Ulangan Uram 17
17
1“Ani, sunci Er Iya Erebdobnyi biryi malyito tenerur bisam asi Erti dama deirbana mem! Ara, yan yok bulakanci bisam domba kum, sapi kum, u yiranci bisam kum asi Er Iya Erebdobnyi bisi dama deirbana mem!” ebmou.
“Yuk kwemdeina molon ninyi ara dibkwaming,” ebmou uram deyok
17:2-7
2Ura, Musa biryi sun Israel ninyi asi ato ebmou. “Sun Israel ninyi asi Er Iya Erebdobnyi biryi karebsou mutuk dam bindoka kubkwandum. A kuramunyi talak, sun kankan dam aryi sal kum, ner kum aryi, Er Iya Erebdobnyi yu wengna dinyi kunubmangnyi dinyi ab, Er uram ebdeibwe to kum kunubmangnyi ab, ara erbiramnyi tabwe koubdankwande. 3Ani, yuk kwemdeina asi kutam ikdongoboka moloramingnyi nang ab, kiting ab, wala ab asi moloramingnyi kum, kurya moloramingnyi kum, Ni Imtamnyi biryi mem ebdeibse uram asi kum bikanci kum! 4Asi sun kankan dam aryi bikmunyi ura, diboka lilibdemunci, asibdenkwandarur. Asibdemunyi ba, dib duknasito dinyi sun Israel ninyi kankan dam kunuramingnyi ura, 5a yuk kwemdeina moloranci ner kum, sal kum ara sun Israel ninyi kuramunyi weik atei aryi bai yakdonokwandarur. Yakdonokmunyi ura, keil doboka obmunyi ba, dibkwandur. 6Bok, a obkwamamunyi ara ninyi bitinyi kum, winiryi kum asing eibmangiryi, ‘Diba ati asing eibmobwe,’ ebingnyi ura, a, ‘Obkwamab,’ tenebmamunyi ner kum, sal kum ara ur obkwandarur. Bok, ninyi tentok aryi asing eibmariryi, ‘Diba ati asing eibmonwe,’ ebci ura, a, ‘Obkwamab,’ tenebmamunyi ner kum sal kum ara ona mem! 7A kwemdeina molobmaci ner kum, sal kum ara obkwandarur. A obkwamarinyi bira sun asing eibmangnyi nang aryi yuma keil donokoka obkwanung. Ura, sun Israel ninyi nirya keil donokoka obkwandarur. Ba, yu weik dinyi ara akiryi kilibkabkwandarur,” ebmou.
Weik malyi kun dinyi lilin uram deyok
17:8-13
8Musa biryi Israel ninyi asi ato ebmou, “Sun Israel ninyi teneboka obdanmangnyi kum, talyi obdanmangnyi kum, tonyi biryi dinyi aca ebmaribok, tonyi biryi ni dinyi eboka obdanmangnyi kum asi ninyi malyi kubmangnyi nang lilin nang si hakim aryi uram minob sekwetebman kum kubsici ura, sun Nai, Er Iya Erebdobnyi biryi wibdeibci mutuk dam bobinkwandarur. 9Ura, sun ninyi dama deirin nang si imam nang Lewi yala nang asi bobinkwandarur. Ani, sun a mutuk dam kuramingnyi nang ninyi malyi kubmangnyi ba, lilin nang si hakim nang dam bobimunyi ba, sunci tonkwa uram sekwetebkwanung. 10Ba, sun Israel ninyi aryi sun Lewi yala nang ab, ninyi malyi kubmangnyi ba, lilin nang si hakim ab aryi Er Iya Erebdobnyi biryi wibdeibci mutuk dam aryi uram sekwetebmangnyi to kuboka kunubkwandarur. 11Sunci kum kekeana ato kuboka u danguna mem! Eda, sun uram sekwetebmangnyi to kuboka u dikum deibmunci, kunubkwandarur. 12Bok, unanyi biryi sun Er Iya Erebdobnyi biti wa inung nang imam nang ab, ninyi malyi kubmangnyi ba, lilin nang si hakim ab aryi uram sekwetebmangnyi to kum kunubmarinyi bira obkabkwandarur. Ba, yu dinyi sun Israel ninyi kankan dam aryi kilibkabkwandarur. 13Ato kubmamunyi aryi Israel ninyi nirya eibingiryi, ilil kubkwande. Ani, imam nang aryi uram sekwetebmangnyi dinyi kekebingnyi, malyi tenena kumci ilil kubkwaming,” ebmou.
Weik atei sienyi biti yan memen uram deyok
17:14-20
14Musa biryi tubto Israel ninyi asi ato ebmou, “Sun Israel ninyi sirya Er Iya Erebdobnyi biryi karebsou mutuk wengbimunci, kubkwandum mutuk dam aryi ato ebkwandum, ‘Sun yuk atei nang weik sienyi kimnung to nunbabyi weik sienyi tikeibkwayeb,’ ebkwandum. 15Ura, Er Iya Erebdobnyi biryi wibci nang akwe asi wiboka weik sienyi tikeibkwandarur. Bok, yuk atei nang sun atei yandoka kuramingnyi nang ara weik sienyi wiboka tingdeirina mem! Eda, sun atei nang asi wiboka weik sienyi tikeibkwandarur. 16Ba, Er Iya Erebdobnyi biryi ato ebdeibsou, ‘Sunda Mesir mutuk tubto tamuboka bana mem!’ ebdeibsou. Ati, sun weik sienyi tikeibmamunyi nang ara bisam kuda ilinto winina mem! Ara, weik sienyi biryi sunsi, ‘Mesir mutuk tamuboka bisam dengbindarur,’ ebsicei. 17Ani, anyi bira nerabwe ilinto dona mem! Nerabwe ilinto doranci ura, Er Iya Erebdobnyi bisi luba kibcei. Tonda, dengna weik keil si emas ab perak ab ilinto bulubci ba, bona bonanyi kibcei. 18Ura, sirya wiboka tikeibmamunyi sienyi wa ibde baci ura, ato kubkwandarur. Kerek sengna nang asi arukci ba, ‘Yan memen uram ab, arungna uram ab, ukubdarur en uram ab Lewi yala nang aryi deibyi asi doboka yumkuna sekdarur,’ eboka arukwandur. 19Ba, sun Israel nang weik sienyi dam ara a kerek sengna iya er dam kubkwandur. Ba, a weik sienyi kubde bankwanca nirya ara a kerek sengna asi iya nukmuruboka talebnurubdiryi, Er Iya Erebdobnyi bisi ilil tenebkwandur. 20Ato kuboka nungmururanci ura, weik sienyi kanyi ara, ‘Nira telebtonyi kunun,’ eboka ererdana kum kubkwandur. Ani, erci u dina-dina deirdena kum uca u dikum demang deibdiryi, er yala akwe sun Israel ninyi kankan dam weik sien nang kibkwanung.” Ato eboka Musa biryi sun Israel ninyi asi uram ebkarebmou.
Currently Selected:
Ulangan Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
