Ester Uram 2

Weik sienyi Ahasyweros biryi Ester bisi weik sien ner erebdeibmou uram deyok

2:1-18

1Weik sienyi si Ahasyweros biryi sirya yubkarebmou ura, yu wekmou ara sirya mundu tebmou. Bok, ner si Wasti biryi er urasin dam kubmou dinyi ab erci a ner ati, “Taklobkwan,” eboka uram sekwetebmou dinyi ab asi tuba kanya teneinmou. 2Ura, ersi uram, “Ato ebdum-ato kubdum,” eboka uram dorkaren nang er dam kobdob kuramnyi nang aryi ato ebmai, “Nai, ninyi asi uram ebdeibminyi ba, weik sienyi kanti ukuryok nebloboka kunmangnyi nerabwe asi ner urasin teleb-teleb nerabwe ingkiriknung. 3Nerabwe teleb-teleb ingkirikwamingnyi ura, ato kubkwandum. Nai, kan wa in nang asi kan kalingna atei nirya asi tikeibde yibirum. Ba, a nang aryi nerabwe teleb-teleb ukuryok nebmangnyi nerabwe ara nirya boboka Susan atei dongoryangankwaming. Ba, nerabwe dongoryangan ai ninyi si Hegai weik sienyi dam kobdob kunanyi#2:3 Hegai bira sida-sida kuramwe. 1:10 dibderum. nerabwe mer kalingnanyi biryi erci tong-tonga erande dinyi lurdeirinkwande. 4Ba, weik sienyi kanci diraminyi ani, ‘A ner asi ner teleb,’ tenebminyi ner asi doboka weik sien ner Wasti kuramwe sokon unubdeibdum,” eboka uram dobkarebmai. Ura, weik sienyi biryi, “Ato ara teleb,” tenebmou ura, erci a uram eboka dobkarebmai to kunubmou.

5A talak ara weik sienyi Ahasyweros kuramwe atei si Susan dam ara Yahudi nang ababyi ilinto kuramnyi. A Yahudi nang kankan ara ninyi si Mordekhai kuramwe. Anyi bira Benyamin yalanyi kuramwe ba, er nai si ara Yair. Ba, er abwe si ara Simei. Ba, Mordekhai er nai er abwe si ara Kish. 6Minob talak aryi Babel mutuk yuma kalingnamunyi si Nebukadnezar biryi Yerusalem atei yandoka dalubmouci, Yehuda weik sienyi si Yekhonya ab, Yahudi nang yuk nang ilinto ab boboka Babel mutuk tanglorbinamwe. A boboka tanglorbinamwe nang kankan ara Mordekhai er yala nang ababyi boboka tanglorbinamwe uca, Mordekhai bira Susan atei kuramwe. 7Ba, a talak ara nebnyi si Hadasa ebok Ester ebok kimdamnyi ner ababyi Susan atei kuramwe. A nebnyi ara er nai er kwin ara sirya diandei ba, er nai dunyi mi si Mordekhai biryi ersi kwaknaroramwe. A nebnyi ara bikdob ner nun, tonda ninyi kanya mantanangna ner nun nebmou. A nebnyi ara er nai er kwin dirdongorei akiryok, Mordekhai biryi dobdobmouci, er nebnyi kibdobmou.

8Ura, weik sienyi biryi ebmou uram ara er taleamwe atei dam nirya ebde yibinmai ba, ninyi nirya kekebmai. Ura, Susan atei ara kam nerabwe mer ilinto boboka bulubmai ba, ninyi si Hegai biryi kalingnamwe. Ura, kam ner si Ester bibabyi boboka weik sienyi kuramwe atei dam boyanmou. Ba, nerabwe kalingnanyi si Hegai biryi kalingnamwe. 9A kuramwe talak aryi Hegai biryi diramwe uca, Ester bira, “Nebnyi teleb,” tenebmouci, kanya deibmou. Ura, Hegai biryi a nebnyi asi minob tong-tonga teleb dinyi kareboka er yina yuk yuboka kareramwe. Ura, a nebnyi milinkwamnyi nerabwe tabaryi weik sienyi kuramwe atei dam aryi wibmou. Ura, kam nerabwe dongon ai akiryok wiliboka yuk ai asi a nebnyi ab er wa irmilin nerabwe ab kunkwamnyi ai ara dibdeboka iya teleb ai nun asi eterebmou. 10Ura, Mordekhai biryi Ester bisi, “Kanci, ‘Nira anyi nebnyi, nira akatei ner,’ erdana mem,” eamwe deyok aryi Ester biryi, “Nira Yahudi nang yala ner,” eboka er dei lak erdana kum kuamwe. 11Ba, Mordekhai biryi, “Ester bira teleb kunmar do?” tenen, “Ester bisi una kubkwande do?” tenen tuba-tuba bukman mabman nerabwe dongoramnyi ba, kuramnyi atei dam akwe dirkiringnamwe.

12A dongoramnyi kam nerabwe aryi weik sienyi urasin dam baramnyi ara nirya talyi ton kum baramnyi. Eda, liliboka sun uki kubne tum akwe nerabwe tentok-tentok weik sienyi dam baramnyi. Ba, a kam nerabwe ara weik sienyi urasin dam bana kabul talak ara kam nerabwe dongon ai dongobdeiboka kwalina tentok ara tong-tonga teleb dinyi lurdeiriramnyi. Ton wala nabaryi ara minyak si mur aryi lurdeiriramnyi. Ba, ton wala nabaryi ara minyak si kasai ab nerabwe mer lun dinyi tong-tonga en dinyi ab lurdeiriramnyi. 13“A tum ara a ner asi weik sienyi urasin dam yankwamar,” ebdeibman tum kubne ura, a ner aryi, “Nira a dinyi asi ongobokabniryi weik sienyi dam binkwan,” eboka wibmaci tok, ongobdeiboka kweirya dordeiriramnyi. Ura, weik sienyi biryi nabmaci ner er uki kubci ura, a ner asi kam nerabwe mer dongon atei aryi anaboka weik sienyi kuramwe ai wengbaramnyi. 14Ura, sintam aryi weik sienyi dam binmangiryi, a kunmangnyi ani, belekuna ara tubto tamuboka nerabwe dongon atei baroramnyi. Tamuboka yangnyi ura, minob kuramingnyi atei ara kam nerabwe atei tamuboka bana kum kuramnyi. Eda, yuk atei wengbaramnyi. Akatei ababyi nerabwe dongordeirin atei doamnyi bok, akatei ara weik sienyi biryi ukuryok tanuboka dobmaci nerabwe kun atei wengbaramnyi. Akatei kalingnamunyi bira weik sienyi dam kobdob wa inanyi, nerabwe mer kalingnanyi si Saasgas biryi kalingdamwe. Akai boboka dongorbaramnyi nerabwe ara sun yuk aryi weik sienyi urasin dam ara ola kum baramnyi. Eda, kuran ani, weik sienyi biryi er dam yankwamaci ner si si siboka, “Ni dam yarur,” eboka nabmaci ner akwe tentok-tentok er dam yandoka markareramnyi.

15Ani, uki tentok tum aryi Ester biryi weik sienyi dam wengbinkwamou uki tum kubmou. Ester er nai kobdoba Abihail bira diamwe ba, er du Mordekhai bira er nai dunyi mi aryi, “Ni malner,” tenen ersi kwaknabdamwe. Ura, Ester biryi weik sienyi urasin dam binkwamou uki tum kubmou ura, erci er tenebmou to, “A ongon aling asi ongobinkwan,” tenen kum wibmou. Eda, nerabwe kalingdamunyi, weik sienyi dam kobdob kunanyi si Hegai biryi, “Akaling asi ongobderum,” ebmou to akwe kunubmou.

Ba, Ester bisi asing dinmai nang nirya aryi, “A ner ara ner bikdob,” tenebmaici, kanya deibmai. 16Ura, ato kuboka Ester bisi weik sienyi si Ahasyweros urasin dam bobinmai. A bobinmai talak ara weik sienyi Ahasyweros sienyi kibmou talak kuramnyi ani, tabaryi kwalina asi takwe wala si Tebet aryi Ester boboka weik sienyi urasin dam bobinmai. 17Ba, weik sienyi biryi diramwe uca, Ester bisi er kanya takmou ura, yuk nerabwe ara malyi kibmou. Ura, weik sienyi biryi a ner asi kanya deibmouci, yuk kam nerabwe nirya ara kanya kum deibmou. A deyok aryi weik sienyi biryi, “Ester bisi ni dam kobdob kun ner weik sien ner tikeibkwan,” tenebmou. Ura, erci weik sien nerabwe kaluraming dinyi mahkota kalubdeibmou. Ato kuboka erci Ester bisi tikeibmou ba, weik sien ner Wasti kuramwe sokon unubmou. 18Ura, weik sienyi biryi Ester bira weik sien ner kibmou deyok ati er kilkil kuboka er kalingnamwe mutuk sien nang ab, er amwetam wa in nang ab ati yina kwaliboka yibkarebmou. Ura, weik sienyi er kanya karyi kubmou deyok aryi, erci weik sien nang ati pajak dengnamnyi dinyi ara, “A talak dekmanto dinyi ara kum dekwaming,” eboka uram sekwetebmou. Ara, weik sien nang kikniboka kuraming to, erci er taleamwe mutuk dam kuramnyi nang nirya asi mundu lobdeibmou.

Mordekhai biryi weik sienyi bisi mar moun yin deyok bikoka weik sienyi dam lak ebmou uram deyok

2:19-23

19Ura, kam nerabwe ara liki bitinyi dinyi weik sienyi urasin dam bulubdeibmai. A bulubdeibmai talak ara weik sienyi biryi Mordekhai bisi er wa inanyi tikeibmou. Ba, Mordekhai bira weik sienyi kuramwe atei wengyangan bisik bublan dam wa iramwe. 20Ester bira er du Mordekhai er nai dunyi mi aryi ebkareamwe to aryi er dei ara lak botobdandoka, “Nira anyi biryi nebnyi, nira akatei ner,” erdana kum kubmou. Eda, Ester biryi er du Mordekhai biryi ersi kwaknaramuryi, ebdeiamwe to kunubmouci, erci, “Nira Yahudi yala ner,” erdana kum kuramwe. 21Ba, a talak aryi uki tentok tum aryi Mordekhai bira weik sienyi kuramwe atei bisik bublan dam kalikmou. Kalikmouci, kekenmou uca, weik sienyi urasin dam kobdob wa irandei nang bitinyi aryi sisingmarei asi kekebmou. A nang sun si ara Bigtan ab Teresh ab aryi, “Weik sienyi Ahasyweros bisi obkwanim,” tenen kanya bobmareici, mar moun yinmarei asi kekebmou. 22Ato kunmarei bok, Mordekhai biryi bikdongobmouci, ola-ola er malner weik sien ner Ester bisi ebdeibmou. Ura, Ester biryi weik sienyi bisi, “Kan mining wa irmilikin nang ninyi bitinyi aryi obkwamakiringci, mar moun yinmakiring,” eboka erbinmou. Ara, erci, “Weik sienyi kan wa irmilikinanyi Mordekhai biryi kekenmou uca, kansi mar moun yinmakurungwe uram asi kekebmouci, ni dam ebdeibmar to lak eryanmakin,” ebmou. 23Ba, weik sienyi biryi kekebmouci, erci, “A deyok ara dib ebmar do? Tola ebmar do?” tenen ingkiringmou uca, diba kubmou. Ba, a mar moun yinmarei nang bitinyi ara sun ngang tabwe youbdongoboka co ikdeibmaia dub biribkwetebmai ba, dibmarei. Ba, a kubmou deyok ara weik sien nang kuramnyi dinyi sengdongoramnyi kerek sengna umbura dam sekdongoboka deibmai.

Currently Selected:

Ester Uram 2: MTG

Highlight

Copy

Compare