Ester Uram 4

Mordekhai biryi sun Yahudi nang asi lebdeibkwamou ati bisik ingkirikmou uram deyok

4:1-17

1Ura, Mordekhai biryi kerek sengna bongkiringmai dinyi nirya bikmou ura, erci, “Se, nun talyi kubkwansing,” tenen engen kanya bobmouci, er ongon aling kwilikloboka aling kolo ongobdobmouci, uk sici kisok ai deibdanmou. Ura, baitam sakweteboka ngolokoka engena weik engenmou deib aryi atei keta noutam yibarkiringmou. 2Ato kubde yanmou ani, weik sienyi atei wengban bisik bublan dam tingyanmou. Ara, “Aling kolo ongobmangnyi tok weik sienyi ai umbura dam wengbana ara mem,” eramnyi deyok aryi atei dam yandoka tiklobmou. 3Ura, Susan atei kuramnyi Yahudi nang babyi, yuk atei-yuk atei kuramnyi Yahudi nang babyi, weik sienyi biryi ebdeibmou uram kekebmai ura, sun nirya kanya teneina bukam asa aryi yina si teboka engeboka kibmai. Ani, ninyi ilinto aryi aling kolo ongobdobmai ura, uk sici dobtaleboka yamubdonokmaia deici asi mabmai.

4Ba, weik sien ner Ester dam kuramnyi kam nerabwe ab, ersi kalingna nang ab aryi, “Mordekhai bira engena weik engenmar,” en uram kekebmaici, Ester dam ebdongobmai. Ba, weik sien ner Ester biryi kekebmou ura, er kanya mambul weik kubmou. Ura, Ester biryi, “Mordekhai a ongoboka yanmou aling kolo ara kwiribloboka ukuryok ongon aling ongobdobkwandura,” tenen ongon aling deibmou bok, Mordekhai biryi kum dobdobmou.

5Ba, Ester biryi ninyi si Hatah nabmou. Anyi bira weik sienyi biryi tikeiamwe ba, Ester bisi wa irmiliramunyi kuramwe. Ura, Ester biryi anyi bisi nabmouci, ato eboka arukmou, “Kanci Mordekhai bisi bindoka, ‘Kan unatoa ati engena weik engenmarim do?’ eboka asirderbirum,” eboka arukmou. 6Ura, Hatah biryi anaboka Mordekhai bira weik sienyi atei tam aryi anamyangan bisik bublan dam keta bukmou asi asirbinmou. 7Ba, Mordekhai biryi er dam asi kubmou dinyi nirya nukeibmou. Ara, erci Hatah bisi ato ebmou, “Ninyi si Haman biryi, ‘Sun Yahudi nang nirya asi obkabokwan,’ tenerurci, weik sienyi bisi ato ebwe. ‘Kanci mundu lobkwetebniminyi ura, niryi kansi dengna weik keil si perak ukubaryi karebkwankin. Ba, kan weik sienyi ukutotoa deirin ai umbura dam deirirbinkwanking,’ ebwe. Haman biryi nun Yahudi nang ati, ‘Obkabokwan,’ ebwe uram kekebse ati, ni engenun,” ebmou. 8Ani, Haman biryi Susan atei aryi kuboka weik sienyi si deib aryi, “Sun Yahudi nang asi ur obkwandarur,” eboka sekdeibmou kerek sengna asi Mordekhai taruk dam douryanmou dinyi ara Mordekhai biryi Hatah deici deibmou. Ara, erci, “Ester biryi eibci ura, ‘A ebmar uram ara dib ebdeibmar,’ tenebkwandur,” tenen a kerek sengna Hatah deici deibmou. Tonda, erci, “Ester biryi, ‘Boukwe kibsute,’ tenen weik sienyi urasin dam bindoka, ‘Ni yala nang lebdeibsurum,’ eboka molorbinkwandura,” tenen uram ton ebdeibmou. 9Ura, Hatah biryi atei wengbindoka Mordekhai ebdeibmou uram Ester dam ebmou.

10Ato ebmou bok, Ester biryi Hatah bisi tubto Mordekhai dam bokdeibmouci, ato ebdeibmou: 11“Weik sienyi biryi nisi kum nabmanici bok, ni er urasin dam bokarerdarbinyi asi ni obnicei ati, ni kanya manunuk aryi kum binkwaman. Eda, erci nabnici uca, binkwan. Ara, ato ati ebman. Weik sienyi talebwe mutuk dam kunung nang ab, weik sienyi amwetam wa inung nang ab sun nirya sirya bikyi, ‘Unanyi kum, una ner kum aryi weik sienyi biryi namna kum kubmaci bok, sun kanya aryok weik sienyi ai dam keta tingban atikwe anyi kum a ner kum ara obkwaming ba, dibkwande,’ ebyi. Eda, weik sienyi erci, ‘Anyi bisi ni dam ur yarur,’ tenebci ura, erci er kama keil si emas aryi lubdeibyi kama aryi ungdongorande. Ura, a ukdongobci nang asi kam kuronkwaming. Ba, nira a kunub talak wala tentok ara uki 30 baryi ara weik sienyi biryi ton kum nabnou ba, er dam ton kum bise,” ebdeibmou. 12Ba, tubto Hatah biryi Ester ebdeibmou uram asi Mordekhai dam bindoka ebdongobmou, 13Ba, Mordekhai biryi tubto tamuboka Ester bisi ato ebdeibmou, “Ester, kan kanya ara, ‘Ni damnyi lebdandobkwan,’ tenerdan kum. Ani, kanci, ‘Nira weik sienyi kurur atei dam kunun ati, yuk Yahudi nang onmangnyi ababyi, nira kum obkwaning,’ tenerdana mem. 14Kanda weik sienyi atei dam kuboka dung ebokminyi ababyi, nunsi lebdeibkwansiranyi bira yuknyi biryi lebdeibkwansir. Anyi biryi nun yuk Yahudi nang asi lebdeibsici bok, kan ab, kan ai ninyi ab nirya ara oboka kum daneibkwansir. Ati, kanci, ‘Ni yala nang mambul don talak aryi ni weik sien ner bun sokon dobdobse ara ni yala nang Yahudi nang asi lebdeibkwan ati dobdobse,’ teneboka teneibdenderum,” ebmou.

15Ura, Ester biryi, “A uram asi Mordekhai bisi erbirum,” eboka Hatah bisi tubto arukmou, 16“Weik sien ner bira ato ebdeibmar, ‘Kanci anaboka atei biminyi ura, Yahudi nang Susan atei dam kunung nang nirya bulubdeibminyi ba, niti yina si teboka molobliknibnindarur. Ato kunmamunyi ura, uki winiryi ara lukunda babyi kitingtam babyi kwaning yirdena mem, me yirdena mem. Nibabyi ni kalingnaning kam nerabwe babyi ato kuboka yina si teboka bukmabyi ani, weik sienyi dam binkwaman ati, sunbabyi yina si teboka bukmamunci molobliknibnindarur. A dinyi ara weik sien nang aryi, “Ato-ato dinyi ara ukuna mem,” eboka kerek sengdeirinung uram asi dangbisin dinyi kubmar bok, ukubdenyi ba, obningnyi ba, dibnyi ababyi nira malyi, a dibmanun ebmar,’ erbirum,” eboka Ester biryi arukmou. 17Ba, Mordekhai bira anabdobmou ura, Ester biryi ersi Hatah deici ebdeibmou to nirya kunubmou.

Currently Selected:

Ester Uram 4: MTG

Highlight

Copy

Compare