Ester Uram 3

Ninyi si Haman biryi, “Yahudi nang asi obkaboktinyi,” tenebmouci, mar moun yibmou uram deyok

3:1-15

1Ester bisi weik sien ner sirya tikeibmou ura, weik sienyi Ahasyweros biryi ninyi si Hamedata mi si Haman bira Agag deibdobanyi#3:1 Agag bira Amalek mutuknyi kuramwe. Minob ura Amalek nang ara Israel nang sun mar ordan nang kuramnyi. bisi er dam wa inanyi tikeibmou. Haman dobdobmou wa ara iya erebdob wa dobdobmou. Ara, weik sienyi biryi er urasin dam wa iramnyi nang yuk nang ara outam kibkweteboka Haman ersi eitamtoto kun wa erebdob wa asi karebmou. 2Ba, weik sienyi er wa irmilin nang weik atei bublan dam tikmai nang nirya aryi, “Haman bira weik sienyi amwetam wa inanyi kibmar,” tenen kutam ikdongoboka Haman bisi kisal dakmai. A kubmai ara weik sienyi biryi anyi deyok ati ninyi nirya asi arukmou to aryi kubmai bok, ninyi si Mordekhai bira kutam ikdongoboka anyi bisi kisal dangna kum kubmou. 3Ati, weik sienyi wa irmilin nang weik sienyi atei bublan dam tikmai nang aryi Mordekhai bisi ato ebmai, “Kanda unatoa ati weik sienyi biryi arukmasir uram asi dakbisibmarim do?” eboka erekdobmai. 4Ato eboka sirya erekdobmai cok, iya sun ebdana nirya ara ato akwe eramnyi bok, erci kum kekeana ato kurongnamwe. Ba, Mordekhai biryi, “Nira Yahudinyi kunun ati, ninyi asi si weik eboka kisal kum daknun,” ebmou. Ato ebmou asi, sunci, “Haman er ton bikturyi, wenebte ba, Mordekhai biryi er ukurur dinyi ara taklobte,” tenebmai ura, Haman dam asi Mordekhai ukuramwe dinyi nukdongobmai. 5Ba, Haman biryi diramwe uca, Mordekhai bira kutam ikdongoboka Haman ersi si weik ereboka kisal dangna kum kubmou asi asing eibmou ura, er kanyatam yu kubmou. 6Yu wekmou bok, erci ato tenebmou, ninyi yuk nang aryi Haman er dam asi, “Mordekhai bira Yahudinyi kurur,” eboka er yala si sibmai ba, bikmou deyok aryi erci, “Mordekhai er tentok ona ara ni li. Eda, Yahudi nang nirya obkabokwan,” tenebmou. Ato tenebmouci, erci, “Mordekhai er yala nang Yahudi nang asi weik sienyi si Ahasyweros taleamwe mutuk dam kuramingnyi nang nirya obkwan,” tenen bisik ingkirikmou. 7A talak ara Ahasyweros weik sienyi kiamwe ba, kuramnyi ani, kwalina amolbaryi kibmou. A kwalina yuma wala si Nisan aryi Haman biryi, “Yahudi nang orkarongna uki tum ara dan uki tum asi kikiman do?” tenen ingkiringmouci, erci, “Keil yamin deibdarur,” eboka arukmou. Ba, Haman er urasintam aryi yamin deirin keil si Purim deibmai uca, lak kibmou dinyi asing eibmai ura, sunci, “Wala amolbaryi wala si Adar tanggal 13 tum ara Yahudi nang orkarongna kikiman tum berekwande,” tenen bikmai.

8Ura, Haman biryi weik sienyi Ahasyweros urasin dam binmouci, ersi ato ebmou, “Nai, kan talebumwe mutuk dam asi yuk atei nang aryi bokwalwalaboka tingyandoka kunung. A kunung nang aryi weik sienyi kanci mem eboka kerek sekeiboumwe uram ara nirya kum kununung. Eda, sun yuk yan memebdandoka kunung. Tonda, a tingyangan atei nang aryi kuraming dinyi ara yuk bok, nun kanci talebsoumwe mutuk nang yoka aryi nirya kuramib to ara yuk. A deyok aryi, nai weik sienyi, kanci ukuboka tanglona ara kikiman kum. 9Ati, nai, kanci teleb tenebminyi ura, akatei nang asi obkabokwayeb ati, uram dobkwetebdum. Ba, ato kubmanyi deyok ati ni kan wa irmilikinanyi biryi ni talenun keil dengna weik dinyi si perak asi 10.000 baryi kanti tenen karebkwaman. Ara, weik sienyi kan bona talena kalingdurnyi dam karebnyi ba, erci kan ukutotoa deirin ai umbura deirirbinkwande,” eboka minibmou. 10Ba, weik sienyi biryi, “Haman er teleb tenebmar to, akatei nang asi ur ukubdur,” tenebmouci, er taruk du dongona kwiribtaleboka sun Yahudi nang asi yu boramunyi Haman bisi karebmou. Ara, Hamedata mi si Haman bira Agag deibdobanyi biryi molobmou to mundu lobdeibmou. 11Ura, weik sienyi biryi Haman bisi uram ara ato ebkarebmou, “Keil uang perak karena ara kan kanya aryi ukubminyi akwa ba, akatei nang orkarongna ababyi kanci kan kanya tenebminyi tok, ukubkwandum,” eboka mundu lobdeibmou. 12Ba, wala yuma wala asi tanggal 13 aryi Haman biryi weik sien nang kerek sengna nang nabmou ba, yanmai. Sirya yanmai ura, erci sunsi, “Ato-ato eboka kerek sekeibdarur,” eboka arukmou. Ba, sunci weik sien nang amwetam bun nang ab, weik atei sien nang ab, weik atei si erebdob nang ab ati kerek sengna sekoka deibmai. A kerek sengna ara atei yuk-yuk kerek sengdamnyi to ab, sun uram yuk-yuk eramnyi to kuboka kerek sekdeibmai. Ura, “Sunci, ‘Weik sienyi biryi arukmar ba, sekdeibmang,’ teneboka dobdobkwanung,” tenen weik sienyi Ahasyweros taruk du dongona aryi lubdeiboka deibmai. 13Ura, a kerek sengna ara ola nun aryi ninyi arukmai ba, boboka weik sienyi taleamwe mutuk atei nirya bokirikmai. Ara, ato ati kubmai, “Yahudi nang sun atei kuramingnyi nang nirya ara oboka kum daneibnung,” tenen kubmai. Ara, “Ninyi wise ner sal babyi, kam ner sal babyi, mitik-mitik mabwe babyi, mitik-mitik nermabwe babyi nirya obkiribkwanung,” tenen kubmai. Tonda, “A kwalina amolbaryi wala si Adar asi tanggal 13 akiryok nirya oboka kum daneibingnyi ura, sun bona talena ababyi dalubdobnung,” tenen kerek sengna bokirikmai. 14A kerek sengna asi a mutuk dam nirya deibmaici, uram ebdeibmai ba, a mutuk nang nirya kekebmai. Ara, a kerek sengna deibmai ara ato ati kubmai, “Sunci a kerek sengna nukingnyi ura, Yahudi nang nirya oboka kum danardeirin uki tum kurbana ati kalikoka dibde bunkwanunga,” tenen ati kerek sengna minob sekoka deibmai. 15Ura, arukmai ba, kerek sengna bongkiringna nang ara minob ola birib-birib eboka anabmaici, a kerek sengna bokirikmai. Ura, weik sienyi biryi arukmou to aryi arungna uram ara Susan atei aryi dobkwetebmai. Ba, a talak ara weik sienyi ab Haman ab kilkil kanya boboka ur bukoka me yinmarei bok, Susan atei dam kuramnyi nang ara a uram deyok ati sirim talebmou.

Currently Selected:

Ester Uram 3: MTG

Highlight

Copy

Compare