ‘Obkwan,’ eboka mar moun yirur. Ara, ‘Mordekhai talebnyi obura, co dub biribkweteblobkwan,’ eboka er ai dam co ikwelebwe co cang ara 22 meter baryi asi sirya ikoka kiknibdeibwe,” ebkarebmou. Ba, weik sienyi biryi kekebmou ura, ato eboka arukmou, “Haman er mining ikdeibdobwe co dub asi biribkweteblobdarur,” ebmou. 10Ura, Haman bisi er mining kiknibdeiamwe co dub biribkwetebmai ba, dibmou. Ara, erci, “Mordekhai bisi obkwan,” eboka ikdeiamwe co deici asi biribkwetebmai ba, dibmou. Ato kubmai ba, weik sienyi yu wekmou ara mundu tebmou.

Currently Selected:

Ester Uram 7: MTG

Highlight

Copy

Compare