Ester Uram 5

Ester biryi weik sienyi urasin dam binmou uram deyok

5:1-8

1Kunmai ani, uki winiryi tum berekmou ura, Ester biryi weik sien nerabwe ongon aling ongobdobmou ura, weik sienyi atei dam keta asi bindoka weik sienyi ai wengban bisik bublan dam kobdob asi tingbinmou. Ba, weik sienyi bira er ai weik sien nang bun sokon deici bukmouci, er urasin ara er ai wengban bisik bublan dam tam kuboka deibmou. 2Ukuboka bukmouci, dinmou uca, er ner Ester weik sien ner ara er atei dam keta yandoka tikmou asi eibmou. Ura, ersi kanyi deiboka, “Ai wengyate,” tenebmouci, weik sienyi biryi emas aryi kikniamnyi kama aryi er ner Ester tikmou tam asi ukdongobmou. Ba, Ester biryi a kama dam tingyandoka a kama urub asi talerbinmou. 3Ura, weik sienyi biryi ersi asibdenmou, “A ner Ester, weik sien ner, kan dan do? Kanda unato tenebdimci, yanandim da? A ner kanci ni talebse mutuk dam asi, ‘Wiliboka dinatam karebnurum,’ eboka molobminyi ababyi karebkwankununa,” eboka asibdenmou. 4Uca, Ester biryi ato ebmou, “Nai weik sienyi, kanci teleb tenebminyi ura, kan ab Haman ab arub ara ni kan wa irmilikin ner aryi weik sienyi kanti kwalibkarebkwamakin kwalina dam yiryarurum,” ebmou. 5Ba, weik sienyi biryi, “Weik sien ner aryi molobmasir dinyi kunubdeibkwanim ati, Haman ola iniboka yandarur,” eboka er arungna nang asi arukmou. Ba, iniboka yanmai ura, weik sienyi ab, Haman ab Ester biryi sunti yuk kwalibmou ai binmarei. 6Ura, co anggur du yung me yibde bukmaici, weik sienyi biryi Ester bisi asibdenmou, “A ner, kanda unatoa molobdobkwamarim do? Kan molobdobmaminyi tok kunubdeibkwamakin. Ba, tonda kanda unatoa asi teleb kukurur do? A ner, kanci ni talebse mutuk dam asi, ‘Wiliboka dinatam karebnurum,’ eboka molobdobminyi ababyi karebkwankununa,” eboka asibdenmou. 7Ba, Ester biryi ato ebmou, “Ni kan wa irmilikin ner molobdobkwaman dinyi ab ni teleb tenebman dinyi ab ara: 8Weik sienyi, kanci nisi kanya deibmaniminci, teleb tenebniminyi ura, kanci ni molobkun dinyi ab ni tenebman dinyi ab asi kunubdeibnurum. Ara, tubto weik sienyi kan ab Haman ab sunti liki bitinyi dinyi kwalibkwansin yina yiryarurum. Ba, ambutum ara ni kan wa irmilikin ner aryi weik sienyi kan urasintam ni tenen dinyi lak ebkwan,” eboka uram dekeibmou.

Haman biryi, “Mordekhai bisi obkwan,” tenen, “Co cang ikdarur,” eboka er wa irmilin nang asi arukmou uram deyok

5:9-14

9Ura, Haman bira Ester atei me yinmou ani, kanya kilkil asa aryi anaboka er atei binmou. Er atei barouci, baitam sakweteboka diramwe uca, ninyi si Mordekhai bira weik sienyi atei wengban bisik bublan dam atei keta bukmou asi eibmou. Ba, Haman biryi, “Nisi erebdeiboka kutam ikdongoboka kibdobnute,” tenebmou uca, tingdongna ababyi kum, lulungdena ababyi kum kubmou ba, Haman biryi Mordekhai bisi yu weik bobmou. 10Haman yu wekmou bok, kanya darabdongoboka er atei bindobmou. Atei binmou ura, er kwit yabwe ab er ner si Zeresh ab nabmou. 11Nabmou ba, er ai buluboka wekmaici, tonkwa bukoka uram sisingmai. A sisingmai ai aryi Haman biryi erdamnyi uram kisal dangdanmouci, er taleramwe bona-bona ilinto deyok dub ererdanmou. Tonda, er deiriramwe mabwe ilinto deyok ati dub ererdanmou. Tonda, weik sienyi biryi er wa irmilin nang yuk nang ababyi erebdob wa kareamwe bok, Haman ersi ara eitamtoto wa asi karebmou deyok ati nungmouci, Haman biryi dub ererdanmou. 12Ani, Haman biryi, “Kisal tabakoka dakniting,” tenen ton ato ebmou, “Ton yuk uram tabangdongon dinyi ara weik sien ner Ester biryi er ai kwalina yirban nang ara yuk nang kum du dongobmar. Eda, weik sienyi ab, ni ab akwe, ‘Ni kwalina yiryarurum,’ eboka nabmasir ba, yirbinmanim. Ani, ‘Ambutum ababyi tubto yarurum,’ eboka nabmasir ati, weik sienyi ab tonkwa tubto yirbinkwamanim. 13Weik sien ner aryi nisi teleb kimnurur bok, Yahudinyi si Mordekhai bira nisi kisal kum dangnurur deyok aryi ni kanya ara teleb kum kunurur. Ati, Mordekhai bira weik sienyi atei wengban bisik bublan dam tuba buranci asi eiriranyi talak ara ni kanya ara teleb kum kunkwanir,” ebmou. 14Ato ebmou ba, er ner si Zeresh ab, er kwit yabwe nirya aryi ato ebmai, “Ato ebmarim ura, kanci ninyi asi arukminyi ba, co cang dangna ara 22 meter baryi asi touboka ikoka kiknibdeibnung. Sirya kiknibdeibingnyi ura, kanda ambutum ara weik sienyi bisi bindoka, ‘Mordekhai bira ur obkwan do?’ eboka molorbirum. Ba, weik sienyi biryi, ‘Ur,’ ebkici ura, Mordekhai bisi obdum. Ara, er ngang tabwe youbdongoboka a co cang dub ai asi biribkweteblobminyi ura, kanda ur mangkau asa aryi weik sienyi ab tonkwa a kwalina yirbirurum,” eboka uram dobkarebmai. Ba, Haman biryi sun a eboka dobkarebmai uram ara teleb tenebmou ura, co cang touboka kiknibdeibkwamai ati ninyi asi arukmou.

Currently Selected:

Ester Uram 5: MTG

Highlight

Copy

Compare