Ulangan Uram 2

Israel ninyi yini mutuk dam kubde binamnyi to uram deyok

2:1-25

1Musa biryi sun Israel nang asi ato ebmou, “Er Iya Erebdobnyi biryi ebdeibwe to kuboka yini mutuk tam tubto tamuboka binmoubwe. Ba, nun uki weik Seir mutuk dam yibarkiringdamoubwe. Ani, Laut Teberau me dingibwe tam kuboka binamoubwe,” ebmou. 2“Ura, Er Iya Erebdobnyi biryi nisi ato ebmanou, 3‘Uki weik a mutuk dam yibarkiringdarur. Ati, sun anabdobmunci, me utam bindarur,’ ebmanou. 4Ani, tubto Er Imtamnyi biryi ato ebmanou, ‘Uki kum uca sun kwit yabwe Esau yala nang Seir mutuk kunung dam binkwamarum. Ba, sunda sun Israel ninyi asi ilil kubkwamar bok, sun kalikdandarur. 5Sun Esau yala nang kunung mutuk Edom ara sunsi ton kum karebkwamasin. Ati, sun Esau yala asi mar bona mem! Ba, Edom mutuk ara Ni Imtamnyi biryi sun Esau yala ninyi ati karebse. 6Ati, sun Israel ninyi aryi kwaning ab, me ab yibkwamamunyi ura, dekmunci doboka yibkwandarur,’ eanou. 7Ato kurandum deyok aryi, Er Iya Erebdobnyi biryi sun wa ibde binkwanduma nirya kisal dakmasou. Ba, Er Imtamnyi biryi sun Israel ninyi yini mutuk dam barandau nirya kalingdansou. Ani, sirya kobdob kwalina uki 40 baryi ara Er Iya Erebdobnyi biryi kalingdansou ba, ukutotoa nirya ara bulung kum kurandau. 8Ba, nun baramoubwe ani, nun atei nang Esau yala kunung atei Seir bok Edom mutuk dam ara binamoubwe bok, bisiamoubwe. Akatei bisiboka binamuburyi, Yordan me dingibwe mutuk ab, Elat atei bisik ab, Ezion-Geber atei bisik ab ara bana kum kuamoubwe. Eda, kaniboka Moab mutuk yini mutuk bisik dam binamoubwe,” eboka Musa biryi ebmou.

9“Tubto Er Iya Erebdobnyi biryi ato ebmanou, ‘Ni Imtamnyi biryi sun Israel nang asi Moab mutuk ton kum karebkwamasin. Ati, Lot deibdoba Moab nang asi yan yaniboka mar bona mem! A weik atei Ar mutuk ara Ni Imtamnyi biryi sun Lot yala ati karebse mutuk,’ ebmanou,” ebmou. 10“Minob ura, Ar mutuk ara Emim yala ninyi kuramnyi. Sunda ninyi ilinto kuramiryi sun nong ara Enak yala ninyi nenunga ato kuboka cang ilinto ninyi neboka kuramnyi. 11Sunda Enak yala nang ato bok, ton enung ara Refaim yala nang eraming. Bok, Moab yala nang aryi si dobyi ara Emim atei ninyi enung. 12Minob ura Seir mutuk ara Hori atei ninyi kuramnyi. Bok, Esau yala nang aryi nirya yakdonokoka obkiribyi ura, sun Esau yala ninyi mutuk kibdobiryi kuronung. A kubyi to ara sun Israel ninyi ababyi Er Iya Erebdobnyi biryi, ‘Karebkwansin,’ ebdeibsou mutuk ara ato kuboka sun mutuk kibdobkwandum,” ebmou.

13Ura, tubto Musa biryi Israel ninyi asi ato ebmou, “Sun anabdobmunyi ura, Er Iya Erebdobnyi ebman to kuboka kunuramoubwe. Ara, me Zered kouboka otam binmoubwe. 14Uki weik Kadesh-Barnea mutuk yibarkiringnamoubwe nungna ara kwalina 38 baryi yibarkiringnamoubwe ani, me Zered dam yanamoubwe. Ba, sun uki nungna kwalina 20 baryi bisiboka eitam kuramnyi nang aryi, yu wekoka Er Imtamnyi bisi malyi kimdamnyi nang ara nirya dibkiribyi. Ara, Er Iya Erebdobnyi biryi eamwe to kuboka kunubwe. 15Ara, Er Iya Erebdobnyi biryi Israel nang bindoka kuramnyi dam aryi malyi kimdamnyi nang asi obwe ba, nirya dibsekyi.

16Ara, sun uki kuna 20 baryi kuboka eitam kunmai nang nirya dibsekamnyi ura, 17Er Iya Erebdobnyi biryi nunsi ato ebmasou. 18‘Arub aryi anabdobmunci Moab mutuk Ar atei bimunyi ura, a kuna mem! Eda, bisirbinkwandarur. 19A bisibmamunyi atei ara Amon atei bok Lot yaldangni nang kunung. Ba, a mutuk ara Ni Imtamnyi biryi sun Lot yaldangni ati karebse ba, sun mutuk kiboka kunung. A mutuk ara sun Israel ninyi asi kum karebkwansin, ati Lot deibdoba Amon yala nang asi duboka mar bona mem!’ ebmanou,” ebmou. 20Musa biryi Israel ninyi asi tubto ato ebmou, “Akatei si enung ara Refaim nang atei eramnya asi bingnamnyi. Minob ura Refaim ninyi ara a mutuk kuramnyi bok, Amon yala nang aryi si doamnyi ara Zamzumim eboka doamnyi. 21Refaim ninyi ara yubwa ilinto kuramiryi sun nong ara cang ilinto Enak yala nang nenungto kuboka neramnyi. Bok, Er Iya Erebdobnyi biryi nirya obwe ura, Amon yala nang aryi araboka sun mutuk kibdobiryi uku talak ababyi iya a kunung. 22A kubwe to Er Iya Erebdobnyi biryi Seir mutuk kuramnyi ninyi asi obwe ura, Esau yala nang atei kibdeibwe. Ara, Seir mutuk kuramnyi Hori yala ninyi ara sun Esau yala ninyi aryi yakdonokoka sun atei kibdobiryi uku talak ababyi iya a kunung. 23Ba, ilila me dingibwe mutuk lu nirya ara Awi ninyi bindoka Gaza atei eboka dobde kuramnyi. Bok, Kaftor ninyi aryi yandoka Awi ninyi nirya obkabyi ura, Kaftor ninyi atei kibdobyi,” ebmou.

24Ura, Musa biryi Israel ninyi asi ato ebmou, “Nun sirya Moab mutuk bisibibyi ura, Er Imtamnyi biryi ebmasir to kubkwanub. Ara, Er Iya Erebdobnyi biryi nunsi ato ebmasir, ‘Anabdobmunci, me Arnon kouboka bindarur. Ba, Hesybon atei sienyi Amori yalanyi Sihon ab, er mutuk ab sun taruk dam karebkwamasin. Ati, sun Israel ninyi aryi ibindoka obmunyi ura, a mutuk ara sun mutuk kibkwande. 25Ati, arub aryi Ni sun Nai Imtamnyi biryi dantam-dantam kunung ninyi nirya asi sunsi ilil kubkarebkwaman. Ba, sunci sun Israel ninyi asi ilil aryi kukmata tilikoka sirim talebkwamar,’ ebmasir,” ebmou. Ato eboka Musa biryi Er Imtamnyi ebmou to kuboka sun Israel ninyi asi ebkarebmou.

Israel nang aryi Hesybon atei sienyi si Sihon oboka erebdobmai deyok

2:26-37

(Bil. 21:21-26)

26Musa biryi Israel nang dam asi ato ebmou, “Nun sirya me Arnon kouboka atam yabwe ura, ato ebmase. Ara, ‘Hesybon atei sienyi Sihon bisi uram ato erbindarur,’ eboka arukmase. 27Ara, ato ebdeibmase, ‘Nai sienyi, kan atei bisik nunsi, “Ur yibindarur,” eboka yan lobsurum. Ba, nunci urasin siriktam dibde, kwanimtam dibde bana kum kubkwayeb, eda ilila bisik akwe u dikum yibindobkwayeb. 28Ati kanci, “Ur yibindarur,” ebsurum. Ba, kwaning ab, me ab yibde binkwayeb ara dekeibyi ura, nun yibkwayeb. 29Ba, nun yanganub bisik dam aryi kuboubwe to kubkwayeb. Ara, Esau yala Seir mutuk ab, Edom mutuk ab kunung ninyi ab, Moab atei ninyi Ar mutuk kunung ninyi ab aryi nunsi, “Nun mutuk bisik ur yibindarur,” eboka yan lobsei. Ba, nun Israel ninyi asi Er Iya Erebdobnyi nun molonanyi biryi karebsou mutuk Yordan me kouboka yabwe,’ ebdeibmase,” ebmou. 30“Bok, Er Iya Erebdobnyi biryi Hesybon atei weik sienyi Sihon kisok keil kat ato kibdeibmar. Ara, Er Imtamnyi biryi akatei weik sienyi sun taruk dam dobkarebci ba, oboka erebdobkwamarum ati keil kat ato kibdeibmar. Akiryi nunsi, ‘Ur yibindarur,’ eboka yan lodeirisina kum kubmasir,” ebmou.

31Ura, Musa biryi ato ebmou, “Er Iya Erebdobnyi biryi ato ebmanou, ‘Kan bikdum. Hesybon atei sienyi Sihon kan taruk dam karebmakin. Ati, ur biminci kan mutuk kibdum,’ ebmanou. 32Ati, weik sienyi Sihon ab, er yin doun nang ab aryi iyanansei. Ba, Yahas mutuk dam obdanamoubwe. 33Ba, Er Iya Erebdobnyi nun molonubnyi biryi weik sienyi Sihon ab, er yin doun nang ab, er mabwe ab nun taruk dam dobkareansou ba, nunci sunsi nirya oboka erebdoamoubwe. 34Ba, Amori mutuk weik atei-mitik atei nirya arabdoamuburyi akatei ninyi nirya obkiriamoubwe. Ara, nerabwe babyi, mabwe nermabwe babyi nirya oboka kum dandeiamoubwe. 35Bok, bisam yabwe ab, sun bona-bona ab ara nirya daluboka dobdobuburyi sun atei ababyi nirya arabdoboubwe. 36Ara, Er Iya Erebdobnyi biryi karebsou ba, arabdoboubwe. A arabdoboubwe mutuk ara Aroer mutuk me Arnon yibiu mutuk dam ab, atei donung mutuk lu ab, Gilead atei ab ababyi nirya arabdoboubwe. Akiryi nunci asing dina ara weik atei lika doboka ton kuna kum. 37Eda, nunci Amon yala nang atei dam ara mar boboka ararona kum kubmoubwe. Ara, me Yabok kubkub otam nirya ab me kuboka mutuk kon dam donung atei nirya ab ara Er Iya Erebdobnyi biryi, ‘Mar bona mem!’ ebsou,” ato eboka Musa biryi Israel ninyi asi ebkarebmou.

Currently Selected:

Ulangan Uram 2: MTG

Highlight

Copy

Compare