Daniel Uram 7

Daniel kunumna kunubdeibmouci, kamyoa yala dumbaryi asing eibmou deyok

7:1-28

1Babel mutuk asi Belsyazar sienyi kibmouci, yuma kwalina kwalibmai. A kwalina aryi Daniel lengdera deib aryi er man sokon mabmou uca, kunumna asing eibmou. Daniel er lengdera mabmaci deici aryi kunumna asing eiriamwe to kerek sengnamwe. A lengdera maramwa deyok weikto dinyi ara ato kuboka maramwe.

2Ura, Daniel biryi er lengdera deici aryi asing eiriramwe to kuboka kerek ato sekamwe, “Lukunda mabmase talak aryi dinmase uca, imtam aryi ibalya dina-dina bisik kuboka yanmouci, ublikoka ilila me kwan asi lontik-lontik ebkabokmou. 3Ba, kamyoa weika koukwe akwe a weik me kwan umbura aryi dumbaryi anabmai. A dumbaryi anabmai kamyoa ara sun nong bol kamuk yuk-yuk urasin asi anabmai. 4Yuma anabmou kamyoa bol kamuk ara yu kam singa atoanun uca, er ol ara maka bib ol atoanun kuamwe. Bok, dirongse uca, er ol ara kusakaboka im karin kengkeng erorwelebmou. Ura, a kamyoa ara taruk mururuk eboka er yan bitinyi dem kibdobmouci, ninyi atoanun danmou. Ura, a kam asi ninyi kanya er koukwe umbura dongobdeibmou ba, ninyi kanya bobmou. 5Bitinyi dinyi ara ton yuk kamyoa anabmou. A kamyoa kamuk ara bai kam si beruang atoanun anabmou. Ani, yuk kamyoa ton anabmouci, taruk mururuk eboka yan bitinyi dem yandoka tikmou. Ba, a bai kam er si bambul dam ara ya cok yok winiryi si tobmouci, er si karin-karin asi dikmou tok yandoka tikmou. Ba, ni kekese uca, uram ton doboka ato ebmai, ‘Yuk kamyoa asi oboka tub ilinto yirorum!’ ebmai. 6Ani, winiryi dinyi ara tubto diranse uca, yuk kamyoa ton anabmou. A kamyoa ara yu kam si harimau atoanun anabmou. Uca, er kum tam asi maka ol atoa dumbaryi kuamwe. Ani, er kisok ababyi kisok dumbaryi kuamwe. A keica er mikib kuboka sien kam kimna kikiman kam nun yanmou.

7Ani, tubto dumbaryi dinyi ara, a tum lukunda aryok tubto kunumna asing eibmase. Ara, a kamyoa mikib mak ara, ninyi ilil weik kun kamyoanun anabmou. A kamyoa er si ara ililanun si tikamuryi, kat weik keil besi atoanun si tikamwe. Akiryi utotoa nirya tomoboka alubnin yanganmouci, utotoa nirya tulubyaniboka yanisitabde yanganmou asi eibmase. A kamyoa ara min talak winiryi yanabyi dinyi ara dikumtoto uca, a yanmou dinyi ara ilil weik dinyi yanmou. A kamyoa ara er kisok yang takubaryi kwalekamwe. 8Ba, niryi dinmase uca, a keica er kisok yang takubaryi kwalekamwe bok, er damuka liki tentok aryi mitikto yang noutumang ton tingweleyanmou. Ba, minob tikamwe yang winiryi ara kwinibkabokmou. Ura, a ukuryok mitikto yang tingyanabwe kisok yang er asing ara ninyi asing ato kubmou. Ba, er si bambul ara wingdaboka ererdan uram akwe sisikmou.#Why. 13:1-7

9Ura, nira tuba dirongmase uca, sien nang buraming sokon bukeibdanamnyi asi ton asing eibmase. Ura, diranse uca, wis daunyi, Iya Kam Tuba Kururnyi nun asi sien nang buraming sokon bukmou asi asing eibmase. Ba, er ongon aling ara kait bol aling lumtaia kait atoanun asi ongobmou. Ba, er otong namin ara domba otong ato kuamunyi nun asi bukmou. Ba, er bun sokon ara uk buk angmou. Ani, a bukmou sokon kongkong ena ababyi uk buk lemberengmou. 10Ani, Er bukmou dikum aryi uk buk ato me anaboka yibanmou asi asing eibmase. Ani, ninyi ding yubwa dingkwaming niningmaci, Er dam wekmai asi asing eibmase. Ani, malyi dinyi lilin nang bukmaici, ninyi aryi malyi dinyi ab teleb kunuramingnyi dinyi nirya kerek sengdongorur kerek sengna lelekoka nukoka lilinmai asi asing eibmase.

11A kamyoa dumbaryi dinyi aryi er kisok yang aryi ererdanmouci, sisingmou uram ati nira tuba a dikum tikoka kekebde tingmase. Uca, a kisok yang beleamwe kamyoa ara oboka uk umbura dongobmou. 12Ani, yuk anda kamyoa kisok yang belerdaramwe kamyoa nirya ababyi obkabmouci, sun sienyi kimna mikib nirya dobdobmou. Ura, sun anda kamyoa kisok yang kum dandeibkwamwe tum sirya kiknibdeibmou. Ba, a kisok yang kamyoa kum dandeibkwamwe talak ababyi aminda berekwamwe ati kiknibdeibmou.

13A lukunda aryi kunumna kununmou dinyi tuba dinmase. Ura, ninyi atoanun duwa deici lak kibmou asi asing eibmase. Ba, ninyi atoa a yanganmounyi bira Wisinyi dam yanmou. 14Ura, Wisinyi biryi a yanmounyi bisi mikib dinyi ab, si eren dinyi ab, ibarya dinyi ab karebmouci, sienyi tikeibmou. Ba, im dangna tukwe dangna nang ab, ninyi yala yuk-yuk ab, uram yuk-yuk en nang ab er amwetam nang akwe kibsekmai. Anyi Er sienyi kiboka talebkwamwe dinyi ara kum danana kum uca, iya kubkwamwe ati sienyi tikeibmou.

15Ba, ni Daniel bira a kubmou dinyi ara ni ilil kubmanou. Ba, ni a kunumna asing eibmase dinyi aryi ni kanya ikin kiboka teneina bukam kibmanou. 16Ura, nira a buluboka wekmai ninyi kankan binmase ura, anda ukunmou dinyi asi, ‘Unati ato kunmar do?’ eboka asibmase. Ba, erci nisi, ‘Ato ati ukunmar,’ eboka ni dam lak ebmanou. Ara, ato ebmanou, 17‘Kamyoa dumbaryi ilila akwe asing eibmarim ara, sien nang dumbaryi tukwe umbura aryi anaboka sien nang kibkwaming to ati kiklibmar asi asing eibmarim. 18Ato kubingnyi sirya ura, aminda ara Imtamnyi mabwe kiamingnyi nang aryi sien nang kiboka talebkwaming ara a sienyi kiboka taleamingnyi tok asi kum danana kum kubkwande.’

19Ani, ‘A dumbaryi dinyi kamyoa ara unati kubmar do?’ eboka asibmase. Ara, ‘Ton winiryi kamyoa ara yuk-yuk kamyoa ato kum uca, nong kamuk yukto deyok aryi bikwanuna,’ tenen asibmase. Ara, a kamyoa ara ninyi ilil kimsinin kamyoa asi asing eibmase. A kamyoa er si ara kat keica besi si boamwe ani, er aluk ababyi tembaga aluk boamwe. Ba, a si ab, a aluk ab aryi utotoa nirya sici kiboka tomoboka alubde yanganmou. Ani, utotoa nirya yanisitabde yanmou asi asing eibmase. 20Ani, er kisok deici asi yang takubaryi beleamwe. Ba, yuk kisok yang ara asing ab si ab ton botoamwe. Ba, a kisok yang ara wingdaboka uram sisikoka kimna ati si botoamwe. Ato kuamwe kisok yang tingyangaramwe uca, ton winiryi yang ara mitik kibmou ba, minob kisok yang bulakoka sakmai. Aminda tingmou kisok yang ara mambul dinyi mengersinin kisok yang nun tingyanmou. 21Ura, a tingyanmou kisok yang aryi Er Imtamnyi bisi dib tenen nang asi mar bobmouci, oboka erebdobmou. 22Bok, Wisinyi a bukmounyi yanmouci, Ersi dib tenen nang asi erebdeiboka sien nang kimna kikiman nang kibdeibmou.

23Ura, minob a eterenmanounyi biryi nisi ato ebmanou, ‘A kamyoa dumbaryi dinyi anabmar ara tukwetam nirya ninyi tentok sienyi kiboka talebkwande to ati kikliboka lak kibmar. A sienyi kibdiryi, talebkwande to ara sien nang da kibde banung to kum uca, anyi sienyi kiboka talebkwande ara yukto kuboka talebdiryi, tukwetam nirya ninyi malyi kibkwande. A sienyi kibkwandanyi biryi tukwetam sien nang kimdaramingnya nirya amwetam kibdeiboka yanisitabkwande. 24Ba, kisok yang takubaryi kiklibmar ara, aminda sien nang takubaryi tukwetam aryi anaboka sien nang kibkwaming to kubmar. A nang aryi sien nang kiamingnyi kum daci ura, ninyi tentok yandoka sienyi kibkwande. Anyi biryi minob sienyi kibdanamingnyi nang kuramingnyi to kum uca, er yukto kiboka talebkwande. Ba, minob sien nang kiamingnyi nang winiryi ara dobkwetebkwande. 25A ukuryok sienyi kiboka talebkwandanyi biryi sisikwande uram ara Er Iya Erebdobnyi biryi erande uram dong aniboka yuk tam bisik uram akwe sisikwande. Ani, Er Iya Erebdobnyi mabwe kiamingnyi nang asi ikin wa kareboka, durukoka oranci ba, mambul asa kubkwaming. Ani, tonda anyi biryi Er Iya Erebdobnyi biryi, “Ato kubdarur-ato kubdarur,” eanci uram ab talak sirya kiknibdeianci uki ab asi dakweteboka yukto kibde binkwande. Ani, a talak kuramingnyi nang asi anyi taruk dam kuramingnyi ara kwalina tentok bisibkwande, ton bitinyi bisibkwande, ton winiryi bisibkwande, dumbaryi dinyi ara mabterberekingnyi bok asi a mambul dinyi kum dankwande. 26Ura, malyi dinyi lilin nang aryi weik sokon dam bukingnyi ura, a sienyi iranci wa doboka kum dandeibkwaming. 27Ato kubingnyi ura, Er Imtamnyi Iya Erebdobnyi biryi Er mabwe kiamingnyi nang asi sien nang kimni mikib karebci ba, tukwetam nirya a nang aryi sien nang kiboka talebkwaming. A nang aryi sien nang kiboka talebkwaming ara yuk nang ununa kum kubkwaming. Ba, sun kalingnamingnyi ninyi nirya aryi a sien nang ebingnyi tok kunubde binkwaming,’ ebmanou.

28A ebmou uram ara sirya nukmasin. Ni Daniel bira ni kanyitam teneina bukam asa kuranse aryi ni urasin ara bindanou. Bok, a dinyi tuba ni kisok dam tuba boanse.”

Currently Selected:

Daniel Uram 7: MTG

Highlight

Copy

Compare