Ulangan Uram 21

Ninyi talyi orlon deyok

21:1-9

1Ura, Musa biryi tubto sun Israel ninyi asi ato ebmou. “Er Iya Erebdobnyi nun molonanyi biryi karebsou ba, nun mutuk kibsou mutuk si Kanaan aryi, ninyi oblobmangnyi ba, dibmaca eibkwandum. Ba, er obmarinyi bibabyi kum bikwandum. 2Ato dinyi kunubmaci eibmunyi ura, sun sien wisi-wisi nang aryi a oblobmanginyi ba, dibmaci dikum bindoka, ‘Dantam atei nang aryi yandoka oblobmang do?’ eboka a dibmarinyi er tukwi mabmaci dikum aryi kikliboka libkwanung. 3Yan sengdengnyi ba, atei dam nang aryi obmangnyi sirya bikingnyi ura, ukuryok nerbalbalinglonmaci bisam sapi ner ton boboka wa irdena kum kuramingnyi bisam asi dobkwanung. 4Ura, wisi-wisi nang aryi ukuryok nerbalbalinglonmaci bisam sapi ner asi doboka bobingnyi ura, me demang kurandiryi wa ton iboka kourdena kum kuramingnyi mutuk lu dam asi bobinkwanung. Bobingnyi ura, a bisam lembu ner asi ngang sekoka obkwanung. 5Ba, a bisam onmangnyi mutuk lu ara Er Iya Erebdobnyi nun molonanyi biryi, ‘Ni wa akwe inkwaning,’ eboka sirya wibwe yala nang, sun Lewi yala imam nang ababyi a binkwanung. Ba, sun Lewi yala imam nang a binmangnyi aryi, Er Iya Erebdobnyi si deici aryi a kunubmaci dinyi nirya kisal dakoka sirya sengkweten uram ebkwanung. 6Ebingnyi ura, sun akatei ninyi ab, akatei wis yoka sien nang nirya ab aryi a bisam sapi ner deici sun taruk deibdongoboka me ilikdongobkwanung. 7Ilikdongobingnyi ura, ato ebkwanung. ‘Anyi bira nunci kum obmab. Ani, er a obmaranyi bira nun kum bikmab,’ ebkwanung. 8Ebingnyi ura, Er Iya Erebdobnyi bisi ato eboka molobkwanung, ‘Nai Iya Erebdobnyi, nun Kan nermabwe mabwe Israel ninyi asi, Mesir mutuk aryi bobdakde yanansoumwe to nun malyi kun dinyi kilibsurum. Ara, Kan nermabwe mabwe Israel ninyi kankan aryi, er malyi dinyi ton kununa kum bok oblobmangnyi bira nun talyi ikin bobibyei,’ eboka molobkwanung. 9Ato kuboka Er Iya Erebdobnyi urasin dam aryi, ‘Teleb,’ tenen dinyi kubkwandarur. Ba, sun Israel ninyi kankan dam aryi, er malyi dinyi kununa kum bok asi, oblobmanginyi bira sun ikin kum bobkwandarur,” ebmou.

Il wa dimni nerabwe asi don deyok

21:10-14

10Ura, Musa biryi sun Israel ninyi asi tubto ato ebmou, “Sun mar ordana nang asi mar boboka obdankwamandarur. Ba, Er Iya Erebdobnyi nun molonanyi biryi sun mar ordana nang sun taruk dam karebkwamasurur. Ba, a muna kibdongoamunyi atei nerabwe ara boyandoka sun il wa arungni nerabwe kibdeiandarur. 11Ani, sunci anda nerabwe mer kankan dam aryi ner tentok ara urasin teleb ura, ‘Doboka ni ner kibdobkun,’ tenebkundarur. 12Ura, a ner doboka sun ai boyankwandarur. Boyamunyi ura, er otong kukaboka, er taruk keila sekabkwandur. 13Ani, sun il wa arungni ner kiandiryi ongoranci ongon aling kwiribkabkwandur. Ani, er kwin er nai dina ati, wala tentoka ara engeboka ati ur te louboka bukwandur. Ato sirya kubci ura, a ner doboka sun ner kibdobmunyi ura, tonkwa kubdobkwandarur. 14Ani, sunci a ner asi sirya tatab-tatab eboka doamuncok asi, ‘Nun li,’ tenebmunyi ura, taklobmunyi ba, er, ‘Bindobkwan,’ tenebmaci to bindobkwandur. Sunci, yuk nang asi co bok dengna mem! Ara, sunci a ner asi il wa in ner kimdeiana mem! Ara, kanci, ‘A ner dobkwan,’ teneaminyi deyok aryi ato kuna mem!”

Du mi ati er nai taleranci bona karen deyok

21:15-17

15Ura, Musa biryi sun Israel ninyi asi ato ebmou, “Sal tentok aryi nerabwe bitinyi doanci ura, anyi biryi ton ner asi kanyi deibci ura, ton ner ara kanyi kum deirande. Ba, a nerabwe bitinyi yuk-yuk aryi sal mi deiandurung. Bok, yuma mi ara er kanya kum deiranci ner aryi deianci mi kurandur. 16Bok, anyi biryi er mabwe bitinyi asi er taleranci bona bokeibkwamaci ura, ato kubkwandur. Ara, dunyi biti karebman bona bok asi, er kanyi deiranci ner aryi deianci mi atikwe weikanun karena mem! 17Eda, er kanya kum deiranci ner aryi deianci mi dunyi bisi, ‘Ni mi, erda dunyi deibsa,’ eboka er taleranci bona ara tabakdongoboka olong bitinyi deiboka karebkwandur,” ebmou.

Sun kwin ab, sun nai ab en uram kekena kum nermabwe mabwe deyok

21:18-21

18Ura, Musa biryi sun Israel ninyi asi tubto ato ebmou, “Sun mabwe ara sun nai ab, sun kwin ab aryi etereboka, yan memeramingnyi uram asi kekena kum mabwe kuramingnyi ura, 19sun kwin sun nai aryi akatei wisi-wisi nang ai dam bisik bublan dam asi bobinkwandurung. 20Bobiringnyi ura, ato ebkwandurung, ‘Nun mi ara nun eteren dinyi babyi, nun uram babyi kekena kum kururci, walina me yin mi kibwe,’ ebkwandurung. 21Ati, sun Israel ninyi aryi a mi asi keil aryi donokoka obingnyi ba, dibkwandur. Ato kubmunyi aryi, a mabwe malyi kuramingnyi dinyi sun kankan dam aryi kum danabdeibkwandarur. Ba, sun Israel ninyi nirya aryi, ‘Ato kuboka obmangnyi ati,’ sunci kekebingiryi ilil kubkwandur,” ebmou.

Sun malyi kun dinyi ati ikin karebmangnyi nang tukwe dongon deyok

21:22-23

22Ura, Musa biryi sun Israel ninyi asi tubto ato ebmou, “Ninyi tentoka aryi er malyi dinyi kunuranci ura, din dinyi ikin karebkwandarur. Ba, anyi dibci ura, co ab laboka tabwe deblobkwandarur. 23Ba, anyi dibci ura, er tukwi ara a berekmaci lukunda nirya a deirlona mem! Eda, a dibmaci tum aryok tukwe dongobkwanung. A oboka lablobmanginyi bira Er Imtamnyi biryi submaci aryi kubmarura. Ati, Er Iya Erebdobnyi nun molonanyi biryi karebsou ba, nun mutuk kibsou mutuk si Kanaan dam aryi malyi kun dinyi beterdongona mem,” ebmou.

Currently Selected:

Ulangan Uram 21: MTG

Highlight

Copy

Compare