Ulangan Uram 15

“Kwalina uki tabaryi kubci ura, bona borloramunyi dinyi unubkwandarur,” ebwe uram deyok

15:1-11

1Musa biryi Israel ninyi asi ato ebmou, “Kwalina uki tabaryi dinyi sirya kwalibkwamamunyi talak ara sunci yuk nang bona bobloamunyi bona unun li dobkwandarur. 2Ara, ato kuboka unubkwandarur. Sun Israel ninyi mamun bona boblobdanamunyi ura, a uki tum aryi olong unubkwandarur. Ato kubmamunyi ura, Er Iya Erebdobnyi biryi arukmasici to kubmandarur. Asi kum unuamunyi ura, bona dam nang aryi, ‘Olong unubsindarur,’ ebsingnyei. 3Yuk atei nang aryi bona bobloansingnyi ura, ‘Olong unubnurum,’ ebkwandarur. Bok, sun Israel ninyi mamun bona boblobdanamunyi ara, ‘Olong unubnurum,’ ena mem! 4Sun ato kubmunyi ura, Er Iya Erebdobnyi biryi karebsou mutuk kubkwandum. Ba, Erci kisal dakwansir deyok aryi sun a mutuk kubkwandum ara ukutotoa kum nang ton kum kubkwandum. 5Bok, Er Iya Erebdobnyi bisi dib tenebmunci, niryi yan memen uram ab, arungna uram ab arub a ebdeibne uram asi diboka kunubkwandarur. 6Ba, Er Iya Erebdobnyi biryi kisal dakwansin ebdeibwe to kunubsici ura, sunci yuk atei nang asi aminda tamubkarebkwankici bona ilinto ur karebkwandarur. Bok, sun Israel ninyi yuk atei nang asi tamurkarerdan bona kum molobkwandum. Ani, sun Israel ninyi aryi yuk atei-yuk atei nirya talebkwandum. Bok, sun yuk atei aryi sunsi ton kum talebkwansing.

7Ba, sun Er Iya Erebdobnyi biryi ebdeibsou mutuk wengbindoka kubkwandum. A talak aryi sun yala bok, bona bon kum ninyi kuramingnyi ura, sun bona bon ninyi aryi erebdandoka sun bona bon kum ninyi eboka te murungdona mem! 8Eda sun te lakoka bona bon kum ninyi asi kanya teleb asa aryi aminda tamubkarebkwansingnyi bona sun molobmangnyi to kuboka karebkwandarur. 9Bok, sunci bona molobmarinyi dam asi ato ena mem! ‘Bona tamurkarerdan kwalina uki sirya dam kibmar ati kanti kum karebkwankin,’ ena mem! Ato eboka bona kum karebmunyi ura, sun kwit yabwe kanya u yibsinibkwandum. Ura, erci Er Iya Erebdobnyi bisi sun bona kum karebmamunyi dinyi ati molobkwande. Ba, sunda malyito kunun nang kibkwandum. 10Sun kanya luknubdongoboka teleb asa aryi karebkwandarur. Ba, Er Iya Erebdobnyi biryi sun wa ibmunyi dinyi nirya kisal dakwansir. 11Ba, sun Israel ninyi kuramunyi kankan ara ukutotoa talena kum ninyi iya ton kubkwaming. A deyok aryi Niryi ato kuboka arukmasin. Sun kwit yabwe bona molobmangnyi bok, kanya dararongna mem! Eda, sun kwit yabwe asi kanya loblobkwandarur,” ebmou.

“Sun neik yala bok Ibrani ninyi, sun wa iramingnyi ner ab sal ab asi, uki kwalina tabaryi ato ukubkwandarur,” ebmou uram deyok

15:12-18

(Kel. 21:1-11; Im. 25:39-46)

12Musa biryi Israel ninyi asi ato ebmou, “Sun atei nang bok, Ibrani yala sal kum, ner kum aryi bona bobloandiryi sun atei yaci ura, kwalina uki nabaryi sun ai wa in ner kum, sal kum kibkwandarur. Bok, kwalina uki tabaryi dinyi sirya kimbici ura, a ner kum, sal kum ara sun ai wa irmiliransici dinyi ara lobdeibkwandarur. 13Ba, sun ai wa iranci ner kum, sal kum bindobkwamaci ura, nong demang barona mem! 14Eda, sun kanyi teleb asa aryi sun Nai, Er Iya Erebdobnyi biryi kisal dakoka kareransici bisam domba ab, kambing ab, gandum du ab, anggur du yung ab karebkwandarur. 15Sun kanyi teneibdenkwandarur, minob ura sunda Mesir mutuk aryi il dimna nang kuboka mambul weik dorandau bok, Er Iya Erebdobnyi biryi leboka a mutuk dam boyasou. A deyok aryi arub niryi, ‘Ato ukubdarur,’ eboka arukmasin. 16Bok, sun ai wa irmilin ner kum, sal kum aryi, ‘Ni sun ai ninyi asi kanya deibsise ati ni kum bindobkwan,’ ebci ura, ato kubkwandarur: 17A ner kum, sal kum ara sun bisik bublan dam tingdeiriryamunyi ura, amol libtaleboka yumci aryi lukdongobkwandarur. Ba, iya sun ai wa irmilin ner kum sal kum kibkwandur. 18Kwalina uki nabaryi sun ai wa irmilisin ner kum, sal kum kiamunyi ani, lobdongobmunyi ba, bindobci ati sun kanya se teneboka mambul kanyi bona mem! Ara, erci uki kwalina nabaryi il weik bitinyi takubdobninto kubwe. Ba, sun ai ilingkwanci ati dekamunyi dinyi ara mitik. Sun Israel ninyi aryi ni a ebdeibmasin to kunuramunyi ura, Er Iya Erebdobnyi biryi wa ibde binkwanduma nirya kisal dakmurubkwansir.” Ato eboka Musa biryi Israel ninyi asi uram ebkarebmou.

Yuma deianci bisam deyok

15:19-23

19Musa biryi Israel ninyi asi ato ebmou, “Yuma deianci bisam lembu sapi mi kum, bisam kambing domba mi kum ara Er Iya Erebdobnyi bisi dama deibkwandarur. Ba, a bisam sapi ara tukwe kurungna bisam kimna mem! Ani, domba ara otong kungna mem! 20A bisam ara sun ai ninyi nirya Er Iya Erebdobnyi biryi wibdeibci, mutuk dam bobindoka Er Imtamnyi urasin dam yibkwandarur. Ara, weik li kwalibde bankwanduma nirya ukubmurubde bankwandum. 21Bok, yan bulakanci bisam kum, asing kuanci bisam kum, mata walili eranci bisam kum ara Er Iya Erebdobnyi biti dama deirina mem! 22Eda, sun kun atei dam ur oboka yibkwandarur. Ara, betebdongobdanmangnyi ninyi ab, beterdongordana kum ninyi ab ur talyi yibkwandarur. Ara, bisam rusa ab, bisam kijang ab ur yirandum to kuboka yibkwandarur. 23Bok, bisam ining ara yina mem! Eda tukwetam diklobkwandarur,” ebmou.

Currently Selected:

Ulangan Uram 15: MTG

Highlight

Copy

Compare