Efesus Uram 4
4
“Nun dib tenen nang ara nun Du Yesus ab tonkwa nong tentok ato kunub,” ebmou uram
4:1-16
1Ura, ni Paulus bira nun Du Yesus Kristus bisi wa irmilinun deyok aryi, ninyi aryi tabwe deboka kalingnunungnyi kununci, niryi uram ebdaraboka sunsi uram ton ebdeibkwinsin. Ara, nun Nai Imtamnyi biryi, “Ni dam kun nang kibdarur,” eboka nabsou to, sunci Er Imtamnyi biryi namsin uram keken nang kibdandobmunci, teleb dinyi kunubdarur. 2Ato kubmunci, sun kanya luknuboka namin kanya bobdarur. Tonda, sun yu kanya minola weksicei. Eda, boukwe weik kibdamunci, yuk nang asi yu minola weksicei. 3Ati, sunci tanglona kum uca busul kuboka yuk nang ab tonkwa antanibdobdarur. Ara, Er Imtamnyi Kanya Roh Kudus biriman aryi karebsou antanirdeirisina kalikoka sunci tuba-tuba neik kanya akwe bobdarur. 4Nun dib tenen nang ara nong tentok ato kunub ati ebman. Tonda, Er Imtamnyi Kanya Roh Kudus ababyi tentok kurur. Tonda, nun dibde bunub dinyi ababyi tentok dinyi akwe kurur. Ara, nun Nai Imtamnyi biryi sunsi nabsou ara Erci, “Dibde bun dinyi tentok asi dibde bukdarur,” eboka nabsou ati ebman. 5Ba, nun Du Yesus bibabyi tentok kurur. Tonda, nun Du bisi dib tenena ababyi tentok kurur. Tonda, nun me dongosina ababyi tentok kurur. 6Tonda, nun Nai Imtamnyi bibabyi tentok kurur. Nun Nai bira utotoa nirya asi kalikoka Iya Erebdobnyi kurur. Erci im dangna tukwe dangna dinyi nirya asi kikniboka lulungdeirisurur. Nun Nai bira ninyi nirya sun kanya dam kusururci, Erbabyi tentok kurur. 7Ba, nunda dib tenen nang yuk-yuk ara Er Imtamnyi Kanya Roh Kudus aryi karesin dinyi yuk-yuk dobdobmoubwe. Ara, nun Du Yesus Kristus biryi bokoka karebsou to, nun yuk-yuk aryi karesin dinyi yuk-yuk asi dobdoboubwe.
8A deyok aryi, Er Imtamnyi Uram aryi nun Du Yesus Kristus biti ato erur,
“Erebdob ai welebanmou ura, Er ordana nang asi muna kibmounyi biryi tabwe deamwe nang ilinto asi lebdeiboka bobinmou.
Bobinmou ura, Erci bulubdeibmou bona asi bokoka ninyi yuk-yuk asi karebmou.”#Mzm. 68:17
9A nukmab uram ara nun Du Yesus Kristus deyok ati eboka kerek sekmou. Nun Du bira erebdob ai welebinmounyi bira imtam ai welebana kum kubmou cok, mutuk um ato wengyurbinmou. 10Ura, nun Du Yesus bira mutuk amwetam yurbinmou ani, Erci imtam ai iya erebdob ai asi welebinmou. Ura, Erci imtam tukwetam nirya asi langdeibkwamwe ati, Erci imtam ai erebdob ai asi welebinmou. 11Welebinmou ura, nun Du Yesus biryi karebsou uca, ton nang ara nun Du Yesus biryi, “Teleb Uram deyok kouboka eterebde bindarur,” eboka bokdonoksou nang kunub, yuk nang ara Er Imtamnyi Uram ebdeibmaca lak eteren nang kunub. Tonda, yuk nang ara Teleb Uram eterermilin nang kunub, yuk nang ara dib tenen nang asi kalingna nang kunub, tonda yuk nang ara dib en uram liliboka eteren nang kunub. 12Ara, nunci Er Imtamnyi dam kun nang dib tenena asi katabum ebdeibkwamib ati, nun Du Yesus biryi nunsi tikeibsou. Ara, “Sun dib tenen nang aryi katabum eboka yuk nang asi diblilibkwaming,” tenen ati, nun Du Yesus biryi nunsi tikeibsou. Tonda, “Sun dib tenen nang ara antanibdandoka nong tentok ato kibingnyi ba, dib tenena dinyi asi nebnin-nebnin binkwaming,” tenen ati, nun Du Yesus biryi Er wa irmilin nang tikeibsou. 13Ara, nun dib tenen nang nirya aryi antanibdandoka dib tenebibyi biriman aryi neik kanya bobkwamib ati, nun Du Yesus biryi nunsi tikeibsou. Tonda, nunci neik kanya boboka Er Imtamnyi Mi asi diboka bikwamib ati, Erci nunsi tikeibsou. Tonda, nunci antanibdandoka nun Du Yesus Kristus biryi kisal dangsina langdeirisurur ati, nirya bikwamib ati Erci nunsi tikeibsou.
14Ara, nun dib tenen nang kanya ara kankana tuba kum kubkwansir ati, Erci wa yuk-yuk kareboka tikeibsou. Ara, nunda mitik mabwe aryi walwal kanya tuba boraming to kum kubkwamib ati, erci nunsi tikeibsou. Tonda, “Tola uram eteren nang aryi bowanikminikingnyei,” tenen nun Du Yesus biryi nunsi wa yuk-yuk karebsou ba, tola uram yuk-yuk aryi nunsi tuba kum bowanikminikwansir. 15Eda, nunda dib tenen nang aryi boukwe weik kibdandoka dib en uram akwe ebkwamib ati, nun Du Yesus biryi tikeiboka wa yuk-yuk asi karebsou. Ato kuboka nebnin-nebnin baramibiryi, nunda katabum eboka antanibdandobibiryi, nun Du Yesus Kristus ab tonkwa kubkwamib. Nun Du bira nun iya weik sienyi kurur ati ebman. 16Nun Du biryi antanirdeirisurur uca, nunda dib tenen nang nirya ara nong tentok ato kunub. Nong tentok ato antanibdandoka kunub ba, nun Du Yesus biryi karebmasou dinyi biriman yuk-yuk aryi nunsi miliboka mururdeirisurur. Melmel yuk-yuk aryi nun yan taruk nong nirya asi mururdeirisurur to, nun Du Yesus biryi karebmasou dinyi yuk-yuk aryi nunda dib tenen nang asi mururdeirisurur. Nong tentok ato kuboka nunda dib tenen nang aryi teneramib dinyi asi nebnin-nebnin baransir ba, nunci tabakoka boukwe weik kimdanub. Ara, nun Du Yesus biryi mururdeirisurur ba, nunda dib tenen nang nirya aryi nun Du Yesus biryi wa yuk-yuk karebsou asi kunuramibci, nunci tabakdongoboka boukwe weik kimdanub.
“Sunda berengna dam kun nang ato kundarur ati, teleb dinyi akwe kunubdarur,” eboka eterebmou uram
4:17-32
17A deyok aryi, nun Du Yesus biti niryi uram ton ebdarab eboka sunsi ebkwinsin. Sunda Er Imtamnyi Uram kum bingnung nang aryi malyi kuraming to kuna mem. A nang ara talyi dinyi akwe tenenung ati ebman. 18Sun Er Imtamnyi Uram kum bingnung nang ara asing kun nang ato kunungci, nun Nai Imtamnyi bisi diboka kum bingnung. A nang ara Er Imtamnyi dam kun nang kum kunung deyok aryi, Er ab tonkwa kum kunung. A nang ara tanglona kum uca, “Nun li,” tenenungci, Er Imtamnyi bisi iya kum bingnung. 19A nang ara ninyi kanya diboka kum boronung aryi, “Ner talyi yobkwan,” tenen kanya akwe bonungci, talyi yordanung. Tonda, a nang aryi alyi tenen dinyi utotoa asi kuraming. Tonda, a nang ara tanglona kum uca, “Bona ilinto dobdobtinyi,” tenen kanya akwe bonung.
20Sun Er Imtamnyi Uram ati walwal nang aryi ato kuboka malyi kuraming bok, sunda dib tenen nang ara ato kuna kum nang kurandum. Sunda nun Du Yesus Kristus milin nang kurandum ati, sunci a malyi kun dinyi nirya ati, “Nun Du biryi mem esurur,” tenen bikmarum. 21Sun Efesus nang aryi nun Du Yesus uram Teleb Uram ara sirya kekebmarum. Tonda, nun Du Yesus deyok dib en uram ara Teleb Uram eteren nang aryi sunsi diboka eterebmasei. 22-23Ara, ato eboka dib en uram eterebmasei. “Sunci sun malyi tenen dinyi nirya asi taklobmunci, teleb tenen dinyi ukuryok tenen dinyi akwe teneibdarur. Ati, sunci sun minob tenen dinyi ninyi kanya aryi malyi tenen dinyi nirya asi taklobdarur. Ninyi kanya aryi tenen dinyi ara malyi dinyi akwe tenerur ati, ‘Sirya lubmar,’ tenen dinyi bai donokmanto dinyi kurur ati ebman. Ati, sunci malyi tenen dinyi nirya asi bai donokmunyi ba, Er Imtamnyi Kanya Roh Kudus aryi ukuryok kanya karebsir ba, sunci teleb tenen dinyi akwe tenen kunubdarur. 24Ati, sunci nun Nai Imtamnyi biryi sunti kiknibdeibsou ukuryok tenen dinyi asi kaliboka sun kanya dam yuk-yuk asi bobdobdarur. Nun Nai biryi, ‘Ni kunun to sunbabyi kubkwaming,’ tenen Erci nunda dib tenen nang ati ukuryok tenen kanya kiknibdeibsou. Ati, nunci Er Imtamnyi urasintam aryi dib en uram taleboka kikib dinyi akikwe kunubdeiboka Er Imtamnyi dam kun nang kubkwamoubwe ati, nun Nai biryi nunti ukuryok kanya kiknibdeibsou.”
25A deyok aryi, sun nirya ara tola uram nirya taklobmunyi ura, yuk nang asi dib en uram akwe eterebkwandurur. Nunda dib tenen nang ara nong tentok ato kunub ati, dib en uram akwe erdana teleb ati ebman.#Za. 8:16 26Yu kubsici ababyi, sunci malyi uram ebmunyei. Tonda, malyi dinyi kunubmunyei. Eda, yu kanya asi darabdongobdamunci, sunci, “Arub aryi antanibdankwanim,” ebdandoka minola antanibdandarur. 27Ato kubmuncok, sunci isa sienyi si Iblis bisi bisik sekoka sokon kum loubkwandum. 28Sun yuk nang bona asi ukula doramingnyi nang ara ukula dona taklobkwanung. Yuk nang bona asi ukula dona ati taklobingiryok, a nang ara busul kuboka sun taruk aryi wa yuk-yuk asi ina teleb. Ara, “Sun kwaning ataranci nang asi yina karebkwan,” tenebingiryi, wa ina teleb.
29Sunci yuk nang asi malyi uram ebmunyei. Eda, yuk nang asi katabum erdeirin uram akwe ena teleb. Ara, sun yuk nang mitang yuk-yuk kuranci nang asi katabum erdeirin uram ebdarur. Ara, “Sun ni uram kekebningnyi nang kanya yuk-yuk asi katabum ebdeibkwan,” tenen ato kuna teleb. 30Sunci malyi uram eboka Er Imtamnyi Kanya Roh Kudus karebmasou dinyi asi surburuksinibmunyei. Roh Kudus karebmasou ara nun Nai biryi, “Aminda lebkwansir dinyi bikwandarur,” tenen karebmasouci, sisa deirininto kuboka Er Kanya karebsou asi malyi uram eboka surburuksinibmunyei. 31Sunci sun yuk nang aryi malyi tenen dinyi nirya asi bai donokdarur. Tonda, yuk nang ati, “Yu bobkwan,” tenen kanya nirya taklobdarur. Tonda, yuk nang asi kerena uram ababyi taklobdarur. Tonda, sunci tola ati yuk nang asi tatab-tatab ebmunyei. Tonda, yuk malyi kun dinyi ababyi sunci kubmunyei. 32Eda, namin kanya bobmunci, yuk nang asi bico tenebdarur. Yuk nang aryi sunsi malyi kubmasingnyi ura, sunci yu kanya darabdongoboka antanibdobdarur. Nun Nai Imtamnyi biryi nun Du Yesus Kristus biriman aryi nun malyi kun dinyi asi kilibmasouci, nun ab tonkwa antanibdeibmasou to, nunbabyi neiktoto nunsi malyi kubdeibmasingnyi nang ab tonkwa antanibdobkwanub.
Currently Selected:
Efesus Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
