Efesus Uram 3
3
Er Paulus biryi sun Yahudi yala nang kuma asi Teleb Uram lak etereramwe uram
3:1-13
1A deyok aryi, ni Paulus bira nun Du Yesus Kristus milinunyi bisi ninyi aryi tabwe deboka kalingnunung. Ara, niryi, “Sun Yahudi yala nang kuma ababyi nun Nai Imtamnyi dam kun nang kibdeibtinyi,” tenen Teleb Uram eteresunun deyok aryi, ninyi aryi tabwe deboka nisi kalingnunung.
2Nun Nai Imtamnyi biryi nisi teleb kubdeibmanouci, Erci nisi ato eboka takubdeibnou. “Sun Yahudi yala kuma nang dam asi bindoka Teleb Uram etererbirum.” Ato eboka takubdeibnou to aryi niryi sun yuk yala nang asi Teleb Uram eteresunun ati, sunci sirya kekebmarum ati ebman. 3A dinyi ara minob ura lak kum kuransou bok, nun Nai Imtamnyi biryi tek deib aryi nisi ukuryok lak kibdeibnou. Ba, niryi sunsi a deyok ara sun Yahudi yala kuma nang ati mitikanun eitam sirya kerek sekmasin. 4Sunci ni kerek sekmasin uram asi lilibde nukmunci, sunci niti, “Ei, nun kwit bira nun Du Yesus Kristus deyok ara kibdeibsou deyok ati diba ati liliboka bita bingdur,” tenen bikwandum. 5Nun Du Kristus lak kibdeibsou dinyi ara nun abwe yabwe minob kuramnyi nang nirya ara kum bingnamnyi. Ara, sunci, “Nun Nai Imtamnyi biryi sun Yahudi yala kuma nang asi dobdobkwande,” tenen dinyi sun kum bingnamnyi. Bok, ukuryok talak ara Er Imtamnyi Kanya Roh Kudus aryi nunsi laktoto kibdeibsou. Ara, nun Nai Imtamnyi biryi bokdonoksou uca Teleb Uram deyok kouboka eterebde ban nang ab nun Nai Imtamnyi Uram ebdeibmaci to lak etereramnyi nang ab asi Er Imtamnyi Kanya Roh Kudus aryi a dinyi lak kibdeibsou. 6Ara, nun Du Kristus biryi ukuryok lak kibdeibsou uram ara ato kurur. Sun Yahudi yala kum nang ara Teleb Uram dobdobmang ba, Er Imtamnyi biryi sunsi, “Ni mabwe nermabwe,” tenen kibdobmar. Ara, sun Yahudi yala nang kankan dib tenen nang ab tonkwa antanibdeibmou cok, Er Imtamnyi biryi sun Israel yala kum nang ababyi kisal dangdur. Ara, sun Israel yala kum nang ab sun Israel yala nang ab tonkwa ara neik yala ato tub tentok ato kibdeiboka murubmar. Ati, nun Nai Imtamnyi biryi, “Kristus Yesus biriman aryi teleb kubdeibkwan,” ebdeibsou uram ara sun Yahudi yala kum nang ababyi kunubdeibsou.
7Nun Nai Imtamnyi biryi Er mikib deici wa iboka nisi teleb kibdeibnou uca, niryi Er Imtamnyi wa irmilinanyi kununci, a Teleb Uram asi eterebde banun. 8Nira sun Er Imtamnyi dam kun nang kankan asi iya tukwetam bunanyi bitonyi kunun bok, nun Nai Imtamnyi biryi nisi teleb kibdeiboka tikeibnou. Tikeibnou ba, Erci nisi ato eboka takubdeibnou. “Sun Yahudi yala kuma nang dam asi biminyi ura, kanci sunsi, ‘Kristus kisal dangsina langdirdeisurur dinyi ninyi aryi liliboka nukmanto kum kurur,’ eboka lak eterebdum.” Ato eboka takubdeibnou ati ebman. 9Tikeibnou ba, nun Nai Imtamnyi biryi nisi ato eboka takubdeibnou. “Kanci ninyi nirya asi a dinyi laktoto kibdeibdum. Ara, ‘Nun Nai Imtamnyi biryi sun Yahudi yala kum nang ababyi teleb kubdeibkwande,’ eboka kanci minob ura laktoto kum kuamwe dinyi asi lak kibdeibdum.” Ato eboka nun Nai Imtamnyi biryi nisi tikeibnou. Ara, nun Nai Imtamnyi bira utotoa nirya kikniamunyi biryi a dinyi asi minob bingnamuryok, Erci nun abwe yabwe minob kuramnyi nang dam ara lak kum kimdeiramwe. Odei-odei kubde baramnyi nang nirya aryi a dinyi ara sun walwal aryi kum bingnamnyi asi, ukuryok aryi nun Nai biryi a dinyi ara ninyi nirya asi lak kimdeirisurur. 10Ara, sun im dangna tukwe dangna nang kalingnamingnyi weik sien nang ab erebdob nang ab nirya aryi nun Nai Imtamnyi biryi teneiransou bikdob dinyi nirya asi bikdobting tenen, nun Nai biryi a dinyi ati sun dib tenen nang asi lak kibdeibsou. Ara, nun Nai Imtamnyi biryi, “Niryi teneiranse bikdob dinyi utotoa nirya lak kibkwande,” tenen Erci nunda dib tenen nang biriman aryi sun im dangna tukwe dangna kuraming sien nang asi etererur. 11A dinyi ara nun Nai Imtamnyi biryi yuma kobdob talak aryi teneramwe to kunurur. Ba, Erci minob teneramwe to ara nun Du Yesus Kristus biriman aryi sirya kunubmou. 12Nun Du Kristus biriman aryi nun dib tenen nang ara nun Nai Imtamnyi urasintam bana teleb. Ara, dib tenena deici aryi nunci, “Nun Du biryi nunsi lebdeibsou,” tenebibiryi, ilil kum asa aryi nun Nai dam bana teleb. 13A deyok aryi, ni Paulus biryi sunsi ato ebkatabkwinsin. Ninyi aryi tabwe deboka nisi kalingnunung deyok aryi sun kanya mambul kubsicei. Niryi sun Yahudi yala kuma nang asi Teleb Uram eteresunun deyok aryi, mambul kurdeiriraning ati, sunci katabum kanya bobdobmunci, kilkil kanya bobdarur. Ati, sunci, “Nunda Yahudi yala kuma nang ababyi Teleb Uram dobdobmab,” tenen nun Nai Imtamnyi si weik ena teleb.
Paulus biryi sun Efesus nang ati molobmilibmou uram
3:14-21
14A deyok aryi, ni Paulus biryi ni kutam ikoka nun Nai Imtamnyi bisi molonun. 15Nun Nai Imtamnyi bira imtam kurande yala tukwetam kurande yala utotoa nirya asi kiknibmou ura, yala si yuk-yuk asi doansounyi kurur ati ebman 16Nun Nai Imtamnyi biryi sun kanya yuk-yuk asi mikib kibdeiboka katabum erdeirisina teleb. Ara, Erci mikib kimdeirisina langdeirisur to, Erci Er Kanya Roh Kudus biriman aryi sun kanya dam langdibdeiboka mikib kimdeirisina teleb. Ato eboka molormilisunun. 17Ara, sun dib tenena deici aryi nun Du Yesus Kristus bira sun kanya dam asi iya kusurur ati molormilisunun. Tonda, sunci tanglona kum uca katabum eboka boukwe weik kibkwandum ati molormilisunun. 18Niryi sunti molobmilibne ba, sun dib tenen nang yuk nang nirya ab tonkwa aryi mikib yabokabmunci, nun Du Yesus Kristus bikdob dinyi bingna teleb. Ara, “Nun Du Kristus biryi nunsi boukwe weik kimsurur dinyi ara langdeiboka karesurur,” tenen bikdobkwandum. Ba, sunci diboka lilibmunci, “Nun Du Kristus biryi nunsi boukwe kimsurur ara ninyi aryi nukoka kiklibmanto kum dinyi asi karesurur,” tenen bikdobkwandum. 19Nun Du Kristus biryi boukwe kimsurur dinyi ara iya langdirdeisurur. Ati, ninyi kanya aryi a dinyi nirya asi liliboka kum bingnub. Ati, nun Du Yesus biryi langdibdeiboka sunsi boukwe weik kimsina teleb. Ara, nun Nai Imtamnyi biryi langdeiboka karesururnyi kurur to, Erci langdeiboka sunsi kisal dangsina teleb.
20-21Ura, ni kwit yabwe. Nun nirya ara nun Nai Imtamnyi si weik ena teleb. Nun Nai bira iya mikibnyi kurur ati ebman. Ara, nunci molobmabyi tok, nun tenebmabyi tok nirya asi kunuboka nun Nai biryi kisal dangsina ilinto tabakoka langdeiboka karebsute. Ura, Erci kisal dangna ilinto asi tabakoka karebsute. Ara, nun kanya dam wa isurur mikib deici aryi nun Nai biryi nunsi langdeiboka kisal daksute. Ati, nunci nun Nai Imtamnyi si weik ena teleb. Ara, sun dib tenen nang kankan asi Er si weik ebkwayeb. Ati, nunci nun Du Yesus Kristus biriman aryi nun Nai Imtamnyi si weik ena teleb. Ara, ukuryok aryi kuboka aminda kubde binkwayeb talak ababyi nunci tanglona kum uca Er si weik ena teleb. Amin.
Currently Selected:
Efesus Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
