Ulangan Uram 25

Er malyi kubmarinyi bisi ikin weik dinyi karen deyok

25:1-4

1Ura, Musa biryi sun Israel ninyi asi ato ebmou. “Sunci, ninyi malyi kun dinyi kunuramingnyi asi lilibdeiboka sirya uram sengkweten ai binkwamandarur. Ba, sun a malyi kun dinyi liliboka sirya uram sengkweten nang aryi, ‘Anyi biryi malyi dinyi kunubwe,’ ba, tonyi bira, ‘Erci malyi dinyi kum kunubwe,’ ebkwamasunung. 2Ura, ‘Erci malyi kurur,’ eboka sirya uram sekwetebmanginyi bisi, sun sirya uram sengkweten nang aryi, ‘Kan nong nirya tukwe ai mabdum!’ ebkwanung. Ba, tukwe ai mabci ura, ‘Er malyi kurur to kuboka kikliboka obdarur!’ ebingnyi ba, obkwanung. 3Ara, anyi bisi liki 40 baryi bisibkaboka orbana mem! Eda, liki 39 baryi litukoka obdarur! ebmangnyi to kuboka obkwanung. Asi sun kum ebdeibmangnyi to bisibkaboka obmangnyi ura, sun Israel ninyi kankan dam aryi anyi alyi dakeibdankwandur.

4Sunci gandum yalyi kwebkwamaci bisam sapi er si bambul asi sapi si kourdongon keica aryi kourdongona mem! Ba, erci a yalyi kwerbinmaci gandum du asi doboka yibkwandur,” ebmou.

Er du biryi deibloboka dianci ner asi don deyok

25:5-10

5Ura, Musa biryi sun Israel ninyi asi, “Er du biryi deibloboka dianci ner ara ato kubkwandarur,” ebdeibmou. Ara, “Sun ai ninyi kuramunyi dam aryi, sun du er mabwe ton deirona kum kuandiryok er ner deibloboka dibci ura, a ner ara yuk ai ninyi aryi dona mem! Eda, er akenyi er weit nong kobdoba aryi a ner dobkwandur. Ato kuboka sun weit yabwe nong aryi a sun du deibloboka dianci ner dobdanin bankwandarur. 6Ba, a dobdiryi yuma deibci mi ara er du mi kibkwandur. Ba, sun Israel ninyi kankan dam aryi, er du diandinyi bibabyi er deibdoba ara, ‘Atiba,’ ebkwanung.

7Bok, er weit aryi, ‘A ner ni kum dobkwan,’ ebci ura, a ner aryi sun Israel weik wisi-wisi nang asi bindoka ato ebkwandur. Ara, ‘Ni akenyi er weit aryi, “Ni kum dobkwankin,” ebmanir. Ati, niryi ni akenyi biti mi ton kum deibkarebkwan ba, aminda er deibdoba ton kum kubkwaming,’ ebkwandur. 8Ura, sun Israel atei weik wisi-wisi nang aryi, anyi naboka uram sisikwanung. Uram sisingmangnyi uca, ‘Minob uca, niryi sirya a ner kum dobkwan ebse ara dib ati ebse,’ ebkwandur. 9Ato ebci ura, a ner aryi sun Israel atei weik wisi-wisi nang dam aryi, anyi urasintam asi si maka tulubdeiboka, anyi er yan karuk kwiribci ura, ersi ato ebkwandur. ‘Sun Israel ninyi aryi, sun du yabwe deibloboka diamingnyi nerabwe asi, sun weit yabwe aryi dona kum nang ara ato kuraming,’ ebkwandur. 10Ba, sun anyi ai ninyi asi sun Israel ninyi aryi, ‘Akai ninyi aryi sun du doamwe ner asi dorona kumci taklobyi ner kurur,’ enkwanung,” ebmou.

Sun kankan dam aryi, “Malyito dinyi kuna mem,” ebmou deyok

25:11-12

11Ura, Musa biryi sun Israel ninyi asi ato ebmou. Ara, “Sun sal bitinyi nang ordanmatiring bok asi, tonyi ner aryi yandokabturyi, er akenyi biti, ‘Miliboka lebdobkwan,’ tenen sangkuna kute uca, er akenyi ab ordanmatiringnyi den asi kotoktalebte. 12Ura, sunci a ner asi boukwe kimna mem! Eda, er taruk sekwandarur,” ebmou.

Ukutotoa kikliboka ikin diboka bingni dinyi deyok

25:13-16

13Ura, Musa biryi sun Israel ninyi asi ato ebmou. Ara, “Sunci bona dekdobkwamamunyi ura, ukutotoa ikin eitam-outam kimdeirin keil aryi kiklina mem! 14Tonda, sunci eitam-outam kimdeirin moyok si efa aryi kiklina mem! 15Eda, sunci ukutotoa sun ikin a kuanci tok diboka bingni dinyi ab, ukutotoa kiklina si efa diboka kikliranci dinyi akwe bobkwandarur. Ba, sunda Er Iya Erebdobnyi, nun molonanyi biryi karebsou mutuk asi wau loboka dibkwandarur. 16Ara, unanyi biryi a ukutotoa asi diboka kum kikliboka inina doramingnyi ninyi ara Er Iya Erebdobnyi, nun molonanyi biryi sunsi, ‘Duknasito,’ tenerande,” ebmou.

“Amalek mutuk ninyi asi obdarur!” ebdeibmou deyok

25:17-19

17Ura, Musa biryi sun Israel ninyi asi ato ebdeibmou. Ara, “Sun Amalek mutuk ninyi aryi, nunsi malyito kuransei dinyi ara luba kimna mem! Ara, Mesir mutuk aryi anaboka bisik noutam yangaroramoubwe talak aryi, nunsi iya malyito dinyi kuransei. 18Ara, sunci Er Imtamnyi bisi, ‘Ilil,’ tenena kum kuramnyi. Eda, mutuk cang yibanmana mitang ati, yandoka mabmana asi, sun Amalek ninyi aryi aminda domyandoka nun Israel mitang-mitang ninyi mer asi orsengdansei. 19Ato kuransei ilil dinyi asi, Er Iya Erebdobnyi nun molonanyi biryi, ‘Karebkwansin,’ ebsou mutuk si Kanaan sirya karebkwansir. Karebsiriryi, nun mar ordan nang nirya asi kaliksici ura, sunci sun Amalek ninyi nirya asi obkabkwandarur! Ati, sunci luba kimna mem!” ebmou.

Currently Selected:

Ulangan Uram 25: MTG

Highlight

Copy

Compare