Ester Uram 6

Weik sienyi biryi Mordekhai bisi erebdeibmou uram

6:1-14

1A tum lukunda ara weik sienyi Ahasyweros bira wi kum mabmou. Ura, erci er wa in nang asi arukmou ara, “Weik sien nang kuramib dinyi sengdongon kerek sengna asi boyandarur,” ebmou ba, boyandoka er urasin dam nukmai. 2Ba, a nukde banmai uca, a kerek sengna umbura dam aryi sekdeiamnyi asi nukmai, “Ninyi bitinyi weik sienyi ai bisik bublan dam kalingna nang sun si ara Bigtan ab Teresh ab aryi, ‘Weik sienyi si Ahasyweros bisi obkwanim,’ tenen sun yuk bisik ingkiringmarei bok, ninyi si Mordekhai bira kekebmouci, weik sienyi dam ebdongobmou,” Ato eboka sekamnyi asi ton nukmai. 3Uca, weik sienyi biryi ato eboka asibdenmou, “A lebdeibmanou deyok ati nunci Mordekhai bisi erebdob dinyi ab weik dinyi ab una dinyi karebmoubwe do?” ebmou. Ba, er wa irmilin nang aryi ato ebmai, “Kum, nunci ersi ukutotoa ton kum karebmoubwe,” ebmai. 4Ba, mabmai ani, berekwe ura, belekuna kobdob aryi weik sienyi biryi er wa irmilin nang asi asibdenmou, “Baitam atei keta dam yanganmaranyi bira unanyi do?” eboka asibdenmou. Ato erongkwe talak ara Haman bira baitam atei keta tingyanmou. Ara, erci weik sienyi bisi, “ ‘Niryi Mordekhai bisi co ingna deici biribkweteboka obkwan,’ tenen kiknibdeibse ati obkwan,” eboka moloryanganmou. 5Ura, weik sienyi ai dam wa irmilin nang aryi weik sienyi bisi ato ebmai, “Nai, Haman bira yandoka baitam atei keta ou tikmar,” ebmai ba, erci ato ebmou, “ ‘Ur ai wengyarum,’ ebdarur,” ebmou. 6Ba, Haman ai wengbinmou ura, weik sienyi biryi ersi asibdenmou, “Niryi, ‘Ninyi tentok si erebdeibkwan,’ tenenun ati, nunci anyi bisi una kubkwanub?” eboka asibdenmou. Uca, Haman er kanyatam aryi ato tenebmou, “Weik sienyi biryi si erebdob dinyi ara ni kum karebnute ura, unanyi bisi karebkwamote do? Ara, yuk nang kuma, niti ebmararya!” tenebmou. 7Haman biryi ato tenebmou deyok aryi weik sienyi bisi ato ebmou, “Nai, kanci anyi biti, ‘Si erebdob dinyi karebkwan,’ tenebmarimnyi bira, 8weik sienyi kan ongorandim ongon aling doyandoka anyi bisi ongobdeibdum. Ura, tonda ninyi boyiban bisam kuda ababyi weik sienyi kan burandim bisam asi karebkwandum. Ba, a bisam kuda kisok deici kisok kaluna ara weik sien nang kaluraming dinyi asi kalubdeibkwandum. 9Ba, ongon aling ab, bisam kuda ab anyi biti karebkwamaminyi ura, sienyi kan dam kobdob bun nang kankan asi ninyi tentok asi arukdum. Ura, kanci anyi bisi ato ebdum, ‘Kanci ni weik sienyi ongon aling ton doboka niryi si erebdeibkwamananyi bisi ongobdeibminci, tomobtaleboka bisam kuda deici burdeirirbirum,’ ebdum. Ura, anyi bira bisam kuda deici bukoka atei keta noutam asi kingkaningkiringmaci ba, kan dam kobdob kunanyi biryi bobde menengmariryi, uram ara ato eboka dobkwandur. ‘Weik sienyi bisi kanya teleb kurdeirinanyi bira ato kuboka kisal dangna weik dinyi dobdobkwandur!’ eboka uram dobkwandur,” ebmou. 10Asi, weik sienyi biryi Haman bisi arukmou, “Kanci kan ebmarim tok nirya kunubkwamarum, mitika tentok ababyi dangbisina mem. Minob anabdobminyi ura, ni weik sienyi ongon aling ab, ton bisam kuda ton doboka bobminyi ura, kan ebmarim to kuboka Yahudinyi si Mordekhai bisi kunubdeibdum. Anyi bira ni atei wengyangan bisik bublan dam burur. Anyi biryi ni kanya asi teleb kubdeibnou ati, kanci kan ebmarim to nirya ukurdeirirbirum,” ebmou. 11Ba, Haman biryi ongon aling ab bisam kuda ab boyandoka Mordekhai bisi ongon aling ongobdeibmou ura, Mordekhai bira bisam kuda deici bukoka atei keta yibarkiringmou. Ba, Haman erda Mordekhai urasin dam aryi uram weik doboka, “Weik sienyi bisi kanya teleb kurdeirinanyi bira ato kuboka kisal dangna weik dinyi dobdobkwandur!” eboka bobde kingkaningkiringmou.

12A kingkaningkiringmarei ani, Mordekhai bira weik sienyi atei wengban bisik bublan dam tamurbinmou bok, Haman bira er mundu sukubmou ba, kisok aling kalubdakde atei cungdorbinmou. 13Ura, atei bindoka er ner si Zeresh ab, er kwit yabwe ab asi er kubmou dinyi nirya nukarebmou. Ba, er kwit yabwe er uram dorkaren nang ab, er ner Zeresh ab aryi ersi ato ebmai, “Er Mordekhai bira Yahudinyi kurur ati, kansi malyi kiboka muna kibdongobkwamakir. Ati, kanci bukalaboka tamuboka ersi lebesekwamarim bisik ara iya ton kum kubmar, erda iya ati malyi kibsinibkwamakir,” ebmai. 14Ato eboka uram tuba sisingnabyi bok, weik sienyi wa irmilin nang yandoka Haman bisi iniboka bobmai ura, Ester biryi kwalibmou ba, yinmai ai ola bobinmai.

Currently Selected:

Ester Uram 6: MTG

Highlight

Copy

Compare