Ulangan Uram 32
32
Musa biryi libmou mot deyok
32:1-43
1Musa biryi mot ato eboka libmou.
“Im e, ni uram ebkwaman ati kekenurum.
Tukwe e, ni uram si angdona asi kekenurum.
2Ni eteresin uram ara mo doun kuna sunsi ordeisina teleb.
Ba, ni uram ena ara mo doum-douma kuna turdeirisina teleb.
Tonda, ni eterena ara nimnim enmo aryi ukuryok luk anmaci dinyi turdeirirande to kurdeirisina teleb.
Ilila mo aryi kouryina dubdub asi turdeirirande to turdeirina teleb.
3Ati, niryi Er Iya Erebdobnyi bisi moloboka si weik ebkwaman:
Ati, nunci nun Nai Imtamnyi bira weiknyi kurur dinyi asi erebdeibkwayeb.
4Nun Nai Imtamnyi bira keil aryi sasiboka burande mutuk kon atonyi kurur.
Er bisik ara kikimanto kuboka lilirur deyok aryi
Er wa irura a nirya ara memeboka irur.
Er Imtamnyi bira iya busulnyi kurur.
Erda, tola uram en kumnyi kurur.
Erda kikimanto dinyi ab dib dinyi ab akwe kununanyi kurur.
5Bok, sunda Er Imtamnyi urasintam asi iya malyi kundarur.
Sun mining malyi kun dinyi aryi sunda Er nermabwe mabwe kuma dansekdau.
Sunda yu dinyi akwe langkaringsurur ninyi kundarur.
Sunda tola ilila endarur ninyi kundarur.
Tonda, kitukna kanya bona ninyi kundarur.
6We, etekdob kanya borona kum uca, okoloma kanya bobdob ninyi e.
Er Imtamnyi bira sun kiknibmasounyi sun Nai kuma darib?
Sunsi kikniboka katabum ebdeibsounyi bira Er Imtamnyi kuma darib?
Er Imtamnyi biryi sunsi boukwe kimsurur dinyi ara sunci ato malyi kun dinyi aryi Ersi tamuboka dekeibkwandarur darib?
7Minob talak aryi, Er Iya Erebdobnyi biryi iya ilil tenen dinyi kikniboka,
sun Israel ninyi asi boukwe kiboka lemdeiransou dinyi ara sunci luba kimna mem!
Sun nai yabwe asi asibdenkwandarur ba, sunci, ‘Ato kuansou,’ ebkwansunung.
Sun wisi nang asi asibdenkwandarur ba, sunci, ‘Diba, ato kuboka ukuansou,’ ebkwansunung.
8Er Iya Erebdobnyi biryi sun tukwetam ninyi nirya asi tukwe bokeibmou.
Im dangna mutuk tukwe dangna mutuk nang mutuk yuk-yuk wiliba likeibmou.
Ura, ninyi yala yuk-yuk mutuk lingdeirinmou ura,
a mutuk imtam kuboka kalingna nang yuk-yuk wibdeibmou.
9Bok, Er Iya Erebdobnyi biryi Yakub deibdoba ninyi asi Er nermabwe mabwe kibdamwe.
Im dangna tukwe dangna ninyi kankan aryi, Erci wiamwe ninyi ara Er nermabwe mabwe kibdobmou.
10Sun Israel ninyi ara yini mutuk dam yibarkiringnamnyi ura, sunsi dirniliramwe.
Keil yoka dem mutuk dam aryi sunsi noutam dongobdeiboka dirniliramwe.
Ani, Erci sunsi Er asing du kuna diboka kalingdoramwe.
11-12Yuk kwemdeina aryi sunsi ton milirona kum uca,
Er Iya Erebdobnyi Er tentok aryi sun Israel ninyi asi bomenekoka yangaramwe.
Ara, maka bib aryi du deianci ani bunuboka boyibarande to kuramwe.
Er mi alib asi langlang eryibanmariryi kalingnande to kuramwe.
Ani, er mi sakmanto kuci ura, er kwin ol aryi akurorande to kuramwe.
13Er Imtamnyi biryi sun Israel ninyi asi yim mutuk araron mikib karebmou.
Tonda, wa in dam koubdoba araron mikib karebmou.
Ani, Erci keil siram dolorande kwiryi me yinkwamnyi ati nukarebmou.
Ani, keil kat dub ai tingnande co zaitun du yung yibde kunkwamnyi ati nukdongobmou.
14Er Imtamnyi biryi sunsi moum yung ururon bisam sapi ab kambing ab kareamwe.
Ani, minta ilinto bisam domba mabwe ab kuboka kareamwe.
Ani, Basan atei bisam domba yim ilinto ab, kambing yim ilinto ab kareamwe.
Tonda, gandum du teleb dinyi ababyi kareamwe.
Ani, tonda anggur du yung ining bi teleb sun yibde kuromunyi dinyi ababyi karebsou.
15Sun Israel ninyi ara yina teleb akwe yibde binkwandum.
Ba, bouboka sun nong ara weik neboka kubokabmunci, bona weik talebkwaming.
Ba, sunci a yina bona kareransirinyi Er Imtamnyi bisi taklobkwaming,
Ani, Er Imtamnyi lebdeianci dinyi asi, ‘Nun li,’ ebkwandum.
16Sun Israel ninyi kwemdeina moloramnyi deyok ati, Er Imtamnyi matan kubmou.
Yuk kwemdeina asi kanyi deiboka moloramnyi deyok aryi Er Imtamnyi yu wekmou.
17Yuk kwemdeina kanya ati, sun dama deiboka molonung.
Sun molonung kwemdeina ara sun kum bingdamnyi kwemdeina asi molonung.
Sun molonung kwemdeina ara sun nai yabwe ababyi ton kum moloramnyi kwemdeina asi molonung.
Anda molonung kwemdeina ara Nun Nai Er Imtamnyi bisi kum molonung. Eda, ukuryok kwemdeina asi molonung.
18Sun Nai mikib asa aryi lemdeirirurnyi bira luba kibyi.
Sun kam kurdeirinanyi bira bingna kum kunung.
19Ato kunung deyok aryi sun Nai, Er Iya Erebdobnyi bira yu kurur.
Ura, Er mabwe nermabwe asi yu boboka kererur.
20Ura, Imtamnyi biryi ato erur, ‘Nira, Ni urasin ara sun urasin dam lak kimna kum kubkwan,’ erur.
Ani, sun mambul kubmaci ababyi asing eiboka takokwan.
Sun Israel nang ara kanya tingkwanibdob kanya bonung ati ukubkwan.
A ninyi ara busul kanya ton bona kum kunung.
21Sun Israel nang molonungnyi bira Iya Erebdobnyi kuma bok, molonung aryi, Ni matan kunurur.
Ura, Ni sun matan aryi sun kiknibdeiboka molonung kwemdeina asi Ni yu bonun.
A deyok aryi, Niryi Ni uram kekena kum ninyi asi boukwe kibkwan. Ba, sun Israel ninyi aryi, Nisi matan kubkwaning.
Ati, ukura Niryi yuk atei ninyi asi boukwe kibnyi ba, sun Israel ninyi kanya u yibkwansir.
22Ni yu mak ara uk buk lemberengnande to kunurur.
Ati, Ni yu aryi uk lemberekoka yibde banmaci ani,
din nang sambal kuraming dikum ababyi nirya yibkwande.
Ni yu aryi uk lemberekoka tukwetam kurur dinyi nirya yibkwande.
Ani, Ni yu uk lemberekoka mutuk deyok ababyi yaliboka yibkwande.
23Ni yu boranyi dinyi ara sun deici asi tuba-tuba karenkwan.
Ani, Ni mar nirya ara sun deici asi yaribnyi ba, sun deici akwe bukwande.
24Ara, uk aruma youn deici aryi tin buboka dibkwaming.
Ani, kwaning utan deici aryi dibsekwaming.
Ani, bai kam asi nenebdongobnyi ba, oboka yibkwande.
Ani, yu kwatima tok asi aruknyi ba, si sekoka obkwande.
25Sun Israel ninyi asi baitam ara mar iyandoka obkwaming.
Ai umbura ababyi ilil aryi ninyi dibde binkwaming.
Ba, sal kabir babyi, ner kabir babyi obkiribkwaming.
Ani, alok mabwe babyi, ninyi wis babyi obkiribkwaming.
26‘Niryi sun Israel ninyi nirya uk kwamingca uraming to kuboka kum dandeibtinyi,’ tenenun.
Ba, ‘Sun yuk mutuk ninyi aryi Israel ninyi si luba kibkwansing,’ tenenun.
27Bok, Niryi ton ato tenenun. ‘Niryi ato kuranyi asi yuk mutuk nang aryi, “Imtamnyi biryi ukurura kuma.
Nun mikib aryi ukunub,” eboka erebdangnyei,’ tenen aryi tanglonun.
28Sun Israel ninyi ara, ‘Ato-ato dinyi aryi kusurur,’ tenerdena kum atei nang kunung.
Ani, kanya wisiboka, ‘Ato kuande ara a deyok ati kuande,’ tenerdena kum atei nang kunung deyok aryi ato ebman.
29Sangkuna sun bukdob bingna nang kuranting ura, anda deyok bikwamating.
Ani, sun kam kuna asi, ‘Aminda sirya ukubkwansir ati, banub,’ tenebkwamating.
30Er Iya Erebdobnyi biryi sun Israel ninyi asi, sun mar ordana ninyi taruk dam kum karebmote.
Ura, sun Israel ninyi yubwa 1.000 baryi ninyi asi sun mar ordan nang tentoknyi biryi doboka talebkwamote do? Ukubman kum.
Ani, sun mar ordana nang ninyi bitinyok dem aryi, ninyi yubwa 10.000 baryi ninyi asi, dalubtiring do? Ukubman kum.
Ni sun molonindarurnyi Iya Erebdobnyi biryi sunsi kikibmasin.
31Nun Nai Iya Erebdobnyi mikib weik ara sun yuk-yuk mutuk ninyi kalingdur kwemdeina mikib ab kiklibdenman kum kurur.
Akiryi sun Israel mar ordana mutuk ninyi ababyi sirya bingnung.
32Bok, sun Israel mar ordana mutuk ninyi ara Sodom ab, Gomora ab aryi tingnande co anggur ato kunung ninyi kunung.
A sik tukwe aryi koubingnyi co anggur du ababyi sik kubkwandur.
33A anggur du me aryi kiknibmangnyi me yung ara yu kibkwandur.
A me yung ara kwatima tok aryi si tobci ba, siksika leleng-leleng eboka ninyi diraming dinyi kurur.
34A deyok ara Niryi sun mar ordana nang aryi sunsi malyi kusunung dinyi asi tuba teneirinkwan.
Ara, sun malyi kun dinyi asi Niryi bona teleb kuna diboka deiboka kalingnikwan.
35Sun yan sirim talebci tum aryi
Niryi sunsi ukuramingnyi dinyi dekeibkwan.
Sunsi ikin karebkwaman talak sirya dam kubmar.
Do talak ara, ‘Sunsi kum dandeibkwan,’ teneranyi to kunubkwaman.
36Er Iya Erebdobnyi biryi sun Israel ninyi asi boukwe kurande.
Ani, sun mar ordana nang aryi Er mabwe asi kuramingnyi to liliboka dekeibkwandur.
Ani, Er nermabwe mabwe iya mitang kubmaci nang asi eiboka lemdorande.
Ara, Er nermabwe mabwe sien nang babyi, sun wa irmilin nang ababyi lemdorande.
37Ba, Er Iya Erebdobnyi biryi sunsi ato kuboka asibkwande.
‘Sun mar ordana nang mikib sasiboka molorandau kwemdeina ara dantam da?’ ebkwande.
38‘Sunci minta dama deiboka uk dandarur kwemdeina ara dantam da?
Ani, sunci co du anggur du dama deiboka molondarur kwemdeina ara dantam da?
Ati, sun anda molondarur kwemdeina dib kuramingnyi ura, ur lebdobsunung!
Ani, anda kwemdeina yabwe asi sun kalingnanyi ur kibdobdarur,’ ebkwande.
39Bok, Nira Iya Erebdobnyi diba kunururnyi a kunum kunun.
Yuk dib kunurur kwemdeina da ton kum kunung.
Eda, Ni tentok Iya Erebdobnyi kunun.
Nira ninyi oboka dibdeiabnyi ani, tubto kam burdeirinanyi kunun.
Nira ninyi dilaka sakeiabnyi ani, kwetenanyi kunun.
Ni mikib dobdobnyi ara yuk kwemdeina aryi lebdobman kum kurur.
40Ni iya kam kununyi biryi iya dib sirik aryi ebkun.
Ni mining si deici aryi, taruk imtam ereboka uram talak ebkwinsin.
41‘Ni ninyi on ya sirya ketebmanyi tum ara,
Ni mar ordan nang asi ikin karebkwan.
Ani, Ni si li teneraningnyi ninyi asi dekeibkwan.
42Ba, ni mar ara sun ining akwe alibkwande.
Ani, ni ninyi on ya ara sun ining yibkwande.
Marabloamingnyi ba, kam kuranci nang babyi,
Ninyi dongon ai dongoamingnyi nang babyi,
mar ordan co biriranci nang babyi ni ya sun ining yibkwande,’ ebkwinsin.
43Er Imtamnyi biryi Er mabwe onunga sirya dekmar.
Ersi onung nang ara Ersi mundu kirdongonung yu aryi sunbabyi obkwande.
Ba, Er nermabwe mabwe sun malyi kun dinyi kilibkwande.
Ati, im dangna tukwe dangna e, kilkil kanya aryi Er Imtamnyi bisi si weik ebdarur,” eboka Musa biryi mot libmou.
Musa biryi sun Israel ninyi asi, “Ato-ato kubkwandarur,” eboka yan memebmou deyok
32:44-47
44Ura, Musa ab ninyi si Nun mi Yosua ab sun tonkwa yanmareici, sun Israel ninyi asi Musa er libmou mot nirya asi nukarebmou.
45Ura, Musa biryi sun Israel ninyi nirya asi Er Imtamnyi erdeirin uram sirya ebkarebmouci, 46tubto sunsi ato ebmou, “Arub aryi niryi sunsi ebmasin uram ara diboka bikwandarur! Ba, sunci kuboka sun deibkwandum nermabwe mabwe asi ebkarebkwandarur. Ba, Er Imtamnyi biryi, ‘Ukubdarur,’ ebdeibsou uram asi kunubde binkwanung. 47A ebdeibmasin uram ara sun kam kubde binkwandum tam telebto kubkwandum ati, ebkarebmasin. Ara, sunci me Yordan kouboka otam bindoka kubkwandum mutuk si Kanaan dam aryi a ebmasin uram asi talebnurubmunci, kubde binkwandarur.” Musa biryi sun Israel ninyi asi ato eboka yan memebmou.
Musa dimna talak sirya dam kubmou deyok
32:48-52
48A uki tum aryok, Er Iya Erebdobnyi biryi Musa bisi ato ebdeibmou. 49“Niryi sun Israel ninyi ati karebnyi ba, sun mutuk kibdobingiryi kubkwaming mutuk si Kanaan dirdonongderbirum! Ara, Moab mutuk kuramwe Abarim mutuk kon bok, Nebo kon asi weleboka tikminyi ura, sunti a karebkwan mutuk dibdonokdenkwandum. 50Ura, kanda a welebmaminyi mutuk kon dub a dibkwandim. Ba, kan sambal ara kan abwe yabwe sambal ab tonkwa bulubkwansing. Ara, kan du Harun bibabyi mutuk kon si Hor dub diamwe ba, er dibdoba sambal ara er abwe yabwe dibdoba sambal ab neik tum bulubdeibyi to kuboka kanbabyi neiktoto ato kubkwanking. 51Ara, Ni Iya Erebdobnyi uram asi kan ab, Harun ab aryi kununa kum kuandurumwe deyok aryi ato kubkwankin. Ara, yini mutuk si Zin dam bok, me u si Meriba dam aryi, sun Israel ninyi kankan dam aryi keil asi kulabmarurumwe ara Nisi malyi kiandururumwe deyok aryi ato kubkwankin. 52Akiryi, sun Israel ninyi ati karebkwan mutuk si Kanaan ara asing demang eibkwandim. Bok, kan ab tonkwa ara kum wengbinkwandum,” Er Imtamnyi biryi Musa bisi ato ebmou.
Currently Selected:
Ulangan Uram 32: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
