Ulangan Uram 8
8
“Mutuk teleb si Kanaan bindoka kubkwandum,” ebmou uram deyok
8:1-20
1Musa biryi sun Israel ninyi asi ato ebmou, “Arub tum aryi arukmasin uram nirya asi, sunci busul asa kuboka kunubkwandarur. Ba, sun kam kuboka, sun yala ilinto kubkwandum. A uram asi kubmunyi ura, Er Iya Erebdobnyi biryi sun abwe yabwe dam asi uram talak ebdeiamwe mutuk wengbinkwandum. 2Sun kisok dam bobdarur! Er Iya Erebdobnyi nun molonubnyi biryi sun yini mutuk bisik kwalina uki 40 baryi taleboka boyasou. A boyanansou ara sunci Er Imtamnyi bisi, dib kum tenendarur ati luknubdeibsou. Tonda, sunsi teneboka dubdesou ara, ‘Ni Imtamnyi ebdeibse uram asi dib kunubkwaming do? Kum kunubkwaming do?’ tenen ati dubdesou. 3#Mat. 4:4; Luk. 4:4Ba, Er Imtamnyi biryi sun kanyi luknubdeiboka kwaning atan dinyi kareansou. Ani, Erci roti kwaning si Manna kareansou. Bok, sun ab, sun abwe yabwe ab asi roti kwaning si Manna ara, ‘Ato kwaning,’ tenena kum kundarur. Ara, Er Imtamnyi biryi kubsou dinyi ara ato dinyi ati kuansou. Ara, ninyi kam kunung ara kwaning aryok kum kam kunung. Eda, Er Iya Erebdobnyi uram kekeboka kunuranci ura, kam kuraming. 4Ba, kwalina uki 40 baryi yangandarur talak aryi sun ongon aling ton malyi kibsou do? Ani, sun yan u yiboka ton nesurur do? 5Er Iya Erebdobnyi nun molonubnyi biryi sunsi eteresurur. Ara, sun nai yabwe aryi sun mabwe asi etereraming to kusurur dinyi ara sunci bikwandarur. 6Ati, sunci Er Iya Erebdobnyi nun molonubnyi biryi ebdeibsou uram asi kunubdarur. Ba, Erci, ‘Ato kuboka kunubdarur,’ ebdeibsou to kunubmunyi ura, Ersi kanyi deibkwandarur! 7Ba, Er Iya Erebdobnyi nun molonubnyi biryi sul mutuk boboka wengbinkwansir. A mutuk ara me teleb mutuk kon dam aryi, anaboka lu mutuk dingirbarur mutuk ab, me kwan me dingirur mutuk ab asi bobinkwansir. 8A mutuk kurur yina yala ara gandum yala amuma ab, anggur co ab, kwarang co ab, delima co ab, zaitun co ab, kwiryi me ab ilinto kurur. 9Ba, sun bindoka kubkwandum mutuk ara roti kwaning ab, yuk yina ab kum atabkwansir. Tonda, tukwe kurukoka kat keil besi aryi dobkwandum. Ba, mutuk kon asi kurukoka keil si tembaga dobkwandum. 10Sun yina yibmunyi ura, boubkwansir. Ba, Er Iya Erebdobnyi nun molonubnyi bisi si weik ebkwandum. Ara, sul mutuk ati Imtamnyi si weik ebkwandum,” ebmou.
11Ura, tubto Musa biryi Israel ninyi asi ato ebmou, “Diboka kalikdandarur! Ara, sunci Er Iya Erebdobnyi nun molonubnyi bisi luba kibmunyei. Sunci yan memen uram ab, arungna uram ab arub a ebdeibmanto asi, tentok ababyi luba kiboka tanglona mem! 12Ba, sun kwaning yibkwandum ara mundu bukwansir. Sun kun atei dobmunyi ara telebto atei kibkwande. 13Sun sapi ab, kambing ab, domba ab tabakdongoboka ilinto kubkwande. Tonda, dengna weik keil si emas ab, perak ab sun ai koubdoba nirya tabakdongoboka ilinto kubkwande. 14Ato kubkwandum deyok aryi, sunci diboka kalikdandarur. Sun wingdan kanyi bobmunci, Er Imtamnyi Iya Erebdobnyi bisi luba kibmunyei. Sunda Mesir mutuk aryi arungni deici kurandau bok, Er Imtamnyi biryi taruk taleboka boyasou. 15Ba, Er Imtamnyi biryi ilila yini mutuk bisi boyasou. Tonda, yu kwatima tok ilinto dam ab, yu tangkaua ilinto dam ab, asi taleboka boyasou. Ani, me kum mutuk bok, Erci me anabdeibsou ba, sun yibdau. 16Ba, kwaning wa in kum mutuk dam ab, me kum mutuk dam ab aryi, Er Imtamnyi biryi sun yin roti kwaning si Manna karebsou. A kwaning roti ara sun abwe yabwe kum bingnamnyi kwaning. Ara, Er Iya Erebdobnyi biryi, ‘Sun kanyi luknubkwanunga,’ tenen dubdesou. Ato kuboka dubdesou ara aminda tam teleb kibdeibkwansir. 17Ati, sun kanyitam aryi, ‘Ni etekdob bingna dinyi ab, ni mikib ab aryi bona ilinto talenun,’ tenena mem! 18Ba, a talendarur bona ara Er Iya Erebdobnyi nun molonubnyi biryi mikib karebsici deici aryi bona talerandum. Ara, Erci sun abwe yabwe asi minob uram talak dib en uram aryi ebdeiamwe deyok aryi ato kusurur. Ati, sunci Er Iya Erebdobnyi nun molonubnyi bisi teneibdenkwandarur,” ebmou.
19Musa biryi ton ato ebmou, “Niryi sunsi tubto uram ebkarebkwinsin. Ara, sunci Er Iya Erebdobnyi nun molonubnyi bisi luba kiboka yuk kwemdeina asi molona mem! Ato kuboka yuk kwemdeina asi molobmamunyi ura, Imtamnyi biryi obkwansir. 20Ba, sun Israel ninyi aryi Er Iya Erebdobnyi nun molonubnyi biryi ebdeibwe uram kum kunubmunyi ura, obkwansir. Ara, sun urasin dam aryi, sun mar bon nang nirya obkabwe to kuboka sunbabyi obkwansir,” ebmou.
Currently Selected:
Ulangan Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
