Ulangan Uram 19

Teleb asa akwe kuron atei-atei deyok

19:1-13

1Ura, Musa biryi sun Israel ninyi asi tubto ato ebmou. “Er Iya Erebdobnyi nun molonanyi biryi sunti karebsou mutuk si Kanaan dam minob a kunung ninyi asi sirya obminikwande. Sirya obminikci ura, sun atei-atei babyi, sun ai-sun ai babyi nirya doboka arabdobkwandarur! 2Arabdobmunyi ura, sunci atei winiryi wibdeiboka Er Iya Erebdobnyi nun molonanyi kubkwanci ati karebkwandarur! 3Ato kuboka bokmunci, Er Iya Erebdobnyi nun molonanyi kunkwanci atei wiboka kiknibdeibkwandarur. 4Ara, teneboka kum kurongmunyi uca, sangkuna sun kwit yabwe obkwetebmunyi ura, a yuk wibdeibwe atei inirdarorbinkwandarur. 5Kiklin dinyi ara ato: sun ninyi bitinyi ya kala bobokabtiringci bai co kweboka yengbinkwamatiring. Ura, co kweboka yekwamatiringci, tonyi bira co kwemote. Uca, ya kala lukdonokoka er kwit ur tikmatunyi bisi ya sekte ba, dibmote. Ato kubdeibdamunyi ura, a sirya winiryi wibdeibwe atei bok, tentok atei yana mutuk atei asi inirdaroryankwandarur. 6Ato kubkwamamunyi ara, ‘A obmariba, dibmarinyi er tam nang aryi yu wekdiryi ya lukdonokmarinyi bisi dobkirikoka obingnyei,’ tenen ati ato kubdobkwandarur. 7A deyok aryi niryi sunsi, ‘Atei winiryi yuk wibdeibdarur,’ ebmasin. 8Ani, Er Iya Erebdobnyi nun molonanyi biryi nun abwe yabwe asi, ‘Sun mutuk tukwe weik kibdeibkwansin,’ ebdeiamwe to kubdeibsir. 9Ati a ebdeibman uram asi sunci diboka kunuboka, Er Iya Erebdobnyi nun molonanyi biryi, ‘Ukubdarur,’ ebdeibsou to kunuramunyi ura, Er Imtamnyi biryi tubto atei winiryi tabakdongobkwansir. 10Ba, Er Iya Erebdobnyi nun molonanyi biryi karebsou ba, sun mutuk kibdobdauci kundarur mutuk dam aryi sun malyi kuna kum nang ining sakcei! Sun malyi kuna kum nang ining a mutuk dam sakci ura, sun ikin takubdobkwandum.

11Bok, er kwit tonyi biryi tonyi bisi minob uca, ‘Li,’ teneranturyi obmatuba dibmote. Ba, a yuk wibdeiante atei inirdarorbinmote. 12Ato kubmote ura, sun akatei sien nang aryi er kwit obloboka inirdarorbinmatunyi bisi nabkwanung. Nabingnyi ura, er kwit obmaci ba, dibmaci tam nang taruk dam dobkarebkwanung. Ba, anyi bibabyi obingnyi ba, dibkwandur. 13Sunci sunsi boukwe bona mem! Sun Israel ninyi kankan aryi ato kuboka, sun malyi kun dinyi kunun ninyi asi obkabokabmunci, teleb asa akwe kubdoro binkwandarur,” ebmou.

“Tukwe wiliba ararbana mem,” en deyok

19:14

14Ura, Musa biryi sun Israel ninyi asi tukwe wiliba arardan deyok ati ato ebmou. “Er Iya Erebdobnyi, nun molonanyi biryi nun abwe yabwe ati, ‘Karebkwansin,’ ebdeiamwe mutuk si Kanaan dam wengbindoka sun mutuk kibdobmunci kubkwandum. A wengbindoka kubkwandum mutuk tukwe dam aryi, sun kwit yabwe tukwe wiliba dangbisina kumci, sun yuk-yuk kareansici to kuboka iboka yibde binkwandarur,” ebmou.

“Sun dinmangnyi ba, ukuamingnyi to liliboka nukwandarur,” ebdeibmou deyok

19:15-21

15Musa biryi sun Israel ninyi asi ato ebmou. “Sun kankan dam aryi, ninyi tentok aryi malyito dinyi kunubmaci asi, ninyi tentok aryi eibmariryi, ebde yanmaci dinyi ara, ‘Diba,’ ati kum ebkwandur. Eda, ninyi bitinyi kum, winiryi kum aryi, a malyi kun dinyi kunubmaci asi asing eibmangiryi ebnin yanmangnyi dinyi ara, ‘Dib ebmang,’ eboka uram sekwetebkwandarur.

16Ba, ninyi tentok aryi sangkuna tola ati tonyi bisi, ‘Obsinibtinyi,’ tenen ati malyi dinyi kunurum ebmote. 17Ato kubmote ura, a bitinyi nang nisin tum Er Iya Erebdobnyi urasin dam ab, Imtamnyi ai wa in nang urasin dam ab, malyi kubmangnyi nang deyok lilirdeirin nang urasin dam ab asi boyankwanung. 18Boyangnyi ura, malyi kun deyok lilin nang aryi diboka-diboka lilibkwanung. Lilinmangnyi uca, tonyi biryi tonyi bisi, ‘Obsinibtinyi,’ tenen ati ercok minibde yanmarur. 19Ato kubmaci ura, sun malyi deyok lilin nang aryi, tola ati ercok minibde yanmarinyi bisi, er a tola ati minibmaci to kikliboka, obkabkwandarur! 20Ato kubmunyi ba, sun yuk nang ababyi asing eibingiryi, sunbabyi, ‘Nai e, nunbabyi ukubsingnyei,’ tenebingiryi ato deyok aminda sun kankan dam aryi, ato kunubde bana kum kunkwanung. 21Ati, sunci anyi bisi boukwe kimna mem! Eda, er malyi kubmaci to kuboka ikin dinyi karebkwandarur. Ati, sun malyi kubmangnyi ninyi asi ato kuboka ikin karebkwandarurur. Ara, sun ninyi kam kun dinyi kum danabdeibmaci ura, erbabyi obkwandarur. Tonyi biryi asing tulukeibmaci ura, erbabyi asing tulubkabkwandarur. Tonyi biryi er kwit si kurukabmaci ura, erbabyi si kurukabkwandarur. Tonyi biryi er kwit bisi taruk bulakeibmaci ura, erbabyi taruk bulakabkwandarur. Tonyi biryi er kwit yan bulakeibmaci ura, erbabyi yan bulakabkwandarur,” ebmou.

Currently Selected:

Ulangan Uram 19: MTG

Highlight

Copy

Compare