Ulangan Uram 28

Er Imtamnyi uram kunun nang ati kisal dangna deyok

28:1-14

1Ura, Musa biryi sun Israel ninyi asi ato ebmou, “Sunci Er Iya Erebdobnyi nun molonanyi uram asi diboka kekeboka, Erci ebdeibsou uram bok, tubto niryi sunsi enmasin uram asi diboka kekebkwandarur. Kekebmunyi ura, Er Iya Erebdobnyi nun molonanyi biryi tukwe dangna mutuk ninyi kankan dam aryi sunsi ereboka Er nermabwe mabwe kibdobkwansir. 2Ani, Er Iya Erebdobnyi nun molonanyi uram diboka kekeboka kunuramunyi ura, Er karesin dinyi sunsi kareboka dibnilikwansurur. 3Ani, Er Imtamnyi biryi sun atei dam babyi, sun wa in ai babyi asi, Er karena aryi sunsi kareboka kisal dakwansir. 4Ani, tonda sun nermabwe mabwe babyi, sun wa ibdobkwanduma babyi, sun bisam winibdobkwandum babyi ara Er Imtamnyi biryi kareboka kisal dakwansir. A winibkwandum bisam ara lembu sapi bisam babyi, kambing domba bisam babyi ara Erci sunsi ilinto karebkwansir. 5Ani, gandum babyi, gandum aryi yuk yina kiknibkwandum dinyi babyi sunsi karebkwansir. 6Ani, sun ai dam bukwandum babyi, ‘Ato dinyi dobdobtinyi,’ tenen ati wa iboka ingkirikwandum babyi nirya ara Erci sunsi kisal dakoka karebkwansir.

7Ani, tonda Er Iya Erebdobnyi biryi sun mar ordana ninyi nirya asi oboka muna kibdongobkwande. Ara, sunci diboka koubtaleboka tentok bisik iyanmasingnyi ababyi Er Imtamnyi biryi muna kibdongobkwande. Ba, sun a yanmangnyito kuboka barona kumci bokwalwalabdandoka tabaryi bisik a nirya tentok-tentok binsekwaming. 8Er Iya Erebdobnyi biryi sunsi Er karen dinyi karebkwansir. Ara, yuk wa-yuk wa ibdobkwandum ab, a ibdamunyi dinyi aryi boboka deiriryankwandum ai aryi sunsi karebkwansir. Ani, Er Iya Erebdobnyi nun molonanyi biryi karebsou mutuk dam aryi Erci sunsi kisal dakwansir. 9Ani, Er Iya Erebdobnyi biryi sunsi Er nermabwe mabwe kibdeiboka lek ninyi kibdeibkwansir. Ara, Er Iya Erebdobnyi sun molonindarurnyi biryi ebdeiamwe uram asi diboka talebnuruboka, Er ebdeibwe to akwe kunubde bimunyi ura, minob uca, ‘Ni nermabwe mabwe kibdeibkwansin,’ eamwe to kuboka kubkwansir. 10Ba, tukwe dangna mutuk ninyi nirya aryi, ‘Sun Israel ninyi ara Er Iya Erebdobnyi biryi yuk wibdeibwe mutuk ninyi,’ ebokabsingiryi, ‘Nun ilil,’ tenebkwansing.

11Ani, sun Israel ninyi asi mi yaldakde ban dinyi karebkwansir. Ani, bisam ilila kuboka talebde binkwandum. Ara, Er Iya Erebdobnyi biryi Israel ninyi sun abwe yabwe asi, ‘Karebkwansin,’ eamwe mutuk si Kanaan karebkwansir. Ba, sun mutuk kibmunci, a mutuk dam aryi mi yaldakdandoka talebde binkwandum. 12Ani, Er Iya Erebdobnyi biryi imtam aryi sun wa iron talak ara mo karenkwansir. Ani, ‘Ato dinyi asi dobdobtinyi,’ tenen ati wa ibdorobinkwandum dinyi nirya ababyi karebkwansir. Ba, yuk mutuk ninyi aryi sun talebde binkwandum bona ab, yina ab asi, ‘Sun bona ton tiya bobkwansib,’ eboka bobde binkwansing. Bok, sun Israel ninyi ara ato kum kubkwandum. Ara, sun Israel ninyi ara ukutotoa nirya labtalebkwandum. 13Ani, tukwe dangna mutuk ninyi kankan aryi, Er Iya Erebdobnyi biryi sun Israel ninyi asi mitik mabwe kimdeisina kumci, eda weik sien nang kibdeibkwansir. Sunci Er Iya Erebdobnyi nun molonanyi biryi, ‘Ukubdarur,’ ebdeibsou ba, a enmasin uram asi diboka kunuramunyi ura, Er Imtamnyi biryi sunsi iya ereboka kisal dakde binkwansir. 14Ani, sunci yuk kwemdeina asi miliboka molona kum uca, a erdeirinmasin to akwe kuramunyi ura, Er Imtamnyi biryi sunsi kisal dakde binkwansir,” ebmou.

Er Imtamnyi erdeirin dinyi asi kununa kum ati sumna deyok

28:15-46

(Im. 26:14-31)

15Ura, Musa biryi sun Israel ninyi asi tubto ato ebmou, “Bok, sunci Er Iya Erebdobnyi nun molonanyi biryi, ‘Ukubdarur-ukuna mem,’ eboka sirya ebdeibsou ba, niryi sunsi a enmasin uram asi diboka kekeboka kum kunubde bimunyi ura, Er Imtamnyi biryi sunsi iya weik sumna dinyi karebkwansir. 16Ara, sun bona talentam babyi, sun wa iboka yibde bantam ara kum danabdeibkwansir. 17Ani, sun gandum weik kin dinyi babyi, gandum aryi yuk yina kiknin dinyi babyi nirya kum danabdeibkwansir. 18Ani, sun ninyi mi yaldangdontam babyi, sun bisam lembu sapi yaldakdorobantam babyi, sun kambing domba mi yaldakdorobantam babyi ara kum danabdeibkwansir. 19Ani, sun ai dam bukwandum babyi, ‘Ato dinyi dobdobtinyi,’ tenen ati wa iboka ingkirikwandum babyi nirya ara Erci sunsi sumna dinyi karebkwansir,” ebmou.

20“Sunci Er Iya Erebdobnyi bisi deiblobokabmunci, malyi dinyi akwe kunubde bamunyi ura, Er Imtamnyi biryi sunsi sumna ab, orminingni dinyi ab karebkwansir. Ani, sun wa irorandum dinyi ara dobdobman kumto dinyi karebkwansir ba, dibsekwandum. 21Ani, Er Iya Erebdobnyi biryi sunsi dirminingni youn karebkwansir. Ba, sunci wengbindoka kubde binkwandum mutuk dam aryi nirya dibsekwandum. 22Er Iya Erebdobnyi biryi karebkwansir dirminingni youn ara kosokna youn ab, tin weik uk aruma youn ab, yinkorokna kasang-kasang en youn ab, sun nong bol yabung deirminingni youn ab karebkwansir. Ani, Er Imtamnyi biryi sun kouryina asi kelkel erdeirin dinyi ab, sun kouryina doryin dinyi ab karebkwansir. Ato kuboka karebde baransici tok asi nirya dibsekwandum. 23Ba, im ara kat keil si tembaga ato kibdeibkwande. Ba, tukwe ara kat keica si besi ato kibdeibkwande. Ba, mo ababyi ton kum karebkwansir. 24Ba, Er Iya Erebdobnyi biryi imtam aryi kuboka sici mo karebkwansir ba, dibsekokabmunci, kum dansekwandum. 25Er Iya Erebdobnyi biryi sunsi muna kirdongon dinyi karebkwansir. Ba, sun mar ordana nang aryi muna kibdongobkwansing. Sunci yuk mutuk nang asi mar bobkwandum bok, sunsi muna kibdongobkwansing. Ani, sun mar ordana nang ilil ati cukdobkwandum. Ba, ato kubkwandum dinyi aryi sun tukwe dangna mutuk ninyi nirya asi alyi dakeibkwandum. 26Ba, sun dibdoba ara ninyi tub yin maka ab, tukwetam kurande kamyoa ab aryi yibkwansing. A yibkwansing tam ara yuk ninyi aryi ton da kum yakoka lebdobkwansing.

27Ani, Er Iya Erebdobnyi biryi sunsi Mesir mutuk ninyi kareamwe torok yala dumbaryi karebkwansir. Ba, sun nong bol nirya ara torok eibkwansir. A eibkwansir torok ara kum lobdobkwansir eda, iya eibkwansir. A dumbaryi torok ara torok sirik ab, yabung tulul eboka tong malyi dinyi ab, ninyi nong bol deici asi ining tulul en dinyi ab, susa kiringna ba, ining anardeirirdan dinyi ab asi eibkwansir. 28Ani, Er Iya Erebdobnyi biryi sunsi asing kun dinyi ab, walina talen dinyi ab, kanyi teleb waningni dinyi ab karebkwansir. 29Ba, sun asing kun nang aryi yana kitingtam bok asi, talebisibde yibaraming to kuboka talebisibde yibinkwandum. Sun il doboka kubde binkwandum tam ara teleb dinyi ton kum dobdobkwandum. Sun yuk nang aryi sunsi tuba-tuba malyi kibsiniboka arabdobkwansing. A kubkwansing dinyi ababyi sun yuk nang aryi ton da kum lebdobkwansing. 30Sunti ner umolonga sekwansing bok, a ner ara sun yuk nang ab mabdobkwaming. Sunci ai dobdobkwandum bok, a dobkwandum ai ara sun yuk nang aryi kubdobkwaming. Sunci anggur wa ibkwandum bok, a anggur wa ara sun yuk nang aryi kiboka yibdobkwaming. 31Sun bisam lembu asi yuk nang aryi sun urasintam ngang sekoka toubkwaming. Bok, sunci a bisam lembu ara kum yibkwandum. Sun yuk nang aryi sun bisam keledai ababyi sun urasintam aryi yandoka arabdobkwansing. Arabdobkwansing tam ara sunbiramnyi asi kum tamubkarebkwansing. Sun bisam kambing ab, domba ab ara sun urasintam aryi un mar ordan nang ati doboka karebkwaming. Dobkarebkwaming tam ara yuk nang aryi sun tam kiboka ton da kum miliboka lebdobkwansing. 32Sun urasintam aryi sun nermabwe mabwe ara yuk mutuk nang ati dobkarebkwaming. Ba, a maberekde binkwandum uki nirya ara sun nermabwe mabwe asi lemdona kumci, ‘Se, nun nermabwe mabwe,’ ebde bukwandum. 33Sun kum bingdarur mutuk nang aryi yandoka sun il doboka iroramunyi dinyi nirya kiboka yibdobkwansing. Ba, sunda sun yuk mutuk ninyi aryi sunsi yan yaniboka malyi kibminikwansing. 34Ato kubde binkwansing ba, eibkwandum dinyi aryi walina talebkwansir. 35Er Iya Erebdobnyi biryi sunsi lorona kum kubkwansir torok karebkwansir. Ara, sun nong nirya kisok lublub aryi kuboka sun yan ai nirya ara torok diribkanikwansir. 36Sun Israel ninyi nirya ab, sunbiramnyi aryi, ‘Nun sienyi,’ eboka tikeibdamunyi ab asi, Er Iya Erebdobnyi biryi sun yuk nang mutuk bobinkwansir. Ara, sun abwe yabwe ab, sun ab bingna kum mutuk bobinkwansir. A bobisici ba, kubkwandum mutuk dam aryi sunci yuk kwemdeina asi miliboka molobkwandum. Ara, sun ninyi aryi kiknibdeiboka moloramingnyi co kwemdeina ab, keil kwemdeina ab asi miliboka molobkwandum. 37Ba, sunsi Er Iya Erebdobnyi biryi bai donokwansir ba, bindoka kubkwandum mutuk ninyi aryi anda malyito kubkwandum dinyi eibsingiryi sun ilil kubkwande. Ani, sunsi ngilikoka kerebsingiryi akwe tubde binkwansing. 38Sun wa iboka yina yala ilinto kwekwandum. Bok, a kwekamunyi to kuboka kum absiriba, yibkwandum. Ara, kwising aryi a kwekdobkwandum yala nirya doboka yibdobkwande. 39Sunci anggur wa iboka kalikdobkwandum. Bok, sunci a anggur du ab, me ab ara kum yibdobkwandum. Ara, co du yin belbela aryi nirya doboka yibdobkwande. 40Sun kubkwandum mutuk dam aryi co zaitun ilinto talebkwandum. Bok, er du ara diboka mouna kumci, nirya kulubsakwande. Ba, sunci zaitun yung diboka kum lubdobkwandum. 41Sunci nermabwe mabwe deibdobkwandum. Bok, sun ab tonkwa kum kubkwandum. Eda, yuk mutuk nang sun il wa dimdona nermabwe mabwe kibdeibkwaming. 42Sun co babyi, sun kouryina babyi nirya ara kwising aryi nirya yibkiribkwaming. 43Sun mutuk bok asi, sun tingyangan nang aryi sun mutuk kuna sunci talebkwaming. Talebingiryi, sunda outam kibminikwansing. 44Ba, sun tingyangan nang aryi sunsi, ‘Nun bona tiya boansiminyi ani, aminda kan taruk dam kubci uca, unubsurum,’ en bona karebkwansing ba, talebkwandum. Bok, sunci kuboka sunda ato kum kubkwandum. Sun Israel nang yoka mutuk bok asi, sun tingyangan nang ara kisok ato nang kubkwaming. Ba, sun Israel nang yoka ara amwe ato nang kubkwandum.

45A sumna dinyi nirya ara diba ati sunsi kunubkwansir. Ani, sunsi iya ati mambul kimdeiransici tok asi, sun nirya dibsekwandum. Ara, Er Iya Erebdobnyi bisi, ‘Nun ilil,’ teneboka Erci, ‘Ukubdarur,’ eboka iya kibdeibsou uram asi talebnuruboka kunubde bana kum deyok aryi ato kubkwansir. 46A nirya ara sunbabyi sun deibdoba aryi odei-odei yaldakde binkwaming ninyi nirya ati sisa ab, ilil tenen dinyi ab ebdeibsou.” Ara, Musa biryi sun Israel ninyi asi, “Er Imtamnyi biryi sunsi ato kuboka subdeibsou,” ebmou.

Obdandoka sun mar ordana nang il wa dimni nang kibdeibkwamnyi deyok

28:47-68

(Im. 26:32-46)

47Ura, Musa biryi sun Israel ninyi asi ato ebmou, “Er Iya Erebdobnyi nun molonanyi biryi sun Israel ninyi asi ukutotoa nirya ara sirya kareboka kisal daksou. Bok, sunda kanya teleb asa kuboka Ersi, ‘Nun Nai,’ eboka iya kum milindarur. 48Ato kundarur deyok aryi yina ab, me ab utan asa kubde binkwandum. Ani, sun nong baning kubde binkwandum. Ani, Er Iya Erebdobnyi biryi sun mar ordana nang asi arukdongobkwande ba, sun kam kubde binkwandum talak nirya mar bobmurubde binkwansing. Ba, sun il wa dimni nang kibdeibkwansing. Ba, ato kubde baramunyi tok asi nirya kum dansekwandum. 49Ani, Er Iya Erebdobnyi biryi yuk mutuk-yuk mutuk nang, sunci sun uram kum bingdamunyi mutuk nang asi boyandoka sun kankan dam taklobkwansir. Ara, maka kirim oryin maka si bib aryi kirim mi dam asi yandoka sarsarirlorande to kuboka sun kankan dam boyandoka taklobkwande. 50A boyandoka taklobkwande mutuk yu nang ara sun ninyi wisi-wisi nang babyi, mitik mabwe nermabwe babyi asi boukwe kimna kum mutuk ninyi asi boyandoka taklobkwande. 51Ba, sun winin bisam sapi domba babyi, sun iryirona babyi nirya ara ton kum takdongobkwansing. Eda, nirya daluboka kum danabdeibkwansing. Anda nirya dalubdobkwansing dinyi ara gandum babyi, anggur me babyi, zaitun du yung me babyi nirya dalubdobkwansing. Ani, sun bisam sapi mi babyi, bisam domba mi babyi sun mutuk dam aryi daluboka kum dandeibkwansing. 52Ani, Er Iya Erebdobnyi nun umolonanyi biryi karebsou mutuk nirya ababyi yandoka warikwansing. Ani, sunci diba tenendarurci, ‘Nunsi kalingsurur,’ tenendarur weik atei lika ara sun mar ordana nang aryi yandoka daluboka sici kibminikwansing. 53Ato kuransingnyi ba, kwaning utan aryi Er Iya Erebdobnyi biryi karebde basurur mabwe nermabwe oboka yibde binkwandum. Yuk mutuk ninyi sun atei boyandoka taklobkwansir ba, kubde binkwandum talak ara ato kubyibde binkwandum. 54Ani, a kubde binkwansing talak ara sun kankan dam minob kuramunyi talak aryi kanya iya namin boboka kuramingnyi nang ababyi kanyi malyi bobkwaming. Kanyi malyi bobingiryi sun du yabwe urasintam ab, sun weit yabwe urasintam ab, sun nerabwe urasintam ab ani, sun mabwe nermabwe urasintam ab asi malyi dinyi kubminikdankwandum. 55Ba, sun yina ton kum aryi sun mining nermabwe mabwe asi oboka yibde binkwandum. A oboka yibde binkwandum tam ara sun du weit yabwe kum karebdankwandum. Yuk mutuk ninyi sun atei boyandoka taklobkwansir ba, kubde binkwandum talak ara ato kubyibde binkwandum. 56Ani, minob uca, sun kanya iya namin kanya akwe boboka kuramingnyi deyok aryi sun yan tang limdona si sandal ongorona kumkum yibinkwaming nerabwe bok asi, malyi kanya bobkwaming. Malyi kanya bobingiryi sun akenyi yabwe ab, sun nermabwe mabwe urasintam ab asi iya malyi dinyi akwe kubde binkwaming. 57Ani, anda yuk mutuk ninyi sun atei yandoka kubkwaming talak aryi sun nerabwe mer aryi ato kubde binkwandum. Ara, kwaning utan ati kuramunci, sun mining nermabwe mabwe asi obmunyi ura, iniboka a nermabwe mabwe ab, sun sokom ab er yuk yibde binkwandum.

58Sun Israel ninyi aryi Er Iya Erebdobnyi biryi, ‘Ukubdarur-ukuna mem,’ ebdeibsou uram nirya a kerek sengna umbura kerek sekeibsou asi diboka talebnurubmunci, Ersi diboka kum molobmunyi ura, 59Er Iya Erebdobnyi biryi sun ab, sunci odei-odei yaldakde binkwandum ninyi nirya ab asi sunsi orminingni dinyi karebkwansir. Ara, iya lorona kum youn ab, kulasin dinyi ab, yuk-yuk malyi kurminingsin dinyi ab karebkwansir. 60Ani, Mesir mutuk eiansou ba, sunci ilil ati dorandau youn karebkwansir iya eibkwansir. 61Ani, yuk-yuk youn babyi, ton kum kerek sekeibwe youn babyi nirya karebkwansir. Ba, iya talebde binkwansir ba, dibsekwandum. 62Sun Israel ninyi minob uca kundarur yubwa ara kurya nalirlorande ato kundarur. Bok, aminda ninyi mitikanun kibkwansir ba, kam kubkwandum. Ara, sunci Er Iya Erebdobnyi nun molonanyi bisi miliboka diboka molobde bana kum kundarur deyok aryi ato kubkwansir. 63Er Iya Erebdobnyi biryi sun Israel ninyi asi ukutotoa nirya karebsici ba, ilinto kibkwansir. Ba, yiboka teleb asa akwe kubde bamunyi eibsici ura, Er kanya iya teleb kurur. A kurur to akwe sun Israel ninyi nirya kum danabdeibkwansir ababyi Er kanya iya teleb kubkwande. Ani, sunci bindoka kubkwamarum mutuk dam aryi doboka bai donokwansir. 64Er Iya Erebdobnyi biryi sunsi yuk mutuk tukwe dangna nang taruk dam dobkarebkwansir. Ba, a bindoka kubkwandum mutuk dam ninyi aryi moloramingnyi kwemdeina molobkwandum. Ara, ninyi taruk aryi keil ab, co ab aryi kiknibdeiboka moloraming kwemdeina asi molobkwandum. Ara, minob uca, sun ab sun abwe yabwe ab aryi kum moloramunyi kwemdeina asi miliboka molobde binkwandum. 65A bindoka kubkwandum mutuk dam ara teleb asa akwe kuboka iya kuron dikum ton kum dobdobkwandum. Er Iya Erebdobnyi biryi sunsi taklobkwansir. Ba, sun busul kiboka kuron dinyi babyi sun dam ton kum kubkwansir. 66Sun kam kubde binkwandum tam ara diboka kum kubde binkwandum. Eda, kitingtam lukunda nirya ara ilil kanya ab, dibibyob tenen kanya ab akwe boboka kubde binkwandum. 67Ba, sunci belekuna babyi lukunda babyi sun urasin dam lilibum eryankwansir dinyi nirya ara ilil dinyi akwe kubde binkwansir. Ato kubde binkwansir deyok aryi sunci ato ebde binkwandum. Sirya inibdiryi lukunda kibci ura, ‘Nai e, a bukabib to asi belekuna kibte ura, teleb,’ ebkwandum. Ani, sirya berekci ura, ‘Nai e, a bukabib to asi belekuna kibte ura, teleb,’ ebkwandum. 68Er Iya Erebdobnyi biryi sunsi tubto Mesir mutuk boboka tanglorbinkwansir. Ara, a bisik aryi bobindoka tanglorbinkwansir ebdeibsou bisik kuboka bobinkwansir. Ba, a bindoka kubkwandum mutuk nang asi, ‘Nunda sun il wa in nang kibdobkwansurum ati dekdobsindarur,’ ebkirikwandum. Ato kuboka ebkirikwandum bok, ton kum dekwansing.” Musa biryi sun Israel ninyi asi ato kuboka kubdeibkwansin ba, ukubkwansing ebdeibsou, ebmou.

Currently Selected:

Ulangan Uram 28: MTG

Highlight

Copy

Compare