Daniel Uram 9
9
Daniel biryi er atei nang Israel nang ati Imtamnyi bisi molobliknibmou deyok
9:1-19
1Media mutuknyi si Darius biryi weik sienyi kibmou. Anyi Darius, er nai bira Ahasyweros kuramwe. Ura, Darius biryi Babel mutuk weik sienyi kiboka talebmou kwalina, yuma kwalibmai. 2Ba, a talak aryi ni Daniel biryi Er Iya Erebdobnyi uram minob kerek sekoka deiamnyi dinyi ab, kwalina kwalibde yanamyi talak ab a nirya asi dakeiboka nungnanse. Uca, Imtamnyi uram ermurunanyi Yeremia biryi kerek sekamwe uram asi eibmase ara ato, “Yerusalem atei a dalubloamingnyi tok asi kwalina yubwa 70 baryi kwalibkwaming,” eboka kerek sekamwe asi asing eibmase.
3Ura, niryi kwaning si teboka, tukwe borbosa lubdandoka, malyito ongon aling aryi akubdandoka engebde buranse. Ani, ni Nai Imtamnyi, Er Iya Erebdobnyi bisi imtam dibweleboka aryi ni malyi kun dinyi lak eboka molobmase. 4Ato molobmase, “Nai, Imtam Weik Sienyi kurumnyi, Kanci ilil tenen dinyi kiknirandimnyi kurur. Kanda, Kansi kanyi deiboka kan uram kunuraming nang ara, ‘Ukubkwan,’ eaminyi tok kunurandimci, tuba boukwe kimdumnyi kurum. 5Nunci, malyi dinyi kunuboka, Imtamnyi Kan uram kekena kum nang ato kuboka, Kan uram yan yanikunub. 6Ani, Kanci, Kan wa in nang, Kan uram ermurun nang nabi nang deici aryi uram erdeirisurum ba, nunci kununa kum kunub. A uram Kan si deici Kan uram ermurun nang aryi nun mutuk weik sien nang babyi, nun kalingnansing nang babyi, nun nai yabwe babyi, nun talyi nang nirya ab asi eteresunung. Bok, a ebmasingnyi uram kununa kum kunub. 7Nai Imtamnyi, Kanda iya dibnyi kobdob kurum. Eda, nunci kansi malyito kurdongokunub ara nun alyi dangdana kikiman nang kunub. Arub ababyi alyi dakdanmab. Ara, Kanci, Yehuda yala nang babyi, Yerusalem atei yoka nang babyi, Israel nang era mutuk nang babyi, dam mutuk nang babyi nirya Kanci bai donokmarim ba, da yuk mutuk binsekmang. Ara, Kan uram kekeboka kununa taklobyi deyok aryi bai donokmarim. 8Nai Iya Erebdobnyi e, Kan uram kununa kum uca dangbisinub. Ara, nunbabyi, nun weik sien nang babyi, nun kalingnansing nang babyi, nun nai yabwe babyi ara alyi dangdana kikiman nang kunub. 9Ati, nun Nai Imtamnyi. Kanda ninyi boukwe kimnanyi kurum. Nun ninyi aryi Kan uram kununa kum nang ababyi asi liliboka wenena kum uca limdorandimnyi kurum deyok aryi nunsi libdobsurum. 10Ara, nun Nai Iya Erebdobnyi, Kanci Kan wa in nang, Kan uram ermurun nang nabi nang liknibdongoboka, ‘Ato kubdarur-ato kuna mem,’ eboka yan memesurum uca, nunci kununa kum kunub. 11Nun Israel nang nirya aryi Kanci, ‘Ukubdarur-ukuna mem,’ ebumwe dinyi nirya kekena kum uca, dakbisiboka kununa kum kunub. Ati, Nai Kanci, Kan wa inanyi Musa biryi kerek sekamwe to kunuboka sumna dinyi ab, ‘Obkwansin,’ eamoumwe dinyi ab ur da suboka obsurum. 12Ani, Nai Kanci, nun ab, nun kalingsunung nang ab asi Kan uram minob ebdeiansoumwe. Ara, ato eamoumwe, ‘Yerusalem atei asi wenebkwan dinyi ara weiktoto wenebkwan.’ A ebdeiansoumwe dinyi Kanci sirya kunuboka wenebmasirim. Ato ara yuk-yuk atei im dangna tukwe dangna nirya ara ato dinyi ton ukubde wenena kum kunung to asi wenebmasirim. 13Musa kerek sengna umbura aryi, ‘Ukubdarur-ukuna mem,’ eboka kerek sekmou to kununa kum kunub deyok aryi nunsi ikin dinyi dakoka taikeibmasirim. Bok, nunci nun Nai Kansi, ‘Nun malyi dinyi libdobsurum,’ eboka molorona kum kunub. Ani, nunci tubto tamuboka kan ebumwe bisik kunurona kum kunub. 14A deyok aryi Nai Iya Erebdobnyi, Kanci nunsi obsinibmanto dinyi kiknibdeiaminyi aryi nunsi ikin kareboka wenesurum. Ato kuransirim ara Kanda nun Nai, Iya Erebdobnyi kurum aryi dib nun kunubmabyi to akwe liliboka weneransirim. Bok, nunci Kan uram ara kekena kum kunub. 15Ati, nun Nai, Iya Erebdobnyi, Kanci nun Kan mabwe asi Mesir mutuk dam aryi taruk mikib asa aryi taruk taleboka boyanansumwe. Kanci a boyanansumwe dinyi ara nunci Kan si weik eboka tuba teneirinub bok, Kan uram ara kum bikana ato kuboka, arub ababyi kan uram dangbisinmab. 16Se, Nai Imtamnyi, Kanci nunsi boukwe kimdansirim to boukwe kibsurum. Nun malyi kun dinyi ab, nun nai yabwe malyi kuramnyi dinyi ab deyok aryi Kan atei Yerusalem malyi kun dinyi beterdongona mem atei ab, kan mabwe ab asi ikin dinyi kareboka wenesina ara taksurum. Kanci nun Kan mabwe ab, Kan mabwe atei ab asi ormingna dinyi karebsiminyi ura, yuk nang aryi, ‘Imtamnyi bira Er atei ab, Er mabwe ab diboka kalingna kum kururci, orminingdur,’ ebkingnyei. 17Ati, Nai Imtamnyi, ni Kan wa irmilinanyi biryi Kansi molobkwinkin dinyi kekeboka kunubdeibnurum. Nai, Kan sinarya milil aryi Kan atei daklobyi dikum asi milil arabdeiboka bitabdeibdum. Ba, yuk nang aryi, ‘Er Imtamnyi dib kurur,’ tenebkwanking. 18Nunci Kansi molokunub ara nun teleb dinyi kunub deyok aryi kum molokunub. Eda, Kanci nunsi boukwe tuba kuransirim deyok aryi Kansi molokunub. Ati, Nai Imtam kurumnyi, kan amol takeiboka nun molona kekesina teleb. Kanci asing ababyi biti dirlilisina teleb. Nun ab, Kan si deici aryi donub atei Yerusalem atei ab asi dakabokyi ara Kan asing dibdeboka boukwe kimsina teleb. 19Se, Nai Imtamnyi, nun molona kekebsurum se! Se, Nai Imtamnyi, nun malyi kunun dinyi libdobsurum se! Nai e, ukurlosina mem se, nunsi ola lebdobsurum e! Kanda nun Nai kobdoba kurum. Ati, Yerusalem atei ab, nun Kan mabwe ab ara Kan ai kobdoba ab, Kan mabwe kobdoba ab kunub ati ola lebdeibsurum!” eboka molobmou.
Imtamnyi uram eryuryangananyi si Gabriel Daniel dam yanmou deyok
9:20-27
20Nira Imtamnyi bisi ni malyi kun dinyi ab, ni atei nang Israel nang sun malyi kun dinyi ab, Er Imtamnyi atei Yerusalem ab ati tuba molobde buranse. 21Ukuboka buranse uca, Imtamnyi uram eryuryangananyi malaikat si Gabriel ol lamlam eboka ola nun ni bukmase dam yanmou. Anyi bira minob kunumna kunubdeianounyi bikwe yanmou. A talak ara sintam aryi Imtamnyi biti ninyi dama deiriramnyi talak kubmou talak aryi yanmou. 22Ura, erci nisi yandoka eterenouci, ato ebmou, “Daniel, ni arub kan dam a yan ara kansi bingdon dinyi etereryanmakin. 23Kanci Imtamnyi bisi molorabumwe talak aryi, Imtamnyi uram kanti ebdeibmakir to ati kansi eryanmakin. Kanda Er kanyi deibkounyi kurum ati, Er uram asi diboka bingdonkwandum. Ani, kansi kunumna asing eirirum to diboka liliboka bikwandum.
24Kwalina yubwa o kwali-o kwali baramingnyi asi 70 baryi kwalibingnyi ura, koubne tentok kiboka nukwaming. Ani, tubto nukaliboka kwalina nukde baramingnyi ani, tubto 70 baryi kwalibingnyi ura, koubne bitinyi kwalibkwaming. Ato akwe kuboka nukde baramingnyi asi kwalina liki koubne tabaryi kwalibkwaming. A uki ara Er Imtamnyi biryi minob ukuboka kiknibdeibwe. A talak kimci ura, kan atei nang Israel nang ab, kan atei Er Imtamnyi ai doamnyi atei Yerusalem atei ab asi libdobkwande. A talak aryi sun malyi kundarur dinyi libdobkwansir. Ba, tonda sun malyi dinyi liliboka wenebsici ura, kilibkwansir. Ato kubdeibsici ura, sun kunumna deici asing eirindarur dinyi ab, aminda ukubkwande eboka minob lak erandum dinyi ab ara, a talak aryi lak kiboka kunubkwande. Ani, Er Imtamnyi ai ara, a talak aryi malyi dinyi kiliboka bitabdeibci ura, tubto Er Imtamnyi molon ai kibdeibkwande.
25Kan dam a yandoka enman uram ara diboka kekebminyi ura, diboka bikwandum. Kwalina tabaryi akwe liki tabaryi kubkwandum ara Er Iya Erebdobnyi uram a erdongou talak aryi kuboka Yerusalem atei yumkuna ukuryok atei dobkwaming talak ati ebman. Ani, a talak ara sienyi Er Imtamnyi biryi wibdinyi yaci ura, erci sienyi kiboka talebkwande. Akai Yerusalem don talak ara kwalina koubne tabaryi liki yubwa 62 baryi kibkwande. Akai dam memeboka, me tomol wakoka kimnamingnyi talak ara mangkau kuna kum talak eda, mambul weik asa kun talak asi dobkwaming. 26Kwalina 62 koubne tabaryi talak sirya dakbisibci ura, akai sienyi tikeiamingnyi bira obkwaming. Anyi bira erci malyi dinyi ton kununa kum bok, anyi bisi obkwaming. Ani, Yerusalem atei nirya ab, Imtamnyi ai ab asi yuk sienyi taleanci atei nang yandoka dakabkwaming. A talak sirya dakwamaci talak ara ninyi obdankwaming ara ilila me walum-waluma dobde yanganmaci ani, yandoka siklirande to kubkwande. Ato kubdankwaming to ara Imtamnyi biryi a talak minob kiknibdeibwe. 27Liki tentok ara kwalina tabaryi kwalina a nirya ara akatei sienyi kiboka tikandinyi biryi er taleanci atei nang ati, ‘Ukubkwansin,’ en uram minob sunsi ebkatabdeibkwande. A tabaryi kwalina kibnoutumang ara a sienyi biryi dama deiboka bisam kambing domba oboka dabde yiramingnyi dinyi ara kum dandeibkwande. A talak ara yu weik dinyi nun kunubde binkwaming. A yandoka ninyi malyi kimdamingnyi nang ara sirya kobdob tum ara Er Imtamnyi biryi sunsi ikin kareboka obkwande. Ato kubkwande talak ara Imtamnyi biryi minob kiknibdeibwe,” ebmou.
Currently Selected:
Daniel Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
