Ulangan Uram 10

Imtamnyi biryi, “Ukubdarur-ukuna mem,” en uram tubto kerek sekoka unubmou deyok

10:1-11

(Kel. 34:1-10)

1Ura, Musa biryi Israel ninyi asi ato ebmou, “Er Iya Erebdobnyi biryi nisi ato ebmanou, ‘Musa, kanci keil lase bitinyi minob kuanse to tubto teleboka bitabdeibdum. Ani, co yekoka a keil deirin co sangkol kiknibdum. Sirya kiknibminyi ura, Nisi mutuk kon dub weleyarum. 2Ba, Ni Imtamnyi biryi a keil lase bitinyi asi, Ni uram yuma kerek sekeianse bok, telebumwe dinyi tubto kerek sekwaman. Ba, a keil lase bitinyi ara kanci kiknibmaminyi co sangkol umbura kibdongobkwandum,’ ebmanou.

3Ura, niryi Er Imtamnyi uram kirdongon co sangkol kiknibmase. A kiknibmase co si ara akasia. Ani, keil lase bitinyi ababyi minob kuamwe to kuboka teleboka kiknibse ura, ni taruk bitinyi aryi boboka mutuk kon dub welebinmase. 4Ba, a keil lase bitinyi asi, Er Iya Erebdobnyi biryi yan memen uram deyok takubaryi minob sekeibmou to kuboka tubto sekeibmou. A deyok takubaryi uram ara sun Israel ninyi neika buluboka wekmandau talak aryi, uk buk angmou deici tingyandoka uram ebmou to sunti kerek sekeibmou. Sirya sekwe ura, nisi karebmanou. 5Ura, a mutuk kon dub aryi yuryandoka Er Iya Erebdobnyi ebdeibmou to kuboka kunubmase. Ara, a keil lase bitinyi asi co sangkol kiknibmase bisik kibdongobse. Ba, a kerek sengna keil bitinyi ara tuba a kubwe,” ebmou.

6Beerot Bene-Yaakan ebyi ara Musa biryi Harun ongobmou ongon aling kwiribtaleboka er mi Eleazar bisi ongobdeibmou. Ura, Harun bira a Hor mutuk kon dub dam dibmou ba, Hor mutuk kon dongobmai mutuk ati ebyi. Ani, a Mutuk ara ninyi aryi minob tukwe ukdanin yibinamnyi mutuk. Ura, sun Israel ninyi Beerot Bene-Yaakan ninyi aryi tukwe ukamnyi mutuk dam aryi anabdobmaici Mosera mutuk binmai. Ura, Harun a mutuk dam dibmou ba, tukwe dongobmai. Ba, Harun Imam kiboka iramwe wa unubmounyi bira er mi si Eleazar biryi unubmou. 7Ura, Mosera mutuk aryi anabdobmaici, Gudgod mutuk binmai. A mutuk aryi anabdobyi ura, me ilinto kuramwe mutuk si Yotbata binmai.

8Ura, Musa biryi sun Israel ninyi asi ato ebmou. “Sinai mutuk kon dam aryi Er Iya Erebdobnyi biryi sun Lewi yala nang asi ato ebdeibwe. ‘Sun Lewi yala nang aryi, “Ukubdarur-ukuna mem,” en uram co sangkol bobkwanung. Ani, sunda Ni Iya Erebdobnyi ai wa in nang imam nang kibkwaning. Tonda, ni Iya Erebdobnyi si deici aryi ninyi kisal dakwaming,’ ebdeibwe. A ebdeibwe to kuboka ukubabyi iya ukunkwaming. 9A deyok aryi sun yuk yala nang tukwe dobyi to, sun Lewi yala nang ara Kanaan mutuk tukwe ton dona kum kubkwaming. Eda, Er Iya Erebdobnyi nun molonubnyi bira sun dinyi kibkwande. Ara, Er Iya Erebdobnyi biryi ebdeibwe,” ebmou.

10Musa biryi ato ebmou, “Berengna 40 baryi, inina 40 baryi Sinai mutuk kon bindoka kuanse ara yuma bindoka kuranse to kuboka kubmase. Ba, Er Iya Erebdobnyi biryi ni molona kekebmanou. Ura, Er Iya Erebdobnyi biryi sun orkasina kum kubmasou. 11Ura, Er Iya Erebdobnyi biryi nisi ato ebmanou, ‘Yurbindoka sun Israel ninyi boboka menekdum. Ba, Ni Imtamnyi biryi sun abwe yabwe asi, “Kanaan mutuk boboka wengbinkwansin,” eanse mutuk bindoka kubkwaming,’ ebmanou,” ebmou.

Musa biryi sun Israel ninyi asi, “Er Imtamnyi bisi dib tenebdarur,” ebmou uram deyok

10:12-22

12Musa biryi sun Israel ninyi asi ato ebmou. “Ni kwit yabwe sun Israel nang, kekendarur. Er Iya Erebdobnyi nun molonubnyi biryi, ‘Ato kubdarur,’ ebsou. Ara, ato, ‘Er Iya Erebdobnyi nun molonubnyi bisi ilil kuboka Er ebdeibwe to akwe kunubdarur. Sun kanyi ab, sun nong ab nirya aryi Er Iya Erebdobnyi bisi kanyi deibmunyi ura, Ersi si weik ebkwandarur. 13Arub a ebman uram ara, “Sun telebto akwe kubdate,” tenen ebman. Ati, sunci Er Iya Erebdobnyi ebdeibwe to akwe kunubkwandarur.’

14Er Iya Erebdobnyi nun molonubnyi biryi im kikniburyi Er dinyi kibwe. Ani, im dub ababyi im kikniburyi Er dinyi kibwe. Tonda, tukwe ab, tukwetam kurur dinyi ab ababyi Erci kikniboka Er dinyi kibwe. 15Bok, Er Iya Erebdobnyi bira boukwe mitika kumnyi biryi sun abwe yabwe asi boukwe kiamwe. Ba, sun deibdoba, sun yala nang yuk wibdeiamwe. A nang ara sun a kunmarum atiba. 16A deyok aryi, sun kubde binkwanduma nirya ara Er Iya Erebdobnyi bisi ilil kuboka dib tenebkwandarur. Sun kisok keil kat ato kimna mem! 17Nun Nai Imtamnyi, nun molonubnyi bira Er tentok ara Er Iya Erebdobnyi kurur. Erda iya weiknyi kurur. Tonda, iya mikibnyi kurur. Er Iya Erebdobnyi bira ton nang teleb, ton nang malyi tenena kum kururnyi kurur. Tonda, Erci ninyi obmamunyi ba, libdobsurur tenen ati, dengnandum bona donanyi kuma. 18Er Iya Erebdobnyi biryi kwaknamna mabwe ab, sun akenyi dianci ba, ur kuraming nerabwe ab asi boukwe kimnande. Tonda, yuk atei nang sun atei tingyandoka kuraming nang asi boukwe kiboka kwaning ab, ongon aling ab karerande. 19Sunbabyi minob Mesir mutuk kurandau talak ara tingyangan nang kiandau. Ati, sunci yuk nang sun atei yandoka kunung nang asi boukwe kibkwandarur. 20Sunci Er Iya Erebdobnyi nun molonubnyi bisi ilil kubkwandarur. Ani, Er Iya Erebdobnyi bikwe moloboka Er ebdeibwe to akwe kunubkwandarur. Ba, Er si deici aryi, ‘Ato kunubde binkwan,’ eboka uram talak likeibkwandarur. 21Er Iya Erebdobnyi sun kiknibsounyi bisi, sunci Er si erebdeibkwandarur. Erci kuna ara sun asing eindarur. Ara, Er mikib ab, ilil tenen dinyi ab sun dam kurur ara sirya eirindarur. 22Sun abwe yabwe Mesir mutuk binamnyi ninyi ara 70 baryi demang bindoka kuramnyi. Bok, uku talak kunmarum ara Er Iya Erebdobnyi nun molonubnyi biryi sun yala ilinto tabakdongoboka karesurur. Ba, sun yala kurya tilirande to kundarur. A deyok aryi, Er Iya Erebdobnyi bisi si weik erebdeibkwandarur.” Ato eboka Musa biryi sun Israel ninyi asi ebmou.

Currently Selected:

Ulangan Uram 10: MTG

Highlight

Copy

Compare