Ulangan Uram 27

Er Imtamnyi uram keil deici sekmou deyok

27:1-10

1Ura, Musa ab, sun Israel nang wis yoka nang ab aryi Israel nang asi ato ebdeibmai, “A ebdeibkwinsin uram asi diboka talebnurubmunci, kunubde bindarur!

2-4Ara, sunci me Yordan koubkaboka otam binkwandum. Sirya kouboka bimunyi ura, Er Iya Erebdobnyi nun molonanyi biryi nun abwe yabwe asi, ‘Karebkwansin,’ ebdeiamwe mutuk wengbinkwandum. A sul mutuk ara kwaning babyi, co du babyi, bisam babyi yina amuma nirya kurur mutuk asi wengbinkwandum. Sirya wengbimunyi ura, mutuk kon si Ebal dam binkwandarur! A mutuk kon dam bimunyi ura, anda kuranci ilila keil mikbaryi aryi ikoka ko tukwe aryi deneboka dobkwandarur. Sirya dobmunyi ura, Er Imtamnyi biryi, ‘Ato kubdarur-ato kuna mem,’ en uram ab, yan memen uram ab a ebdeibmasin to kuboka a keil deici sekeibkwandarur! 5Ani, a dikum ababyi Er Iya Erebdobnyi nun molonanyi biti dama deiboka molon keil dungna ababyi kiknibkwandarur! A kiknibkwamunyi keil ara besi ab aryi tabakdongoboka kiknina mem! 6Er Iya Erebdobnyi biti dama deiboka molon keil dungna ara ukuryok keil aryi dobkwandarur! Ba, a dama deiboka molon keil lamna dub ara sunci Er Iya Erebdobnyi biti bisam sapi yim ab, bisam domba ab oboka nong nirya dama deiboka molonkwandarur! 7Ani, sun Er Imtamnyi ab antanirdan dama ababyi dama deiboka molonkwandarur! Ba, a keil dungna dam akwe kilkil asa aryi, Er Iya Erebdobnyi nun molonanyi urasin dam a deibmamunyi dama kablobyi dinyi nirya yinkwandarur! 8Anda keil deici ara ko tukwe aryi eibkwamingnyito tenen diboka sekwandarur,” ebmai.

9Ura, Musa ab, sun Lewi yala nang ab aryi sun Israel nang asi ato ebmai, “Uram kilikmunci kekendarur! Arub tum aryi sunda sirya Er Iya Erebdobnyi nun molonanyi nermabwe mabwe kibsir. 10Ati Er Iya Erebdobnyi nun molonanyi biryi, ‘Ato-ato ukubde bindarur,’ ebdeibsou uram asi tubto arub aryi erdeirinmasin uram asi diboka kekeboka talebnurubmunci, kunubde bindarur.” Musa ab sun Lewi yala ninyi imam nang ab aryi sun Israel nang asi ato ebkarebmai.

Er Imtamnyi biryi, “Mem,” ebdeibmou dinyi asi kekena kum ninyi ati sumna amolbaryi deyok

27:11-26

11Ura, a uki tum aryi Musa biryi sun Israel mutuk ninyi, koklombaryi yala ninyi asi bokoka dika bitinyi kibdeibmou. Ara, ton tam ninyi yala nabaryi, ton tam ninyi yala nabaryi kibdeibmouci, sunsi ato ebmou.

12“Me Yordan sirya kouboka otam bimunyi ura, sun Israel ninyi yala nabaryi aryi mutuk kon si Gerizim kon asi bindoka tikwandarur! Ba, Er Iya Erebdobnyi biryi sunsi ebdeianci to kuboka kisal dangna ebkwandarur. Sun a nabaryi ninyi yala si ara Simeon yala ninyi ab, Lewi yala ninyi ab, Yehuda yala ninyi ab, Isakhar yala ninyi ab, Yusuf yala ninyi ab, Benyamin yala ninyi ab aryi kisal dangna ebkwandarur. 13Ba, ton nabaryi yala ninyi aryi mutuk kon si Ebal asi bindoka tikwandarur! Ba, Er Iya Erebdobnyi biryi sunsi ebdeianci to sumna dinyi ebkwandarur. Sun a nabaryi ninyi si ara Ruben yala ninyi ab, Gad yala ninyi ab, Asyer yala ninyi ab, Zebulon yala ninyi ab, Dan yala ninyi ab, Naftali yala ninyi ab aryi sumna dinyi ebkwandarur. 14Ato kuboka sirya subci ura, sun Lewi yala ninyi aryi uram ibokabmunci ato ebkwandarur! 15‘Er Iya Erebdobnyi biryi iya duknasito tenerur kwemdeina asi ninyi aryok duknubdob dikum da kiknibdeiboka molonung. A kwemdeina kiknibdeiboka molonung yala ninyi asi, bita subdarya,’ ebkwaming. Ani, Israel ninyi nirya aryi ato kuboka submaca ati, ‘Diba,’ ebkwaming.

16Ani, tonda ato ebkwaming, ‘Sun kwin yabwe ab, sun nai yabwe ab asi malyi kimsininung ninyi asi, bita subdarya,’ ebde binkwaming. Ani, Israel ninyi nirya aryi, ‘Diba, a submar to kuboka kunubkwande,’ ebkwaming. 17Sun yuk nang wa tukwe wiliba asi araramungwe ninyi yala asi, ‘Bita subdarya,’ ebde binkwaming. Ani, Israel ninyi nirya aryi, ‘Diba, a submar to kuboka kunubkwande,’ ebkwaming. 18Ani, tonda ‘Sun asing kubdob nang asi malyi bisik boboka waningminingdamungwe ninyi yala asi, bita subdarya,’ ebkwaming. Ba, sun Israel ninyi nirya aryi, ‘Diba, a submar to kuboka kunubkwande,’ ebkwaming. 19Ani, tonda ‘Tingyangan ninyi ab, sun kwaknamna nermabwe mabwe ab, sun akenyi kum nerabwe asi tatab-tatab eboka yonung ninyi yala asi, bita subdarya,’ ebde binkwaming. Ani, Israel ninyi nirya aryi, ‘Diba, a submar to kuboka kunubkwande,’ ebkwaming. 20Ani, ‘Sun nai yabwe nerabwe bok asi yoraming ninyi yala asi, bita subdarya,’ ebde binkwaming. Ani, Israel ninyi nirya aryi, ‘Diba, a submar to kuboka kunubkwande,’ ebkwaming. 21‘Sun yuk kamyoa asi yoramungwe ninyi yala asi, bita subdarya,’ ebde binkwaming. Ani, Israel ninyi nirya aryi, ‘Diba, a submar to kuboka kunubkwande,’ ebkwaming. 22Ani, ‘Sun malnerabwe bok yordaraming ninyi ab, sun nai yabwe kum, sun kwin yabwe kum ara sun du weit aryi deiamingnyi nermabwe ara ni malner eraming bok asi talyi yordaraming ninyi ab asi bita subdarya,’ ebde binkwaming. Ba, sun Israel ninyi nirya aryi, ‘Diba, a submar to kuboka kunubkwande,’ ebkwaming. 23Tonda, ‘Sun ner er kwin bisi yonung ninyi asi, bita subdarya,’ ebde binkwaming. Ba, sun Israel ninyi nirya aryi, ‘Diba, ati, bita subdarya,’ ebkwaming. 24Tonda, ‘Sun ninyi mamun boka, iniboka oraming ninyi asi bita subdarya,’ ebde bikwaming. Ba, Israel ninyi nirya aryi, ‘Diba, a submar to kuboka kunubkwande,’ ebkwaming. 25Tonda, ‘Sun malyi dinyi kununa kum nang asi yuk nang aryi, “Obdeibsurum,” eboka dengdaming dengna doraming nang asi bita subdarya,’ ebde binkwaming. Ba, Israel ninyi nirya aryi, ‘Diba ati, bita subdarya,’ ebkwaming. 26Ani, ‘Er Imtamnyi biryi, “Ukubdarur,” ebdeibsou uram asi diboka kum kunuraming ninyi asi bita subdarya,’ ebde binkwaming. Ba, Israel ninyi nirya aryi, ‘Diba ati, bita subdarya,’ ebkwaming.” Musa biryi sun Israel ninyi asi ato ebmou.

Currently Selected:

Ulangan Uram 27: MTG

Highlight

Copy

Compare