Daniel Uram 10

Daniel bisi kunumna ton kunubdeibmou ba, asing eibmou deyok

10:1–11:1

1Sienyi si Koresh biryi sienyi kiboka mutuk si Persia mutuk taleamwe. Anyi Koresh sienyi kibmou ara kwalina winiryi kwalibmou. A talak aryi kunumna deici aryi Daniel ebok, Beltsazar ebok kimnaminyi bisi kunubdeibmouci, uram tentok ebdeibmou. A kunumna deici aryi ebdeibmou uram ara iya dib sirik ati kunubkwamwe to ebdeibmou. A kunumna ara lak kibmou ara aminda kunubkwamwe dinyi mambul weikto dobde binkwamnyi ati kunubdeibmou. Ura, Daniel bira, “A kunumna deici asing eibmanto ara una dinyi ati kubmar do?” tenen er kanya teneina bukam asa ingkiringnamwe. Uca, a kunubdeiamwe dinyi nirya liliboka bikmou.

2Ni Daniel biryi a kunumna asing eibmase talak ara minggu kukwe winiryi a nirya ara, “Se, una kubkwande ati a dinyi kunubdeibnou do?” tenen ni kanyatam teneibde buranse. 3Ukuboka atei akwe buranse talak ara to erande yina kum yiranse. Ani, kamyoa tub ab, anggur me ab ababyi ni si bambul umbura ton wengbana kum kuanou. Ani, kisok otong ababyi lelengdona kum uca, otong du moubdanou. 4Ani, ukuryok wengbinmai kwalina yuma wala tanggal 24 tum berekmou. Ura, a tum aryi ilila me si Tigris dala bindoka kunmase. 5Me dala a kunmasiryi, asing lenglengto kubnou ati, diranse uca, ninyi tentok kait aling ongobmouci, er der arikna ara emas kobdoba aryi kikniamnyi der arikna aryi arikdanmounyi bira a yandoka tikmou. 6Er nong bol kamuk ara dengna weik keil si Tarsis aryi mildang erande ato kuboka mildang enmou. Ani, er urasin milil ibarya ara bebe liming erande to kubmou. Ani, er asing ulul ara uk buk lemberengninto kunmou. Ani, er taruk ab, er yan ab ara keil si tembaga aryi mil dangnande ato kunmou. Ani, er uram ara ninyi ilinto aryi uram tili-kwali eraming to enmou asi kekebmase. 7Ninyi ilinto a wekmai ninyi ara kum eibmai. Eda, ni Daniel bikwe a dinyi asing eibmase. A dinyi asing eibkuse talak ara anda ninyi ati, ilil tenen dinyi mengebsinibokmou ba, binsekdobmai. 8Ba, ni tentok taklobmanei.

Ura, nira a tiklobmasiryi, a kunumna ilila dinyi eibmase uca, ni mikib ara kum dandobmanou. Ani, ni urasin bindobmanouci, tumakdobmanou. 9Ura, er uram eramwe kekebdongose uca, daluksakoka urasin tukwetam bindoka u lumlumukoka diblalakmase. 10Bok, er taruk aryi ni nong asi bolibmanou ba, ni kutam ab, taruk ab caknam olong ebdobmanou. 11Ura, a yandoka tikmounyi, Imtamnyi uram erbananyi biryi ato ebmanou, “Daniel, kanda Er Imtamnyi biryi kanyi deibkounyi kurum. Ati, kan yan aryi tukwe yaniboka tikminci, uram tentok kansi ebkwinkin asi kekerum. Ni a yanman ara Imtamnyi biryi bokdonokmanir ba, kan dam yanman,” ebmanou. Erci ato ebmanou ura, ni sirim asa tikmase. 12Ura, ton ato ebmanou, “Daniel, kan ilil kuna mem. Ni a yanman ara, yuma tum kunumna asing eibmoumci, ‘A dinyi liliboka biktinyi,’ tenen kan Nai Imtamnyi bisi molobmoumwe dinyi ni kekebmakise. Ati, nira a molobumwe dinyi ati lak eryuryanmakin. 13Persia mutuk kalingnung nang aryi uki 24 baryi nirya nisi mar bobmanunguryi, malyi kimanungwe. Bok, a nang kankan aryi bin tentok ni dam yanmoci, lebdobmanirnyi er si ara Mikhael biryi lebdobmanir. Ura, anyi bira Persia mutuk sien nang dam o takloboka a yanman. 14Ara, kan atei Israel nang kankan dam asi aminda sirya do talak da yukto kubde binkwande ati kansi minob eryanman. Kanci, kunumna a asing eibumwe dinyi ara sirya kobdob do talak kubde binkwande to ati, minob kansi kunumna lak kibdeibkou ba, asing eibumwe,” ebmou.

15Ba, ni a uram kekebse ura, ni uram kum dandobmanou ba, ni ngang dakdongoboka tukwe asi kisok dumubokmase. 16Uca, er damuka nun ninyi atoa aryi ni si bambul asi bolibdongobmanou. Ukuboka bolirdongoranou uca, ni si akoka uram botobmase ura, ni dam a yandoka tikmounyi bisi ato ebmase, “Nai e, a kunumna asing eiriran uca, ni diblalakman aryi ni mikib ton kum kubmanir. 17Nai, niryi kan urasin dam asi uram doboka ebman kum. Ni mikib ab, ni isin ab ton a kubmanute akwe ara uram ebkwamatinyi,” ebmase. 18Ba, ninyi atoa a yandoka tikmounyi biryi ni nong asi tubto bolirderanou akiryok ni mikib dongobdeibmanou. 19Ura, erci uram ato ebmanou, “Anyi, kanda Imtamnyi biryi kanyi deiboka boukwe kukururnyi kurum. Ati, kanci ilil kanya bona mem. Kan mangkau kuboka karyi asa kuna teleb. Mikib dongobkwankir-mikib dongobkwankir,” ebmanou. Ura, er ab uram tonkwa sisingmanoumwe akiryok mikib tubto yanou ura ato ebse, “Nai e, nisi sirya mikib karebmanirim aryi mikib yanmanir ati, uram ur ebdum,” eboka molobmase.

20-21Uca, ninyi atoa a yandoka tikmounyi biryi ato ebmanou, “Kanda, ni kan dam a yanman dinyi ara, ‘Ukuti yanmar,’ tenebmanirim do? Niryi kansi ebkwinkin ara kekerum. ‘Dib Uram Kerek Sengna,’ umbura kerek sekwe dinyi asi lak eryanmakin. Ani, do talak kuci ura, Persia mutuk kalingdur sienyi bisi ibinkun cok, kan dam yanman. Ani, tamurbindoka Persia kalingdur sienyi ab sirya obdanimnyi ura, Yunani nang sienyi iyankwamanir.

Ni tam mar bormilin nang ara da ton kum kunung. Eda, kan mutuk nang Israel nang kalingsururnyi Mikhael tentok asi ni tam kiboka mar bormilinurur,” ebmou.

Currently Selected:

Daniel Uram 10: MTG

Highlight

Copy

Compare