Daniel Uram 6

Daniel bisi keil siling um, yu kam si singa ai dongobmai deyok

6:1-29

1Ura, a talak aryi Belsyazar sirya obmai ba, dibmou. Ura, Media mutuknyi si Darius unuboka a mutuk sienyi kibmou. Darius er deiamnyi talak aryi kubde yangaramwe kwalina ara, kwalina 62 baryi kwalibmou cok sienyi kibmou. 2Ura, sienyi si Darius biryi er amwetam sien nang gubernur nang kiboka talebkwamnyi ati, ninyi yubwa 120 baryi wiboka tikeibnin yibinmou. Ura, a mutuk atei nirya sien nang buknin yibinmai. 3Ura, sal winiryi boyandoka a amwetam sien nang gubernur nang kalingkwamnyi ati, erebdob wa kareboka tikeibmou. A tikeibmou nang ara Daniel ab, sal bitinyi ab tikeibmou. Ba, a winiryi nang wa ara, a mutuk atei yuk-yuk sien nang kibmai nang asi kalingkwamnyi ati wa kareboka tikeibmou. Ba, a mutuk weik sienyi er kanya, “Nebneb ena kum asa mangkau kubkwan,” tenen ati a nang tikeibmou. 4Ura, Daniel bira ereboka weikto wa dobmouci, wa iramwe. Ba, Imtamnyi Kanya ersi likniramwe. Ato kuramwe deyok aryi yuk-yuk sien nang ara amwetam kiboka Daniel bisi ereramwe. Ura, a mutuk weik sienyi biryi Daniel bisi si erebdob wa kareboka tikeibmou. Ba, yuk sien nang ara er amwetam kibmai.

5Ba, a mutuk sien nang ab sun wa in nang ab aryi, “Anyi Daniel bira unati erebdob wa karebwe do?” eboka uram sisikmai. Ani, “Anyi dobkwetebkwayeb,” tenen, “Malyi dinyi kunubmar,” eboka dobkwetebmanto dinyi ati ingkiringnamnyi uca, ton eirina kum kuramnyi. 6Ura, akatei weik sien nang ab, outam weik sien nang ab aryi ato eboka sisikmai, “Daniel biryi malyi dinyi kuna ingkiringnub. Ucab, malyi dinyi kununa nun ton asing eirina kum kubmab. Eda, Er Nai Imtamnyi bisi molona dem asi asing eirinub!” ebdanmai.

7Ura, akatei weik sienyi amwetam bun nang gubernur nang ab, akatei gubernur kalingnandei sien nang bitinyi ab nirya anaboka sienyi dam binmai. Ura, bindoka ato ebmai, “Yo, sienyi Darius, kan sienyi kiboka talebumwe ara iya talebkwandim! 8Nai, kanci a mutuk sienyi kiboka talebumwe dam kan amwetam sien nang kiboka wa inub nang nirya uram sisikmabci, ato ebmab. ‘A mutuk sienyi biryi dangbisina mem eboka uram minob bisik sekdur. Ara, unanyi biryi a talak uki 30 baryi kubkwamab talak nirya uki aryi, “Yuk kwemdeina molona mem. Eda, ni a mutuk sienyi bisi moloboka si erebnindarur,” eboka sekweteaminyi dinyi asi dakbisiboka, yuk nang kum, yuk kwemdeina kum asi molonmaci ura, anyi bisi tabwe deboka yu kam singa marande keil siling um dongobkwayeb. 9Ati, nai sienyi, “Yuk nang ab, yuk kwemdeina ab asi molona mem. Ato kuboka yuk kwemdeina molobmarinyi bira yu kam marande ai dam keil siling um dongobkwayeb,” eboka kerek sekeibdum. Ba, a kerek sengna ara Persia mutuk nang ab, Media mutuk nang aryi a uram ara kilibkaboka kum danardeirina mem dinyi kimnung to kibdeibdum,’ ebmab,” ebmai. 10Ura, a sienyi Darius biryi sun ebmai to kunuboka a kerek sekeibmou.

11Ura, a mutuk sienyi biryi ato kubmou dinyi Daniel kekebmou ura, Daniel anaboka er ai bindobmou. Daniel er ai im dub ai ara Yerusalem tam kuboka ara bisik botona kikniboka botobdeiamnyi dikum asi bindoka Er Imtamnyi bisi kutam sunsunubdeiboka moloramwe to bindoka molonmou. 12Asi, Daniel ersi mar iramnyi nang aryi Daniel bira Imtamnyi molonmou asi bikmai. Ura, a nang ara Daniel Imtamnyi molonmoua dam wengbindoka asing eibmai.

13Ura, a uram boboka a mutuk weik sienyi dam asi ebde binmai. A dinyi weik sienyi dam erbinmai ara Daniel bisi ikin kareboka wenebkwamai ati erbinmai. A nang aryi akatei sienyi dam asi bindoka ato ebmai, “Nai sienyi, kanci ato ebumwe, ‘Yuk kwemdeina kum, yuk ninyi sirik kum asi molona mem. Eda, ni a mutuk sienyi bisi moloboka si erebnindarur. Unanyi biryi uki 30 baryi er kwemdeina molonmaci ura, anyi bisi yu kam singa ai keil siling um dongobkwayeb,’ eboka sekwetebumwe. Bok, a dinyi asi Daniel biryi dakbisibmarci, er Molorurnyi, Er Imtamnyi bisi molonmar,” ebmai. Uca, a mutuk weik sienyi biryi ato ebmou, “Niryi, Persia mutuk ab, Media mutuk ab ara, ‘Ukubkwayeb,’ eboka uram sekwetebse dinyi ara kilibkaboka yan yanibmanto dinyi kuma,” ebmou. 14Uca, a uram ebde binmai nang aryi a sienyi bisi ato ebmai, “Daniel bira, kanci, ‘Mem,’ ebumwe uram yan yanibmarci, er kwemdeina molonmar. Anyi bira Yehuda yalanyi bok, nun mutuk dam a tingyauci kururnyi biryi uki tentok ara liki winiryi Imtamnyi bisi molorur,” ebmai. 15Ba, a mutuk weik sienyi a uram kekebmouci, er kanyi, “Se,” tenen kanyi bobmouci, kanyi teneina bukam kubmou. Ara, “Una kubnyi uca, Daniel ona kum kubkwaming do?” tenen bisik ingkiringmou. Ani, kiting sirya wekmou talak ababyi Daniel lemdeirin bisik ingkiringmou.

16Uca, “Daniel bira ukunmar,” ebde yanmai nang a sienyi dam buluryanmai. Ura, sienyi bisi ato ebmai, “Persia mutuk ab, Media mutuk ab ara sienyi biryi, ‘Ukubde bankwayeb,’ eboka uram sekweteanci dinyi ara kilirkarongna babyi, dorkarongna ababyi ara ukubmanto kum,” ebmai. 17Ura, sienyi biryi, “Daniel taleboka yu kam singa marande keil siling umbura dongorbindarur,” eboka arukmou. Ba, Daniel taleboka keil siling umbura dongorbinmai. Ura, a mutuk sienyi biryi Daniel bisi ato ebmou, “Kan kanyi busul asa aryi kan kwemdeina moloramoumwe dinyi aryi lebdobkwankir kum?” ebmou. 18Ura, Daniel dongobmai keil siling bisik bublan ara ilila keil ila aryi kamuboka bublan tirikdongobmai. Ura, “Daniel bira yukto da kubingnyei,” tenebmaici, a mutuk sienyi ab, er amwetam sien nang ab aryi sun taruk du dongoramnyi keica aryi dangdeina deibmai. 19Ura, a mutuk sienyi Darius bira er sienyi kiboka taleamwe ai dam binmouci, a lukunda nirya yina si teboka bunmou. A sienyi yina si teboka bukmou ai ara bindoka mot seboka nenerdeirin nerabwe kum sal kum ababyi wengbana kum. Ani, a lukunda nirya ara wi mana kum kubmou tok asi berekmou.

20Belekuna kobdob kiting tingyangau ura, sienyi Darius anabdobmou. Ura, er kanyi wisirona kum uca, lukdandoka banmou ani, Daniel keil siling um dongobmaici, keil bublan tirikdongobmai dam binmou. 21Sirya a keil siling um bublan dam tingbinmou ura, er kanyatam aryi, “Talya aryi yu kam oyibmar do?” tenen nebneb en kanya bobmouci, Daniel bisi ato ebmou, “Daniel, Er Imtamnyi Iya Kam Kururnyi mi o! Kan nai Imtamnyi bisi tuba-tuba si ereboka molorumnyi biryi yu kam singa kankan aryi lebdeibmakir do?” eboka asibmou. 22Uca, Daniel biryi a sienyi bisi ato ebmou, “Yo, nai sienyi, kanda iya kam kubkwandim! 23Nira, ni Nai Imtamnyi biryi er dam wa in nang bokeibmar ba, ni dam yandoka kalikmaning. Kalikmaningci, yu kam singa yabwe si asi darubtalebmang ba, nisi obde yina kum kubmaning. Ato kuboka yu kam singa aryi nisi obde yina kum kubmaning ara, niryi Imtamnyi urasin dam ab, kan urasin dam ab aryi malyi dinyi ton kununa kum kubse bok, a dongobmanurum deyok aryi ato kubmanir,” ebmou. 24Ba, a sienyi er kanya nebneb enmou ara darabmouci, er kanyi kilkil kubmou. Ura, a sienyi biryi, “Daniel tabwe dobkweteboka libdarur!” eboka arukmou. Ba, tabwe dobkweteboka libmaici, er nong bol dirkaningderamnyi uca, er nong bol nirya mitik dilaka ababyi ton sangna kum kubmou. Ara, Daniel biryi er Nai Imtamnyi bisi iya dib teneramwe deyok aryi yu kam yabwe singa aryi obde yina kum kubmai. 25Ura, a sienyi biryi Daniel bisi durukoka, ina ngilikoka kimai nang asi, “Taleboka boyandarur,” eboka arukmou. Ura, a nang asi taleboka boyanmai ba, a nang ab, sun nerabwe ab, sun nermabwe mabwe ab nirya yu kam singa kankan a keil siling akwe dongobmai. Ba, a ninyi nirya keil siling um a dorkwetei aryok, tukwetam marbana kum uca, yu kam singa mer aryi ce tong eboka dobdobmaici, sun tub nirya kwilikoka yibsekdobmai. Ani, yok ababyi nirya tangtang eboka yibmaici, yanisitaboka sungwe ebdeibmai.

26Ato kubmou asi a mutuk sienyi Darius asing eibmou ura, “Daniel molorur Imtamnyi bira dib kurur,” tenebmou. Ura, a sienyi Darius biryi a talak kuramnyi mutuk im dangna tukwe dangna nang ab,#6:26 A talak kuramnyi im dangna tukwe dangna mutuk ara Babel mutuk nirya asi, Media mutuk ab Persia mutuk ab kuramnyi nang asi Darius biryi kerek sekeibmou. uram yuk-yuk eramnyi nang ab, yala yuk-yuk da kuramnyi nang ab ati kerek sekoka deibmou. Ara, ato eboka kerek sekeibmou,

“Sun kisal dangna dinyi dorona teleb!

27Niryi sunsi ebkwinsin ara ni sienyi kiboka a talebsise mutuk nang nirya ati ebkwinsin.

Ara, sunci Daniel biryi si weik eboka Molorurnyi bisi ilil kuboka sirim talena teleb.

Daniel si weik eboka Molorurnyi bira Iya Kam Kururnyi kurur ati ebman.

Ani, aminda sirya kobdob tum ababyi, Erci sienyi kiboka talebde binanci tok iya kubkwande.

Erci, mikib yaboka taleanci dinyi ara iya sasibkwande.

28Er Imtamnyi bira ninyi lobdeiboka lemdeirinanyi kurur.

Erci, imtam babyi, tukwetam babyi ilil tenen dinyi kiknirurnyi kurur.

A deyok aryi Er Imtamnyi biryi Daniel bisi yu kam singa kankan aryi lebdeibmar,” eboka kerek sekeibmou.

29Ura, Darius sienyi kiboka a mutuk taleamwe talak ab, Persia mutuk sienyi si Koresh sienyi kiamwe talak ab aryi Daniel bisi erebdob sokon kareamwe ba, erebdobnyi kiamwe.

Currently Selected:

Daniel Uram 6: MTG

Highlight

Copy

Compare