Ulangan Uram 33

Musa biryi sun Israel mutuk mitik-mitik atei ninyi nirya asi kisal dakmou uram deyok

33:1-29

1Ura, Er Imtamnyi wa inanyi si Musa dina kabul talak aryi, sun Israel ninyi asi kisal dakmouci, ato ebmou. 2“Er Iya Erebdobnyi bira Sinai kon dam aryi, nun Israel ninyi ab ebdanamoubwe. Ara, Erda kiting ato anamyandokaburyi, nun Israel ninyi nirya asi, Er milil arabkareansou. Ara, yini mutuk si Paran bok, Seir mutuk kon dam aryi, Er milil arabkareansou. Ba, sun Er uram eryuryangan nang si malaikat nang mer ara Ersi aknabdongobmai kankan yanamwe. Ba, Er Imtamnyi Er siriktam ara uk angmou noutam yanganmou asi nun Israel ninyi aryi eiamoubwe. 3Er Imtamnyi biryi nunsi boukwe bosurur dinyi ara weik. Ara, nunda Er Imtamnyi mabwe nermabwe kunub aryi Erci nunsi kalingdansir. Ati, nunci Er yan dam aryi kisok luknubdongoboka, ‘Ukubdarur,’ ebdeibsou uram asi kekeboka dobdobmunci, kunubde binkwandarur! 4Ati, Er Imtamnyi biryi, ‘Ukubdarur,’ ebdeibsou uram ara sun Israel ninyi kankan dam aryi iya bikdob uram kibdobkwandum. A uram asi, ni Musa biryi sunsi erkarenmasin. 5Ba, sun Israel yala ninyi ab, sun yuk-yuk yala sien nang ab nirya bulubmunyi ura, Er Iya Erebdobnyi biryi sun Israel mutuk ninyi sienyi kiboka sirya talebsou,” ebmou.

6Ura, Musa biryi sun Ruben yala ninyi asi ato ebmou. Ara, “Sun yala ninyi nirya ara dibsekmunyei. Eda, mitikto nun ton tuba kubkwandarur,” ebmou.

7Ura, Musa biryi sun Yehuda ninyi ati, Er Imtamnyi bisi ato eboka molobliknibmou. “Nai Iya Erebdobnyi, sun Yehuda yala ninyi molon dinyi asi kekebdum. Kekebminci, sun mutuk ninyi asi tamuboka bobirum. Ani, sunci sun mar ordana nang asi mar bobkwamangnyi ura, Kanci sun tam kiboka milibdum,” eboka molobliknibmou.

8Ura, Musa biryi sun Lewi yala ninyi deyok ati, ato ebmou. “Nai, Kan tenebmaminyi to ati bingni dinyi keil si Tumim ab Urim ab ara Kanci boukwe kimdum ninyi, sun Lewi yala ninyi dinyi kibkwande. Ara, kan wa in nang, sun Lewi yala nang dam asi, me si Masa dam ab, me si Meriba dam ab aryi, Kanci sunsi teneboka dubdenamoumwe. 9Sun Lewi yala ninyi ara, ‘Er Iya Erebdobnyi uram ara iya dib uram,’ teneboka talebnurubingiryi ibde baraming. 10Tonda, Imtamnyi Kanci, ‘Ukubdarur,’ ebdeibumwe uram ara sun Yakub yala Israel ninyi asi eterebkwaming. Ba, sunci Kan urasin dam asi dama deiboka daryankwanking. Ara, sunci iya tong teleb en co Kanti dama deiboka dankwanking. Tonda, bisam domba oboka nong nirya asi Kanti dama deirin keil dub aryi dankwanking. 11Nai Iya Erebdobnyi, Kanci sunsi mikib karebdum. Ani, sun wa in dinyi kisal dakdum. Tonda, sun mar ordana nang ab, sunsi ina ngilingnaming nang ab asi obminikdum,” ebmou.

12Ura, Musa biryi sun Benyamin yala ninyi ati, ato ebdeibmou. “Sun Benyamin yala ninyi ara Er Iya Erebdobnyi biryi iya dibniliboka kalingdur. Ani, Er Imtamnyi biryi sunsi kanya deibwe yala ninyi kunung,” ebmou.

13Ura, sun Yusuf yala ninyi ati ato ebdeibwe. “Sun Yusuf yala ninyi kuraming mutuk asi, imtam aryi mo karebminyi ura, tukwetam aryi me karebokabminci, sunsi kisal dakdum. 14Tonda, Nai Imtamnyi, Kanci sunsi dou teleb karebdum. Ba, sun wa ibde bankwaming nirya asi, teleb-teleb co du akwe karebde birum. 15Ba, minob talak aryi bukdanamwe mutuk konkon bok, ukubabyi tuba buknin yibiu mutuk konkon amwetam asi, sun wa iron dinyi aryi, sunsi weikanun tabakdongoboka nong karebdum. 16Ba, a tukwe wa in dinyi aryi, sunsi yina-yina nong tabakdongoboka weikanun karebdum. Ara, Nai Imtamnyi Kan kirikna dub uk angmou ai aryi Musa bisi lak kibdanamoumwe. Kanci sun Yusuf yala ninyi asi tuba-tuba kanyi deiboka kisal weik dakdum. Ara, Yusuf er yala ninyi kankan aryi er tentok asi si erebdobnyi kibdeiamoumwe deyok aryi ersi kisal weik dakdum. 17Yusuf bira lembu yim bisam yuma mi aryi neboka mikib kurande tonyi kurur. Ba, a bisam lembu er kisok yang ara bai bisam lembu mikib kisok yang ato belebdanamwe. A kisok yang ara er deibdoba ninyi sun Efraim yala ninyi yin doun nang 10.000 baryi buluna mikbaryi ab, sun Manasye yala ninyi yin doun nang 1.000 baryi buluna mikbaryi ab yubwa-yubwa kunung. A belebdanamwe kisok yang aryi, sun tukwe dangni ninyi nirya asi obkwaming,” ebmou.

18Ura, Zebulon yala ninyi ab, Isakhar yala ninyi ab ati, Musa biryi ato ebmou. “Sun Zebulon yala ninyi, sun dekoka tamubkarebdanin yuk atei-yuk atei binkwandum deici aryi, iya teleb asa aryi Er Imtamnyi bisi si weik ebde binkwandum. Ani, Isakhar yala ninyi ara sun keis ol ai doboka teleb akwe kubde binkwandum deici aryi iya teleb asa aryi Er Imtamnyi bisi si weik ebde binkwandum. 19Ba, sunci me si laut aryi yina ab bona doronkwandum. A doronkwandum deici aryi Er Iya Erebdobnyi biti bisam domba oboka uk dankwandum. Ara, sun yuk yala-yuk yala ninyi asi, ‘Mutuk kon dam yandarur,’ eboka nabkwandum. Ura, sun tonkwa Er Imtamnyi biti bisam oboka uk dabmunci Ersi si weik erebkwandum,” ebmou.

20Ura, Musa biryi Gad yala ninyi ati ato ebmou. “Er Imtamnyi biryi sun Gad yala ninyi asi boukwe bobokabdiryi, tukwe weik karebkwande. Ba, sunda yu kam si singa aryi, teleb asa akwe kurandiryi, er yina yangana ati, kalikoka buranci ani, orande to kuboka kubde binkwaming. 21Ani, sun Gad yala ninyi ara Kanaan mutuk asi tukwe teleb dikum asi wiboka kubdobkwaming. Sunci weik sien nang kiboka talen tukwe dikum asi dobkwaming. Ba, sun Israel yuk weik nang bulubingnyi ura, sun Gad yala ninyi aryi, Er Iya Erebdobnyi tenerur to asi sun Israel ninyi tukwe dorona ati diboka lilinkwaming,” ebmou.

22Musa biryi Dan yala ninyi ati, ato ebmou. “Dan yala ninyi ara ukuryok nerkalkalirlon yu kam singa aryi, mutuk nirya dakyaniboka, er Basan mutuk aryi ordana nang asi yandoka orande ato yala ninyi kubkwaming,” ebmou.

23Ura, Musa biryi sun Naftali yala ninyi ati, ato ebmou. “Sun Naftali yala ninyi ara Er Iya Erebdobnyi biryi sunsi kanya deibokabdiryi, Er karen dinyi ara langdiboka karebde binkwande. Ba, sun mutuk ara Danau Galilea aryi kuboka me youkwetam nirya ara sun mutuk kibkwande,” ebmou.

24Musa biryi sun Asyer yala ninyi ati, ato ebmou. “Sun Asyer yala ninyi ara sun Israel yuk yala ninyi kankan aryi, Er Imtamnyi biryi Asyer yala ninyi asi kisal dakmurubde binkwande. Ba, sun Israel yuk yala ninyi niryi aryi, Asyer yala ninyi asi, kanyi deiboka teleb tenebde binkwaming. Ba, sun co zaitun ara lukluk eboka abokabdiryi, du teleb moubdankwande. Ani, zaitun du yung me ilinto aryi sun yan ababyi ilikdankwaming. 25Ba, sun atei wengban bisik bublan ara kat keica si besi ab, tembaga ab aryi kikniboka tirikwaming. Ba, teleb asa akwe kam kubde binkwaming,” ebmou.

26Ura, Musa biryi sun Israel ninyi asi ato ebmou. “Nun Nai Iya Erebdobnyi kurur,” eboka Er si erebmou. “Israel ninyi e, im dangna tukwe dangna nirya ara nun Israel ninyi molonubnyi bitonyi bira da ton kum kunung. Er Imtamnyi biryi Er mikib aryi nunsi lebdobkwamasici ura, duwa deici yibindoka lemdansir. 27Er Imtamnyi bira iya ati nun lemsinanyi kurur. Ba, Er taruk iya mikib aryi talebsou. Ba, Er Imtamnyi mikib aryi, sun mar ordan nang asi yakminikokabdiryi obminikwande. 28Ba, sun Israel ninyi ara mangkau asa aryi teleb akwe kubde binkwaming. Ani, sun Yakub yala ninyi ara gandum ab, anggur ab asi imtam aryi mo cebdongobde ba, sulsul eboka abkwande mutuk dam asi kubde binkwaming. 29Sun Israel ninyi e, sun kanya kilkil asa kuna teleb. Sun Israel ninyi ara, Ni boukwe kuboka lemdeirisunun. Yuk mutuk ninyi asi sun lemdeirisununto ton da kum ukunung. Ni Iya Erebdobnyi bira, sun ninyi on ya ab, sun ting mar u lilirona ab atonyi kunun. Sun mar ordan ninyi aryi sun amwetam luknubdongoboka, ‘Nunsi libdobsumunci, lebdeibsindarur,’ eboka moloryankwansing. Ukuboka moloryanmasinyi uca, sunci sunsi yanisitabkwandum,” ebmou.

Currently Selected:

Ulangan Uram 33: MTG

Highlight

Copy

Compare