Ulangan Uram 11

Er Iya Erebdobnyi biryi ilil tenen dinyi karesurur uram deyok

11:1-7

1Musa biryi Israel ninyi asi ato ebmou, “Er Iya Erebdobnyi bisi kanyi deibmunci, Erci, ‘Ukubdarur-ukuna mem,’ en uram ab, yan memen uram ab, arungni uram ab karebsou asi diboka talebnurubkwandarur. 2Niryi a enmasin uram ara sun nirya bikdau. Sun mabwe ara kum bikyi, eda sun a yangandarur ninyi nirya ara Er Imtamnyi biryi ilil tenen dinyi ab, Er mikib ab, Er kalingna ab ara eiboka bingdarur. 3Er Iya Erebdobnyi biryi Mesir mutuk sienyi Firaun dam ab, Mesir mutuk dam ab asi ilil tenen dinyi kubdeiamwe ara sun asing aryi eibdau. 4Ba, Er Iya Erebdobnyi biryi Mesir atei yin doun nang ab, ninyi bon bisam kuda ab asi ilila me Teberau dingibwe dam dongobdongobwe. A dongobwe ara, ‘Sun Israel ninyi asi obkwayeb,’ tenen kunmasei bok, me dongobwe ba, sun kam kuna kumci dibyi. 5Tonda, sun a mutuk yangana kum kubmandau talak yini mutuk dam aryi Er Imtamnyi biryi kubwe dinyi ara bikdau. 6Sunbabyi bikdau ara Er Iya Erebdobnyi biryi Ruben yalanya Eliab mabwe Datan ab, Abiram ab kuramnyi mutuk asi dilikoka sun bitinyi ab, sun nerabwe ab, sun mabwe nermabwe ab, sun atei ab nirya boboka wekamwe. A kuamwe to ara sunbabyi nirya eiandau. 7Ba, Er Iya Erebdobnyi biryi ilil tenen dinyi kubde yangaramwa ara sun asing aryi nirya eiandau,” ebmou.

Er Iya Erebdobnyi biryi ebdeibwe to kunurandinyi bira kisal dakwande. Ba, Er uram kum kunurandinyi bira subkwande deyok

11:8-32

8Musa biryi Israel ninyi asi ato ebmou, “Arub aryi sun Israel ninyi asi, niryi, ‘Ukubdarur-ukuna mem,’ ebman uram asi diboka talebnurubkwandarur. Ura, sun katabum eboka sun wengbinkwandum mutuk bindoka kubkwandum. 9Ba, Er Iya Erebdobnyi biryi sun abwe yabwe dam asi minob dib uram aryi uram talak ebdeiamwe mutuk sul ilinto mutuk wengbindoka ani, wau loboka dibkwandum. 10Sun wengbindoka kubkwandum mutuk ara Mesir mutuk aryi kurandau to kum kubkwandum. A kurandau to ara yina koubkwaman ura, me dikoka il weik dobnaryok kourandau. 11Bok, sunci lu ilinto mutuk ab, konkon ilinto mutuk dam ab bindoka kubkwandum, Ani, a mutuk ara mo cebmaci ababyi olong me ceron mutuk asi bunkwandum. 12Er Iya Erebdobnyi biryi a mutuk dam asi kalingdur. Erci yuma kikniamwe akiryi kuboka sirya kurbinkwande uki nirya iya diblilibkwande mutuk.

13Ati, niryi arub a ebsin uram asi iya kunubde baramunyi ura, sun kanyi ab, sun nong nirya Er Iya Erebdobnyi bisi kanyi deibkwandarur. 14Ato kuramunyi ura, Er Imtamnyi biryi gandum du yuma koubmamunyi tum mo karebkwansir. Ani, sirya kibmunyi tum ababyi mo karebkwansir. Ba, sun gandum du ab, anggur du ab, minyak zaitun ab ilinto kubkwansir. 15Tonda, sun bisam yabwe ati lukluk en sungsunga karebkwansir. Ani, sun kubkwanduma mutuk ara kwaning ab, yuk yina ab atana kum kubkwansir, eda boun asa kubkwandum. 16Ati, sun Israel ninyi diboka kalikdandarur. Ara, sunci Er Iya Erebdobnyi bisi luba kibmunci, yuk kwemdeina molobmunyei. 17Ato kubmamunyi ura, Er Iya Erebdobnyi yu wekoka im tirikdongobkwande. Ba, mo cemna kum kubdiryi, sun koubkwandum yina nirya kum abkwande. Ba, sunsi Er Imtamnyi biryi mutuk teleb karebsou mutuk dam aryi kwaning atana deyok aryi ola dibsekwandum. 18Bok, a ebman uram ara sun kanya dam ab, sun nong dam ab deibkwandarur. Ani, a uram ara sekokabmunci, sun toubna dam ab, sun asok dam ab ongoramunyi deici asi kikiboka bobkwandarur. 19Ani, ‘Ato-ato kubkwandarur,’ ebmasin uram ara sunci sun mabwe asi tuba-tuba eterebkwandarur. Ara, ai umbura bukmamunyi dikum babyi, bisik dam yibanmamunyi dikum babyi, mabmamunyi dikum babyi, bukokmunyi dikum babyi nirya eterenkwandarur. 20Ani, a uram ara sun bisik wengban dam abyokomna ab, atei bisik wengyangan bublan ab asi sekdongobkwandarur. 21Ba, sun ab sun mabwe nermabwe ab ara Er Iya Erebdobnyi biryi sun abwe yabwe dam asi, uram talak ebdeiamwe mutuk dam kubmunci, wau loboka dibkwandum. Ani, im ab tukwe ab kuanci to sunbabyi a mutuk dam iya kubkwandum.

22Ati, sunci ni ebman uram asi diboka talebnurubmunci, ato kubkwandarur. Er Iya Erebdobnyi bisi kanyi deibmunci. Er uram ebdeiburyi, ‘Ato kuboka kunubkwandarur,’ ebdeibwe to kuboka kunubkwandarur. 23Ato kubmunyi ura, Er Iya Erebdobnyi biryi sun kankan dam aryi Kanaan kunung ninyi nirya yakdonokwande. Ba, mikib ilinto ninyi ab, nong ilila ninyi ab nirya yakci ura, sun mutuk kiboka kubkwandum. 24Ba, sun Israel ninyi yanibde yandau mutuk nirya ara sun mutuk kibkwandum. A mutuk ara yini mutuk me youkwetam aryi kuboka me utam Libanon mutuk kon ab, Efrat me yaletam aryi kuboka kitingbantam ilila me laut dingibwa mutuk nirya ara sun dinyi kibkwandum. 25Ba, Er Iya Erebdobnyi biryi uram talak ebdeibsou to kubkwande. Ara, ato, ‘Sun yan yanibde yandau mutuk kunung ninyi ab, yan yanibde binkwandum mutuk ninyi ab asi sun Israel ninyi ati ilil kuboka sirim kibsinibkwande. Ba, sunci sunsi ton kum duboka iyankwansing,’ ebdeibsou.

26Arub aryi sunci wibdarur. Ara, kisal dangna dinyi wibkwandum kum? Sumna dinyi wibkwandum kum? 27Niryi arub aryi Er Iya Erebdobnyi ebdeibwe uram yan memen uram ab, ukubdarur en uram ab, arungna uram ab ebdeibmasin to asi kekebmunci, kunubkwandum ara kisal dangni dinyi dobdobkwandum. 28Bok, Niryi arub aryi Er Iya Erebdobnyi ebdeibwe uram yan memen uram ab, ‘Ukubdarur,’ en uram ab, arungna uram ab ebdeibmasin to asi kum kekebmunci, yuk kwemdeina molobkwandum ara sumna dinyi dobdobkwandum.

29Ba, Er Iya Erebdobnyi biryi bobaransici ani, Erci ebdeibsou mutuk wengbimunyi ura, kisal dangni dinyi ara Gerizim mutuk kon dam aryi nukwandarur. Ba, sumna dinyi ara Ebal mutuk kon dam nukwandarur. 30A mutuk kon bitinyi ara eratoto kitingbantam kuboka bukdei. Ara, Kanaan nang me Yordan kouboka otam mutuk lu kunung dam asi bukdei. Ba, a mutuk ara yana mutuk bukde bana kum eda dam, bok weik atei Gilgal mutuk asi co si tarbantin ilinto tingdur dam mutuk More bukde biu mutuk dam. 31Ati, sunda uki kum uca me Yordan kouboka Er Iya Erebdobnyi biryi ebdeibsou mutuk wengbinkundum. Sirya wengbindoka kubmunyi ura, ato kubkwandarur. 32Sunci busul asa yan memen uram ab, arungni uram ab, ukubdarur en uram ab, Niryi arub a ebdeibmasin to akwe kunubkwandarur.” Ato eboka Musa biryi Israel ninyi asi nukarebmou.

Currently Selected:

Ulangan Uram 11: MTG

Highlight

Copy

Compare