Ulangan Uram 23

Er Iya Erebdobnyi nermabwe mabwe kimna kum deyok

23:1-8

1Ura, Musa biryi sun Israel ninyi asi ato ebmou, “Sun den kum, den dulu kum sekandinyi bira Ni Iya Erebdobnyi mabwe kimna mem!

2Ba, tonda Er Imtamnyi urasin dam aryi dordana kum kuandingiryok asi yaldangnandingnyi nermabwe mabwe ab, sun malner nebnyi asi doboka yaldangnandingnyi nermabwe mabwe ab, sun kwit ner ab sun nai ner ab asi doamunci yaldangnamunyi nermabwe mabwe ab ara Ni Iya Erebdobnyi mabwe kimna mem! Ani, odei-odei yaldakde binkwaming ninyi nirya ab ara Ni Iya Erebdobnyi mabwe kimna mem!

3Ani, sun Amon yala ninyi ab, Moab yala ninyi ab, odei-odei yaldakde binkwaming ninyi nirya ab ara Ni Iya Erebdobnyi mabwe kimna mem! 4Ara, Mesir mutuk aryi anaboka bisik noutam yangarandau talak aryi, roti kwaning babyi, me babyi ton kum yibkareansei. Ani, Aram mutuk bok, Mesopotamia dam aryi Petor ateinyi Beor mi Bileam bisi, ‘Israel ninyi subdeibsurum!’ eamnyi ba, suansou. 5Bok, Er Iya Erebdobnyi nun molonanyi biryi Bileam sumsina ara kekeboka, ersi kum kareamwe. Eda, a sumna asi danguboka sunsi kisal dangsina dinyi kareansou. Ara, Er Iya Erebdobnyi nun molonanyi, nunsi boukwe kimsurur deyok aryi ato kuboka kareansou. 6Ati, sun kam kubde binkwandum tam nirya ara a mutuk ninyi ati, teleb asa akwe kubde bana dinyi ara karena mem!

7Sun Edom mutuk ninyi asi, ‘Sunda malyi mutuk ninyi aca,’ tenena mem! Ara, sun kwit yabwe kunung. Ani, sun Mesir mutuk ninyi asi, ‘Malyi mutuk ninyi aca,’ tenena mem! Sunbabyi minob talak ara sun mutuk bindoka kurandau. 8A mutuk ninyi ara sun deibdoba aryi yaldakde binkwaminga yal winiryi ninyi ara, ‘Ur,’ Ni Iya Erebdobnyi nermabwe mabwe kibkwanung,” ebdeibsou ebmou.

Keis ol atei asi lek kimna deyok

23:9-14

9Ura, Musa biryi tubto sun Israel ninyi asi ato ebmou, “Sun yin doun nang ab, ninyi mar boboka ibinkwamamunyi ura, malyi dinyi sun kankan dam aryi kalikdandobkwandarur! 10Sun yin doun nang kankan aryi malyi dinyi beterdongon dinyi erci lukunda aryi kunubmaci ura, erci yin doun nang keis ol atei wengbana mem! Eda, yuk da bai bindobkwandur. 11Bindobmaci ani, sintam kibci ura, me kekdongobkwandur! Me kekdongobokabdiryi kiting wengbici ura, tamuboka keis ol atei ur wengbinkwandur.

12Sun a malyi dinyi kunubmangnyi yin doun nang nirya bindobkwamangnyi dikum ara baitam yuk da kiknibdeibkwandarur. Ba, sunci a dikum asi bindoka dei ab, lin ab sirya yaboka labkabokingnyi ura, keis ol aitam ur yankwanung. 13Sun a malyi dinyi kunubmangnyi ati, a kiknibdeiamingnyi dikum binkwamangnyi ura, sun dei ab, lin ab laboka yabdongobkwamangnya tukwe ukwamangnyi keica yuk bobdobkwanung. Ba, akiryi sun dei ab, lin ab siklibkwanung. 14Ara, Er Iya Erebdobnyi nun molonanyi bira sun keis ol atei dam yandoka kalikoka, sun mar ordana nang asi oboka muna kirdongon dinyi karebkwansir. Ati, sun keis ol atei ara, ‘Iya lek akwe kubdeibkwandarur!’ Ba, Er Iya Erebdobnyi biryi sun dam yandoka kum milibsicei ati, ato kubkwandarur,” ebmou.

Sun il wa dimna nang asi boukwe kimna deyok

23:15-16

15Ura, Musa biryi sun Israel ninyi asi tubto ato ebmou. “Yuknyi il wa dimnanyi biryi, ‘Nai ni kan dam iniroryanman,’ eboka kansi yandobmaci ura, ‘Kan wa irumnyi bisi bindobdum,’ ena mem! 16Ani, sunci ersi orsinina mem! Eda, er kanya aryi, ‘Akatei ara teleb asa kubdobkwan,’ teneandiryi sunsi yandanci atei sun ab tonkwa a kuronkwandarur,” ebmou.

“Beterdongona mem ai dikum aryi talyi yordana ninyi bordongona mem,” en deyok

23:17-18

17Ura, Musa biryi sun Israel ninyi asi tubto ato ebmou, “Sun Israel nermabwe mabwe ara yuk kwemdeina molon ai aryi, ‘Talyi yordan ner ab, sal ab kimna mem!’ 18Ani, a kwemdeina moloramingnyi ai wa iboka, yordaramunci doramunyi co bok aryi, Er Iya Erebdobnyi nun molonanyi Er ai Kemah Suci ai boyangana mem! Ato kuraming dinyi ara Er Iya Erebdobnyi nun molonanyi bira, ‘Iya duknasi,’ tenerur dinyi asi kunuraming,” ebmou.

“Nunuboka molona mem!” uram deyok

23:19-20

19Ura, Musa biryi sun Israel ninyi asi tubto ato ebmou, “Sun kwit yabwe aryi sun bona asi tiya boansingnyi ura, ‘Tabakdongoboka,’ molona mem! Ara, co bok babyi, yina babyi, yuk dinyi-yuk dinyi babyi nirya ara sunci ato kuboka molortabangna mem! 20Bok, yuk mutuk nang ara, ‘Ur, tabakdongoboka,’ molobkwandarur. Eda, sun Israel mutuk ninyi mamun nong ara ato kuboka molordana mem! Ba, Er Iya Erebdobnyi nun molonanyi biryi sun taleronkwamunyi dinyi asi kisal dakwansurur,” ebmou.

Er Imtamnyi bisi, “Ukubkwankin,” en deyok

23:21-23

21Ura, Musa biryi sun Israel ninyi asi ato ebmou, “Sunci Er Iya Erebdobnyi nun molonanyi bisi, ‘Ukubkwankin,’ sirya eamunyi ura, ‘O talak aryi kunubkwan,’ ena mem! Ato kuna ara Er Iya Erebdobnyi nun molonanyi biryi, ‘Ukubkwankin eanoumwe to kuboka kunubdeibnurum,’ ebkwansurur. Ba, tonda a eaminyi dinyi kum kunubdeiaminyi aryi, malyi dinyi bobdobkwandarur. 22Bok, sunci Er Imtamnyi bisi, ‘Ukubkwankin,’ en uram ton kum eamunyi ura, malyi kun dinyi ikin kum bobdobkwandarur. 23Sun si bambul aryi, ‘Ukubkwankin,’ eamunyi ura, sun a eamunyi tok kuboka kunubkwandarur! Sun mining si bambul aryi Er Iya Erebdobnyi nun molonanyi bisi, ‘Ukubkwankin,’ ur dem eamunyi ura, sun a eamunyi to kuboka kunubdeibkwandarur,” ebmou.

Yuk nang anggur wa dam yibindoka du dangna deyok

23:24-25

24Ura, Musa biryi sun Israel ninyi asi tubto ato ebmou, “Yuk nang anggur wa, ukuryok kum kiamingnyi wa dam sangkuna yibamunyi ba, utanmakici ura, kanci dakoka aling kirona mem! Eda, ur dakoka yinmaminyi ba, boubkwankurur. Ato kuna teleb. 25Tonda, yuk nang gandum wa ukuryok kum kiamingnyi wa dam asi sangkuna yibamunyi ba, kan kanya nunukici ura, taruk aryi kibmamunyi dinyi ara ur yibkwandarur. Bok, sun kwit yabwe gandum asi ya aryi nirya sekoka kina mem,” ebmou.

Currently Selected:

Ulangan Uram 23: MTG

Highlight

Copy

Compare