Efesus Uram 2
2
“Sun malyi kurandau aryi din nang ato kurandau asi nun Nai Imtamnyi biryi sunsi kam bukeibsou nang ato kibdeibsou,” eboka eterebmou uram
2:1-10
1Ura, ni kwit yabwe, sunda minob ura malyi kun dinyi akwe kurandauci, sunci nun Nai Imtamnyi biryi, “Ato-ato kubdarur,” eansou uram asi yan yanibde barandau. A deyok aryi, sunda din nang ato kurandau. 2Minob talak aryi sunda kilkil kanya boboka malyi kun dinyi akwe kurandau. Ati, sunci, “Sun malyi kanya bon nang aryi malyi tenen dinyi akwe kunubkwayeb,” teneboka sunci malyi kun nang sienyi bisi milirandau. Anyi bira isa sienyi kurur ati, erci wa iboka sun, “Er Imtamnyi Uram kekena nun li,” tenen nang kanya asi malyi kimdeirirur. 3Nun nirya ababyi minob ura ato kuramuburyi nunci, “Nun kanya dam aryi malyi tenen dinyi kunubkwayeb,” tenen, “Talyi dinyi akwe kunubkwayeb,” tenena akwe kuramoubwe. Ati, nunci nun kanya teleb teneransou tok, malyi kun dinyi akwe kuramoubwe. A talak ara nun Nai Imtamnyi biryi nunsi yu weik boransouci, Erci nunbabyi, “Wenebkwan,” teneransou. Ara, sun Er Imtamnyi bisi milina kum nang ukuryok kuraming to, nunbabyi neiktoto ato kuramoubwe. 4-5Nunda nun malyi kun deyok ati wenebmasin to nang kuramoubwe bok, nun Nai Imtamnyi bira Er kanya namin kurur aryi langdeiboka nunsi bico tenebsou. Ati, nun Nai biryi nunsi boukwe weik boransouci, Erci nun malyi dinyi akwe kuramoubwe nang asi lebdeibsou. Ara, Erci nunda din nang ato kuramoubwe asi kam bukeibsou. Ara, nun Nai biryi nun Du Yesus Kristus bisi kam bukeibmou ara nunbabyi nun Du Yesus ab tonkwa kam bukeibsou. Nun Nai Imtamnyi biryi nun malyi kun dinyi nungna kum kubmasouci, nunsi teleb kubdeibsou deici aryi nunsi lebdeibsou ati ato ebman. 6Ura, nun Nai biryi nun Du Yesus Kristus bisi kam bukeibmou ura, imtam ai erebdob sokon asi bukeibmou. Ato kuboka Erci nunbabyi nun Du Yesus ab tonkwa kam bukeibsou ura, erebdeiboka nunbabyi imtam ai erebdob sokon bukeibsou. 7Ara, aminda kubkwayeb talak ara nun Nai biryi nunsi nun Du Yesus biriman aryi langdeiboka teleb kurdeirisurur ati, lak kibdeibkwande. Erci langdeiboka teleb kurdeirisina asi lak kibdeibkwande ati, nun Nai biryi nunsi nun Du Yesus Kristus ab tonkwa erebdeiboka erebdob sokon bukeibsou. 8Nun Nai Imtamnyi biryi nunsi lebdeibsou ara Erci nun malyi kun dinyi asi nungna kum kubmasouci, Erci teleb kibdeibsou deyok aryi, nunsi lebdeibsou ati, ato ebman. Ara, nunci nun Du Yesus bisi dib tenenub deyok aryi, Erci nunsi lebdeibmasou. Nunda telebto kuramoubwe deyok aryi, Erci kum lebdeibsou. Eda, nun Nai Imtamnyi biryi nun malyi kuramoubwe nang asi bico tenebmasouci, “Teleb kubdeibkwan,” tenen nunsi lebdeibsou. 9Nun Nai biryi boukwe kiboka lebdeibsou ara nunci teleb kuramoubwe deyok aryi kum lebdeibsou. Eda, nun Nai biryi, “Teleb kubdeibkwan,” tenen lebdeibsou ati, ninyi tentok aryi wingdaboka erdamnyi kisal dangdana mem ati ebman. 10Nun dib tenen nang ara Er Imtamnyi biryi ukuryok kiknin nang ato kibdeibsou. Ara, nunci Er Imtamnyi biryi kiknibdeiansou wa teleb kun dinyi kununkwamoubwe ati, Erci nun Du Kristus Yesus biriman aryi kiknibsou. Ura, Erci, “Ni teneibmase to kubting,” tenesurur.
“Nun Du Kristus biryi nun Yahudi yala nang ab Yahudi yala kum nang asi antanibdeibsou,” ebmou uram
2:11-22
11A deyok aryi, sun nirya ara sun minob kurandau to teneibdarur. Minob talak aryi sunda Er Imtamnyi Uram walwal nang kurandau ati, teneibdarur. A talak aryi sun Yahudi yala nang aryi sunti si siboka, “Yahudi yala nang kum kunung,” eboka “Den bama kum sengna nang aca,” eransei. Sun Yahudi yala nang ara den bama sengna nang aryi sunti ato eransei. A den bama sengna ara ninyi aryi kiknin dinyi kurur ati, nun malyi kun dinyi kum kilibsute ati ebman. 12A kurandau talak aryi sunda Kristus dam kun nang kum kurandau. Tonda, Er Imtamnyi biryi wibmou nang ara Israel yala nang ab tonkwa kum kurandau. A talak aryi Er Imtamnyi biryi, “Kisal dakwansin,” murubdeiboka ebdeibsou uram yuk-yuk ati, sun walwal kurandau. Er Imtamnyi biryi ebdeibsou uram yuk-yuk asi kum bingnandauci, sunci, “Nun Nai Imtamnyi biryi lebkwansir,” tenen dibde kum burandau. A talak aryi sunda malyi nang kankan kurandauci, Er Imtamnyi bisi walwal nang ato kurandau. 13Ato kurandau bok, sunda yuk ai dam kuna kum ai kurandau nang asi ukuryok ara nun Nai Imtamnyi biryi nun Du Yesus Kristus biriman aryi sunsi boyandoka Er dam kun nang kibdeibsou. Ara, nun Du Yesus Kristus Er ining sakmou akiryi nun Nai biryi sunsi Er dam kun nang kibdeibsou.
14Nun Du bira nun ninyi antanirdeirin deyoknyi kurur deyok aryi, nun minob ara lika wilibdandoka bongdaramoubwe asi a lika dakdeiboka antanibdeibsou. Ba, nun Yahudi yala nang ab, sun Yahudi yala kuma nang ab bimsa yaribdandoka yuk-yuk kuramoubwe ara sirya antanibdeibsou. Ba, minob yuk-yuk kuramoubwe to kum kunub. Eda, neika antaniboka kunub. 15Nun Du bira dibmou deici Erci Musa takubdeibsou uram asi dongtam kibdeibsou ati ebman. Ara, Musa biryi, “Ukubdarur-Ukuna mem,” en uram yuk-yuk asi nun Du Yesus biryi dongtam kibdeibsou. Ara, nunda Yahudi yala nang ab Yahudi yala kum nang ab tonkwa antanibdeiboka ukuryok yala neik yala kiknibkwansou ati, nun Du Yesus dibmou. Ato kubokaburyi, nun Du Yesus biryi nun dib tenen nang asi antanibdeibsou. 16Ara, yala tentok ato, nong tentok ato kiknibdeibkwansou ati, Erci nunda Yahudi yala nang ab sun Yahudi yala nang kuma ab asi antanibdeibsou. Ara, nun Du Yesus co lase deici dibmou biriman akiryi nun Du Yesus biryi nunda tukwetam nang ab nun Nai Imtamnyi ab antanibdeibsou. Nun Du co lase deici dibmou akiryi, nun bimsa yarirdaramoubwe dinyi nirya ara kum daneibsou ati ebman. 17Nun Du bira sirya yanmou ura, Erci, “Antanibdeibmasin,” eboka Teleb Uram lak eterebsou. Ara, “Yahudi yala kuma nang babyi Yahudi yala nang babyi antanibdeiboka namin kanya karebmasin,” eboka eterebsou. Ara, minob ura Er Imtamnyi dam kuramnyi nang ab Er Imtamnyi dam kum kuramnyi nang ab asi nun Du Yesus biryi antanibdeibsou. 18Nun Du biriman aryok nunda Yahudi yala nang ab sun Yahudi yala kuma nang ab ara nun Nai Imtamnyi urasintam barona teleb ati ebman. Ara, Er Imtamnyi Kanya Roh Kudus milibsir ba, nun nirya ara neik kanya boboka nun Nai Imtamnyi dam baramib.
19A deyok aryi, uku talak ara sunda Er Imtamnyi Uram ati tuba walwal nang kum kurandum. Sunda yuk atei aryi tiya tingyangaraming nang ato tuba kum kurandum. Eda, sunda Er Imtamnyi dam kun nang ato kurandum. Ara, Er Imtamnyi atei nang ato kurandum. Tonda, Er Imtamnyi mabwe silib ato kurandum. 20Tonda, sunci dib en uram asi diboka talerandum. Ara, Er Imtamnyi biryi bokdonoksou eterebde ban deyok nang aryi etereransou Teleb Uram asi sunci diboka talerandum. Tonda, Er Imtamnyi Uram ebdeibmaca lak eterermururansei uram asi sunci katabum eboka dib tenerandum. A dib en uram deyok ara nun Du Yesus Kristus kurur ati ebman. Sunda dib tenen nang ara Er Imtamnyi biryi dorur ai ato kurandum ati ebman. Ninyi aryi, “Ai dobkwan,” tenebmangnyi ura, yuma kobdob ara atika ton abyokomna ikingnyi ura, aminda aryi aruma kalurdongoraming. Ura, nun Nai Imtamnyi bibabyi neiktoto ukuryok ai ato dorur. Ati, nun Nai biryi ingdur abyokomna katabum tingdeirin dinyi ato ara dib en uram kurur. Tonda, sunda dib en uram asi katabum eboka dib tenerandum nang ara Er Imtamnyi dorur ai abilinga ato kundarur. Ura, nun Du Yesus Kristus bira nun nirya asi mururdeirisina deyoknyi kurur. 21Nun Du Kristus biryi mururdeirisurur deyok aryi, nunda dib tenen nang ara tonkwa antanirdardoramib. Nun Du biriman aryi nunsi mururdeiriransir ara Er Imtamnyi Kanya Roh Kudus aryi nun kanya dam kubkwansou ati, nunda Ersi dama deiboka Er Imtamnyi si weik ebkwamoubwe ati, Erci nunsi murubdeibsou. Ato kuboka nun Du Yesus biryi nunda dib tenen nang asi antanibdeiboka Er Imtamnyi biti dama deiboka si weik en ai ato kimdeiriransir. 22Nun Yahudi yala nang akwe kum antanirdeiriransir. Eda, sunda Yahudi yala kum nang ababyi nun Du Yesus biryi antanirdeirisurur. Ati, nunda Yahudi yala nang ab Yahudi yala kum nang ab aryi Er Imtamnyi Kanya Roh Kudus biriman aryi nun Nai Imtamnyi ab tonkwa kubkwamoubwe ati, nun Du Yesus biryi nunsi mururdeirisurur.
Currently Selected:
Efesus Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
