Daniel Uram 8

Daniel biryi bisam domba yim ton, bisam kambing yim ton kunumna deici aryi asing eibmou deyok

8:1-27

1Sienyi si Belsyazar sienyi kiboka talebmou talak kwalina winiryi dinyi ara ni Daniel bisi kunumna kunubdeibmanou ba, asing eibmase. Minob talak ababyi, ukuboka kunumna lak kimdeiriranou to akwe a tum ababyi kunumna asing eibmase.

2Niryi kunumna deici aryi asing diranse uca, nira mutuk si Elam mutuk asi iya mikib weik atei si Susan dam bindoka tikmase. A bindoka tikmase dikum ara me si Ulai dala bindoka tikmase. 3Ni urasin ereboka dirweleranse uca, a me dala akwe asi bisam domba yim tentok tikmou asi asing eibmase. A domba kisok yang ara bitinyi beleamwe. Bok, ton yang ara cang weik loamwe uca, ton yang ara bumang toto tikamwe. Ba, cang loamwe yang ara ukuryok tikmou yang bok, cang weik loamwe. 4A bisam domba asi dinmase ba, er yang aryi kitingbantam ibde, yaletam ibde, me youkwetam ibde, me utam ibde kimou. Ato kuboka irdenmou ara yuk kamyoa aryi ersi obmanto kum kubmou. Ani, yuk kamyoa aryi ersi muna oboka binman kumto kunmouci, er tenebdobni to kuboka, erebdandoka weik kimdeirirdanmou.

5Ura, ni a tikoka dinmase uca, bisam kambing yim tentok kitingbantam aryi tukwe yan yanina kum uca, mutuk kablibkaboknin yanganmou. A kambing yim er yang ara asing dina-dina utam asi ilila yang nun tentok beleboka tikamwe. 6A kambing yim yanganmou ara domba yim kisok yang bitinyi beleamwe domba me dala a tikmou asi asing eibmase domba ati iyanganmou. Ura, a kambing yandoka yu asa aryi a domba asi ilinto obde yibanmou. 7Ato kunmou asing eibmase ura, nira a onmoua dam a tikoka dinmase. Uca, a domba asi onmou ba, iya obdeibmouci, er kisok yang bitinyi beleamwa bitinyi nirya bulakabokmou. Ba, a domba er mikib kum danmouci, erbabyi leboka obman kum kubmou. Ura, a domba asi tukwetam dobkwetebmouci, yanisitaboka obmou. A onmoua mikib ara lebdeibmanto kum kubmou. 8Ura, a kambing yim ara erebdandoka weik kimdanmou ani, weikanun mikib doramwe uca, er kisok yang weika ara bulakaboka bukmou. Ba, a kisok yang tikamwe olong ara yukto kisok yang dumbaryi beleboka tingyanmou. A kisok yang urub ara kitingbantam ton, yaletam ton, me youkwetam ton, me utam ton bisik dumbaryi nirya akaboka tikmou.

9Ura, anda yang asi tentok dinyi ara iya mitik yang belebmou. Ani, a mitik yang aryi weik dandoka a kisok yang er urub ara me youkwetam kuboka yang urub deibmou. Ani, yaletam kuboka urub deibmou. Ani, mutuk sul telebto mutuk ara Israel nang mutuk tam kuboka urub deibmou. 10A kisok yang ara weiki dandoka welebmou ani, imtam yin doun nang dam urub binmou. Ara, imtam kurya mikbaryi asi bindoka tomobkwetebmou ba, tukwetam sakoka maryuryanmai. Ura, a kambing aryi anda kurya asi yanisitabmou. 11Ura, Er Iya Erebdobnyi bisi bindoka luknubdeibwe ura, erbiramnyi asi erebdanmou. Ani, a kambing aryi Er Iya Erebdobnyi bisi malyi kiboka, Imtamnyi biti tuba-tuba dama deiriramnyi dinyi seksiniboka, Er Imtamnyi biti dama deirin ai asi malyi dinyi kubdeiboka betebsinibmou. 12Ba, Imtamnyi ai a wekmaici, Imtamnyi biti dama deirinmai bok, a bisam kambing aryi ukunmai dinyi seksiniboka akai arabdobmouci, malyito dinyi asi, “A dinyi kunuboka molobdarur,” eboka arukmou ba, malyito dinyi asi kunubmai. Ura, a nang nirya er ebmou to akwe kunubmaici, ersi milibdobmai.

13Ura, ni kekese uca, imtam ai wa in nang bitinyi uram ebdanmarei. Tonyi biryi ato ebmou, “A uki berekmaci tum ara minob sintam aryi dama deiriramingnyi dinyi ab, belekuna dama deiriramingnyi dinyi ara kum dandeibkwande. Ura, malyito dinyi-malyito dinyi kununa asi iya kibdeibci ba, kunubkwaming. Tonda, Imtamnyi ai asi daksiniboka, imtam yin doun nang ab asi malyi kiboka yanisitabkwaming. Ato kuranci ani, kwalina unabaryi bisibci ura, sirya kurbinkwande do?” ebmou. 14Ba, tubto kekeranse uca, ton imtam ai wa inanyi biryi ato ebmou, “Malyito dinyi kunuboka beterdongon li dobde baranci ani, lukunda uki-kitingtam uki yubwa 2.300 baryi li dobkwaming. Ara, uki tentok tum ara belekuna ton li dobmangnyi ani, sintam ton li donkwaming. Ato kubingnyi ura, Imtamnyi ai ara ukuryok malyi dinyi beterdongoramingnyi dinyi kum dandeiboka minob kuramnyi to kubde binkwaming,” ebmou.

15Ni Daniel bira a kunumna asing eibmase dinyi ati, “Una kubkwande to ati kunubdeibmanir do?” tenen kanya bobmase. Uca, a talak aryok ninyi sal tentok a yandoka tikmou. 16Ura, a tikmase me si Ulai dubdub aryi ninyi uram ton dobmou. Ara, ato ebmou, “Imtamnyi uram erbananyi Gabriel, anyi bisi a kunumna bikwande ati bingni dinyi karebdum!” ebmou. 17Ura, anyi bira ni tikmasa dam yangau ba, ni kanya borona kum kubmase aryi dalukoka mabmase. Uca, anyi biryi ni dam yandoka ato ebmanou, “Ninyi mi e! A kunumna kunubdeibmakir dinyi nirya ara, sirya talak kubkwande to ati kubmar ati liliboka bikdobdum!” ebmou. 18Ura, anyi biryi niti uram erkarenou talak ara ni kanya bona kum kubmasiryi, dalukoka tukwetam marbinmase. Uca, anyi biryi talerderanou uca, bukokmase ba, tubto tikeibmanou.

19Ura, erci nisi ato ebmanou, “Niryi kansi ebkwinkin, ara Imtamnyi Er yu aryi a ikin weik dinyi ukubkwande to lak kibmar. A ukubmar dinyi ara aminda sirya uki tum aryi ukubkwande to ati lak kibmar,” ebmanou. 20“Bisam domba yim ab, er kisok yang bitinyi ab asing eibmarim dinyi ara, Persia mutuk sien nang ab, Media mutuk sien nang ab ati kunubdeibmar asi asing eibmarim. 21Ba, bisam kambing yim otong yalul bisam asing eibmarim ara, Yunani sienyi biti kunubdeibmar asi asing eibmarim. Ani, a kambing yim er asing dina-dina utam beleboka tikamwe yang ara Yunani yuma sienyi minob taleamunyi biti kiklibmar. 22Uca, a beleamwe dikum sasa kotokmoci, a olong asi kisok yang dumbaryi beleboka tingyanmongwe. Ato kubmo ara a mutuk akwe sien nang dumbaryi tikwaming. Bok, minob sienyi kiboka taleandinyi mikib sasianci to kum kubkwaming to kunubmo. 23Ba, a dumbaryi sien nang aryi taleamingnyi talak ara, teleb dinyi kununa kum uca, malyi dinyi akwe kunun nang asi weik kibde baci ura, yu dukuta ilinto sienyi nun unubci ura, tola ati taktak ebsinibokwande. 24A sienyi er mikib weiknyi bok, yuma taleanci sienyi bito kumnyi nun talebkwande. Ura, anyi biryi ninyi dirminingni dinyi boyandoka ninyi nirya mambul weik dinyi ilinto mambul dobkwaming. Ani, anyi er ukurongmaci tok kununa akwe kubde binkwande. Ani, anyi biryi ninyi mikib weik nang ab, Imtamnyi uram kunuramingnyi nang ab ara obkiribkwande. 25Ura, a sienyi er uram aryok taktak eboka nonola birirdeirongnanci bok, dib kunubde binkwande. Anyi er nong erebdandoka mitikanun dakbisibingnya atikwe tulub-tulub eboka obde binkwande. Ani, yin dobci ura, weik sienyi, Iya Erebdob sienyi bibabyi mar bobkwande. Ukuranci bok, ninyi taruk aryi iboka ona kum uca, er damuka a sienyi obci ba, dibkwande. 26Belekuna aryi ninyi dama deirina babyi, sintam aryi dama deirina babyi seksinibmou asi asing eibmarim dinyi nirya ara aminda do talak aryi kunubkwande dinyi asing eibmarim. Ati, asing eibmarim dinyi nirya ara ninyi keken ai talyi nukde yibana mem,” ebmanou.

27Ni Daniel bisi ato ebdeibnou ura, akiryok ni youn dobdobse. Ba, uki ukunengkwe youn donmase. Ani, sirya nakibdobse ura, bukoka sienyi biryi wa kareanou wa daktaleboka ibde binmase. Ba, nira a kunumna asing eianse dinyi akwe tuba teneim-teneim eboka, “Una kubkwande dinyi ati kunubdeibnou ba, ni asing eibse do?” tenen kanyatam ingkirikde kuranse. Uca, ukuti kubnou tenena kum kubmase.

Currently Selected:

Daniel Uram 8: MTG

Highlight

Copy

Compare