Ulangan Uram 18

Sun Israel ninyi aryi imam nang ati yina sun yuk wiboka kareramnyi deyok

18:1-8

1Ura, Musa biryi sun Israel ninyi asi ato ebmou. Ara, “Sun Lewi yala nang kankan Imtamnyi biti ninyi dama deirin nang ab, sun Lewi yala ninyi nirya ab ara Israel yuk ninyi aryi mutuk tukwe yuk-yuk taleboka kuramingnyi to kum kubkwaming. Eda, Er Iya Erebdobnyi ai wa in nang kibkwaming. Ba, sun yiboka kubde binkwaming ara sun Israel ninyi aryi Er Imtamnyi biti bisam domba ab, yina-yina ab dama deiboka uk daryanmangnyi dinyi demang akwe yiboka kubde binkwaming. 2Er Iya Erebdobnyi biryi, ‘Lewi yala ninyi aryi sun tukwe taleninto ara Ni ai wa iya teleb wa in ninyi kibkwaming. Ba, sun kwit yabwe yuk Israel ninyi ara mutuk tukwe yuk-yuk talebkwaming,’ eamwe to kunuramnyi.

3Sun Israel ninyi aryi, domba bisam kum, sapi bisam kum oboka dama deiriryanmangnyi dinyi ara a bisam taruk ab, si kankanya bitinyi ab, mundu umbura kuranda deisu nirya langakmamunya ab ara sun Lewi yala nang ati karenkwandum. 4Tonda, gandum wa iamunya yuma kibmamunyi dinyi ab, co anggur du yuma dakmamunyi dinyi ab, co zaitun du aryi yingying en me yuma kiknibmamunyi dinyi ab, bisam domba otong yuma kukmamunyi dinyi ab ara sun Lewi yala nang ati karenkwandum. 5Sun Lewi yala ninyi ara nun Israel ninyi yala kankan dam aryi, Er Iya Erebdobnyi nun molonanyi biryi wiboka, Er ai wa in nang iya kibdeibwe. Ara, sun yaldangna odei-odei nirya Imtamnyi ai wa in nang akwe kibde binkwaming.

6Ani, sun Lewi yala ninyi aryi Israel mutuk aryok boka, dinatam atei-dinatam atei kuramingnyi ani, Er Iya Erebdobnyi biryi, ‘Nira a dikum asi kunkwan,’ eboka sirya wibdeibwe ai tiya yankwamanung. Ara, sun, ‘Kanya tentok bobokabingiryi Er Imtamnyi ai wa inkwan,’ tenebokabingiryi yankwamanung. A wibdeianci dikum tiya yanmangnyi ababyi, sun minob a kuramingnyi Lewi yala ninyi aryi Er Imtamnyi ai iramingnyi to kuboka sunbabyi yandoka ibkwanung. 7Ba, anyi bibabyi er yala nang aryi, Er Iya Erebdobnyi nun Molonubnyi ai wa iramingnyi to kuboka erbabyi tonkwa inkwanung. 8Ba, sun yina ara neikto akwe yinkwanung. Tonda, sun a nang ara yina yuk bisik aryi doramingnyi ababyi, sun a kuramunyi Lewi yala ninyi aryi doramunyi to kuboka sunbabyi donkwanung,” ebmou.

“Ato-ato dinyi ara kununa mem,” ebmou deyok

18:9-13

9Ura, Musa biryi sun Israel ninyi asi ato ebmou. Ara, “Nun Nai Iya Erebdobnyi, nun molonanyi biryi karebsou mutuk si Kanaan dam sirya wengbimunyi ura, sun minob a kuramingnyi ninyi aryi, iya malyi dinyi kuramingnyi to ara kununa mem! 10Ara, tola-tola ati, ‘Aminda ara ato dinyi kunubkwande,’ ena mem! Dibdob nang kanya asi asirdena mem! Ninyi kir dona mem! Sun mabwe nermabwe asi, yuk kwemdeina ati oboka uk dana mem! 11Ani, sunci ninyi din nang kanya sambal ab uram sisikoka, ‘Nunsi utotoa lak eterebnurum,’ eboka molona mem! Mirei bingdandinyi kum asi, ‘Utotoa karebsurum,’ eboka molona mem! 12Ati, sun a duknasito kuramingnyi ninyi ara Kanaan mutuk dam aryi Er Iya Erebdobnyi biryi yakdonokwande. A deyok aryi, sunbabyi a duknasito dinyi ara kununa mem! 13Ati, Er Iya Erebdobnyi, nun molonanyi urasintam aryi, ‘Li,’ tenerur dinyi kunubde bana mem! Eda, iya telebto dinyi akwe kunubde bankwandarur,” ebmou.

Er Imtamnyi biryi, “Ni uram ermurunanyi ton bokwetebkwansin,” ebdeibmou deyok

18:14-22

14Ura, Musa biryi sun Israel ninyi asi ato ebmou. Ara, “Sun wengbindoka kubkwandum mutuk si Kanaan mutuk dam minob a kunung ninyi ara dibdob nang kanya namna nang ab, suncok tola-tola ati, ‘Aminda ara ato dinyi kunubkwande,’ en nang ab ebingnyi tok kuboka kununung nang mutuk binkwandum. Ati, sunbabyi sun kunung to bindoka kunubmunyei. Ato kunung dinyi ara Nun Nai Iya Erebdobnyi biryi, ‘Ato kuna mem!’ ebsou. 15Sun kankan dam aryi, Er Iya Erebdobnyi, nun molonanyi biryi Er Imtamnyi uram ebdeibmaci to doboka sun dam eransinanyi ni Musa bitonyi nun karebkwansir. A karebkwansiranyi biryi ebkwansir uram asi diboka kekebkwandarur. 16Ara, Er Iya Erebdobnyi, nun Molonanyi bisi Horeb kon dam aryi ato eandau. ‘Er Iya Erebdobnyi, nun molonanyi uram ab, Er ilila uk buk ab ilinto kunmar ara nun dibibyei,’ eandau. 17Ato ebmandau ba, Er Iya Erebdobnyi biryi nisi ato ebmanou. ‘Sun Israel ninyi aryi ato ebmang ara diboka ebmang,’ ebmanou. 18Ani, tonda ato ebmanou, ‘Sun Israel ninyi kankan dam aryi, Musa kan kuruma atonyi nun asi, wiboka tentok tikeibkwan. Tikeibnyi ura, Ni uram ara er si bambul deici deibdongobnyi ba, erci Ni ebdeibmanyi uram boboka sun Israel ninyi kankan dam erbankwande. 19Ba, Ni Imtamnyi biryi a wibmaninyi biriman ebdeibmanyi uram kununa kum kubmarinyi bira er malyi kubmaci dinyi ati ikin karebkwan. 20Bok, yuk ninyi biryi Ni Imtamnyi uram ermurunanyi kibdandokabdiryi, Ni ebmanyi to kuboka ena kum uca, ercok dukoka ebkwande kum, yuk kwemdeina si ablakoka ebkwande kum ara anyi bira obkwan.

21Tonda, sangkuna ato tenebkwandarur. “A Imtamnyi uram ermurunanyi nabi biryi erur uram ara diba Er Iya Erebdobnyi biryi ebmaci to erur do? Ercok uram mengeboka erur do?” tenebkwandum. 22Ani, a nabi ara Er Imtamnyi si deici aryi ebmaci bok, sangkuna kununa kum kubci ara Er Imtamnyi biryi ena kum kubmaci bok, ercok dukoka ebmariryi. Ati, anyi biryi ercok dukoka ato enmaci uram ara lamlamak eboka dib tenena mem,’ ebmanou,” ebmou.

Currently Selected:

Ulangan Uram 18: MTG

Highlight

Copy

Compare