Ulangan Uram 16
16
Weik li winiryi kwalina uram deyok
16:1-17
1Musa biryi Israel ninyi asi ato ebmou, “Sun anaboka yandau wala ara yuma wala si Abib wala dobmou ura, sun Nai Er Iya Erebdobnyi biryi sunsi lukunda Mesir mutuk dam aryi boyanansou. Ati, Abib wala dobci ura, sun kanyi teneibdeboka weik kwalina si Paskah nun Nai Iya Erebdobnyi biti kwalibkwandarur. 2Ba, sunci bisam lembu sapi ab, kwaning domba ab oboka Er Iya Erebdobnyi biti dama deibkwandarur. A dama deibkwamamunyi ura, Er Imtamnyi biryi sirya wibdeibci mutuk asi bobindoka deibkwandarur. 3Sun lukdandoka ilil asa Mesir mutuk dam aryi anabdoandau ati, uki tabaryi bungbung en keica dongona kum roti kwaning yibkwandarur. Ba, a roti kwaning si ara mambul weik don kwaning ebkwandarur. Bok, bungbung en dinyi dongon roti kwaning ara yina mem! Ato kubmunyi ura, sun kubmurubde binkwanduma nirya ara sun Mesir mutuk aryi anaboka yanandau uki iya bikwandum. 4Uki tabaryi ara roti kwaning bungbung en keica si ragi ara sun ai umbura dam deirina mem! Ba, yuma lukunda obmamunyi bisam ara deibmamunyi ani, belekuna yina mem! Eda, a lukunda aryok nirya a obmamunyi bisam nirya yibkwandarur. 5Ba, weik kwalina si Paskah tum bisam obkwamamumnyi ura, Er Iya Erebdobnyi biryi wimna kum kuanci mutuk bobindoka ona mem! 6Eda, Er Iya Erebdobnyi biryi Ni si ara a mutuk weik atei kubkwande ebdeianci mutuk asi bobindoka dama deibmunyi ura, obkwandarur. Ba, sun Mesir mutuk aryi kiting wengbau bok anabdoandau ati, sunci bisam dama deibkwamamunyi ura, kiting wengdongoci bok dama deibkwandarur. 7Ba, a bisam ara Er Iya Erebdobnyi biryi wibdeianci mutuk dam asi yuboka yibkwandarur. Ba, ambutum belekuna ara sun tiya kuna atei keis ol ai dam yuk-yuk binkwandarur. 8Uki nabaryi ara sun roti kwaning bungbung ena dongona kum roti kwaning yibkwandarur. Bok, uki tabaryi tum berekci ura, sunci mitik wa irdena mem! Eda, sun neika buluboka Er Iya Erebdobnyi bisi si weik ebkwandarur,” ebmou.
9Musa biryi Israel ninyi asi tubto ato ebmou. “Gandum du yuma ya sekoka dakmamunyi tum aryi nungnamunyi tok ani, minggu tabaryi kubmunyi ura, weik li Hari Raya Tujuh Minggu kwalibkwandarur. 10Ura, Er Iya Erebdobnyi biti ur dem dama deibkwandarur. Ara, Er Imtamnyi biryi kareransici yina sun taruk dam kubmaci to dama deibkwandarur. 11Ura, Er Iya Erebdobnyi biryi, ‘Ni si ara a mutuk kubkwande,’ ebdeibci mutuk dam asi, sun ab, sun mabwe nermabwe ab, sun wa irmilisin nang ab, sun wa irmilisin nerabwe ab, Lewi yala nang ab, yuk atei ninyi sun atei yandoka bukmarinyi ab, kwaknamna mabwe nermabwe ab, sulyi nerabwe ab nirya buluboka Er Imtamnyi bisi si weik ebkwandarur. 12Sun kanyi teneibdendarur, minob ura sunda Mesir mutuk nang aryi arungnansei ba, il weik dorandau. Ati, niryi, ‘Ukubkwandarur,’ ebdeibman uram asi kunubde binkwandarur.” Ato eboka Musa biryi Israel ninyi asi uram ebkarebmou.
13Musa biryi Israel ninyi asi ato ebmou, “Sunci gandum du nirya dakoka sirya yalyi kwebmunyi ura, tiya ati durubdeiboka kun ai doramnyi to ati, teneibdeboka uk tabaryi nirya li dobkwandarur. Ara, weik li si Hari Raya Pondok Daun kwalibkwandarur. 14Ura, sun kanya teleb asa aryi sun ab, sun mabwe nermabwe ab, sun wa irmilisin nang ton, sun wa irmilisin nerabwe ton, Lewi yala nang ab, yuk atei ninyi sun atei yandoka bukmarinyi ab, kwaknamna mabwe nermabwe ab, sulyi nerabwe ab nirya buluboka li dobkwandarur. 15Uki tabaryi nirya Er Imtamnyi bisi si weik ebkwandarur. A si weik ebkwamamunyi mutuk ara Er Iya Erebdobnyi biryi, ‘Ni si ara a mutuk kubkwande,’ ebdeibci mutuk dam asi kubkwandarur. Ba, sun wa ibde binkwanduma ab, sun kouryina nirya ab ara Er Imtamnyi biryi kisal dakwansir. Ba, sunci Er Iya Erebdobnyi bisi kanyi deiboka si weik ebkwandum.
16Ba, sun Israel sal nang ara kwalina tentok bok liki winiryi Er Iya Erebdobnyi bisi Er wibdeianci mutuk bindoka Ersi molobkwandarur. A molobkwandum ara bungbung ena dongona kum kwaning roti uki si Hari Raya Roti Tidak Beragi ati molobkwandum. Tonda, sun kouryina kibmamunyi dinyi si Hari Raya Tujuh Minggu ati molobkwandum. Tonda, tiya durubdeiboka mabde yanandau atei si hari Raya Pondok Daun ati teneibdeboka molobkwandum. Eda, nong dem akwe aryi akatei bindoka molona mem. 17Ba, sun yuk-yuk Er Iya Erebdobnyi biryi yina kareransicito bobmunyi ura, Erti dama deirbinkwandarur,” ebmou.
Malyi kubmangnyi ba, diboka lilin uram deyok
16:18-20
18Musa biryi Israel ninyi asi ato ebmou. “Er Iya Erebdobnyi nun molonubnyi biryi karebsou weik atei-weik atei kubkwandum ara ninyi malyi kubman ba, lilin nang si hakim yala yuk-yuk wibkwandarur. Ba, sunci malyi kubmangnyi nang asi diboka lilibkwanung. 19Ba, sunci malyi kun dinyi lilinkwamangnyi ura, ninyi urasin meiboka uram sekweteboka dangum-dangum ena mem! Bona deksingyi ura, dorona mem! A bona dobmangnyi ura, sun etekdob bingna ab, diboka lilin dinyi ab ara siklibsinibkwande. Ba, diboka enmarinyi bisi malyi kibsinibkwaming. 20Sunci diboka akwe lilibkwandarur. Ba, sun kam kubmunci, Er Iya Erebdobnyi biryi karebsou mutuk wengbindoka kubkwandum.” Ato eboka Musa biryi Israel ninyi asi ebkarebmou.
Yuk kwemdeina molon deyok ab, bisam yan bulakanci ba, dama deirirban uram deyok ab
16:21–17:1
21Ura, Musa biryi sun Israel ninyi asi ato ebmou, “Sun Israel ninyi aryi Er Iya Erebdobnyi biti bisam dama deiboka uk dan keil lamna doamunyi dam asi yuk kwemdeina molon co kouboka molona mem! 22Ani, Er Iya Erebdobnyi biryi duknasi tenerurci li tenerur kwemdeina kiknibdeiboka molona mem!” ebmou.
Currently Selected:
Ulangan Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
