Ulangan Uram 9

Israel ninyi aryi Imtamnyi ebdeiamwe to kununa kum kuramnyi deyok

9:1-6

1Musa biryi Israel ninyi asi ato ebmou, “Israel ninyi kekendarur! Sunda mikib kum ninyi bok, arub aryi me Yordan kouboka mikib ilila koukwe ninyi ab, nong ilila ninyi ab mutuk dam wengbinkwamarum. Ba, sun weik atei-weik atei ilinto donungci, lika doboka aknabdongobyi. A dobnyi lika ara im bolibmanto kurur. 2Ba, sun nong ara ilila koukwe neboka mikib ilinto atei ninyi kuramnyi. Sun yala ara Enak yala ninyi. Sun deyok ati yuk ninyi aryi nungnung ara sunci kekendarur. Ara, ato enung, ‘Unanyi biryi sun Enak yala ninyi asi dubdenkwamote do?’ enung. 3Bok, ukura sunci eibkundum. Ara, Er Iya Erebdobnyi bira me Yordan kouboka minob menengbinkwamar. Ura, Er Iya Erebdobnyi nun molonubnyi biryi sun urasin dam aryi Enak yala ninyi asi uk yirande to kubdeibci ura, sun urasintam aryi sun Enak yala ninyi mikib ara luknubdeibkwande. Ba, sunsi uram talak ebdeibsou to kuboka, sunci Enak yala ninyi asi yakdonokoka nirya obsekwandum. 4Bok, Er Iya Erebdobnyi biryi sunsi sirya yakdonokci ura, sun kanyatam aryi ato tenena mem! Ara, nun, ‘Er Imtamnyi ebdeibwe to diboka kunub deyok aryi Er Iya Erebdobnyi nun molonubnyi biryi a mutuk boyasou,’ ara tenen kanya bona mem! Er Imtamnyi biryi Enak yala ninyi aryi malyi kun dinyi ilinto kunung deyok ati sun dam dobkarebsou. 5Sunci Er Imtamnyi ebdeibwe to kunundarur ati, a mutuk dam boyasou kuma. Eda, Er Iya Erebdobnyi biryi minob sun abwe yabwe, Abraham ab, Ishak ab, Yakub ab dam asi uram talak minob ebdeiamwe to kunubdeibsou. A kunubdeibsou ara sun Kanaan ninyi ara malyi kun dinyi ilinto kunung deyok ati, yakdonokuryi sunti karebsou. 6Ati, sun Israel ninyi diboka bikdarur. Sunci Er uram ebdeibwe to kunundarur ati, Nun Nai Iya Erebdobnyi biryi sunsi sul mutuk karebsoua kuma. Eda, Israel ninyi sunda kisok keil kat ato ninyi kundarur!” ato eboka Musa biryi Israel ninyi asi ebmou.

Musa biryi, “Israel ninyi aryi Sinai mutuk kon dam kwemdeina kiknibmai,” nukmou uram deyok

9:7-29

(Kel. 32:1-35)

7Musa biryi Israel ninyi asi ato ebmou, “Sun luba kimna mem! Kisok tam diboka bobdarur. Ara, Mesir mutuk deibloboka a mutuk dam wengyankwandauci bisik dam yangarandau talak aryi, sunci Er Imtamnyi bisi tuba-tuba waturandau. Ato kurandau deyok aryi, sun Nai Er Iya Erebdobnyi bisi yu wekeiandau. 8Ba, Horeb mutuk kon dam aryi Er Iya Erebdobnyi yu weik wengna dinyi kunubmandau. Ura, Erci sun nirya asi, ‘Obkwan,’ tenebmasou. 9Nira Horeb mutuk kon dub welebinmase. Ara, ‘Ukubdarur-ukuna mem,’ en uram sunti Er Imtamnyi biryi keil lase deici sekeiboka karebkwamanou deyok ati binmase. Ba, uki 40 baryi kwaning ab, me ab yina kumkum Sinai mutuk kon kuanse. 10Ba, Er Iya Erebdobnyi biryi keil lase bitinyi Er taruk aryi sekdongoboka karebmanou. Sunda Sinai mutuk kon deyok dam neika buluboka wekmandau talak aryi Er Imtamnyi biryi uk buk angmou deici tingyandoka uram ebmou. A uram ebmou to keil lase bitinyi sekeiboka karebmanou.

11Uki nungna 40 baryi sirya bisibwe ura, Er Iya Erebdobnyi biryi, ‘Ukubdarur-ukuna mem,’ en uram keil lase bitinyi nisi karebmanou. 12Sirya karebnou ura, Er Iya Erebdobnyi biryi nisi uram ato ebmanou, ‘Kan atei nang Mesir mutuk aryi lobkweteboka boyangarum ninyi malyito kunmang. Ara, Nisi molona kumci, ukura sunci yuk kwemdeina asi kikniboka molonmang. Ati, ola yurbirum,’ eboka arukmanou.

13Tubto Er Iya Erebdobnyi biryi nisi ato ebmou, ‘Ni bikman, akatei nang ara sun kisok keil kat ato ninyi kuramnyi. 14Ni Iya Erebdobnyi bisi bisik sengnina mem! Niryi sun nirya obkiribnyi ba, luba kibkwaming. Bok, kan yala ninyi asi weik kibdeibniryi, mikib ilila yala kibdeibkwankin,’ ebmanou.

15Er Iya Erebdobnyi sirya uram ebwe ura, ni dangubokabsiryi, ‘Ukubdarur-ukuna mem,’ en uram ni taruk bitinyi aryi boboka yuryanmase. Ba, a yuryanganmase mutuk kon ara uk buk ilinto tuba angmou. 16Niryi dinmasise uca, sun Israel ninyi aryi sun Nai, Er Iya Erebdobnyi dam malyi kibmandau. Ara, keil si logam aryi bisam sapi mi kiknibdeiboka kwemdeina molonmandau. 17Ura, niryi sun asing dinmandau bok, ‘Ukubdarur-ukuna mem,’ en uram keil lase bitinyi ni taruk doubmase ara donokoka oublobmase ba, teleboka mitik-mitik kibmou.

18Ura, Er Iya Erebdobnyi bisi tubto mutuk kon dam welebinmase. Ba, Er Iya Erebdobnyi urasin dam luknubdongoboka uki nungna kitingtam 40 baryi, lukunda 40 baryi kuanse. Ara, yuma kuanse to kwaning ab, me ab yina kum kuranse. Ato kuanse dinyi ara sun Israel ninyi aryi Er Iya Erebdobnyi dam malyi kibmandau deyok aryi kuanse. Ara, sunci Er Imtamnyi dam asi iya malyi dinyi betebdongoandau aryi, Er Iya Erebdobnyi bisi yu weik kibdongoandau. 19#Ibr. 12:21Ato kubmandau deyok aryi ni ilil kubmanou. Ara, ‘Er Iya Erebdobnyi yu ara uk angnande to kuboka sun nirya obsicei,’ tenebmase. Bok, Er Iya Erebdobnyi biryi tubto ni molona kekebmanou. 20Tonda, ‘Er Iya Erebdobnyi biryi Harun bibabyi yu bobmouci, obcei,’ tenebmase. Bok, niryi Harun biti ababyi molobliknibmase. 21Ba, sunci kwemdeina bisam sapi mi yim atoanun kiknibdeiboka molonmandau dinyi ara niryi doboka uk dongobmase. Ura, niryi teleboka teikmasiryi, sici kibdeibmase. Ba, a sici kibdeibmase dinyi ara Sinai kon aryi me anaboka yurbaramwe me te asi dongobmase.

22Tonda, sun Israel ninyi aryi Er Iya Erebdobnyi bisi tuba-tuba yu kibdeibmandau. Ara, Tabera mutuk eboka si doandau ab, Masa mutuk eandau ab, Kibrot-Taawa mutuk eandau ab akiryi sun malyi kun dinyi aryi Er Imtamnyi yu wekeiandau.

23Tonda, sun Nai, Er Iya Erebdobnyi biryi minob talak aryi ato eansou, ‘Sun Kadesh-Barnea mutuk dam aryi anabdobdarur. Anabdobmunyi ura, “Sunti karebkwansin,” ebdeiansise mutuk si Kanaan dam wengbindarur,’ eansou. Bok, sun Israel ninyi aryi Er Imtamnyi ebmou uram asi dib kum tenebmandau. Tonda, Erci ebmou to kum kunubmandauci, Er ebdeiasou uram yan yaniandau. 24Niryi sun kundarur dinyi nirya bingsunun. Ara, sunci Er Iya Erebdobnyi ebdeibwe to kum kunundarur.

25Ba, sun Sinai mutuk kon dam aryi kwemdeina kikniboka molonmandau asi, Er Imtamnyi biryi, ‘A ninyi nirya obkwaman,’ ebmou ara ni bikmase. Ura, uki nungna kitingtam 40 baryi, lukunda 40 baryi, ni Er Iya Erebdobnyi bisi tuba-tuba luknubdongoboka moloranse. 26Niryi Er Iya Erebdobnyi bisi moloranse to ara ato kuboka moloranse. ‘Nai, Iya Erebdobnyi, Kan mabwe nermabwe bok, Kanci orkana mem. Sunda Kanci Mesir mutuk dam aryi lobdeiboka Kan mikib ab, Kan ibarya ab aryi, a ninyi lebdeiboka boyangarum. 27Kan wa in nang Abraham ab, Ishak ab, Yakub ab asi kanyi teneibderum. Kanci sun Israel ninyi kisok keil kat ato dinyi ab, sun yu dinyi ab, sun malyi kun dinyi ab asi dirlilina mem. 28Kanci kan mabwe nermabwe asi nirya obkabminyi ura, sun Mesir ninyi aryi ato ebkwanking. “Sun Israel ninyi molonungnyi bira Er mabwe asi, ‘Kanaan mutuk boboka wengbinkwansin,’ ebwe to kum kubmar. Eda, yini mutuk dam bobindoka obwe,” ebkwanking. Ara, Nai Imtamnyi kanci sun Israel ninyi asi yu bobumwe deyok aryi ato ebkwaming. 29Nai Imtamnyi, sunda Kan mabwe nermabwe kuma do? Nai, Kan Mesir mutuk aryi kuboka a boyangarum ara Kan mikib ab, Kan ibarya ab aryi kum boyangarum do?’ eboka molobmase,” Musa biryi sun Israel ninyi asi ato ebmou.

Currently Selected:

Ulangan Uram 9: MTG

Highlight

Copy

Compare