Ulangan Uram 24

Ner ab, sal ab taklobdanandingnyi ani, tubto dordana ati, “Ukuna mem,” eboka lilirdeirin deyok

24:1-5

1Ura, Musa biryi sun Israel ninyi asi ato ebmou. Ara, “Ner ab, sal ab dobdandoka kurandurung. Uca, er ner aryi malyi dinyi kunubmaci ba, er akenyi asing eibci ura, er ner asi, ‘Ni li,’ tenebkwandur. Ura, ‘Taklobkwan,’ tenen aryi anyi biryi ner ab, sal ab tanglordan kerek sekwandur. Sirya sekci ura, a ner taruk dam karebkwandur. Karebci ura, anyi biryi a ner asi, ‘Bindobdum!’ ebkwandur. Ba, a ner ara anyi ai aryi anaboka bindobkwandur. 2Ba, sangkuna a ner aryi bindobdiryi yuk nang dobdobkwandur. Ba, a ner ara yuk nang ner kibkwandur. 3Ani, tubto a dobmarinyi biryi a ner asi, ‘Ni li,’ tenebci ura, a dobmarinyi bibabyi tubto, ‘Taklobdankwanim,’ en kerek sekokabdiryi, a ner asi karebkwandur. Karebci ura, ‘Bindobdum!’ ebkwandur. Ba, a ner bindobkwandur. Tonda, sangkuna a dobmarinyi dibci kum ura, ninyi dona kum ner kibkwandur. 4Ura, a ner ara tubto yuma doandinyi biryi tamuboka dona mem! A ner ara, ‘Nining ato,’ tenen dinyi asi kunuranci deyok aryi dona mem! A ner ara aminda doandinyi ab sirya dobdandoka kurandingnyi deyok aryi, Er Iya Erebdobnyi urasin dam asi betebdongobkwandur. A deyok aryi, a ner tubto dona mem! Ani, sunci Er Iya Erebdobnyi nun molonanyi biryi karebsou ba, kunub mutuk dam asi malyi dinyi beterdongona mem!

5Tonda, ner ukuryok dobmarinyi bira yin doun nang miliboka mar bobana babyi, il weik wa karena babyi ara mem! Eda, kwalina tentok ara er ner ab tonkwa sun tenebdobmaringnyi to kuboka teleb asa akwe kunubde kubkwandurung. Ba, anyi biryi a dobmaci ner er kanya teleb kibdeibci ba, er kanya teleb asa akwe kubkwandur,” ebmou.

Musa biryi sun Israel ninyi asi, “Sun mamun ukuboka kalingdankwandarur,” ebmou deyok

24:6-22

6Ura, Musa biryi sun Israel ninyi asi ato ebmou. “Sun kwit yabwe ati, sun bona tiya karebkwamamunyi ura, sun kwit yabwe sun gandum du yalyi kwen keil ara dona mem! A gandum du yalyi kwen keil ara sun kwit yabwe sun yibde kurona bikdob dinyi kurur.

7Sun Israel ninyi mamun bok, sun kankan dam aryi ninyi tentok aryi, sun kwit tonyi bisi, yuk nang asi dekdobkwamaci ati kum? Er il wa dimdonanyi kibdeibkwanci ati kum? Ati, neneboka bobanmaca asi, asing eibmamunyi ura, anyi bira sunci obkwandarur. Ba, sun kankan dam aryi ato malyi kun dinyi bai donokwandarur.

8Tonda, sun susa youn taleranci nang ara, ‘Dakdongobingnyei,’ tenen ati diboka-diboka kalikwandarur. Ati, Ni Imtamnyi biryi sun Lewi yala ninyi asi, ‘Ato-ato kuboka sunci susa youn asi diboka kalikwandarur,’ ebse to sunsi ebsingnyi tok kuboka kunubkwandarur! 9Ara, Er Iya Erebdobnyi, nun molonanyi biryi Miryam bisi susa youn kareamwe dinyi ara sunci luba kibmunyei. Ara, Mesir mutuk aryi anaboka bisik noutam yangaramoubwe talak aryi kareamwe.

10Sunci tiya ati, ‘Tubto tamubkarebkwanirim cok,’ en bona kareamunyi nang ai wengbindoka, ‘Erbabyi ni bona tamurkarenici tum aryi, er bona tamubkarebkwan,’ tenen bona dorbana mem! 11Eda, anyi ai dam bindoka tiklobmamunyi ba, erci kan bona tamurkarekici tum aryi, ‘Tamurkaren bona,’ boboka kansi kareryankwandur. 12Bok, anyi bira bona bon kumnyi ura, er ongon aling deiboka nurubmaminyi ba, inina mem! 13Eda, kiting wengdongorbaci ura, er ongon aling olong tamubkarebkwandum. Ba, kansi, ‘Ni nai, teleb,’ eboka ongobdakabdiryi mabdobkwandur. Ato kubmaminyi deyok aryi, Er Iya Erebdobnyi, nun molonanyi biryi kansi kanya deibkwankurur.

14Sun kwit yabwe babyi, yuk atei nang bok, sun atei kurandum nang babyi bona bon kum nang aryi sun wa inmasingnyi nang asi, ‘Sunda outam nang aca,’ tenena mem! 15Eda, kiting kum wengdongorbinabci uca dekwandarur. Sun kan wa inmakingnyi nang ara bona bon kum nang akiryi, ‘A ironmab wa aryi kwaning yibdobkwamab,’ tenen ati ironmanunga aryi, olong dekwandarur. Ba, sun wa inmasingnyi nang aryi Er Iya Erebdobnyi bisi molobdongobsingnyi ba, sunci a kum dekamunyi deyok aryi ikin dinyi bobdobmunyei.

16Ani, er mi aryi malyi kuranci dinyi ati, er nai bisi ikin kareboka ona mem! Neiktoto, er nai biryi malyi kuranci dinyi ati, er mi asi ikin dinyi kareboka ona mem! Eda, sun malyi kuamunyi to kuboka ikin dinyi yuk-yuk takubdobkwandarur.

17Tonda, sun yuk atei nang ab, sun kwaknamna nermabwe mabwe ab bona asi ararona mem! Ani, sun sal kum nerabwe ongon aling asi, ‘Ni bona tubto tamurkarenici tum aryi karebkwan,’ tenen ati er ongon aling dona mem! 18Niryi sunsi, ‘Ato kuna mem!’ ebdeibmasin dinyi ara sunbabyi Mesir mutuk bobinanseici, il wa in nang kibdeiansei. Bok, Er Iya Erebdobnyi, nun molonanyi biryi Mesir mutuk aryi bobdakde yanansou. A kuansou dinyi ara sunci luba kimna mem! Eda, sun kuransei to kuboka sun bona talen kum nang asi boukwe kibkwandarur!

19Sun wa iamunya yuma kinmamunci, luba kibmamunyi gandum kwaning ara tubto tamuboka kirbana mem. Eda, sun yuk atei nang ab, sun kwaknamna nermabwe mabwe ab, sun akenyi kum nerabwe ati, a tanglonkwandarur. Ba, Er Iya Erebdobnyi, nun molonanyi biryi sun wa iramunyi dinyi asi kisal dangnikwansurur. 20Ba, zaitun kouamunya du dakwamamunyi ura, a tum aryok nirya simsim eboka dangna mem! Ani, a co te timum-tamum eboka nirya dangna mem! Eda, a co du ara sun yuk atei nang bok, sun atei kuramingnyi nang ab, sun kwaknamna nermabwe mabwe ab, sun sal kum nerabwe ab ati takdongobkwandarur. 21Ani, anggur du dakwamamunyi ura, takdongoamunyi co du ara tubto tamuboka dangbana mem! Eda, sun tingyangan nang ab, sun kwaknamna mabwe nermabwe ab, sun sal kum nerabwe ab ati, takdongobkwandarur. 22Niryi sunsi, ‘Ato dinyi kuna mem!’ ebmasin ara sunbabyi Mesir mutuk bobinansici, arukoka il wa in nang kibdeiansei. A ukuransei dinyi ara sunci luba kimna mem!” A deyok aryi, sunci sunsi luba kibmunyei. Eda, sun kuransei to kuboka, sunsi boukwe kibkwandarur ebmasin ebmou.

Currently Selected:

Ulangan Uram 24: MTG

Highlight

Copy

Compare