Ulangan Uram 22

Ninyi boukwe kimdana deyok

22:1-4

1Ura, Musa biryi sun Israel ninyi asi tubto ato ebmou, “Sun kwit yabwe bisam lembu wanikamingnya asi eibmamuncok, kum eiana atonun kuna mem! Eda, sun kwit yabwe bisam dam nang asi dobkarebkwandarur! 2Bok, a bisam damnyi bira sun ai dam kum kurandur kum, sun kum bingdamunyi bisam dobmandarur kum ura, a bisam ara sunci boboka kunkwandarur! A boboka kuramunyi ba, er a bisam damnyi biryi ingkirikde yangaci tum aryi tamubkarebkwandarur. 3Neiktoto sunci unanyi bisam keledai kum, sun ongon aling kum, sun kwit yabwe aryi yuk bona kum wanikamingnya asi eibmamunyi ura, kum eiana ato kuna mem! Eda, sunci ato kuboka dobmunyi ura, sunbiramnyi asi tamubkarebkwandarur!

4Ani, sunci sun kwit yabwe bisam keledai kum, bisam lembu kum bisik ai da sakmaci eibmamuncok asi kum eiana atonun kuna mem! Eda, sun kwit yabwe ab tonkwa milibdankwandarur,” ebmou.

“Ato kuboka kubde binkwandarur,” eboka yan memen deyok

22:5-12

5Ura, Musa biryi tubto sun Israel ninyi asi ato ebmou, “Sunci nerabwe ongon aling ara sal ongona mem! Ba, sal ongon aling ara nerabwe ongona mem! Ato kurdaraming ninyi ara Er Iya Erebdobnyi nun molonanyi urasin dam asi malyi dinyi kuraming.

6Ani, bisik ai aryi maka du co dub deiboka iribmaca kum, tukwe ai er mi iribmaca kum asi sunci a maka babyi, er mi babyi nirya dona mem! 7Eda, a maka wisi ara takdongobokminyi ura, er mi asi dobdobkwandum. Ba, sun kam kubde bantam ara teleb asa akwe kubde binkwandarur.

8Ani, sunci ai ukuryok doramunyi ura, akai er aruma kubkub tam nirya ara lika dobkwandarur! Ba, akai doraminyi uca, kan kwit yabwe sakingnyi ba, ikin dinyi bobdobmunyei.

9Ani, neik wa yakna aryok asi sunci anggur yala ab, jagung yala ab, yuk yala ab tonkwa tabtabukoka kwengna mem! Ba, a iboka kouamunyi anggur nirya ara aboka moubdiryi, Er Imtamnyi biti yuk wibdeiboka deirin dinyi kibcob. 10Ani, tentoka wa yakna asi bisam lembu ab, bisam keledai ab nisintum boboka ina mem! 11Ani, tabwe yala bitinyi aryi wiamingnyi ongon aling ongona mem! Ara, bisam domba otong tabwe ab, namin aling lenan tabwe ab aryi wiamingnyi ongon aling ongona mem!

12Eda, sun ongon aling er kubkub asi biribdongoboka wiamingnyi ongon aling asi ongobkwandarur,” ebmou.

“Ato kuboka dobdankwandarur,” en deyok

22:13-30

13Ura, Musa biryi sun Israel ninyi asi ato ebmou, “Sun sal nang aryi ner dobmunyi ura, a ner asi ina ngilingna mem! 14Ara, ‘Tola ati, kanda yuk nang aryi minob yorankei ner aca,’ eboka sun ner si malyi kiminingna mem! 15Akiryi, a ner er kwin er nai aryi sun akatei wisi-wisi sien nang ai bisik bublan dam asi, ‘Nun nebnyi kam kurur talak ara yuk nang ab ton talyi kuna kum kunung,’ eboka bobinkwandurung. 16Bobiringnyi ura, ato ebkwandurung, ‘Nunci anyi bisi nun nebnyi kabdeibnoumwe ba, doburyi kururung ani, ersi ina ngilikoka ni li ebwe.’ 17Ani, ‘Sun nebnyi ara minob yuk nang ab talyi kuramnyi ner aca,’ ebsou. Bok, ‘Nun nebnyi kam kuramwe talak ara yuk nang ab talya ton kum boyibaramnyi,’ ebkwandurung. 18Ebdingnyi ura, sun akatei wisi-wisi sien nang aryi anyi bisi oboka wenebkwanung. 19Sirya oboka wenebingnyi ura, a ner er kwin ab, er nai ab ati, ‘Dengna weik keil perak uang 100 baryi dekdum,’ ebkwanung ba, dekwandur. Ara, anyi biryi a ner asi ercok tola ati, ato eanci deyok aryi sun Israel nerabwe si malyi kibminikandur. Ato kuboka dekci ura, a ner asi, ‘Bindobdum!’ kum ebkwandur. Eda, iya ati anyi ner kibkwandur.

20Bok, diba ati a ner ara minob uca yuk nang ab kurandiryok asi anyi doanci ura, ninyi dona kum uca, er nai ai kunkwandur. 21A kurandiryok sun Israel ninyi dam asi talyi yortamni dinyi bobdongoandur. A bobdongoanci deyok aryi sun akatei ninyi nirya aryi ersi keil donokoka obingnyi ba, dibkwandur. Ba, sun Israel ninyi kankan aryi malyi kun dinyi bai donokwandarur.

22Ani, tonda ninyi sirya doanci ner bok, yuk nang ab yobdanmaringnyi ura, a yobdanmaringnyi ner ab sal ara obkwandarur ba, dibkwandurung. Ato kubmunyi ba, sun Israel ninyi kankan aryi malyi kun dinyi bai donokwandarur.

23Tonda, yuknyi biti deiamingnyi ner bok asi, ton yuknyi ab yobdanmarurung. 24Ato kubdanmaringnyi ura, a nang bitinyi asi keil aryi obkwandarur ba, dibkwandurung. Bok, a ner asi atei keta nong aryi yobkub tenen kusingnyi ura, uram weikanun kwelekwandarur. Ba, sun da yuk dikum kunmangnyi nang aryi uram kekebingiryi yandoka lebdeibkwansunung. 25Bok, yuknyi biti deiamingnyi ner bok asi, ton yuknyi biryi mutuk ai aryi, tatab-tatab eboka yobmaci ura, anyi bisi obkwandarur ba, dibkwandur. 26Bok, ninyi mamun ordaraming to kun malyi kun dinyi ara a ner aryi kum kubmarur. Ati, sunci ersi mitika ton ordena mem! 27A ner ara, ‘Ni li,’ eboka ngolongdonmaci bok asi, yuk ninyi aryi ersi ton kum miliboka lebdobmanung. Ba, anyi biryi, tatab-tatab eboka yobmaci deyok aryi anyi bisi obkwandarur.

28Tonda, kabir ner ara, ‘Ni li,’ enmaci bok asi sal tentok aryi, tatab-tatab eboka yobmaci asi eibmangnyi ura, 29anyi bisi dengna weik keil perak 50 baryi molobkwanung. Ba, a ner er nai bisi dekwandur. Sirya dekci ura, tatab-tatab eboka yobmaci deyok aryi erci a ner asi dobkwandur. Ba, a dobdiryi kubde binkwandingnyi talak aryi, a ner asi tanglona kum kubkwandur.

30Tonda, sun nai yabwe nerabwe asi yona mem!” Ato kuboka sun nai yabwe nerabwe yobmunyi ura, sun nai yabwe asi alyi dakeibkwandarur. Musa biryi sun Israel ninyi asi ato ebmou.

Currently Selected:

Ulangan Uram 22: MTG

Highlight

Copy

Compare