Ulangan Uram 20
20
“Ato-ato kuboka ninyi mar bobkwandarur,” en deyok
20:1-20
1Ura, Musa biryi sun Israel ninyi asi ato ebmou. “Sun ninyi mar boboka obdankwandum ai ara Er Iya Erebdobnyi nun molonanyi Mesir mutuk aryi bobdakde yanansounyi biryi sunsi milibkwansir. Ati, sun mar ordana nang kuda weik ab, kereta weik ab ati ilil kusina mem! Ani, mar ordan ninyi ilinto ab ati, ilil kusina mem! 2Ba, sun mar ordana ninyi ab ordana kabul talak ara Imtamnyi biti ninyi dama deirinanyi imam tentok biryi sun Israel yin doun nang urasin dam tingbici ura, ato ebkwandur. 3‘Israel ninyi kekendarur! Arub aryi nun mar ordana ninyi ab obdankundum. Ati, “Sun mar ordana nang asi una kuboka mar boboka obkub,” tenebokabmunci sun ilil kanya bobmunci, sirim talena mem! 4Sun ninyi mar bobkwamarum ara Er Iya Erebdobnyi nun molonanyi biryi sun tam kibokabdiryi, sunsi milibkwamasir. Milibokabsiriryi, sun mar ordana nang asi muna kirdongon dinyi sunsi karebkwamasir. Ba, sunsi muna kibdongobkwamarum,’ ebkwandur.
5Imam biryi sun Israel yin doun sien nang asi ato ebci ura, a yin doun sien nang aryi yin doun nang mer asi ato ebkwanung. ‘Sun kankan dam aryi, er ai ukuryok doboka bublan kum kukmariryok mar boboka, “Ninyi orbinkwayeb,” tenen ati, yanmaci ura, obingnyei ati atei tamuboka bindobdur! Ba, erci a bublan kum kukmaci ai yuk nang aryi bublan kukingnyei. 6Tonda, anggur wa iyanca kum kibmariryok yanmarinyi bira obingnyi ba, er iyanci anggur wa ara yuk nang aryi kiboka yibdobingnyei ati, tubto tamuboka atei bindobdur! 7Ani, tonda sun kankan dam aryi ner ukuryok dobkwanci ati sirya taknabdeianung. Ato kuamingnyi nang ara sun ab tonkwa ninyi mar boboka ibana mem! Eda, atei bindobkwandur. Ara, ato kuboka mar ibinmamunci, anyi obingnyi ba, er dobkwande eamingnyi ner yuk nang dobingnyi tenen ati atei bindobkwandur,’ ebkwanung. 8Ani, sun yin doun sien nang aryi, sun yin doun nang mer asi tubto ato ebmai, ‘Sun kankan dam unanyi biryi, “Ninyi mar boboka orbinkub se,” tenen kanya bona kumci, ilil kanya bon nang ara sun kwit yabwe yuk nang nirya ababyi a bobmaci kanya bobingnyei ati, atei tamuboka bindobdarur! 9Sun yin doun nang sun sien nang aryi, sun yin doun nang asi sirya ato ebingnyi ura, yin doun nang kalingni sien nang wibkwanung. Ara, 50 kalingnanyi yin doun nang ton, 100 kalingnanyi yin doun nang ton, 1.000 baryi kalingnanyi yin doun nang ton kiboka yuk-yuk wibkwanung.
10Ba, sunci mar bobinmamunyi atei dam sirya bimunyi ura, akatei ninyi asi, “Antanibdobkwayeb do?” eboka molobkwandarur! 11Ato eboka molobmunyi ba, “Yo antanibdobkwayeb,” ebokabsingiryi akatei weik bublan kukeibsingnyi ura, akatei ninyi nirya ara sun il wa dimni ninyi kibdeibkwandarur. Ba, sun arungni wa inkwansunung. 12Bok, akatei ninyi aryi, “Nun sun ab kum antanibkwayeb,” ebsingnyi ura, akatei ninyi ab mar boboka obdankwandarur! Ba, sun atei nirya asi warikdongobkwandarur! 13A warikdongoamunyi tok asi, Er Iya Erebdobnyi nun molonanyi biryi muna kibdongoboka ereron dinyi sunti karebkwansurur. Ba, sunci akatei sal ninyi nirya asi ya sekoka obkiribkwandarur! 14Ani, sun akatei ninyi nerabwe mer ab, nermabwe mabwe ab, bisam ab, akatei kuranci bona nirya ara arabdobkwandarur! Ara, Er Iya Erebdobnyi nun molonanyi biryi sunti karebmasici deyok aryi, ato kuboka arabdobkwandarur. 15Yana mutuk ninyi, sun mar boboka ordana mutuk ninyi asi, ato kubkwandarur. 16Bok, Er Iya Erebdobnyi nun molonanyi biryi sunti karebsou ba, sun mutuk kibsou mutuk si Kanaan kuramingnyi ninyi ara mitika ton tangdongordena kum uca, nirya obkabkwandarur! 17Er Iya Erebdobnyi nun molonanyi biryi ebdeibsou to kuboka sun nabaryi ninyi yala asi obkabkwandarur! Ara, Het yala ninyi ab, Amori yala ninyi ab, Kanaan yala ninyi ab asi obkabkwandarur! Ani, sun Feris yala ninyi ab, Hewi yala ninyi ab, Yebus yala ninyi ab asi obkabkwandarur! 18Ba, sun kwemdeina ati, kuramingnyi duknasito dinyi eterebsingnyei! Ba, Er Iya Erebdobnyi nun molonanyi urasin dam asi malyi kun dinyi betebdongobmunyei!
19Ba, Israel ninyi sunci mar boboka atei tentok asi uki weik bindoka warikoka arabdobkwamunyi ura, ato kubkwandarur. Akatei kuranci co ab, co du ab ara nirya kwemkana mem! Akatei kuranci co ara ninyi kuma ati, kwemkana mem! Eda, anda co du ara ur dakoka yibdobkwandarur. 20Bok, du kum mourande ba, ninyi kum yiraming co asi kwebkabkwandarur! Kwebokabmunci, sun mar ordana ninyi atei warikwamunyi ati, lika doboka aknabdongobkwandarur. Ba, akatei ninyi asi ato kuboka muna kibdongobkwandarur,’ ebkwanung,” ebmou.
Currently Selected:
Ulangan Uram 20: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
